1-2. Ano an marahay na mga dahilan niyato sa pagpahiling nin maimbod na pagkamuot sa lambang saro?

MAY marahay na mga dahilan kita para ipahiling an maimbod na pagkamuot sa lambang saro. Ano an nagkapira kaiyan? Mangnuhon kun paano sinisimbag an hapot na iyan kan minasunod na ipinasabong na mga talinhaga: “Dai mo pagtugutan na bayaan ka kan maimbod na pagkamuot asin kaimbudan. . . . Sa siring, makakakua ka nin pag-uyon asin ibibilang kang may marahay na pakasabot, sa mata nin Diyos asin nin tawo.” “An tawong may maimbod na pagkamuot nagdadara sa sadiri niya nin pakinabang.” “An siisay man na nagmamaigot na magpahiling nin katanusan asin maimbod na pagkamuot makakanumpong nin buhay.”—Tal. 3:3, 4; 11:17, nota sa ibaba; 21:21.

² An mga talinhagang ini nagsambit nin tulong dahilan kun taano ta dapat kitang magpahiling nin maimbod na pagkamuot. Inot, nagigin mahalagang marhay kita sa paghiling nin Diyos pag nagpapahiling kita nin maimbod na pagkamuot. Ikaduwa, nakikinabang mismo kita pag nagpapahiling kita nin maimbod na pagkamuot. Halimbawa, nagkakaigwa kita nin nagdadanay na pakikiamigo. Ikatulo, mag-aako kita nin mga bendisyon sa maabot na panahon, kaiba na an buhay na daing katapusan pag nagmamaigot kita na magpahiling nin maimbod na pagkamuot. May marahay na mga dahilan nanggad kita sa pagsunod sa pagirumdom ni Jehova: “Magpahiling kamo nin maimbod na pagkamuot saka nin pagkahirak sa pagtratar nindo sa lambang saro.”—Zac. 7:9.

3. Anong mga hapot an pag-uulayan ta sa artikulong ini?

³ Sa artikulong ini, pag-uulayan ta an simbag sa apat na hapot. Kiisay kita dapat na magpahiling nin maimbod na pagkamuot? Ano an manunudan ta sa libro nin Ruth manungod sa pagpahiling nin maimbod na pagkamuot? Paano kita makakapahiling nin maimbod na pagkamuot  ngunyan? Anong mga pakinabang an kakamtan kan mga nagpapahiling nin maimbod na pagkamuot?

4. Paano ta maaarog si Jehova sa pagpahiling nin maimbod na pagkamuot? (Marcos 10:29, 30)

⁴ Arog kan nanudan ta sa sinundan na artikulo, an maimbod na pagkamuot ni Jehova—an nagdadanay na pagkamuot niya—para sana duman sa mga namumuot saiya asin naglilingkod saiya. (Dan. 9:4) Gusto tang “magin paraarog . . . sa Diyos, bilang mga aking namumutan.” (Efe. 5:1) Sa dahilan na iyan, gusto tang magpahiling nin pagkamuot sa satong mga tugang sa espirituwal—sarong hararom asin nagdadanay na pagkamuot.—Basahon an Marcos 10:29, 30.

5-6. Ano sa parati an kahulugan kan terminong “kaimbudan,” o “loyalty”?

⁵ Siguradong mauyon ka na pag mas nasasabutan ta an kahulugan kan maimbod na pagkamuot, mas maipapahiling ta iyan sa satong mga kapwa parasamba. Para mapararom an satong pakasabot manungod sa maimbod na pagkamuot, hilingon ta kun paano iyan ikinukumparar sa termino na parating ginagamit kan mga tawo, an kaimbudan o loyalty. Hilingon ta an sarong halimbawa.

 ⁶ Sa ngunyan, an sarong empleyado na nagtrabaho sa sarong kompanya sa laog nin dakul na taon puwedeng apudon na sarong maimbod o loyal na empleyado. Pero sa gabos na taon na pagtrabaho niya sa kompanya, tibaad dai niya pa lamang personal na nakaulay an siisay man sa mga direktor kan kompanya. Tibaad dai man siya pirming uyon sa mga palisiya kan kompanyang iyan. Dai niya gusto an kompanya, pero maugma siya ta igwa siya nin trabaho na nagtatao saiya nin suweldo. Matrabaho siya diyan sagkod na magretiro siya, apuwera na sana kun may mag-alok saiya nin mas marahay na trabaho.

