1, 2. Mantang nag-uuswag kita sa espirituwal, ano an manunudan niyato? Iilustrar.

SARONG sadit na aki an tinawan nin regalo. “O Noy, magpasalamat ka na,” an sabi kan saiyang mga magurang. Nagsunod an aki asin awtomatikong nagpasalamat. Mantang nagdadakula siya, lalo niyang nasasabutan an kaisipan kan saiyang mga magurang asin mas napapahalagahan an kabuutan kan iba. Ngunyan, mas listo asin gikan sa buot na siyang nagpapasalamat. Taano? Huling an pagpasalamat nagin parte na kan saiya mismong kaisipan.

² Kaagid kaiyan, kan inot niyatong maaraman an katotoohan, nanudan niyato an kahalagahan kan pagsunod sa panginot na mga kahagadan ni Jehova. Alagad mantang nag-uuswag kita sa espirituwal, mas nanunudan niyato an mapadapit sa kaisipan ni Jehova—an mga gusto asin habo niya, saka an pagmansay niya mapadapit sa manlain-lain na bagay. Kun manunudan niyatong mag-isip nin siring asin kun tutugutan niyatong giyahan kan kaisipan na iyan an satong paggawi asin mga desisyon, ipinapahiling niyato na inaarog ta an kaisipan ni Jehova.

3. Taano ta puwedeng magin dipisil an pag-arog sa kaisipan ni Jehova?

³ Nakakaugmang marhay an pag-arog sa kaisipan ni Jehova, pero puwede man magin dipisil iyan. Kun beses, puwedeng makaulang  sa sato an kaisipan niyatong bakong perpekto. Halimbawa, tibaad nadidipisilan kitang sabuton an pagmansay ni Jehova dapit sa kalinigan sa moral, materyalismo, paghuhulit, salang paggamit nin dugo, o iba pa. Ano an puwede niyatong gibuhon? Paano niyato padagos na maaarog an kaisipan nin Diyos? Asin ano an dapat na magin epekto kaiyan sa mga desisyon niyato ngunyan asin sa maabot?

4. Ano an kalabot sa pagsunod sa sinabi ni Pablo na ‘baguhon an satong isip’?

⁴ Basahon an Roma 12:2. Ipinapaliwanag digdi ni apostol Pablo kun ano an kalabot sa pag-arog sa kaisipan ni Jehova. Tinabangan kita kan nainot na artikulo na masabutan na tangani na ‘dai na kita magpamolde sa sistemang ini nin mga bagay,’ dapat niyatong sayumahan an kaisipan asin sabuot kan kinaban. Pero sinabi man ni Pablo na kaipuhan niyatong ‘baguhon an satong isip.’ Kalabot diyan an pag-adal kan Tataramon nin Diyos sa katuyuhan na masabutan an saiyang kaisipan, hurop-hurupon iyan, asin iuyon an satong kaisipan sa kaisipan nin Diyos.

5. Ipaliwanag an pagkakalain kan basta pagbasa asin kan pag-adal.

⁵ An pag-adal bako sana basta pagbasa asin pagmarka kan mga simbag sa mga hapot para sa pag-adal. Pag nag-aadal kita, pinag-iisipan niyato an sinasabi kan satong pinag-aadalan dapit ki Jehova, asin sa saiyang mga dalan saka kaisipan. Hinihinguwa niyatong masabutan kun taano ta ipinagbubuot nin Diyos an sarong bagay asin kun taano ta kinokondenar niya an iba. Pinag-iisipan man niyato kun ano an mga kaipuhan niyatong baguhon sa satong buhay asin kaisipan. Tibaad dai man niyato matatawan nin atensiyon an gabos na aspektong iyan sa kada sesyon nin pag-adal, pero makikinabang kita kun matao kita nin panahon—tibaad kabanga kan kada pag-adal ta—para hurop-hurupon an binabasa niyato.—Sal. 119:97; 1 Tim. 4:15.

6. Ano an nangyayari pag hinuhurop-hurop niyato an kaisipan ni Jehova?

⁶ Mantang regular niyatong hinuhurop-hurop an Tataramon nin Diyos, may pambihirang bagay na nangyayari. ‘Napapatunayan niyato sa satong sadiri,’ iyo, nakukumbinsir kita na perpekto an kaisipan ni Jehova sa mga bagay-bagay. Nahihiling na niyato an mga bagay-bagay kapareho kan pagmansay niya asin narerealisar ta na tama iyan. ‘Nababago’ an satong pag-iisip asin iba na kita kun mag-isip. Luway-luway na niyatong naaarog an kaisipan ni Jehova.

