1. Ano an tibaad maihapot ta sa satong sadiri?

NAPUPURISAW ka daw kun minsan pag iniisip-isip mo an mga madali nang mangyari—an paglaglag sa palsong relihiyon, an pag-atake kan Gog nin Magog, asin an giyera nin Armagedon? Naihapot mo na daw sa sadiri mo, ‘Pag umabot na an makatatakot na mga pangyayaring iyan, magdadanay daw akong may integridad?’ Kun naihapot mo na iyan, makakatabang na marhay saimo an pagtukar na ini kan sinabi ni Jesus na yaon sa satong temang teksto. Sinabi ni Jesus sa mga disipulo niya: “Dai mapurisaw an saindong puso. Magtubod kamo.” (Juan 14:1) An makusog na pagtubod makakatabang sato na atubangon an puturo nin may kumpiyansa.

2. Paano ta mapapakusog an satong pagtubod, asin ano an pag-uulayan ta sa artikulong ini?

² Mapapakusog ta an satong pagtubod tanganing matagalan an maabot na mga pagbalo paagi sa pag-isip-isip sa kun paano ta inaatubang ngunyan an mga pagbalo sa satong pagtubod. Kun iisip-isipon ta kun ano an ginigibo ta pag napapaatubang kita sa mga inaagihan tang pagbalo ngunyan, maaaraman ta kun arin na mga aspekto kan satong pagtubod an kaipuhan ta pang pakusugon. Sa kada pagbalong natatagalan ta, nagkukusog man an satong pagtubod. Makakatabang ini sato na matagalan an maabot na mga pagbalo. Sa artikulong ini, pag-uulayan ta an apat na sitwasyon na napaatubang sa mga disipulo ni Jesus na nagparisa na kaipuhan nindang dagdagan an saindang pagtubod. Dangan pag-uulayan ta kun paano kita puwedeng mapaatubang sa kaagid na mga kadipisilan ngunyan asin kun paano ini puwedeng mag-andam sato para sa maabot.

3. Arog kan mababasa sa Mateo 6:30, 33, ano an malinaw na sinabi ni Jesus may koneksiyon sa pagtubod?

³ Natural sana na gusto kan sarong payo nin pamilya na tawan nin supisyenteng kakanon, bado, asin istaran an saiyang agom saka  mga aki. Bako iyan pirming pasil na gibuhon sa masakit na mga panahon ini. Halimbawa, may mga kapagtubod kita na nawaran nin trabaho asin, sa ibong kan mga pagmamaigot ninda, dai sinda nakahanap nin bago. An iba sinayumahan an mga trabahong bakong angay para sa mga Kristiyano. Sa gabos na sitwasyon na iyan, kaipuhan ta nin makusog na pagtubod na sisiguraduhon ni Jehova na maitatao ta an pangangaipo kan satong pamilya. Malinaw ining sinabi ni Jesus sa mga disipulo niya sa Sermon sa Bukid. (Basahon an Mateo 6:30, 33.) Pag lubos kitang kumbinsido na dai kita papabayaan ni Jehova, maipopokus ta an satong atensiyon kun sain dapat—sa intereses kan Kahadian. Mantang nahihiling niyato kun paano kita tinatabangan ni Jehova na magkaigwa kan materyal na mga pangangaipo ta, magigin mas totoo siya sa sato asin magkukusog an satong pagtubod.

4-5. Ano an nakatabang sa sarong pamilya na maatubang an mga kahaditan manungod sa materyal na mga pangangaipo ninda?

⁴ Pag-isipan kun paano naeksperyensiyahan kan sarong pamilya sa Venezuela an tabang ni Jehova na maatubang an mga kahaditan manungod sa saindang materyal na mga pangangaipo. Kaidto, marahay man an buhay kan pamilyang Castro dahil may sadiri sindang uma. Dangan may sarong armadong gang na puwersahan na kinua an pagsadiri ninda asin pinahali sinda sa sadiri nindang daga. Sinabi kan amang si Miguel: “Ngunyan haros nagdedepende na lang kami sa nakukua mi sa pakikiuma sa sarong sadit na daga. Pinupunan ko an kada aldaw paagi sa paghagad ki Jehova na tawan kami kan kaipuhan mi para sa aldaw.” Masakit an buhay para sa pamilyang Castro, pero dahil lubos an pagtubod ninda sa kakayahan kan satong mamumuton na Ama na itao an pang-aroaldaw na mga pangangaipo ninda, regular sindang nag-aatender sa mga pagtiripon kan kongregasyon asin nakikikabtang sa ministeryo. Iniinot ninda an intereses kan Kahadian sa saindang buhay, asin itinatao ni Jehova kun ano an kaipuhan ninda.

