1-2. (a) Ano an nakakatabang sa sato na makatagal sa kada aldaw? Ipaliwanag. (b) Ano an pag-uulayan niyato sa artikulong ini?

“PAG iniisip ko an problemang inagihan ko, aram kong dai ko iyan maaatubang kun ako sana.” Nakapagsabi ka na man daw nin arog kaiyan? An dakul sa sato iyo na. Tibaad nasabi mo iyan pagkatapos mong isip-isipon kun paano mo nakayanan an sarong malalang hilang o an pagkagadan nin sarong mahal sa buhay. Mantang ginigirumdom iyan, namamatian mong nakaya mong makatagal sa kada aldaw dahil sana ta tinawan ka kan banal na espiritu ni Jehova nin “puwersa na urog kisa sa ordinaryo.”—2 Cor. 4:7-9.

² Kaipuhan ta man an banal na espiritu para tabangan kitang labanan an impluwensiya kan maraot na kinaban na ini. (1 Juan 5:19) Saka kaipuhan ta nin kusog para labanan an “maraot na mga puwersang espiritu.” (Efe. 6:12) Para makayanan an mga problemang ini, pag-uulayan niyato an duwang paagi na tinatabangan kita kan banal na espiritu. Dangan pag-uulayan ta kun ano an puwede niyatong gibuhon tanganing lubos na makinabang sa banal na espiritu.

3. Ano an sarong paagi na tinatabangan kita ni Jehova na matagalan an mga kadipisilan?

³ Tinatabangan kita kan banal na espiritu ni Jehova paagi sa pagtao sa sato kan kusog, o puwersa, para magibo niyato an satong mga responsabilidad sa ibong nin mga problema. Namatian ni apostol Pablo na nagibo niyang padagos na makapaglingkod sa ibong kan saiyang mga problema huling nagtiwala siya sa “kapangyarihan kan Cristo.” (2 Cor. 12:9) Durante kan saiyang ikaduwang pagbiyahe bilang misyonero, dai lang nagmaigot sa paghuhulit si Pablo kundi sinuportaran niya man sa pinansiyal an saiyang sadiri. Nagdagos siya sa Corinto sa harong ni Aquila asin Priscila na mga paragibo nin tolda. Huling tatao man kaiyan si Pablo, nagtrabaho siya nin part-time kaiba ninda. (Gibo 18:1-4) An banal na espiritu tinawan si Pablo nin kusog tanganing magtrabaho para masuportaran an sadiri asin tanganing maisagibo an saiyang ministeryo.

4. Sigun sa 2 Corinto 12:7b-9, nagkaigwa nin anong problema si Pablo?

 ⁴ Basahon an 2 Corinto 12:7b-9. Sa tekstong ini, ano an buot sabihon ni Pablo kan sabihon niya na may pinaglalabanan siyang “tunok sa laman”? Kun may nakatusok saimong tunok, makulugon iyan. Kaya an sinasabi ni Pablo iyo na may naeeksperyensiyahan siya kaidtong sarong klase nin makulog na personal na problema. Inapod niya an problemang ini na “sarong anghel ni Satanas” na padagos siyang ‘sinasampaling’ (‘hinahampak,’ nota sa ibaba). Posibleng dai man direktang si Satanas o an saiyang mga demonyong anghel an dahilan kan mga problema ni Pablo, na garo tinutusok ninda nin tunok an saiyang laman. Alagad kan marisa kan maraot na mga espiritung iyan an “tunok,” posibleng gustong-gusto nindang itusok pa iyan nin mas hararom, sabi ngani, tanganing mas makulgan si Pablo. Ano an ginibo ni Pablo?

5. Paano sinimbag ni Jehova an mga pamibi ni Pablo?

⁵ Kan primero, gusto ni Pablo na halion sa saiya an “tunok.” Inadmitir niya: “Tulong beses akong nakimahirak sa Kagurangnan [na Jehova] na mahali na ini sa sakuya.” Pero, sa ibong kan mga pamibi ni Pablo, yaon pa man giraray an tunok sa laman. Nangangahulugan daw ini na dai sinimbag ni Jehova an mga pamibi ni Pablo? Dai nanggad. Sinimbag niya an mga iyan. Dai hinali ni Jehova an problema, pero tinawan niya si Pablo kan kusog para matagalan iyan. Sinabi ni Jehova: “Paagi sa kaluyahan mas lubos na nahihiling an sakuyang kapangyarihan.” (2 Cor. 12:8, 9) Asin sa tabang nin Diyos, napagdanay ni Pablo an saiyang kaugmahan asin panglaog na katuninungan!—Fil. 4:4-7.

