1. Tinutugutan kita ni Jehova na gibuhon an ano?

TINUTUGUTAN kita ni Jehova na pumili kun ano an gusto ta sa buhay. Tinutukduan niya kita kun paano gumibo nin marahay na mga desisyon, asin tinatabangan niya kita na magin mapanggana pag naggigibo kita nin mga desisyon na nakakapaugma sa saiya. (Sal. 119:173) Mantang urog niyatong inaaplikar an kadunungan na nasa Tataramon nin Diyos, urog man kitang nagigin mahusay sa paggibo nin marahay na mga desisyon.—Heb. 5:14.

2. Anong kadipisilan an tibaad mapaatubang sa sato pagkatapos niyatong gumibo nin desisyon?

² Pero dawa ngani nakagibo na kita nin madunong na desisyon, tibaad madipisilan pa man giraray kita na tapuson kun ano an pinunan niyato. Pag-isipan an pirang halimbawa: Sarong hoben na brother an nagdesisyon na basahon an bilog na Bibliya. Nagibo niya iyan nin pirang semana pero nagpundo siya. Sarong sister an nagdesisyon na magregular payunir pero pirmi niya iyan na inaatraso. Sarong grupo nin kamagurangan an nagkauruyon sa desisyon na mas parating magsagibo nin pagpastor sa mga tugang sa kongregasyon pero pakalihis nin dakul na bulan dai pa man giraray ninda iyan napupunan. Magkakalain an mga sitwasyon na ini, pero igwa nin pagkakaagid. Dai ninda lubos na ginibo kun ano an napagdesisyunan ninda. Kaagid kaiyan an nagin problema kan inot na siglong mga Kristiyano sa Corinto. Mangnuhon kun ano an manunudan niyato sa sainda.

3. Ano an nagin desisyon kan mga taga Corinto, pero ano an nangyari?

³ Kan mga 55 C.E., naggibo nin mahalagang desisyon an mga tugang sa Corinto. Naaraman ninda na grabe an pagsakit asin pagtios kan mga tugang sa Jerusalem saka Judea, asin na nagkokolekta nin kuwarta an ibang mga kongregasyon para tabangan sinda. Huli sa kabuutan asin pagkabukas-palad, nagdesisyon an mga taga Corinto na magdonar asin naghapot sinda ki apostol Pablo kun paano sinda makakatabang. Nagpadara siya nin instruksiyon sa  kongregasyon asin ninombrahan si Tito na mag-asistir sa pagkolekta. (1 Cor. 16:1; 2 Cor. 8:6) Pero pakalihis nin pirang bulan, naaraman ni Pablo na dai ginibo kan mga taga Corinto an napagdesisyunan ninda. Kaya posibleng marhay na dai pa magigin andam an donasyon ninda pag dadarahon na iyan sa Jerusalem kaiba kan mga donasyon hali sa ibang mga kongregasyon.—2 Cor. 9:4, 5.

4. Siring kan mababasa sa 2 Corinto 8:7, 10, 11, inenkaminar ni Pablo an mga taga Corinto na gibuhon an ano?

⁴ Naggibo nin marahay na desisyon an mga taga Corinto, asin kinomendaran sinda ni Pablo huli sa makusog nindang pagtubod saka udok sa pusong pagmawot na magin bukas-palad. Pero kinaipuhan niya man sindang enkaminaron na tapuson an napunan ninda. (Basahon an 2 Corinto 8:7, 10, 11.) Itinutukdo sa sato kan saindang eksperyensiya na puwedeng madipisilan dawa an maimbod na mga Kristiyano na isagibo an sarong marahay na desisyon.

5. Anong mga hapot an sisimbagon ta?

⁵ Arog kan mga taga Corinto, tibaad masakitan kitang maisagibo an satong mga desisyon. Taano? Huli sa pagkabakong perpekto, tibaad magpaliman-liman man kita. O tibaad huli sa dai inaasahan na mga pangyayari magin imposible para sa sato na gibuhon an napagdesisyunan ta. (Par. 9:11; Roma 7:18) Paano niyato pag-iisipan giraray an sarong desisyon tanganing madeterminaran ta kun baga may dapat kitang liwaton diyan? Asin paano niyato masisigurado na matatapos niyato an pinunan ta?

6. Nuarin niyato tibaad kaipuhan na liwaton an satong desisyon?

⁶ May mahalagang mga desisyon na nungka niyatong babaguhon. Halimbawa, pinaninindugan niyato an satong desisyon na paglingkudan si Jehova, asin determinado kitang magin maimbod sa satong agom. (Mat. 16:24; 19:6) Pero may ibang mga desisyon na tibaad kaipuhan na liwaton. Taano? Huling nagbabago an mga kamugtakan. Anong mga lakdang an makakatabang sa sato na makagibo nin pinakamahusay na desisyon na posible?

