Namundag ako kan 1983. Kan aki pa ako, okey man an hawak ko, pero kan diyes anyos na ako, nagpuon akong makamati nin grabeng kulog sa manlain-lain na parte kan sakong hawak. Pakalihis nin mga duwang taon, pagmata ko sarong aga, dai na ako makahiro. Maski anong gibuhon ko dai ko na maihiro an sakong mga bitis, mayo nang kusog iyan. Puon kaiyan, dai na ako nakalakaw giraray. Huli sa hilang ko, dai na man ako nagdakula. Ngunyan, kasingsadit pa man giraray ako nin sarong aki.

Mga pirang bulan na ako kaidtong pirmi lang nasa harong kan magdalaw an duwang Saksi ni Jehova. Pag may mga bisita, sa parati nagtatago ako, pero kan aldaw na idto nakipag-ulay ako sa mga babaying idto. Mantang sinasabi ninda an manungod sa Paraiso, nagirumduman ko su nadangog ko kan mga singko anyos ako. Kan panahon na idto, sarong misyonero na an pangaran Jethro, na nakaistar sa Suriname, an nagbibisita sa samong baryo sarong beses kada bulan asin tinukduan sa Bibliya si Tatay. Mabuuton sako si Jethro. Gustuhon ko siya. Nag-aatender man an lolo saka lola ko sa mga pagtiripon kan mga Saksi na ginigibo sa baryo mi asin kun minsan pig-iiba ninda ako. Kaya kan maghapot si Florence, an saro sa mga sister na nagdalaw samo kan aldaw na iyan, kun gusto kong makanuod pa, nag-iyo ako.

Nagbalik si Florence kaiba kan saiyang agom na si Justus, asin pinunan ninda akong tukduan sa Bibliya. Kan marisa ninda na dai ako tataong magbasa, tinabangan ninda akong makanuod magbasa. Paghaloy-haloy, nakakabasa na ako. Sarong aldaw, sinabi sako kan mag-agom na inasignaran sindang maglingkod sa Suriname. Nakakamundo ta mayo nin iba sa Orealla na puwedeng magpadagos sa pag-study sako. Pero nakakaugma ta dai ako liningawan ni Jehova.

Dai nahaloy, sarong payunir na an pangaran Floyd, an nag-abot sa Orealla, asin nanumpungan niya ako mantang naghaharong-harong siya. Kan alukan niya ako nin pag-adal sa Bibliya, nagngirit ako. “Ta’no ta nagngingirit ka?” an hapot niya. Sinabi ko saiya na tapos na ako sa brosyur na Ano an Kahagadan sa Sato nin Dios? asin napunan naman an pag-study sako sa librong Kaaraman na Minagiya Pasiring sa Buhay na Daing Katapusan. * Ipinaliwanag ko kun taano ta napundo an pag-study sako. Ipinagpadagos ni Floyd an pag-study sako sa librong Kaaraman, pero iinasignar man siya na maglingkod sa ibang lugar. Mayo na naman nagtutukdo sako sa Bibliya.

 Pero kan 2004, iinasignar sa Orealla an duwang espesyal payunir na si Granville asin Joshua. Naghulit sinda sa harong-harong, asin nanumpungan ninda ako. Kan haputon ninda ako kun gusto kong mag-adal, nagngirit ako. Pinakisuyuan ko sinda na tukduan ako sa librong Kaaraman puon sa kapinunan. Gusto kong mahiling kun baga an itutukdo ninda sako pareho lang kan mga nainot na nagtukdo sako. Sinabi sako ni Granville na may mga pagtiripon na isinasagibo sa baryo. Dawa ngani masampulong taon na akong dai nagluluwas sa harong, gusto kong mag-atender. Kaya sinundo ako ni Granville asin isinakay sa wheelchair asin ibinusol iyan pa-Kingdom Hall.

Pag-abot nin panahon, dinagka ako ni Granville na magpaenrol sa Teokratikong Paadalan sa Pagmiministro. Sinabi niya: “Dai ka nakakalakaw, pero nakakataram ka. Sarong aldaw, makakapag-public talk ka. Mangyayari iyan.” Nagkusog an buot ko huli sa mga sinabi niya.

Nagpuon akong makikabtang sa gibuhon na paghuhulit kaiba ni Granville. Pero dakul na tinampo sa banwa an bako man sementado saka lubak-lubak na marhay para mag-wheelchair. Kaya sinabi ko ki Granville na ibusol na sana ako sakay nin karumatilya. Nagin mas kumbenyente iyan samo. Kan Abril 2005, nabawtismuhan ako. Dai nahaloy pagkatapos kaiyan, sinanay ako kan mga brother na asikasuhon an mga literatura kan kongregasyon asin an sound system sa Kingdom Hall.

Dangan kan 2007, nakakamundo ta nagadan an sakong ama sa sarong aksidente sa baroto. Munduon na marhay an samong pamilya. Namibi si Granville kaiba mi asin nagtao nin nakakarangang mga teksto hali sa Bibliya. Pakalihis nin duwang taon, nabigla kami huli sa saro na naman na trahedya—nagadan si Granville sa sarong aksidente sa baroto.

An samong sadit asin nagmumundong kongregasyon mayo na nin elder asin sarong ministeryal na lingkod na sana an yaon. Talagang makulugon sako an pagkagadan ni Granville; saro siyang namumutan na amigo. Pirmi niya akong tinatabangan na magin harani ki Jehova asin maasikaso an iba ko pang mga pangangaipo. Sa suminunod na pagtiripon pagkagadan niya, ako an nakaasignar na magbasa kan mga parapo para sa Pag-adal sa Torrengbantayan. Pagkatapos nin duwang parapo, nagpuon akong maghibi asin dai mapundo an sakong luha kaya kinaipuhan kong magbaba sa stage.

Medyo nagrahay an pagmati ko kan may mga tugang hali sa ibang kongregasyon na nagtabang samo sa Orealla. Ipinadara man kan sangang opisina si Kojo, na sarong espesyal payunir. Ugmahon ako ta si Nanay saka an saro sa mas nguhod kong tugang na lalaki nag-adal nin Bibliya asin nabawtismuhan. Dangan kan Marso 2015, ninombrahan ako bilang ministeryal na lingkod. Dai nahaloy, iprinesentar ko an inot kong pampublikong pahayag. Kan aldaw na iyan, naghihibi akong nakangirit mantang nagigirumduman ko an sinabi ni Granville nagkapirang taon na an nakaagi: “Sarong aldaw, makakapag-public talk ka. Mangyayari iyan.”

Paagi sa mga programa sa JW Broadcasting^®, naaraman ko an manungod sa mga tugang na kaagid kan sako an kamugtakan. Pero sa ibong kan saindang problema sa salud, dakul an nagigibo ninda saka maugma sinda. Ako man, may magigibo pa ako. An pagmawot kong itao ki Jehova an ano man na kusog na igwa pa ako nakapahiro sako na magregular payunir. Asin talagang dai inaasahan na bareta an naresibi ko kan Setyembre 2019! Kan bulan na iyan, naaraman ko na ninombrahan akong maglingkod bilang elder sa samong kongregasyon na mga 40 an parahayag.

Nagpapasalamat ako sa mga tugang na nagtukdo sa sako asin nagtabang na magibo ko an sakong ministeryo. Urog sa gabos, nagpapasalamat ako na dai ako liningawan ni Jehova.