DAKUL na tugang na nag-imigrar kaidto sa ibang mga nasyon an nagbalik sa sadiri nindang nasyon. Huli sa pagkamuot ki Jehova asin sa saindang kapwa, nagbalyo sinda sa mga lugar na nangangaipong marhay nin mga parahayag kan Kahadian. (Mat. 22:37-39) Anong mga pagsasakripisyo an ginibo ninda, asin anong mga bendisyon an inako ninda? Para maaraman, hilingon ta an nasyon nin Cameroon sa sulnupan na parte kan Aprika.

Kan 1998, an brother na si Onésime nag-imigrar haling Cameroon. Katorseng taon siyang nag-istar sa ibang nasyon. Sarong aldaw, mantang nasa Kristiyanong pagtiripon, nadangog niya an sarong ilustrasyon manungod sa gibuhon na paghuhulit. Sinabi kan ispiker, “Kun duwang mag-amigo an naninira sa magkaibang lugar asin an saro mas dakul an nadadakop na sira, bako daw na an amigo na dikit an nadadakop mabalyo sa lugar na mas dakul an dakop?”

Huli sa ilustrasyon na iyan, naisip ni Onésime na bumalik sa mabungang lugar para sa espirituwal na paninira sa Cameroon tanganing tabangan an mga parahayag duman. Pero may mga ikinakahadit siya. Makaka-adjust daw siya giraray sa buhay sa Cameroon pagkatapos nin dakul na taon sa ibang nasyon? Tanganing maaraman, nagbisita si Onésime sa Cameroon sa laog nin anom na bulan. Dangan kan 2012, permanente na siyang naglipat duman.

Inistorya ni Onésime: “Kaipuhan kung mag-adjust sa mainit na klima saka sa paagi nin pamumuhay digdi. Sa Kingdom Hall, kaipuhan kong matuod giraray sa bakong komportableng mga tukawan. Pero mantang mas nagpopokus ako sa programa,” an nakangirit niyang sinabi, “dai ko na naiisip su kutson na mga tukawan.”

Kan 2013, pinakasalan ni Onésime si Géraldine, na nagbalik sa Cameroon pagkatapos mag-istar sa Pransia nin siyam na taon. Dahil ipinokus kan mag-agom an buhay ninda sa teokratikong mga aktibidad, anong mga bendisyon an inako ninda? Sinabi ni Onésime: “Magkaibanan kaming nagklase sa School for Kingdom Evangelizers asin naglingkod sa Bethel. Dai pa sana nahahaloy, 20 tinutukduan sa Bibliya an nabawtismuhan sa kongregasyon mi sa laog sana nin sarong taon. Namamatian ko ngunyan na yaon ako sa tamang lugar para ‘manira.’” (Mar. 1:17, 18) Sinabi man ni Géraldine: “Mas dakul na bendisyon an inako ko kisa sa ano man na inaasahan ko.”

Si Judith nagbalyo sa Estados Unidos pero mawot niya talagang pahiwason an saiyang ministeryo. Sinabi niya, “Sa kada pagbisita ko sa pamilya ko sa Cameroon, naghihibi ako pag mahali na ta kaipuhan kong bayaan an nagkapira na napunan ko nang ma-Bible study.” Pero, nagduwa-duwa si Judith na permanenteng magbalik sa Cameroon. May trabaho kaya siyang halangkaw an suweldo  na nagagamit niya para sa pagpabulong sa saiyang ama na nasa Cameroon. Alagad may pagtitiwala ki Jehova na nagbalyo si Judith sa Cameroon. Inadmitir niyang nami-miss niya an nagkapirang bagay na ikinakaugma niya kan yaon siya sa ibang nasyon. Namibi siya ki Jehova na tabangan siyang maka-adjust asin natabangan siya kan pampakusog na inako niya hali sa paraataman nin sirkito asin sa agom kaini.