7. Ano an dapat niyatong ipamibi, asin taano?

⁷ Mamibi na tawan ka nin kadunungan. Pinasabngan ni Jehova si Santiago na magsurat: “Kun an siisay man sa saindo kulang sa kadunungan, padagos siyang maghagad sa Diyos, huling siya bukas-palad na nagtatao sa gabos.” (Sant. 1:5) Sa nagkapirang paagi, gabos kita “kulang sa kadunungan.” Kaya, magtiwala ki Jehova pag naggigibo nin desisyon asin pag pinag-iisipan giraray an desisyon na iyan. Dangan tatabangan ka ni Jehova na makagibo nin madunong na mga desisyon.

8. Ano an dapat niyatong gibuhon bago magdesisyon?

⁸ Mag-research na marhay. Konsultahon an Tataramon nin Diyos, basahon an mga publikasyon hali sa organisasyon ni Jehova, asin makipag-ulay sa mga tawong mapagkakatiwalaan mo. (Tal. 20:18) Mahalagang marhay an siring na pag-research bago magdesisyon na magsalida nin trabaho, magbalyo nin istaran, o magpili nin angay na edukasyon na makakasuportar sa saimong ministeryo.

9. Ano an mga pakinabang kun onesto kita sa satong sadiri?

⁹ Siyasaton an saimong mga motibo. Mahalaga ki Jehova an satong mga motibo. (Tal. 16:2) Gusto niyang magin onesto kita sa gabos na bagay. Kaya pag naggigibo kita nin desisyon, gusto ta man na magin onesto sa satong sadiri asin sa iba kun dapit sa satong mga motibo. Kun bako kitang onesto, posibleng marhay na madipisilan kitang panindugan an satong desisyon. Halimbawa, tibaad magdesisyon an sarong hoben na brother na magregular payunir. Pero paghaloy-haloy, nadidipisilan siyang abuton an kahagadan na oras asin bako na siya gayong maugma sa ministeryo. Tibaad iniisip niya na an pinakamotibo niya sa pagpayunir iyo na mapaugma si Jehova. Pero posible daw na an dahilan niya talaga sa pagpayunir iyo na gusto niyang mapaugma an saiyang mga magurang o an saro na hinahangaan niya?

10. Ano an kaipuhan tanganing makagibo nin mga pagbabago?

 ¹⁰ Pag-isipan an sitwasyon nin sarong tinutukduan sa Bibliya na nagdesisyon na pumundo na sa pagsigarilyo. Nadipisilan siya kan primero; mga saro o duwang semana na natitios niyang dai magsigarilyo pero pagkatapos kaiyan nagsisigarilyo na naman siya. Alagad pag-abot nin panahon, talagang napundo na niya iyan! An pagkamuot niya ki Jehova asin an pagmawot niyang paugmahon Siya nakatabang sa saiya na mahali an saiyang bisyo.—Col. 1:10; 3:23.

11. Taano ta dapat na espesipiko an saimong mga pasuhan?

¹¹ Magin espesipiko. Mantang mas espesipiko ka, posibleng marhay man na matatapos mo an napunan mo. Halimbawa, tibaad nagdesisyon kang mas parating magbasa nin Bibliya. Pero kun mayo kang espesipikong iskedyul, tibaad dai mo magibo an pasuhan mo. * O tibaad nagdesisyon an mga elder sa sarong kongregasyon na mas parating magsungko para sa pagpastor, pero naglihis an pirang panahon, dai pa man giraray ninda nagigibo an napagdesisyunan ninda. Tanganing magibo an saindang napagdesisyunan, puwede nindang ihapot sa sadiri: “Inaram mi daw kun sairisay na tugang an partikular nang makikinabang kun mas parati kaming magpapastor? Nag-iskedyul daw kami nin espesipikong petsa o oras kun nuarin mi sinda dadalawon?”

12. Ano an tibaad kaipuhan niyatong gibuhon, asin taano?

¹² Magin realistiko. Mayo sa sato an igwa nin panahon, pagsadiri, o kusog tanganing magibo an gabos na gusto niyatong gibuhon. Kaya, magin realistiko asin rasonable. Kun hinahagad kan sitwasyon, tibaad kaipuhan mong liwaton an sarong desisyon na dai mo man kayang isagibo. (Par. 3:6) Halimbawang pinag-isipan mo na giraray an saimong desisyon, nakagibo ka na nin kinakaipuhan na pagliliwat, tapos pagmati mo kaya mo na iyan isagibo, ano an makakatabang sa saimo na tapuson kun ano an napunan mo? Pag-isipan an limang lakdang.

13. Paano ka magkakaigwa kan kusog na kaipuhan mo para mautob an sarong desisyon?

¹³ Mamibi na tawan ka nin kusog na gumibo. Puwede kang tawan nin Diyos “kan kakayahan na gumibo” asin utubon an saimong desisyon. (Fil. 2:13) Kaya hagadon ki Jehova an saiyang banal na espiritu na tawan ka kan kusog na kaipuhan mo. Padagos na mamibi dawa kun garo baga naaatraso an simbag sa hinahagad mo. Arog kan sinabi ni Jesus: “Padagos na maghagad, asin itatao iyan [an banal na espiritu] sa saindo.”—Luc. 11:9, 13.

