1-2. (a) Taano ta dapat magtiwala ki Jehova an mga bagong kasal? (Salmo 37:3, 4) (b) Ano an pag-uulayan ta sa artikulong ini?

MADALI ka na daw ikasal o bagong kasal pa sana? Kun iyo, siguradong hinahalat-halat mo na an maugmang buhay kaiba kan tawong namumutan mong marhay. Siyempre, an buhay may agom may mga problema man asin igwa nin mahalagang mga desisyon na kaipuhan gibuhon. An paagi nindo nin pag-atubang sa mga problema asin an mga desisyon na gigibuhon nindo magkakaigwa nin epekto sa kaugmahan nindong mag-agom sa maabot na mga taon. Kun nagtitiwala kamo ki Jehova, makakagibo kamo nin madunong na mga desisyon, magigin mas makusog an saindong pag-aguman, asin magigin mas maugma kamo. Kun dai nindo susunudon an mga sadol nin Diyos, posibleng marhay na makaeksperyensiya kamo nin mga kadipisilan na maresulta nin mga problema sa saindong pag-aguman asin dai kamo magigin maugma.—Basahon an Salmo 37:3, 4.

² Dawa ngani an artikulong ini para sa mga bagong kasal, pag-uulayan digdi an mga problema na puwedeng mapaatubang sa gabos na mag-agom. Itatampok digdi an mga manunudan ta sa halimbawa kan nagkapirang maimbod na lalaki asin babayi sa Bibliya. An mga halimbawang ini sa Bibliya matukdo sato nin mga leksiyon na puwede tang magamit sa manlain-lain na aspekto kan buhay, kaiba an pag-aguman. Aaramon ta man an manunudan ta sa mga eksperyensiya kan nagkapirang mag-agom sa presenteng panahon.

3-4. Anong mga problema an posibleng mapaatubang sa mga bagong kasal?

³ Tibaad may mga magdagka sa bagong kasal na magkaigwa kan inaapod nindang normal na buhay. Halimbawa, an mag-agom tibaad sabihan kan saindang mga magurang asin iba pang paryente na mag-aki tulos. O tibaad an mga amigo asin kapamilya na may marahay man na intensiyon dagkahon an bagong kasal na magbakal nin harong asin panuon iyan nin mga gamit.

⁴ Kun dai magigin maingat an bagong kasal, tibaad makagibo sinda nin mga desisyon na magigin dahilan na magkaigwa sinda nin dakul na utang. Huli kaiyan, tibaad kaipuhan kan mag-agom na parehong magtrabaho nin dakul na oras tanganing mabayadan an mga utang na iyan. Puwedeng luway-luway na kuanon kan sekular na trabaho an panahon na dapat kutang gamiton sa personal na pag-adal nin Bibliya, pampamilyang pagsamba, asin sa ministeryo. Tibaad ngani an mag-agom dai makaatender sa mga pagtiripon para mag-overtime sa trabaho tanganing magkaigwa nin dagdag na kuwarta o tanganing dai sinda mawaran nin trabaho. Bilang resulta, napapalampas ninda an magagayon na oportunidad na mapahiwas an saindang paglilingkod ki Jehova.

5. Ano an nanudan mo sa halimbawa ni Klaus asin Marisa?

⁵ Ipinapahiling kan mga eksperyensiya na an pagpokus kan satong buhay sa pagkua nin materyal na mga bagay dai nagtatao nin kaugmahan. Manungod digdi, pag-isipan an nanudan kan mag-agom na si Klaus asin Marisa. * Kan ikasal sinda, pareho sindang nagtatrabaho nin full-time tanganing magkaigwa sinda nin komportableng buhay. Pero bako talaga sindang maugma. Sinabi ni Klaus: “Sobra pa sa kinakaipuhan mi an materyal na mga bagay na igwa kami, pero mayo kaming espirituwal na mga pasuhan. Sa totoo lang, komplikado saka nakaka-stress an buhay mi.” Tibaad narisa mo man na an pagpokus sa pagkamit nin materyal na mga bagay dai nagtatao sa saimo nin pagkakontento. Kun arog kaiyan, dai ka madisganar. An pagkonsiderar sa marahay na mga halimbawa kan iba makakatabang sa saimo sa bagay na ini. Inot, pag-ulayan ta kun ano an manunudan kan mga agom na lalaki sa halimbawa ni Hading Jehosafat.

