1. Ano an makakaranga sa sato pag namamatian niyatong nagsosolo kita o haros dai na niyato makaya an satong mga problema? (Salmo 118:5-7)

NAMATIAN mo na daw na nagsosolo ka, na mayo nin siisay man na makakatabang sa saimo sa problema mo? Dakul an nakamati kaiyan, pati na an maimbod na mga lingkod ni Jehova. (1 Ha. 19:14) Kun makamati ka nin arog kaiyan, girumdumon an panuga ni Jehova: “Dai taka nuarin man tatalikudan, asin dai taka nuarin man papabayaan.” Kaya masasabi niyato nin may kumpiyansa: “Si Jehova an sakuyang paratabang; dai ako matatakot.” (Heb. 13:5, 6) Isinurat iyan ni apostol Pablo para sa mga kapagtubod sa Judea kan mga 61 C.E. Ipinapagirumdom kaiyan sa sato an mga tataramon na mababasa sa Salmo 118:5-7.—Basahon.

2. Ano an pag-uulayan niyato sa artikulong ini, asin taano?

² Arog kan salmista, aram ni Pablo base sa saiyang eksperyensiya na si Jehova an saiyang Paratabang. Halimbawa, labing duwang taon bago siya magsurat sa mga taga Hebreo, nakaeksperyensiya siya nin peligrosong pagbiyahe sa dagat dahil sa makusog na bagyo. (Gibo 27:4, 15, 20) Sa pagbiyaheng iyan asin bago kaiyan, si Jehova nagin Paratabang ki Pablo sa manlain-lain na paagi. Pag-uulayan niyato an tulo sa mga iyan. Tinabangan siya ni Jehova paagi ki Jesus asin sa mga anghel, paagi sa mga nasa awtoridad, asin paagi sa mga kapagtubod. An pagrepaso sa mga pangyayaring ini sa buhay ni Pablo, makakapakusog kan satong pagtitiwala sa panuga nin Diyos na sisimbagon man niya an satong mga pag-agrangay.

3. Ano an tibaad naisip ni Pablo, asin taano?

³ Kaipuhan ni Pablo nin tabang. Kan mga 56 C.E., ginuyod siya nin sarong grupo nin mga tawo paluwas sa templo sa Jerusalem asin pinurbaran siyang gadanon. Kan suminunod na aldaw, dinara si Pablo sa atubangan kan Sanhedrin, asin diit-diitan pa siyang dagusuon kan saiyang mga kaiwal. (Gibo 21:30-32; 22:30; 23:6-10) Sa pagkakataon na iyan, tibaad naisip ni Pablo, ‘Sagkod nuarin ko matatagalan ini?’

4. Paano tinabangan ni Jehova si Pablo paagi ki Jesus?

⁴ Anong tabang an inako ni Pablo? Kan banggi pagkatapos arestaron si Pablo, “an Kagurangnan,” si Jesus, nagpahiling saiya asin nagsabi: “Kusugi an buot mo! Huli ta kun paanong nagpapatotoo ka nin lubos sa Jerusalem manungod sa sako, dapat ka man na magpatotoo sa Roma.” (Gibo 23:11) Napapanahon nanggad na pampakusog buot! Kinomendaran ni Jesus si Pablo sa pagpapatotoo kaini sa Jerusalem. Asin nanuga siya ki Pablo na ligtas ining makakaabot sa Roma, na diyan magpapatotoo man siya. Pagkatapos kan asigurasyon na iyan, siguradong namatian ni Pablo na ligtas siya, siring sa aki na kugos kan saiyang ama.

5. Paano tinabangan ni Jehova si Pablo paagi sa sarong anghel? (Hilingon an ritrato sa cover.)

⁵ Ano pang ibang kadipisilan an napaatubang ki Pablo? Mga duwang taon pagkatapos kan mga pangyayaring iyan sa Jerusalem, nasa sarong barko si Pablo pa-Italia kan magkaigwa nin sarong makusugon na bagyo kaya paghuna kan mga tripulante asin kan mga pasahero magagadan na sinda. Pero dai natakot si Pablo. Taano? Sinabi niya sa gabos na nasa barko: “Kasubanggi an anghel kan Diyos na may sadiri sa sako asin na pinaglilingkudan ko nagpahiling sa sakuya asin nagsabi: ‘Dai ka matakot Pablo. Kaipuhan kang umatubang ki Cesar, asin alang-alang sa saimo, ililigtas nin Diyos an buhay kan gabos na kairiba mong nagbibiyahe.’” Sinugo ni Jehova an sarong anghel tanganing utruhon an nainot nang asigurasyon na itinao Niya ki Pablo paagi ki Jesus. Asin iyo man nanggad, nakaabot si Pablo sa Roma.—Gibo 27:20-25; 28:16.