7-8. (a) Ano an nagmomotibar sa saro para magpahiling nin maimbod na pagkamuot? (b) Taano ta kokonsideraron ta an nagkapirang teksto sa libro nin Ruth?

⁷ An pagkakaiba kan kaimbudan na napag-ulayan sa  parapo 6 asin kan maimbod na pagkamuot iyo an motibo kan tawong nagpapahiling kaiyan. Sa Bibliya, anong motibo an lataw na lataw sa pagpahiling nin maimbod na pagkamuot kan mga lingkod nin Diyos? An mga nagpahiling nin maimbod na pagkamuot, ginibo ninda iyan bako dahil sa kaipuhan nindang gibuhon iyan kundi dahil sa gusto nindang gibuhon iyan. Pag-isipan an halimbawa ni David. Napahiro siya na magpahiling nin maimbod na pagkamuot sa saiyang namumutan na amigo na si Jonathan dawa ngani gusto siyang gadanon kan ama kaini. Pakalihis nin mga taon pagkagadan ni Jonathan, padagos pa man giraray na nagpahiling nin maimbod na pagkamuot si David sa aki ni Jonathan na si Mefiboset.—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Dakul pa kitang manunudan manungod sa maimbod na pagkamuot paagi sa pagkonsiderar sa nagkapirang teksto sa libro kan Bibliya na Ruth. Anong mga leksiyon manungod sa maimbod na pagkamuot an manunudan ta sa mga panginot na karakter sa librong iyan? Paano ta maiaaplikar an mga leksiyon na ini sa satong kongregasyon? *

9. Taano ta naisip ni Noemi na si Jehova nagin laban sa saiya?

⁹ Sa libro nin Ruth, mababasa ta an istorya manungod ki Noemi, sa saiyang manugang na si Ruth, asin sa sarong lalaki na may takot sa Diyos na si Boaz na paryente kan agom ni Noemi. Huli sa tiggutom sa Israel, nagbalyo sa Moab si Noemi, an saiyang agom, asin an saiyang duwang aking lalaki. Mantang yaon duman, nagadan an agom ni Noemi. An saiyang duwang aking lalaki nag-agom, pero makamumundo, nagadan man an mga ini. (Ruth 1:3-5; 2:1) An mamundong mga pangyayaring idto nagin dahilan para pangluyahan na marhay nin buot si Noemi. Grabe nanggad an nagin  pagmundo niya kaya inisip niya na si Jehova nagin laban sa saiya. Risahon kun paano niya ipinahayag an saiyang namamatian manungod sa Diyos: “Nagin laban sako an kamot ni Jehova.” “An sakuyang buhay ginibo nanggad na mapait kan Makakamhan sa Gabos.” Sinabi niya pa: “Si Jehova na ngani an nagin laban sa sako asin an Makakamhan sa Gabos na mismo an nagpaabot sa sako nin trahedya.”—Ruth 1:13, 20, 21.

10. Ano an nagin reaksiyon ni Jehova sa may kapaitan na mga tataramon ni Noemi?

¹⁰ Ano an nagin reaksiyon ni Jehova sa may kapaitan na mga tataramon ni Noemi? Dai niya binayaan an saiyang napupurisaw na marhay na lingkod. Imbes, nagpahiling siya nin empatiya ki Noemi. Nasasabutan ni Jehova na “an pang-aapi puwedeng makapabua sa sarong madunong.” (Ecl. 7:7) Kaipuhan pa man giraray nin tabang ni Noemi para mahiling niya na dai siya binayaan ni Jehova. Anong tabang an itinao nin Diyos? (1 Sam. 2:8) Pinahiro niya si Ruth na magpahiling nin maimbod na pagkamuot ki Noemi. Gikan sa buot asin mamumuton na tinabangan ni Ruth an saiyang panugangan para dai na ini pangluyahan na marhay nin buot asin mamati na namumutan pa man giraray siya ni Jehova. Ano an manunudan ta sa halimbawa ni Ruth?