14. Paano makakatabang an prinsipyo sa Talinhaga 21:5 na maisagibo mo an saimong desisyon?

¹⁴ Gumibo nin plano. (Basahon an Talinhaga 21:5.) Para matapos an ano man na proyektong napunan mo, kaipuhan mong gumibo nin plano. Dangan kaipuhan mong humiro kauyon kan planong iyan. Sa kaagid na paagi, pag naggigibo nin desisyon, ilista an espesipikong mga lakdang na plano mong sunudon tanganing maisagibo an desisyon na iyan. Kun dakula an trabaho, banga-bangaon iyan tanganing magin mas madali saimo na mahiling kun ano na an mga natapos. Inenkaminar ni Pablo an mga taga Corinto na magtagama para sa saindang kontribusyon “sa inot na aldaw kan kada semana” imbes na maghalat asin magkolekta pag-abot niya. (1 Cor. 16:2) Makakatabang man an pagbanga-banga kan darakulang trabaho sa saradit na trabaho tanganing dai mo mamatian na dai mo iyan kayang tapuson.

15. Ano an puwedeng gibuhon pagkatapos gumibo nin plano?

¹⁵ Kun isusurat mo an plano mo, makakatabang iyan na maisagibo mo an saimong desisyon. (1 Cor. 14:40) Halimbawa, tinawan nin instruksiyon an mga grupo nin kamagurangan na mag-asignar nin sarong elder na malista kan lambang  desisyon kan grupo nin kamagurangan, pati na kun siisay an nakaasignar na gumibo kan napagdesisyunan asin kun nuarin iyan dapat matapos. Pag nagsusunod sa instruksiyon na ini an mga elder, mas pasil sa sainda na gibuhon an napagdesisyunan ninda. (1 Cor. 9:26) Puwede mong arugon an ginigibo ninda kun dapit sa pang-aroaldaw mong buhay. Halimbawa, puwede mong ilista an mga gigibuhon mo sa kada aldaw sigun sa gusto mong pagkasunod-sunod. Makakatabang ini sa saimo bako sanang para matapos an napunan mo kundi para mas dakul an magibo mo sa halipot na panahon.

16. Ano an kaipuhan tanganing maisagibo mo an saimong desisyon, asin paano ini sinusuportaran kan Roma 12:11?

¹⁶ Magmaigot. Kaipuhan na marhay an paghihinguwa para matapos kun ano an napunan mo. (Basahon an Roma 12:11.) Sinabi ni Pablo ki Timoteo na “padagos [na] magpokus sa ginigibo” niya asin “magmaigot” na magin mas mahusay na paratukdo. Aplikado man an sadol na iyan sa ibang espirituwal na mga pasuhan.—1 Tim. 4:13, 16.

17. Paano niyato maiaaplikar an Efeso 5:15, 16 sa pagsagibo kan desisyon niyato?

¹⁷ Gamiton sa madunong na paagi an saimong panahon. (Basahon an Efeso 5:15, 16.) Mag-iskedyul kun nuarin mo isasagibo an saimong desisyon asin dai pagbaguhon an iskedyul. Dai magparahalat sa perpektong pagkakataon para humiro huling posibleng marhay na dai man iyan maabot. (Par. 11:4) Mag-ingat na dai maubos nin bako man gayong importanteng mga bagay an saimong panahon asin kusog na kaipuhan mo para sa mas importanteng mga bagay. (Fil. 1:10) Kun posible, magtagama nin panahon na diyan dai ka gayong madidisturbo sa ginigibo mo. Sabihon sa iba na kaipuhan mong magpokus. Purbaran na i-off an cellphone mo; saka mo na sana hilingon an e-mail o social media mo. *

18-19. Ano an makakatabang sa saimo na dai basta sumuko sa saimong desisyon pag mapaatubang ka sa mga problema?

¹⁸ Magpokus sa magigin resulta. An resulta kan mga desisyon mo kapareho nin sarong destinasyon sa pagbiyahe. Kun gusto mo talagang makaabot sa destinasyon mo, magpapadagos ka dawa kun sarado an sarong tinampo kaya kaipuhan mong magbago nin ruta. Sa kaagid na paagi, kun mapokus kita sa magigin resulta kan satong desisyon, dai kita basta masuko na sana pag mapaatubang kita sa mga problema o pagbabago.—Gal. 6:9.

¹⁹ Bakong pasil an paggibo nin marahay na mga desisyon, asin puwedeng magin dipisil an pagsagibo kaiyan. Pero sa tabang ni Jehova, puwede kang magkaigwa kan kadunungan asin kusog na kaipuhan mo tanganing tapuson kun ano an napunan mo.