6. Anong panuga ni Jesus an makakapakusog sa sato, asin taano?

⁶ Anong tabang an inaako niyato? Susuportaran kita ni Jesus, arog kan ginibo niya ki Pablo. Halimbawa, nanunuga si Jesus sa gabos na parasunod niya: “Kaibanan nindo ako sa gabos na aldaw sagkod sa pagtatapos kan sistema nin mga bagay.” (Mat. 28:20) Gikanan nin kusog para sa sato an mga tataramon na iyan ni Jesus. Taano? Huling may mga aldaw na masakit tagalan. Halimbawa, pag nagadanan kita nin mahal sa buhay, kaipuhan niyatong kayanon an kulog bako sana nin pirang aldaw kundi posibleng marhay na dakul na taon. Kaipuhan man na tagalan kan iba an masakit na mga aldaw huli sa  paggurang. Asin an iba man kaipuhan na atubangon an mga aldaw na nakakamati sinda nin depresyon. Dawa arog kaiyan, nagkakaigwa kita kan kusog na magpadagos huling aram niyato na kaibanan ta si Jesus “sa gabos na aldaw,” kaiba na an pinakamasakit na mga aldaw, sa satong buhay.—Mat. 11:28-30.

7. Uyon sa Kapahayagan 14:6, paano kita tinatabangan ni Jehova ngunyan?

⁷ Inaasigurar kita kan Tataramon nin Diyos na tinatabangan kita ni Jehova paagi sa saiyang mga anghel. (Heb. 1:7, 14) Halimbawa, tinatabangan asin ginigiyahan kita kan mga anghel mantang ihinuhulit niyato an ‘maugmang bareta kan Kahadian’ sa mga tawo kan “gabos na nasyon asin tribo asin lengguwahe.”—Mat. 24:13, 14; basahon an Kapahayagan 14:6.

8. Paano tinabangan ni Jehova si Pablo paagi sa sarong komandante militar?

⁸ Anong tabang an inako ni Pablo? Kan 56 C.E., inasigurar ni Jesus si Pablo na makakaabot ini sa Roma. Pero, may mga Judio sa Jerusalem na planong tambangan si Pablo asin gadanon siya. Kan maaraman kan Romanong komandante militar na si Claudio Lisias an planong iyan, tinabangan niya si Pablo. Tulos-tulos na ipinadara ni Claudio si Pablo—na protektado nin dakul na suldados—pasiring sa Cesarea, sa ruta na mga 105 kilometros hali sa Jerusalem. Sa Cesarea, ipinagbuot ni Gobernador Felix na “bantayan [si Pablo] sa palasyo ni Herodes.” Kaya dai na maaano si Pablo kan mga gustong gumadan sa saiya.—Gibo 23:12-35.

9. Paano tinabangan ni Gobernador Festo si Pablo?

⁹ Pakalihis nin duwang taon, nakapreso pa man giraray si Pablo sa Cesarea. Bako na si Felix an gobernador, si Festo na. Nakiulay ki Festo an mga Judio na padumanon sa Jerusalem si Pablo tanganing bistahon, pero nagsayuma si Festo. Tibaad aram kan gobernador na “pinaplano [kan mga Judio na] tambangan si Pablo asin gadanon mantang nasa dalan.”—Gibo 24:27–25:5.

10. Ano an desisyon ni Gobernador Festo sa apelasyon ni Pablo na husgaran ini ni Cesar?

¹⁰ Dangan, ginibo sa Cesarea an pagbista ki Pablo. Huling gusto ni Festo na “magkaigwa nin marahay na buot sa saiya an mga Judio,” hinapot niya si Pablo: “Ano gusto mong duman ka sa Jerusalem husgaran may koneksiyon sa mga akusasyon na ini mantang nasa presensiya ko?” Aram ni Pablo na posibleng marhay na gagadanon siya sa Jerusalem, asin aram niya man kun ano an magigibo niya tanganing malikayan iyan, makaabot sa Roma, asin maipadagos an saiyang ministeryo. Sinabi niya: “Minaapelar ako ki Cesar!” Pagkatapos na konsultahon ni Festo an saiyang mga parakonseho, sinabi niya ki Pablo: “Nag-apelar ka ki Cesar, di maduman ka ki Cesar.” Huli sa desisyon ni Festo apabor ki Pablo, nailigtas siya sa mga kaiwal niya. Pag-abot nin panahon, nasa Roma na si Pablo—na diyan dai na siya maaano kan mga Judiong gusto siyang gadanon.—Gibo 25:6-12.