11. Taano ta tinatabangan kan mamumuton na mga tugang an mga nasa kasakitan?

¹¹ Pinapahiro kita kan maimbod na pagkamuot na tabangan an mga nasa kasakitan. Arog ni Ruth na nagdanay na kaiba ni Noemi, an mamumuton na mga tugang ngunyan andam man na magdanay kaiba kan mga tugang sa kongregasyon na nagmumundo nin grabe o nade-depress. Namumutan ninda an saindang mga tugang, asin gusto nindang gibuhon an pinakamakakaya ninda para tabangan sinda. (Tal. 12:25, nota sa ibaba; 24:10) Kauyon ini kan sadol ni apostol Pablo: “Magtaram na may pagranga sa mga nagmumundo nin grabe, alalayan an mga maluya, magin mapasensiya sa gabos.”—1 Tes. 5:14.

12. Ano sa parati an pinakaepektibong paagi para tabangan an sarong tugang na pinangluluyahan nin buot?

¹² Sa parati, an pinakaepektibong paagi para matabangan mo an sarong tugang na pinangluluyahan nin buot iyo na dangugon siya asin ipaaram saiya na namumutan mo siya. An saimong pagtao nin mamumuton na atensiyon sa saro sa mahalagang marhay na karnero ni Jehova siguradong nahihiling kan satong Diyos. (Sal. 41:1) Sinasabi sa Talinhaga 19:17: “An saro na nagpapahiling nin kabuutan sa tawong hamak nagpapautang ki Jehova, asin babayadan Niya siya sa mga ginibo niya.”

13. Ano an pagkakaiba ni Ruth ki Orpa, asin taano ta an desisyon ni Ruth pagpahiling nin maimbod na pagkamuot? (Hilingon an ritrato sa cover.)

¹³ Mas masasabutan ta pa an manungod sa maimbod na pagkamuot kun kokonsideraron ta kun ano an nangyari ki Noemi pagkagadan kan saiyang agom asin kan saiyang duwang aking lalaki. Kan mabaretaan ni Noemi na “binebendisyunan na giraray ni Jehova an saiyang banwaan paagi sa pagtao sainda nin kakanon,” nagdesisyon siya na magbalik sa saiyang sadiring lugar. (Ruth 1:6) Kaiba niya sa pagbaklay pabalik an saiyang duwang manugang. Alagad mantang nasa dalan, tulong beses na sinabihan ni Noemi an duwang babayi na  magbalik sa Moab. Anong nangyari? Mababasa ta: “Hinadukan ni Orpa an panugangan niya asin naghali na. Pero si Ruth nagdanay na kaibanan kan panugangan niya.” (Ruth 1:7-14) Kan pilion ni Orpa na magbalik, sinunod lang niya an sinabi ni Noemi, an magbalik sa Moab. Pero si Ruth, dai iyan ginibo. Puwedeng-puwede man kuta siyang magbalik, pero dahil sa maimbod na pagkamuot nagdesisyon siya na magdanay kaiba ni Noemi. (Ruth 1:16, 17) Pinili ni Ruth na magdanay kaiba ni Noemi, bako dahil kaipuhan niyang gibuhon iyan, kundi dahil gusto niyang gibuhon iyan. An desisyon ni Ruth pagpahiling nin tunay na maimbod na pagkamuot. Ano an manunudan ta sa pangyayaring ini?

14. (a) Ano an pinili na gibuhon kan satong mamumuton na mga tugang ngunyan? (b) Sigun sa Hebreo 13:16, anong mga pagsasakripisyo an nakakapaugma sa Diyos?

¹⁴ Pinapahiro kita kan maimbod na pagkamuot na gibuhon an labi pa sa inaasahan. Arog kaidto, dakul na mga tugang ngunyan an pinili na magpahiling nin maimbod na pagkamuot sa mga kapagtubod, dawa duman sa mga dai pa ninda kabisto. Halimbawa, pag naaraman nindang may nangyaring kalamidad, inaaram tulos ninda kun paano sinda makakatabang. Pag may kakongregasyon na nasasakitan sa pagbuhay, dai sinda nag-aalangan na kontakon an tugang na iyan asin tabangan sa praktikal na mga paagi. Arog kan mga taga Macedonia kan inot na siglo, ginigibo ninda an labi pa sa inaasahan. Nagsasakripisyo sinda na itinatao an “labi pa ngani sa makakaya ninda” para tabangan an mga nagtitios nindang mga tugang. (2 Cor. 8:3) Siguradong nauugma si Jehova sa mga nagpapahiling kan arog kaiyan na pagkamuot!—Basahon an Hebreo 13:16.