7, 8. (a) Ano an pagmansay ni Jehova sa materyal na mga bagay? (Hilingon an mga ritrato sa kapinunan kan artikulo.) (b) Kun aarugon niyato an saiyang pagmansay, ano an pirming magigin priyoridad niyato?

⁷ An satong pag-iisip may epekto bako sana sa pagmansay niyato sa mga bagay-bagay kundi pati man sa satong paggawi. (Mar. 7:21-23; Sant. 2:17) Tanganing mas masabutan iyan, pag-ulayan niyato an pirang halimbawa. Malinaw na ipinaparisa kan Ebanghelyo an kaisipan ni Jehova mapadapit sa materyal na mga bagay. An Diyos mismo an nagpili kan mga tawong magurang na mapadakula sa saiyang Aki—sarong mag-agom na simple sana an pagbuhay. (Lev. 12:8; Luc. 2:24) Kan mamundag si Jesus, “ihinigda [siya ni Maria] sa sarong bahugan, huli ta dai na sindang makuang bakanteng dagusan.” (Luc. 2:7) Kun ginusto sana ni Jehova, dakulon kutang paagi tanganing matawan niya nin mas komportableng lugar na mamumundagan kan saiyang Aki. Alagad para sa Saiya, an importante iyo an espirituwal na kamugtakan na diyan madakula si Jesus.

⁸ Sa pagkasaysay na ini kan Bibliya mapadapit sa pagkamundag ni Jesus, masasabutan niyato an pagmansay ni Jehova sa materyal na mga bagay. May mga magurang na nag-iinsistir na an pinakamarahay na itao sa mga aki ninda iyo an materyal na mga bagay, dawa ngani naisasapeligro an espirituwalidad kan mga aki. Alagad malinaw  na an espirituwal na mga bagay an pinakamahalaga para ki Jehova. Arog daw ki Jehova an pagmansay mo? Ano an ipinapahiling kan saimong paggawi?—Basahon an Hebreo 13:5.

9, 10. Paano ta maipapahiling na kapareho kan ki Jehova an pagmansay niyato dapit sa pagigin dahilan na magluya o mawara an pagtubod kan iba?

⁹ An saro pang halimbawa iyo an pagmansay ni Jehova sa saro na nagigin dahilan na magluya o mawara an pagtubod kan iba. Sinabi ni Jesus: “An siisay man na nagigin dahilan na mawara an pagtubod kan saro sa mga tawong arog sa sadit na mga aki, mas marahay pang sabitan sa saiyang liog nin gapong gilingan na pig-iitok nin sarong asno asin iapon siya sa katahawan nin dagat.” (Mar. 9:42) Mapuwersa nanggad na mga tataramon iyan! Huling perpektong ipinahiling ni Jesus an mga kuwalidad kan saiyang Ama, makakasiyerto kita na arog man kaiyan an pagmansay ni Jehova sa siisay man na mayong pakiaram kun an saiyang paggawi makapaluya o makawara kan pagtubod kan sarong parasunod ni Jesus.—Juan 14:9.

¹⁰ An pagmansay daw niyato kapareho kan ki Jehova asin ki Jesus? Isinapuso ta na daw iyan? Ano an ipinapahiling kan satong paggawi? Ipamugtak na gusto niyato an sarong istilo nin pagbado o pag-ayos sa sadiri na posibleng makairitar sa nagkapira sa kongregasyon o makapukaw sa seksuwal na mga pagmawot kan iba. Mangingibabaw daw an satong mamumuton na pagmakulog sa satong mga kapagtubod kisa sa satong personal na kagustuhan?—1 Tim. 2:9, 10.

11, 12. Paano makakatabang sa sato an pag-arog sa pagmansay nin Diyos sa karatan saka an pagpupugol sa sadiri na makalikay sa salang mga gibo?

¹¹ An ikatulong halimbawa iyo na ikinakaungis ni Jehova an pagkabakong matanos. (Isa. 61:8) Minsan ngani aram niya na igwa kita nin salang mga tendensiya huli sa minanang pagkabakong perpekto, sinasadol niya kita na ikaungis man an pagkabakong matanos. (Basahon an Salmo 97:10.) An paghurop-hurop kun taano ta ikinakaungis ni Jehova an karatan makakatabang sa sato na maarog an pagmansay niya, na mas nakakapakusog sa sato na likayan an salang mga gibo.