6. Kauyon kan sadol na nasa Talinhaga 3:5, 6, paano inatubang ni Hading Jehosafat an sarong dakulang problema?

⁶ Mga agom na lalaki, kun minsan daw namamati nindo na nagagabatan na kamo sa saindong responsabilidad? Kun iyo, matatabangan kamo kan halimbawa ni Hading Jehosafat. Bilang hadi, paninimbagan ni Hading Jehosafat an kapakanan kan bilog na nasyon! Paano niya nagibo an pambihirang responsabilidad na iyan? Ginibo ni Jehosafat an pinakamakakaya niya tanganing protektaran an nasyon. Pinasarig niya an mga siyudad kan Juda asin nagbilog siya nin sarong dakulang hukbo na may labing 1,160,000 na suldados. (2 Cron. 17:12-19) Dai nahaloy, napaatubang si Jehosafat sa sarong dakulang problema. Sarong dakulang hukbo nin mga Ammonita, Moabita, asin mga lalaking hali sa kabukidan nin Seir  an gustong sumalakay sa saiya, sa saiyang pamilya, asin sa saiyang banwaan. (2 Cron. 20:1, 2) Ano an ginibo ni Jehosafat? Nagdulok siya ki Jehova para sa tabang asin kusog. Kauyon ini kan madunong na sadol na nasa Talinhaga 3:5, 6. (Basahon.) Mahihiling sa may kapakumbabaan na pamibi ni Jehosafat na nasa 2 Cronica 20:5-12 kun gurano siya nagtitiwala sa saiyang mamumuton na Ama sa langit. Paano sinimbag ni Jehova an pamibi ni Jehosafat?

7. Paano sinimbag ni Jehova an pamibi ni Jehosafat?

⁷ Nakipag-ulay si Jehova ki Jehosafat paagi sa sarong Levita na an pangaran Jahaziel. Sinabi ni Jehova: “Pumuwesto lang kamo, magdanay na nakatindog, asin hilingon an pagliligtas sa saindo ni Jehova.” (2 Cron. 20:13-17) Bako talagang arog kaiyan an ginigibo sa sarong ralaban! Alagad, an mga instruksiyon na iyan bakong hali sa sarong tawo; hali iyan ki Jehova. Lubos na nagtitiwala sa saiyang Diyos, ginibo ni Jehosafat an sinabi sa saiya. Kan siya asin an saiyang banwaan magluwas tanganing atubangon an kalaban, ibinugtak niya sa inutan kan saiyang hukbo, bako an pinakamatitibay na suldados, kundi an daing armas na mga parakanta. Dai ni Jehova pinabayaan si Jehosafat; dinaog niya an kalaban na hukbo.—2 Cron. 20:18-23.

8. Ano an manunudan kan mga agom na lalaki sa halimbawa ni Jehosafat?

⁸ Mga agom na lalaki, may manunudan kamo sa halimbawa ni Jehosafat. Paninimbagan nindo an kapakanan kan saindong pamilya, kaya nagmamaigot kamo na protektaran asin suportaran an saindong pamilya. Pag napapaatubang kamo sa mga problema, tibaad isipon nindo na kayang-kaya nindong solusyunan an saindong problema. Minsan siring, likayan an tendensiya na magtiwala sa saindong sadiring kusog. Imbes, personal na mamibi ki Jehova para sa tabang. Mamibi man nin udok kaiba kan saindong agom. Magpagiya ki Jehova paagi sa pag-adal kan Bibliya asin kan mga publikasyon na itinatao kan organisasyon nin Diyos, asin iaplikar an mga sadol na yaon diyan. An iba tibaad dai mag-uyon sa mga desisyon nindong basado sa Bibliya asin tibaad ngani sabihon pa nindang kamangmangan an mga desisyon na iyan. Tibaad sabihon ninda na an kuwarta asin an mga bagay na mababakal kaiyan iyo an magtatao kan pinakamarahay na proteksiyon para sa saindong pamilya. Pero girumdumon an halimbawa ni Jehosafat. Nagtiwala siya ki Jehova asin pinatunayan iyan paagi sa saiyang mga ginibo. Dai binayaan ni Jehova an maimbod na lalaking iyan, asin dai man niya kamo babayaan. (Sal. 37:28; Heb. 13:5) Ano an magigibo kan mga mag-agom tanganing masigurado na magigin maugma an saindang buhay bilang mag-agom?