Iniisip an mga nangyari, sinabi ni Judith, “Sa laog nin tulong taon, ugmahon ako ta nagkaigwa ako nin apat na aki sa espirituwal.” Nagpuon si Judith na maglingkod bilang sarong espesyal payunir kaiba kan saiyang agom. Ngunyan, naglilingkod siya kaiba kan saiyang agom na si Sam-Castel sa pansirkitong gibuhon. Pero anong nangyari sa ama ni Judith? Nakakua an saiyang pamilya nin ospital sa ibang nasyon na masagot kan operasyon kan saiyang ama. Marahay na sana ta nagin mapanggana an operasyon.

An brother na si Victor nagbalyo sa Canada. Pagkatapos mabasa an sarong artikulo sa Torrengbantayan manungod sa halangkaw na edukasyon, inisip niya an saiyang pag-eskuwela. Nagpundo siya sa pagklase sa unibersidad asin nagkua na sana nin halipot na technical course. Sinabi niya, “Huli kaiyan mas madali akong nagkatrabaho asin nagibo ko an haloy ko nang gustong gibuhon—an magpayunir.” Pag-abot nin panahon, napangagom ni Victor si Caroline, asin nagbisita sinda sa Cameroon. Mantang nagbibisita sa sangang opisina duman, dinagka sinda nin nagkapirang tugang na pag-isipan an posibilidad na maglingkod sa Cameroon. Sinabi ni Victor, “Mayo kaming rason para magsayuma, asin huling pinagdanay ming simple an samong buhay, inako mi an imbitasyon.” Dawa ngani may nagkapirang problema sa salud si Caroline, nagdesisyon sindang magbalyo.

Si Victor asin Caroline nagpuon na maglingkod sa Cameroon bilang mga regular payunir para maasikaso an nanumpungan nindang dakul na interesado sa ministeryo. Kan primero, dai ninda kaipuhan magtrabaho ta may igo man sindang tipon. Pagkatapos maubos an tipon, nagtrabaho sinda sa Canada nin pirang bulan dangan nagbalik sa Cameroon asin nagpadagos sa pagpayunir. Anong mga bendisyon an inako ninda? Nagklase sinda sa School for Kingdom Evangelizers, naglingkod bilang mga espesyal payunir, asin ngunyan naglilingkod bilang mga construction servant. Sinabi ni Victor, “Huling binayaan mi an komportableng buhay, naeksperyensiyahan mi an tabang ni Jehova.”

Kan 2002, si Alain, na sarong estudyante sa unibersidad sa Alemania, nabasa an tract na Mga Hoben—Ano an Gigibohon Nindo sa Saindong Buhay? An mga nabasa niya diyan nakapahiro saiya na magkaigwa nin bagong mga pasuhan. Kan 2006, nagklase siya sa Ministerial Training School asin iinasignar siya sa Cameroon, an nasyon na diyan siya ipinangaki.

Sa Cameroon, nakahanap si Alain nin part-time na trabaho. Paghaloy-haloy, nakakua siya nin trabaho na mas dakula an suweldo, pero nahadit siya ta tibaad mabawasan an saiyang nagigibo sa ministeryo. Kaya kan imbitaran siyang maglingkod bilang espesyal payunir, inako niya iyan tulos. Inalukan siya nin mas halangkaw na suweldo kan saiyang amo, pero dai niya iyan inako. Pag-abot nin panahon, pinakasalan ni Alain si Stéphanie, na nag-istar nin haloy sa Pransia. Anong mga kadipisilan an napaatubang ki Stéphanie pagbalyo sa Cameroon?