6. (a) Sa anong paagi puwedeng simbagon ni Jehova an satong mga pamibi? (b) Anong mga asigurasyon na nasa sitadong mga teksto an nakakapakusog sa saimo?

⁶ Arog ni Pablo, nakimahirak ka na man daw ki Jehova na halion sa saimo an sarong problema? Kun ipinagparapamibi mo na nin udok sa puso an problema pero yaon pa man giraray iyan—o naggrabe pa ngani—nahadit ka daw na tibaad dai nauugma saimo si Jehova? Kun iyo, girumdumon an halimbawa ni Pablo. Kun paanong sinimbag ni Jehova an saiyang mga pamibi, siguradong sisimbagon Niya man an mga pamibi mo! Tibaad dai man halion ni Jehova an problema. Alagad paagi kan banal na espiritu, tatawan ka niya kan kusog na kaipuhan mo tanganing matagalan an problema. (Sal. 61:3, 4) Tibaad “bagsak” ka, pero dai ka babayaan ni Jehova.—2 Cor. 4:8, 9; Fil. 4:13.

7-8. (a) Sa anong paagi nakakaagid sa duros an banal na espiritu? (b) Paano ilinadawan ni Pedro an paghiro kan banal na espiritu?

⁷ Ano pa an sarong paagi na tinatabangan kita kan banal na espiritu? Arog nin duros na pabor sa rutang aagihan sa dagat na darakula an alon, tinatabangan kita kan banal na espiritu na matagalan an mga problema asin makabalyo sa ipinanuga nin Diyos na bagong kinaban.

⁸ Si apostol Pedro pamilyar sa paglayag dahil parasira siya. Kaya, mahalagang risahon na ilinadawan niya an paghiro kan banal na espiritu paagi sa paggamit nin tataramon na minalataw na konektado sa paglayag. Isinurat niya: “An propesiya dai kasuarin man ipinahayag paagi sa kabutan nin tawo, kundi an mga tawo nagtaram gikan sa Diyos mantang sinda ginigiyahan kan banal na espiritu.” An Griegong tataramon na itrinadusir na “ginigiyahan” literal na nangangahulugan na “dinadara.”—2 Ped. 1:21; nota sa ibaba.

9. Anong ilustrasyon an pinalataw ni Pedro gamit an terminong “dinadara”?

⁹ Anong ilustrasyon an gustong palatawon ni Pedro gamit an terminong “dinadara”? Si Lucas, na kagsurat kan Mga Gibo, naggamit nin kaagid na porma kan iyo man sanang Griegong termino tanganing iladawan an sarong barko na ‘ipinapadpad’ nin duros. (Gibo 27:15) Kaya kan sinabi ni Pedro na an mga kagsurat kan Bibliya “dinadara,” naggamit siya nin “sarong magayunon na metapora sa paglayag,” sigun sa sarong iskolar sa Bibliya. Kaya baga man sana sinasabi ni Pedro na kun paanong an sarong barko dinadara kan duros tanganing matapos an paglayag kaiyan, an mga propeta asin kagsurat kan Bibliya dinadara man kan banal na espiritu tanganing matapos ninda an saindang  asignasyon. An iyo man sanang iskolar nagsabi: “Itinaas kan mga propeta an saindang mga layag, sabi ngani.” Ginibo ni Jehova an saiyang kabtang. Itinao niya “an duros,” o banal na espiritu. Ginibo kan mga kagsurat kan Bibliya an saindang kabtang. Nagtrabaho sinda kauyon kan paggiya kan espiritung iyan.

10-11. Anong duwang lakdang an kaipuhan niyatong gibuhon tanganing masigurado na ginigiyahan kita kan banal na espiritu? Iilustrar.

¹⁰ Siyempre, dai na ginagamit ni Jehova an saiyang banal na espiritu tanganing pasabngan an mga tawo na magsurat nin mga libro sa Bibliya. Minsan siring, ginagamit pa man giraray nin Diyos an saiyang banal na espiritu tanganing giyahan an saiyang mga lingkod. Ginigibo pa man giraray ni Jehova an saiyang kabtang. Paano kita makikinabang sa banal na espiritu nin Diyos? Kaipuhan niyatong siguraduhon na padagos niyatong ginigibo an satong kabtang. Paano niyato magigibo iyan?