9. Ano an masasabi ta manungod ki propeta Isaias asin sa saiyang agom?

⁹ An propetang si Isaias asin an saiyang agom isinentro an saindang buhay sa paglilingkod ki Jehova. Sarong propeta si Isaias, asin posibleng marhay na an saiyang agom nagkaigwa man nin asignasyon na magpropesiya huling inapod ini na “propetisa.” (Isa. 8:1-4) Malinaw na bilang mag-agom, si Isaias asin an saiyang agom nagpokus sa pagsamba ki Jehova. Marahayon nanggad na halimbawa sinda para sa mga mag-agom ngunyan!

10. Paano an pag-adal sa mga propesiya sa Bibliya makakatabang sa mga mag-agom na magin determinado na gibuhon an pinakamakakaya ninda para ki Jehova?

¹⁰ Puwedeng isentro kan mga mag-agom ngunyan an saindang buhay sa paglilingkod ki Jehova paagi sa paggibo kan saindang pinakamakakaya sa paglilingkod sa saiya. Puwede nindang mapakusog an saindang pagtitiwala ki Jehova paagi sa magkaibanan na pag-adal kan mga propesiya sa Bibliya asin pag-aram kun paano an mga iyan nauutob. * (Tito 1:2) Puwede nindang hurop-hurupon  kun paano sinda makakatabang sa kautuban kan nagkapirang propesiya sa Bibliya. Halimbawa, puwede sindang magkaigwa nin kabtang sa kautuban kan propesiya ni Jesus na an maugmang bareta ihuhulit sa bilog na daga bago mag-abot an katapusan. (Mat. 24:14) Mantang an mag-agom urog na nagigin sigurado na nauutob an mga propesiya sa Bibliya, nag-uurog man an saindang determinasyon na gibuhon an pinakamakakaya ninda para ki Jehova.

11. Ano an nagibo ni Priscila asin Aquila, asin taano?

¹¹ An hoben pang mga mag-agom makakanuod ki Priscila asin Aquila, sarong mag-agom na Judio na nakaistar sa siyudad nin Roma. Naaraman ninda an maugmang bareta manungod ki Jesus asin nagin mga Kristiyano. Daing duda na maugma sinda sa saindang buhay. Alagad biglang nagbago an buhay ninda kan ipagbuot ni Emperador Claudio na magharali sa Roma an gabos na Judio. Isip-isipa na sana an nagin epekto kaiyan ki Aquila asin Priscila. Kinaipuhan nindang bayaan an kinatudan nindang lugar, magtugdok nin bagong harong, asin punan giraray an negosyo nindang paggibo nin tolda sa bagong lugar. An mga kaulangan daw na ini sa saindang buhay magigin dahilan na dai na ninda inuton an intereses kan Kahadian? Posibleng marhay na aram na nindo an simbag. Sa saindang bagong harong sa Corinto, nagtabang si Aquila asin Priscila sa lokal na kongregasyon asin nakipagtabangan ki apostol Pablo para pakusugon an mga tugang duman. Pag-abot nin panahon, nagbalyo sinda sa iba pang mga banwa kun sain mas nangangaipo nin mga parahulit. (Gibo 18:18-21; Roma 16:3-5) Sarong mabunga asin nakakaugmang buhay nanggad an igwa sinda!