15-16. Paano ipinahiling ni Ruth na pursigido siya?

¹⁵ Dakul kitang manunudan na marahayon na mga leksiyon paagi sa pagsiyasat sa kun paano tinabangan ni Ruth si Noemi. Pag-ulayan ta an nagkapira.

¹⁶ Magin pursigido. Kan sabihon ni Ruth na gusto niyang ibanan pabalik sa Juda an panugangan niyang si Noemi, nagsayuma ini kan inot. Pero dai nagpundo si Ruth. Ano an nagin resulta? “Kan mahiling ni Noemi na talagang desidido si Ruth na mag-iba sa saiya, dai na niya ini pinirit na magpuli.”—Ruth 1:15-18.

17. Ano an makakatabang sato tanganing dai kita tulos magpundo sa pagtabang?

¹⁷ Leksiyon: Kaipuhan an pasensiya para tabangan an mga nagmumundo nin grabe, alagad dai kita dapat magpundo sa pagtabang sa sainda. An sarong sister na nangangaipo nin tabang tibaad sa inot sayumahan an tabang ta. * Pero, papahiruon kita kan maimbod na pagkamuot na gibuhon an pinakamakakaya ta para magdanay kaiba niya. (Gal. 6:2) Naglalaom kita na aakuon niya man giraray an satong pakikiamigo asin na tutugutan niya kita na rangahon siya sa grabeng kamunduan.

18. Ano an siguradong nakakulog sa buot ni Ruth?

¹⁸ Dai magkulog an buot. Kan mag-abot si Noemi asin Ruth sa Betlehem, nahiling giraray ni Noemi an dati niyang mga pagtaraid. Sinabi niya sa sainda: “Yaon sako an gabos kan maghali ako, pero pinabalik ako ni Jehova na mayo na lamang nin ano man.” (Ruth 1:21) Isip-isipa na sana kun ano an namati ni Ruth kan madangog niya an sinabing idto ni Noemi! Ginibo ni Ruth an gabos na makakaya niya tanganing tabangan si Noemi. Naghibi siya kaiba kaini, rinanga ini, asin nagbaklay kaiba kaini sa laog nin dakul na aldaw. Sa ibong kan gabos na ini, sinabi ni Noemi: “Pinabalik ako ni Jehova na mayo na lamang nin ano man.” Sa mga sinabi niyang idto, garo baga dai man lamang pinahalagahan ni Noemi an suporta ni Ruth, na nakatindog kataid niya. Makulugon nanggad idto para ki Ruth! Pero, nagdanay siyang kaibanan ni Noemi.

19. Ano an makakatabang sato para magdanay kaiba kan saro na nag-aagi nin kasakitan?

¹⁹ Leksiyon: Sa ngunyan, an sarong sister na  nag-aagi nin kasakitan tibaad makataram sato nin makulog—sa ibong kan gabos na paghihinguwa ta na tabangan siya. Pero hinihinguwa ta na dai magkulog an buot ta. Nagdadanay kita kaiba kan sister na nangangaipo nin tabang, asin hinahagad ta an tabang ni Jehova na makahanap nin paagi para rangahon siya.—Tal. 17:17.