¹² An pag-arog sa pagmansay ni Jehova sa pagkabakong matanos makakatabang man sa sato na maaraman kun an partikular na mga gibo sala, maski ngani dai iyan espesipikong sinasambit sa Tataramon nin Diyos. Halimbawa, an lap dancing sarong malaswang paggawi na nagigin komun na sa kinaban. Idinadahilan kan nagkapira na an siring na paggawi bako man talagang pakikipag-sex. * Alagad ipinapahiling daw kan siring na paggawi an kaisipan nin Diyos, na nauungis sa gabos na klase nin karatan? Rayuan niyato an salang mga gibo paagi sa pagpakusog kan satong pagpupugol sa sadiri asin pagkaungis sa mga bagay na ikinakaungis ni Jehova.—Roma 12:9.

13. Taano ta kaipuhan na niyatong pag-isipan ngunyan an pagmansay ni Jehova sa mga bagay-bagay tanganing makagibo nin madunong na mga desisyon pag-abot nin panahon?

¹³ Pag nag-aadal, marahay na pag-isipan ta kun ano an pagmansay ni Jehova sa mga sitwasyon na posibleng mapaatubang sa sato pag-abot nin panahon. Paagi kaiyan, mapaatubang man kita sa mga sitwasyon na nangangaipo tulos nin desisyon, andam asin aram na niyato an gigibuhon. (Tal. 22:3) Pag-ulayan niyato an pirang halimbawa sa Bibliya.

14. Ano an manunudan niyato sa pagsayuma ni Jose sa agom ni Potifar?

¹⁴ Paagi sa tulos-tulos na pagsayuma sa mga pang-aakit kan agom ni Potifar, ipinahiling ni Jose na patiinot na niyang pinag-isipan  an pagmansay ni Jehova dapit sa kaimbudan sa agom. (Basahon an Genesis 39:8, 9.) Dugang pa, an simbag niya sa agom ni Potifar na ‘Taano ta gigibuhon ko an [grabeng] karatan na ini, asin magkasala sa Diyos?’ nagpaparisa na bago pa kaiyan isinapuso na niya an pagmansay nin Diyos. Kumusta kita? Ipamugtak na nagpuon na makipag-flirt sa sato an saro niyatong katrabaho. O paano kun pinadarahan kita nin malaswa asin bulgar na mensahe o ritrato sa satong cellphone? * Mas madali nanggad na makapanindugan kun patiinot ta nang inaram asin inarog an pagmansay ni Jehova sa siring na mga bagay asin nagdesisyon na kita kun ano an gigibuhon.

15. Arog kan tulong Hebreo, paano niyato malalabanan an panggigipit na ikompromiso an satong kaimbudan ki Jehova?

¹⁵ Hilingon niyato an halimbawa kan tulong Hebreo na midbid sa apod na Sadrac, Mesac, asin Abednego. An marigon nindang pagsayuma na sambahon an imahen na bulawan na ipinagibo ni Hading Nabucodonosor asin an direkta nindang simbag sa hadi nagpapahiling na patiinot na nindang pinag-isipan kun ano an kaipuhan tanganing magdanay na maimbod ki Jehova. (Ex. 20:4, 5; Dan. 3:4-6, 12, 16-18) Ipamugtak na sinabihan ka kan boss mo na magkontribwir para sa sarong selebrasyon na konektado sa palsong relihiyon. Ano an gigibuhon mo? Imbes na halaton na sanang mapaatubang ka sa arog kaining mga sitwasyon, marahay na pag-isipan mo na ngunyan kun ano an kaisipan ni Jehova sa mga bagay na iyan. Dangan, kun yaon ka na sa sitwasyon na iyan, magigin mas pasil nang gibuhon asin sabihon an tama, arog kan ginibo kan tulong Hebreo.

16. Paano makakatabang sa sato an malinaw na pakasabot sa kaisipan ni Jehova para makaandam sa medikal na emerhensiya?

¹⁶ Kun magkaigwa nin medikal na emerhensiya, makakatabang man sa sato na magdanay na maimbod an patiinot na pagkonsiderar sa kaisipan ni Jehova. Talagang linilikayan niyato an pagpasalin nin dugo o kan arin man sa apat na panginot na elemento kaiyan, pero may nagkapirang paagi nin pagbulong na kalabot an dugo na diyan kaipuhan an personal na pagdedesisyon basado sa mga prinsipyo sa Bibliya na nagpapahiling kan kaisipan ni Jehova. (Gibo 15:28, 29) An pagdedesisyon dapit sa siring na mga bagay bako nanggad marahay na gibuhon pag nasa ospital na, huling sa panahon na iyan posibleng nakakamati kita nin kulog o tibaad hagadon sa sato na gumibo  nin daralian na desisyon. Ngunyan na an panahon na mag-research, gumibo nin legal na dokumento sa pagpabulong na diyan nakalaag an mga kagustuhan mo, asin na makipag-ulay sa saimong doktor. *

17-19. Taano ta mahalaga na aramon asin arugon na niyato ngunyan an pagmansay ni Jehova sa mga bagay-bagay? Magtao nin sarong sitwasyon na kaipuhan na pag-andaman niyato.