11. Anong nakakapakusog na mga tataramon na itinao ni Isaias an posibleng inisip-isip ni Pablo?

¹¹ Mantang hinahalat ni Pablo an saiyang pagbiyahe pa-Italia, posibleng iniisip-isip niya an patanid na ipinasabong ki propeta Isaias na itao sa mga nagkokontra ki Jehova: ‘Maggibo kamo nin mga plano, alagad dai mangyayari an mga iyan! Mag-urulay kamo sagkod na buot nindo, alagad an gabos mayo nin halaga, huli ta an Diyos nasa [samuya]!’ (Isa. 8:10, BPV *) Aram ni Pablo na tatabangan siya nin Diyos, asin siguradong nakapakusog iyan sa saiya mantang inaatubang an mga maabot na pagbalo.

12. Paano trinatar ni Julio si Pablo, asin ano an posibleng narealisar ni Pablo huli kaiyan?

¹² Kan 58 C.E., nagpuon an pagbiyahe ni Pablo pa-Italia. Preso si Pablo kaya binabantayan siya nin sarong opisyal nin hukbo na an pangaran  Julio. Sa puntong iyan, nasa kamot ni Julio kun magigin miserable o marahay an kamugtakan ni Pablo. Paano gagamiton ni Julio an saiyang awtoridad? Pagduong ninda kan sunod na aldaw, “pinahilingan ni Julio nin kabuutan si Pablo asin tinugutan siyang makaduman sa mga amigo niya.” Kan huri, isinalbar pa ngani ni Julio si Pablo. Paano? Gustong gadanon kan mga suldados an gabos na preso sa barko, pero pinugulan sinda ni Julio. Taano? Huling “determinado [siya] na madarang ligtas si Pablo.” Posibleng marhay na narealisar ni Pablo na ginagamit ni Jehova an mabuot na opisyal na ini para tabangan saka protektaran siya.—Gibo 27:1-3, 42-44.

13. Paano puwedeng gamiton ni Jehova an mga nasa awtoridad?

¹³ Anong tabang an inaako niyato? Pag kauyon kan katuyuhan niya, puwedeng gamiton ni Jehova an saiyang makapangyarihan na banal na espiritu para pangyarihon na gibuhon kan mga nasa awtoridad an buot niya. Isinurat ni Hading Solomon: ‘An [puso] kan hadi sarong [sulog] nin tubig sa kamot [ni Jehova]; siya an nagbubuot kan direksiyon kaiyan.’ (Tal. 21:1, BPV) Ano an buot sabihon kan talinhagang ini? An mga tawo nagkakalot nin kanal tanganing pasukion an tubig nin sapa sa direksiyon na gusto ninda. Sa kaagid na paagi, puwedeng gamiton ni Jehova an saiyang espiritu para liwaton an kaisipan kan mga tagapamahala para humiro sinda kauyon kan saiyang katuyuhan. Sa mga pagkakataon na iyan, napapahiro an mga nasa awtoridad na gumibo nin mga desisyon na makikinabang an banwaan nin Diyos.—Ikumparar an Esdras 7:21, 25, 26.

14. Kauyon kan Gibo 12:5, sairisay an puwede niyatong ipamibi?

¹⁴ Ano an puwede tang gibuhon? Puwede tang ipamibi “an mga hadi saka an gabos na may awtoridad” pag naggigibo sinda nin mga desisyon na magkakaigwa nin epekto sa satong buhay bilang Kristiyano asin sa satong ministeryo. (1 Tim. 2:1, 2, nota sa ibaba; Neh. 1:11) Arog kan ginibo kan mga Kristiyano kan inot na siglo, udok man kitang namimibi sa Diyos alang-alang sa satong mga tugang na nakapreso. (Basahon an Gibo 12:5; Heb. 13:3) Dugang pa, puwede tang ipamibi an mga guwardiya sa presuhan na nagbabantay sa satong mga tugang. Puwede kitang makimahirak ki Jehova na giyahan an kaisipan kan siring na mga indibidwal tanganing humiro sinda arog kan ginibo ni Julio asin trataron na may “kabuutan” an satong mga kapagtubod na nakapreso.—Gibo 27:3.

15-16. Paano tinabangan ni Jehova si Pablo paagi ki Aristarco asin Lucas?

¹⁵ Anong tabang an inako ni Pablo? Mantang nagbibiyahe pa-Roma, nagkapirang beses na  tinabangan ni Jehova si Pablo paagi sa mga kapagtubod. Pag-ulayan niyato an nagkapirang halimbawa.

¹⁶ Duwang maimbod na amigo ni Pablo, si Aristarco asin Lucas, an nagdesisyon na ibanan siya sa pagbiyahe pa-Roma. * Andam sindang isapeligro an saindang buhay para ibanan si Pablo, dawa ngani minalataw na pareho sinda dai nag-ako nin personal na asigurasyon hali ki Jesus na makakaabot sinda sa Roma. Naaraman nindang makakaligtas sinda kaidto sanang nasa peligrosong pagbiyahe na sinda sa barko. Kaya, kan magsakay si Aristarco saka Lucas sa barko sa Cesarea para ibanan siya, siguradong udok sa pusong namibi si Pablo ki Jehova na nagpapasalamat sa saiyang tabang paagi sa duwang kapagtubod na ini na makusog an buot.—Gibo 27:1, 2, 20-25.