12. Taano ta dapat na magkaigwa nin espirituwal na mga pasuhan an mag-agom?

¹² An mga mag-agom sa presenteng panahon maaarog si Priscila asin Aquila paagi sa pag-inot kan intereses kan Kahadian. An panahon nin pag-ilusyunan iyo an pinakamarahay na panahon na pag-ulayan kan duwa an saindang mga pasuhan sa buhay. Pag magkaibanan sindang naggigibo nin mga desisyon asin nagtatabangan na maabot an saindang espirituwal na mga pasuhan, igwa sinda nin dakul na oportunidad na mahiling an pagtabang sainda ni Jehova. (Ecl. 4:9, 12) Pag-isipan an eksperyensiya ni Russell asin Elizabeth. Sinabi ni Russell, “Kan magkailusyon pa sana kami, espesipiko ming pinag-ulayan  an samong espirituwal na mga pasuhan.” Sinabi ni Elizabeth, “Pinag-ulayan mi ’yan ta kun mapaatubang kami sa mga pagdedesisyon, masisigurado mi na an samong mga desisyon dai makakaulang sa pag-abot kan mga pasuhan na idto.” Itinugot kan kamugtakan ni Russell asin Elizabeth na magbalyo sinda sa Micronesia tanganing maglingkod kun sain mas dakula an pangangaipo para sa mga parahayag.

13. Sigun sa Salmo 28:7, ano an magigin resulta pag nagtitiwala kita ki Jehova?

¹³ Arog ni Russell asin Elizabeth, dakul na mag-agom an nagdesisyon na pasimplehon an saindang buhay tanganing makatao nin pinakadakul na panahon na posible sa gibuhon na paghuhulit asin pagtutukdo. Pag an mag-agom igwa nin kapaki-pakinabang na mga pasuhan sa paglilingkod ki Jehova dangan nagtatabangan sinda na maabot iyan, magkakaigwa iyan nin magayon na mga resulta. Mahihiling ninda kun paano sinda inaataman ni Jehova, matalubo an saindang pagtitiwala sa saiya, asin magigin sindang tunay na maugma.—Basahon an Salmo 28:7.

14. Paano ipinahiling ni apostol Pedro asin kan saiyang agom na nagtitiwala sinda sa panuga na nasa Mateo 6:25, 31-34?

¹⁴ Makakanuod man an mga mag-agom sa halimbawa ni apostol Pedro asin kan saiyang agom. Pakalihis nin mga anom na bulan sagkod sarong taon pakatapos na inot na mamidbid ni apostol Pedro si Jesus, kinaipuhan niyang gumibo nin importanteng desisyon. An hanapbuhay ni Pedro iyo an paninira. Kaya kan imbitaran ni Jesus si Pedro na sumunod sa saiya nin bilog na panahon, kinaipuhan ni Pedro na pag-isipan an sitwasyon kan saiyang pamilya. (Luc. 5:1-11) Pinili ni Pedro na umiba ki Jesus sa gibuhon na paghuhulit kaini. Madunong na desisyon iyan! Asin may marahay kitang dahilan na an desisyon ni Pedro sinuportaran kan saiyang agom. Sinasabi kan Bibliya na pagkatapos buhayon liwat si Jesus, may mga panahon na iniibanan si Pedro kan saiyang agom. (1 Cor. 9:5) Daing duda, an saiyang halimbawa bilang Kristiyanong agom na babayi nagtao ki Pedro nin katalingkasan sa pagtaram tanganing isurat an ipinasabong na sadol para sa Kristiyanong mga agom na lalaki asin babayi. (1 Ped. 3:1-7) Malinaw na si Pedro asin an saiyang agom parehong nagtiwala sa panuga ni Jehova na kun iinuton ninda sa saindang buhay an Kahadian, itatao niya an mga pangangaipo ninda.—Basahon an Mateo 6:25, 31-34.