20. Ano an nakapakusog ki Ruth para padagos na tabangan si Noemi?

²⁰ Magtao nin napapanahon na pampakusog nin buot. Nagpahiling si Ruth nin maimbod na pagkamuot ki Noemi, pero ngunyan siya na man an nangangaipo nin pampakusog nin buot. Asin pinahiro ni Jehova si Boaz para pakusugon siya. Sinabi ni Boaz ki Ruth: “Bendisyunan ka lugod ni Jehova dahil sa ginibo mo, asin lugod na mag-ako ka nin dakulang balos hali ki Jehova na Diyos kan Israel, huling nagpaili ka sa irarom kan saiyang mga pakpak.” An mabuot na mga tataramon na idto nakarangang marhay ki Ruth. Bilang simbag, sinabi ni Ruth ki Boaz: “Rinanga mo ako, asin pinakusog mo an buot kan saimong lingkod.” (Ruth 2:12, 13) An napapanahon na mga tataramon ni Boaz nagtao ki Ruth nin kusog para padagos na tabangan si Noemi.

21. Arog kan sinabi sa Isaias 32:1, 2, ano an itinatao kan mapagmalasakit na mga elder?

²¹ Leksiyon: An mga nagpapahiling nin maimbod na pagkamuot sa iba nangangaipo man kun minsan nin pampakusog nin buot. Kun paanong inasigurar ni Boaz si Ruth na naririsa an saiyang kabuutan, an mapagrisang mga elder man ngunyan maugmang pinapasalamatan an tabang kan mamumuton na mga tugang. An arog kaiyan na napapanahon asin mamumuton na komendasyon matao sa mga tugang nin kusog para padagos na tumabang.—Basahon an Isaias 32:1, 2.

22-23. Paano nagbago an sabuot ni Noemi, asin taano? (Salmo 136:23, 26)

²² Dai nahaloy, nagtao si Boaz nin dakul na regalong kakanon para ki Ruth asin Noemi. (Ruth 2:14-18) Ano an nagin reaksiyon ni Noemi sa pagigin  bukas-palad ni Boaz? Sinabi niya: “Bendisyunan lugod siya kan Diyos na Jehova, na padagos na nagpapahiling nin maimbod na pagkamuot sa mga buhay pati sa mga gadan.” (Ruth 2:20a) Nagbago na an sabuot ni Noemi! Dati may pagluhang sinabi niya: “Si Jehova . . . nagin laban sa sako,” pero ngunyan maugma niyang sinabi: Si “Jehova . . . padagos na nagpapahiling nin maimbod na pagkamuot.” Ano an nagin dahilan kan pagbago kan sabuot ni Noemi?

²³ Nahiling na ngunyan ni Noemi an pagtabang saiya ni Jehova. Ginamit ni Jehova si Ruth para itao ki Noemi an kinakaipuhan kaining suporta pabalik sa Juda. (Ruth 1:16) Nahiling man ni Noemi an pagtabang ni Jehova kan si Boaz, na saro sa “mga paratubos” ninda, mamumuton na nagtao nin mga probisyon para sainda ni Ruth. * (Ruth 2:19, 20b) Siguradong naisip niya, ‘Nasasabutan ko na ngunyan na dai ako nuarin man binayaan ni Jehova. Kaibanan ko siya pirmi!’ (Basahon an Salmo 136:23, 26.) Siguradong nagpapasalamat si Noemi na si Ruth asin Boaz dai nagpundo sa pagtabang sa saiya! Maiimahinar ta na ugmahon sindang tulo dahil sa magayon na resulta.

24. Taano ta gusto tang padagos na magpahiling nin maimbod na pagkamuot sa satong mga kapagtubod?

²⁴ Ano an nanudan ta sa libro nin Ruth manungod sa maimbod na pagkamuot? Pinapahiro kita kan maimbod na pagkamuot na dai tulos magpundo sa pagtabang sa mga tugang na nasa kasakitan. Pinapahiro man kita kaiyan na gumibo nin mga pagsasakripisyo para tabangan sinda. Kaipuhan kan mga elder na magtao nin napapanahon asin mamumuton na pampakusog nin buot sa mga nagpapahiling nin maimbod na pagkamuot sa iba. Nakakamati kita nin urog na kaugmahan pag nahihiling ta na nagigin makusog giraray sa espirituwal an mga nangangaipo nin tabang. (Gibo 20:35) Pero, ano an panginot na dahilan kun taano ta padagos kitang nagpapahiling nin maimbod na pagkamuot? Huling gusto tang arugon asin paugmahon si Jehova na “abunda sa maimbod na pagkamuot.”—Exo. 34:6; Sal. 33:22.