17. Paano tinabangan ni Jehova si Pablo paagi sa saiyang mga kapagtubod?

¹⁷ Durante kan pagbiyahe ni Pablo, nagkapirang beses siyang tinabangan kan mga kapagtubod niya. Halimbawa, sa Sidon na sarong siyudad na may duungan, tinugutan ni Julio si Pablo na “makaduman sa mga amigo niya saka maasikaso ninda.” Asin dai nahaloy, sa siyudad nin Puteoli, si Pablo asin an saiyang mga amigo ‘may nanumpungan na mga tugang asin inagda sinda [kan mga tugang] na magpirmi sa sainda nin pitong aldaw.’ Mantang inaasikaso kan mga Kristiyano sa mga lugar na iyan an mga pangangaipo ni Pablo asin kan mga kaibanan niya, siguradong nakatao si Pablo nin dakulang kaugmahan sa mga nag-imbitar sa sainda paagi sa paghiras nin nakakapakusog na mga eksperyensiya. (Ikumparar an Gibo 15:2, 3.) Pagkatapos mapakusog, nagpadagos sa pagbiyahe si Pablo asin an mga amigo niya.—Gibo 27:3; 28:13, 14.

18. Ano an nakapahiro ki Pablo na pasalamatan an Diyos asin kumusog an buot?

¹⁸ Mantang nagbabaklay si Pablo pa-Roma, siguradong naisip niya an isinurat niya para sa kongregasyon sa siyudad na iyan tulong taon na an nakaagi: “Haloy ko na man na gustuhon na magdiyan sa saindo.” (Roma 15:23) Pero, dai niya inaasahan na maabot siya sa Roma bilang preso. Siguradong napakusog siya kan mahiling niya an mga tugang sa Roma na naghahalat sa  may tinampo tanganing sabaton siya! “Kan mahiling sinda ni Pablo, nagpasalamat siya sa Diyos asin kuminusog an saiyang buot.” (Gibo 28:15) Risahon na pinasalamatan ni Pablo an Diyos huli sa presensiya kan mga tugang. Taano? Huling nahiling giraray ni Pablo an tabang saiya ni Jehova paagi sa mga kapagtubod.

19. Arog kan sinambit sa 1 Pedro 4:10, paano kita puwedeng gamiton ni Jehova tanganing tabangan an mga nangangaipo?

¹⁹ Ano an puwede tang gibuhon? May aram ka daw na mga tugang sa saindong kongregasyon na nagsasakit huli sa hilang o kaya napapaatubang sa iba pang dipisil na mga sitwasyon? O tibaad nagadanan sinda nin mahal sa buhay. Kun maaraman ta na may nangangaipo nin tabang, puwede tang hagadon ki Jehova na tabangan kita na pahilingan sinda nin kabuutan asin pagkamuot paagi sa tataramon asin gibo. An satong tataramon asin gibo tibaad iyo an mismong pampakusog na kaipuhan kan satong tugang. (Basahon an 1 Pedro 4:10.) * An mga tinatabangan ta puwedeng magkaigwa giraray nin lubos na kumpiyansa na aplikado sa sainda an panuga ni Jehova na “Dai taka nuarin man tatalikudan, asin dai taka nuarin man papabayaan.” Bako daw na makakapaugma iyan sa saimo?

20. Taano ta may kumpiyansa kitang makakapagsabi: “Si Jehova an sakuyang paratabang”?

²⁰ Arog kan naeksperyensiyahan ni Pablo asin kan mga kaibanan niya, puwede man kitang mapaatubang sa arog-bagyong mga problema. Pero kasabay kaiyan, makusog an buot ta huling aram niyato na kaibanan ta si Jehova. Tinatabangan niya kita paagi ki Jesus asin sa mga anghel. Dugang pa, kun kauyon iyan kan saiyang katuyuhan, puwede kitang tabangan ni Jehova paagi sa mga nasa awtoridad. Asin arog kan naeksperyensiyahan kan dakul sa sato, ginagamit ni Jehova an saiyang banal na espiritu tanganing pahiruon an saiyang mga lingkod na tabangan an saindang Kristiyanong mga tugang. Kun siring, arog ni Pablo, masasabi niyato nin may kumpiyansa: “Si Jehova an sakuyang paratabang; dai ako matatakot. Ano an magigibo nin tawo sa sako?”—Heb. 13:6.