15. Ano an nanudan nindo sa eksperyensiya ni Tiago asin Esther?

¹⁵ Kun kamo nagkapirang taon nang mag-agom, paano nindo padagos na makukultibar an pagmawot na pahiwason an saindong ministeryo? An sarong paagi iyo an paghurop-hurop sa mga eksperyensiya kan ibang mag-agom. Halimbawa, puwede nindong basahon an serye na “Gikan sa Buot na Iprinesentar an Saindang Sadiri.” An mga artikulong iyan nakatabang ki Tiago asin Esther, na sarong mag-agom na taga Brazil, na magkaigwa nin makusog na pagmawot na maglingkod kun sain mas dakula an pangangaipo. Sinabi ni Tiago: “Mantang binabasa mi an mga eksperyensiya kun paano tinabangan ni Jehova an saiyang mga lingkod sa presenteng panahon, gusto mi man na mamati an paggiya samo asin pag-ataman samo ni Jehova.” Pag-abot nin panahon nagbalyo sinda sa Paraguay kun sain puon kan 2014, naglilingkod sinda sa teritoryong an mga tawo nagtataram nin Portuguese. Sinabi ni Esther: “An sarong teksto na gustong-gusto mi iyo an Efeso 3:20. Pauruutro mi nang napatunayan na totoo an mga tataramon na ini sa samong paglilingkod ki Jehova.” Sa surat na iyan sa mga taga Efeso, sinabi ni Pablo na si Jehova matao nin mas lampas pa kisa sa hinahagad ta. Totoo nanggad iyan!

16. Siisay an puwedeng kaulayon kan hoben na mga mag-agom pag ineebalwar ninda an saindang mga pasuhan sa buhay?

¹⁶ An hoben na mga mag-agom ngunyan makikinabang  sa mga eksperyensiya kan mga nakanuod na magsarig ki Jehova. May mga mag-agom na dakul na dekada nang naglilingkod sa bilog na panahon na ministeryo. Taano ta dai sinda kaulayon tanganing tabangan kamong ebalwaron an saindong mga pasuhan? Saro pa ining paagi na maipapahiling nindo na nagtitiwala kamo ki Jehova. (Tal. 22:17, 19) Matatabangan man kan mga elder an hoben na mga mag-agom na magkaigwa nin espirituwal na mga pasuhan asin abuton iyan.

17. Ano an nangyari ki Klaus asin Marisa, asin ano an manunudan ta sa saindang eksperyensiya?

¹⁷ Pero kun minsan, an desisyon ta na pahiwason an satong paglilingkod tibaad dai mangyari sa paaging inaasahan ta. Iyan an nangyari ki Klaus asin Marisa, na sinambit sa kapinunan. Pakalihis nin tulong taon pagkakasal ninda, naghali sinda sa saindang lugar asin nagboluntaryo sa gibuhon na pagtugdok sa sangang opisina sa Finland. Minsan siring, naaraman ninda na dai sinda puwedeng mag-istar duman nin lampas sa anom na bulan. Kan inot, nadisganar sinda. Pero dai nahaloy, inimbitaran sinda na mag-atender sa sarong kurso sa pag-adal nin lengguwaheng Arabic, asin ngunyan maugma sindang naglilingkod sa ibang nasyon sa teritoryong an mga tawo nagtataram nin lengguwaheng Arabic. Sa paggirumdom, sinabi ni Marisa: “Nakakatakot na bayaan kun ano an kinatudan mo na asin na magtiwala nin lubos ki Jehova. Pero nahiling ko kun paano kami pirming tinatabangan ni Jehova sa dai inaasahan na mga paagi. Kan maeksperyensiyahan ko ini, mas lalong nagkusog an pagtitiwala ko ki Jehova.” Arog kan ipinapahiling kan halimbawang ini, makakasigurado ka na pirmi kang tatawan nin balos ni Jehova kun lubos kang magtitiwala sa saiya.

18. Ano an magigibo kan mga mag-agom tanganing mapagdanay ninda an saindang pagtitiwala ki Jehova?

¹⁸ An pag-aguman sarong regalo hali ki Jehova. (Mat. 19:5, 6) Gusto niya na ikaugma kan mga mag-agom an regalong iyan. (Tal. 5:18) Mga hoben na mag-agom, ano an ginigibo nindo sa saindong buhay? Ginigibo daw nindo an gabos tanganing ipahiling ki Jehova kun gurano nindo inaapresyar an mga regalo na itinao niya sa saindo? Makipag-ulay ki Jehova paagi sa pamibi. Hanapon sa saiyang Tataramon an mga prinsipyo na aplikado sa saindong sitwasyon. Dangan sunudon an sadol na itinatao saindo ni Jehova. Makakasigurado kamo na magkakaigwa kamo nin maugma saka nakakakontentong buhay kun isesentro nindo an saindong pag-aguman sa paglilingkod ki Jehova!