¹¹ Pag-isipan an pagkumparar na ini. Tanganing makinabang sa duros, kaipuhan na gibuhon kan paralayag an duwang bagay. Inot, kaipuhan niyang iposisyon an saiyang baroto sa inaagihan kan duros. Ta siyempre, dai maabante an saiyang baroto kun yaon lang iyan sa duungan na harayo sa duros. Ikaduwa, kaipuhan niyang lubos na itaas asin ibiklad an saiyang mga layag. Siyempre, dawa may duros, maabante lang an baroto kun tatamaan kan duros an mga layag. Sa kaagid na paagi, makakapagpadagos sana kita sa paglilingkod ki Jehova kun igwa kita kan tabang kan banal na espiritu. Tanganing makinabang sa espiritung iyan, dapat na gibuhon niyato an duwang lakdang. Inot, dapat tang iposisyon an satong sadiri sa mismong inaagihan kan espiritu nin Diyos paagi sa pakikikabtang sa mga aktibidad kun sain yaon an paggiya kan banal na espiritu. Ikaduwa, kaipuhan niyatong lubos na “itaas an satong mga layag” paagi sa lubos na pakikikabtang sa mga aktibidad na ini sa pinakamakakaya ta. (Sal. 119:32) Kun gigibuhon niyato an mga lakdang na ini, tatabangan kita kan banal na espiritu na makayanan an mga pagkontra saka problema asin tatabangan kita kaiyan na magdanay na maimbod sagkod na makaabot kita sa bagong kinaban nin Diyos.

12. Ano na an sunod na pag-uulayan ta?

¹² Napag-ulayan na niyato an duwang paagi na tinatabangan  kita kan banal na espiritu. An banal na espiritu tinatawan kita nin kusog asin tinatabangan kita kaiyan na magdanay na maimbod mantang napapaatubang sa mga problema. Pinapahiro man kita kan banal na espiritu na padagos na maglingkod ki Jehova asin tinatabangan kita na magdanay sa dalan pasiring sa buhay na daing katapusan. Pag-ulayan ta ngunyan an apat na bagay na dapat niyatong gibuhon tanganing makinabang nin lubos sa banal na espiritu.

13. Sigun sa 2 Timoteo 3:16, 17, ano an puwedeng magin epekto sa sato kan Kasuratan, alagad ano an kaipuhan niyatong gibuhon?

¹³ Inot, pag-adalan an Tataramon nin Diyos. (Basahon an 2 Timoteo 3:16, 17.) An Griegong termino na itrinadusir na “ipinasabong nin Diyos” literal na nangangahulugan na “hinangusan nin Diyos.” Ginamit nin Diyos an saiyang espiritu tanganing “ihangos” o ilaag sa isip kan mga kagsurat kan Bibliya an saiyang mga kaisipan. Pag binabasa niyato an Bibliya asin hinuhurop-hurop iyan, minalaog sa satong isip asin puso an mga pagtutukdo nin Diyos. An ipinasabong na mga kaisipan na iyan nagpapahiro sa sato na iuyon an satong buhay sa kabutan nin Diyos. (Heb. 4:12) Alagad tanganing makinabang nin lubos sa banal na espiritu, kaipuhan na magtagama kita nin panahon na regular na pag-adalan an Bibliya asin pag-isipan na marhay an satong binabasa. Dangan an Tataramon nin Diyos magkakaigwa nin epekto sa gabos niyatong sinasabi asin ginigibo.

14. (a) Taano ta masasabi niyato na “naghuhuyop an duros” sa satong Kristiyanong mga pagtiripon? (b) Paano kita makakaatender sa satong mga pagtiripon na “biklad an mga layag”?

¹⁴ Ikaduwa, iribang magsamba ki Jehova. (Sal. 22:22) An satong Kristiyanong mga pagtiripon masasabing mga aktibidad na diyan “naghuhuyop an duros.” An espiritu ni Jehova yaon sa mga pagtiripon. (Kap. 2:29) Taano ta masasabi niyato iyan? Huling pag nagtitiripon kita para magsamba kaiba kan satong mga kapwa Kristiyano, namimibi kita para sa tabang kan banal na espiritu, nagkakanta kita nin mga kantang pang-Kahadian na basado sa Tataramon nin Diyos, asin nagdadangog kita nin basado sa Bibliyang mga pagtutukdo na ipinepresentar kan mga brother na ninombrahan kan banal na espiritu. Asin an iyo man sanang banal na espiritu an nagtatabang sa mga sister sa pag-andam asin pagpresentar kan saindang mga kabtang. Alagad tanganing lubos na makinabang sa banal na espiritu, kaipuhan na andam kita na magpartisipar sa mga pagtiripon. Paagi kaiyan, minaatender kita sa mga pagtiripon na “biklad an mga layag.”