¹⁷ Panghuri, pag-isipan an isinimbag tulos ni Jesus sa salang suhestiyon ni Pedro na, “Mahirak ka sa sadiri mo, Kagurangnan.” Maririsa na patiinot nang pinag-isipan na marhay ni Jesus an dapit sa kabutan nin Diyos para sa saiya asin an mga propesiya sa Kasuratan mapadapit sa saiyang buhay asin kagadanan sa daga. Napakusog kan kaaraman na ini an saiyang desisyon na magdanay na maimbod asin mapagsakripisyo.—Basahon an Mateo 16:21-23.

¹⁸ Sa satong panahon, buot nin Diyos na an mga lingkod niya magin dayupot sa saiya asin lubos na makikabtang sa saiyang gibuhon sagkod na posible. (Mat. 6:33; 28:19, 20; Sant. 4:8) Arog sa nangyari ki Jesus, tibaad purbaran kan mga tawong may marahay man na intensiyon na disganaron kitang gibuhon iyan. Halimbawa, paano kun alukan ka nin mas halangkaw na posisyon na may mas halangkaw na suweldo, pero kun aakuon mo makakaapektar iyan sa saimong espirituwal na mga aktibidad? O kun saro kang estudyante, paano kun alukan ka nin dagdag na edukasyon pero maistar ka harayo sa saindong pamilya? Sa pagkakataon na iyan, ma-research ka pa daw na may pagpamibi, makonsulta sa saimong pamilya asin sa mga elder tanganing makadesisyon? Taano ta dai mo na ngunyan aramon asin arugon an kaisipan ni Jehova dapit sa mga bagay na iyan? Paagi kaiyan, kun mapaatubang ka sa siring na sitwasyon, posibleng marhay na dai na ngani iyan magigin sugot para sa saimo. Huling igwa ka na nin espirituwal na mga pasuhan, bilog na an desisyon mo, asin kaipuhan mo na sanang isagibo iyan.

¹⁹ Posibleng may naiisip ka pang ibang mga sitwasyon na puwedeng bigla na lang mapaatubang sa saimo. Siyempre, dai ta man mapag-aandaman an gabos na posibleng mangyari. Alagad kun huhurop-hurupon niyato an kaisipan ni Jehova sa satong personal na pag-adal, posibleng marhay na magigirumduman ta an napag-adalan ta asin maiaaplikar iyan sa partikular na sitwasyon na inaatubang ta. Kaya lugod na isaisip niyato na kaipuhan tang aramon an kaisipan ni Jehova sa mga bagay-bagay, arugon iyan, asin pag-isipan kun ano an puwedeng magin epekto sa satong mga desisyon kan pag-arog sa kaisipan nin Diyos.

20, 21. (a) Taano ta ikakaugma niyato an pagkaigwa nin relatibong katalingkasan sa bagong kinaban? (b) Paano niyato makakamtan maski paano an kaugmahan na iyan ngunyan?

²⁰ Gustong-gusto na niyatong mag-abot an bagong kinaban. Kadaklan sa sato hinahalat-halat na an buhay na mayong katapusan sa paraisong daga. Sa pamamahala kan Kahadian, mawawara na an gabos na kamunduan na naeeksperyensiyahan ta sa sistemang ini nin mga bagay. Siyempre, maski sa panahon na iyan, padagos na may libertad na magdesisyon an mga tawo. An lambang saro magibo nin mga desisyon sigun sa mga kagustuhan asin kamawutan ninda.

²¹ Siyempre, an katalingkasan na iyan bako absoluto. Kun dapit sa pagdeterminar kun ano an tama asin sala, an mga mahuyo gigiyahan kan mga pagbuot asin kaisipan ni Jehova. An paggibo kaini nakakaugma nanggad, asin maresulta iyan sa dakulang kagaya-gayahan asin abundang katuninungan. (Sal. 37:11) Miyentras tanto, dawa ngunyan makakamati kita nin kaugmahan mantang inaarog ta an kaisipan ni Jehova.