Sinabi ni Stéphanie: “Medyo nagkaigwa ako nin mga problema sa salud asin mga allergy, pero regular man akong nakakapabulong kaya okey na man ako.” Binendisyunan an mag-agom sa  saindang pakatagal. Nag-istorya si Alain: “Kan maghulit kami sa sarong napapasuway na baryo na inaapod na Katé, nakanumpong kami nin mga gustong mag-adal nin Bibliya. Pagkatapos, nakapagkondukta kami nin pag-adal sa sainda paagi sa cellphone. Duwa sa mga Bible study na iyan an nabawtismuhan, asin naestablisar duman an sarong grupo nin mga parahayag.” Sinabi pa ni Stéphanie: “Mayo nang mas nakakaugma pa kisa sa pagtabang sa mga tawo na idusay an saindang sadiri ki Jehova. Sa paglilingkod mi digdi, dakul na beses ming naeksperyensiyahan an kaugmahan na iyan.” Ngunyan, si Alain asin Stéphanie naglilingkod sa pansirkitong gibuhon.

Nabawtismuhan si Gisèle mantang nagkaklase sa sarong medical school sa Italia. Naghanga siya sa simpleng pamumuhay kan mag-agom na payunir na nagtutukdo saiya sa Bibliya, asin gusto niyang dakul pa an magibo sa ministeryo. Kaya nagpuon na magregular payunir si Gisèle mantang nag-eeskuwela.

Gusto ni Gisèle na magbalik sa Cameroon tanganing mas makapaglingkod nin lubos ki Jehova, pero may mga ikinakahadit siya. Sinabi niya, “Kinaipuhan kong butasan an sakong Italian residency asin maparayo sa mga amigo asin kapamilya na nasa Italia.” Dawa arog kaiyan, nagbalik si Gisèle sa Cameroon kan Mayo 2016. Pag-abot nin panahon, nagpakasal siya ki Léonce, asin irinekomendar kan sangang opisina sa Cameroon na magbalyo an mag-agom sa Ayos, na sarong banwa na nangangaipo nin dakul na parahayag kan Kahadian.

Kumusta man an buhay sa Ayos? Inistorya ni Gisèle: “Sa parati, pirang semanang mayong kuryente, kaya dai kami maka-charge kan cellphone mi. Haros dai mi iyan nagagamit. Nakanuod akong magluto na an panggatong kahoy, saka banggi kaming nagsasakdo sa burabod gamit an karumatilya asin flashlight dahil bako na masyadong matawo.” Paano nakatagal an mag-agom? Sinabi ni Gisèle: “Nakatabang sa samo an espiritu ni Jehova, an pagigin mapagsuportar mi sa lambang saro, asin an pampakusog saka an paminsan-minsan na pinansiyal na tabang kan mga kapamilya asin amigo.”

Maugma daw si Gisèle na nagbalik siya sa saiyang sadiring lugar? “Iyo! Mayong duda,” an sabi niya. “Sa primero, igwa nin mga kadipisilan saka pagkadisganar, pero kan mapangganahan mi na iyan, namatian mi ni agom na ginibo mi an mismong kaipuhan ming gibuhon. Nagtiwala kami ki Jehova asin nagin mas dayupot sa saiya.” Nagklase si Léonce asin Gisèle sa School for Kingdom Evangelizers, asin ngunyan naglilingkod bilang mga temporaryong espesyal payunir.

Arog nin mga parasira na inaatubang an manlain-lain na kamugtakan para makadakop nin dakul na sira, an mga nagbabalik sa saindang sadiring nasyon andam na gumibo nin mga pagsasakripisyo para tabangan an mga tawong tama an kamugtakan nin puso na naghihimati sa mensahe kan Kahadian. Siguradong gigirumdumon ni Jehova an mahigos na mga parahayag na ini huli sa pagkamuot na ipinahiling ninda para sa saiyang ngaran. (Neh. 5:19; Heb. 6:10) Kun ika nasa ibang nasyon asin nangangaipo nin mga parahayag kan Kahadian sa saimong sadiring nasyon, puwede ka daw bumalik? Kun gigibuhon mo iyan, nagsusupay na bendisyon an naghahalat sa saimo.—Tal. 10:22.