15. Paano kita tinatabangan kan banal na espiritu sa gibuhon na paghuhulit?

¹⁵ Ikatulo, makikabtang sa gibuhon na paghuhulit. Pag ginagamit ta an Bibliya sa gibuhon na paghuhulit asin pagtutukdo, tinutugutan ta an banal na espiritu na tabangan kita sa ministeryo. (Roma 15:18, 19) Pero tanganing makinabang nin lubos sa espiritu nin Diyos, kaipuhan na regular kitang makikabtang sa gibuhon na paghuhulit asin gamiton niyato an Bibliya nuarin man posible. An sarong paagi na magigibo mong mas makahulugan an saimong ministeryo iyo an paggamit kan sampol na mga pakikipag-ulay sa Workbook sa Pagtiripon na Pamumuhay Asin Ministeryo.

16. Ano an pinakadirektang paagi para makamtan ta an banal na espiritu?

¹⁶ Ikaapat, mamibi ki Jehova. (Mat. 7:7-11; Luc. 11:13) An pinakadirektang paagi para makamtan ta an banal na espiritu iyo na hagadon iyan ki Jehova paagi sa pamibi. Mayo nin makakapugol sa mga pamibi ta na makaabot ki Jehova; mayo man nin makakaulang sa marahay na regalong banal na espiritu na makaabot sa sato—mayong ano man na presuhan an makakaulang, maski pa si Satanas. (Sant. 1:17) Paano kita dapat mamibi tanganing makinabang nin lubos sa banal na espiritu? Tanganing masimbag iyan, siyasaton niyato nin mas detalyado an dapit sa pamibi paagi sa pagkonsiderar sa ilustrasyon na mahihiling sana sa Ebanghelyo ni Lucas. *

17. Sa ilustrasyon ni Jesus sa Lucas 11:5-9, 13, anong leksiyon an manunudan niyato mapadapit sa pamibi?

¹⁷ Basahon an Lucas 11:5-9, 13. Ipinapahiling kan ilustrasyon ni Jesus kun paano kita dapat mamibi para sa tabang kan banal na espiritu. Sa ilustrasyon, nakua kan lalaki an kaipuhan niya “dahil sa [saiyang] pursigidong pamimirit.” Dai siya nagduwa-duwa na maghagad nin tabang sa saiyang amigo dawa matanga na. * Paano inaplikar ni Jesus sa pamibi an ilustrasyon na ini? Sinabi niya: “Padagos na maghagad, asin itatao iyan sa saindo; padagos na maghanap, asin makakakua kamo; padagos na magtuktok, asin bubuksan iyan sa saindo.” Kaya, ano an leksiyon kaini para sa sato? Tanganing kamtan niyato an tabang kan banal na espiritu, kaipuhan niyatong hagadon iyan paagi sa pursigidong pagpamibi.

18. Sigun sa ilustrasyon ni Jesus, taano ta makakapagtiwala kita na tatawan kita ni Jehova kan saiyang banal na espiritu?

¹⁸ Tinatabangan man kita kan ilustrasyon ni Jesus na mahiling kun taano ta tatawan kita ni Jehova nin banal na espiritu. Gusto kan lalaki sa ilustrasyon na maistimar na marhay an bisita. Namatian niya na kaipuhan niyang magserbi nin kakanon sa bisita niyang nag-abot nin matanga, kaya lang mayo siyang maiaalok na kakanon. Sinabi ni Jesus na an lalaki tinawan nin tinapay kan saiyang amigo huli sa pursigidong pamimirit niya na tawan siya nin tinapay. Ano an punto ni Jesus? Kun an sarong bakong perpektong tawo ngani andam na tabangan an kapwa niya na pursigido, ano pa daw an satong mabuot na Ama sa langit! Siguradong tatabangan niya an mga pursigidong naghahagad sa saiya nin banal na espiritu. Kun siring, makakapamibi kita na may pagtitiwalang sisimbagon ni Jehova an satong apuradong paghagad nin banal na espiritu.—Sal. 10:17; 66:19.

19. Taano ta makakasigurado kita na magigi kitang mapanggana?

¹⁹ Makakasigurado kita na sa ibong kan padagos na paghihinguwa ni Satanas na daugon kita, magigi kitang mapanggana. Taano? Huling tinatabangan kita kan banal na espiritu sa duwang paagi. Inot, tinatawan kita kaiyan kan kusog na kaipuhan niyato tanganing makayanan ta an mga problema. Ikaduwa, iyan an puwersa na “minabusol sa satong mga layag,” na tinatabangan kitang padagos na maglingkod ki Jehova sagkod na makaabot kita sa bagong kinaban nin Diyos. Lugod na magin determinado kita na makinabang nin lubos sa tabang na itinatao kan banal na espiritu!