⁵ Sa mga kasakitan na napapaatubang ki Miguel asin sa agom niyang si Yurai, nagpokus sinda sa kun paano sinda inataman ni Jehova. May mga pagkakataon na ginamit ni Jehova an mga kapagtubod para magtao nin materyal na asistensiya o para tabangan si Miguel na makahanap nin angay na trabaho. Sa ibang mga pagkakataon man, itinao ni Jehova an panginot na mga pangangaipo ninda paagi sa pag-ayuda kan sangang opisina. Nungka sindang pinabayaan ni Jehova. Bilang resulta, nahiling nindang mas lalong nagkukusog an pagtubod kan saindang pamilya. Pagkatapos na iistorya an sarong partikular na pangyayari na diyan tinabangan sinda ni Jehova, sinabi kan pinakamatua nindang aking babayi na si Yoselin: “Nakakapahiro sa puso na mahiling an pagtabang ni Jehova. Para sako, saro siyang amigo na maaasahan ko habangbuhay.” Sinabi niya pa: “An mga pagbalong inagihan mi bilang pamilya nag-andam samo para sa mas masakit pang mga pagbalo sa maabot.”

6. Paano mo mapapakusog an pagtubod mo pag may problema ka sa pinansiyal?

⁶ Igwa ka daw nin problema sa pinansiyal? Kun iyo, masakit na panahon ini para saimo. Pero gurano man kasakit an sitwasyon mo, puwede mong  gamiton an panahon na ini para pakusugon an pagtubod mo. Mamibi asin basahon an sinabi ni Jesus na nasa Mateo 6:25-34 asin hurop-hurupon iyan. Pag-isipan an mga eksperyensiya sa presenteng panahon na nagpapatunay na itinatao ni Jehova an mga pangangaipo kan mga nagdadanay na sibot sa teokratikong mga aktibidad. (1 Cor. 15:58) Paagi kaiyan, mapapakusog mo an saimong pagtitiwala na kun paanong tinabangan kan saimong Ama sa langit an mga nasa kaagid na sitwasyon, tatabangan ka man niya. Aram niya an kaipuhan mo asin kun paano iyan itatao. Mantang naeeksperyensiyahan mo sa saimong buhay an tabang ni Jehova, magkukusog an pagtubod mo kaya makakayanan mo an mas darakulang pagbalo sa maabot.—Hab. 3:17, 18.

7. Uyon sa Mateo 8:23-26, paano nabalo nin “makusugon na subasko” an pagtubod kan mga disipulo?

⁷ Kan si Jesus saka an mga disipulo niya maabutan nin subasko sa dagat, ginamit ni Jesus an pangyayaring iyan para tabangan sindang mahiling an mga aspekto na diyan kaipuhan ninda nin mas makusog na pagtubod. (Basahon an Mateo 8:23-26.) Kasagsagan na kaidto kan subasko asin nalalaog na nin tubig an bangka, pero si Jesus tuninong na nagtuturog. Kan pukawon siya kan takuton na mga disipulo asin pakiulayan na iligtas sinda, mabuot sindang sinaway kan Kagurangnan na sinasabi: “Ano ta takuton kamo, kamo na may kakadikit na pagtubod?” Dapat kuta narealisar na kan takuton na mga disipulo na kayang-kayang protektaran ni Jehova si Jesus saka an mga kairiba niya. Ano an leksiyon kaini para sa sato? An makusog na pagtubod makakatabang sato na matagalan an ano man na “makusugon na subasko,” o bagyo, literal man iyan o piguratibo.

8-9. Paano nabalo an pagtubod ni Anel, asin ano an nakatabang saiya?

⁸ Pag-isipan kun paano lalong kuminusog an pagtubod ni Anel na sarong daing agom na sister sa Puerto Rico pagkatapos nin sarong dipisil na pagbalo. An napaatubang saiyang makusugon na bagyo literal. Nagpuon iyan kan 2017 kan radason kan Bagyong Maria an harong ni Anel. Asin dahil man sa bagyo, nawaran siya nin trabaho. “Kan masakit na panahon na idto, napurisaw ako,” an inadmitir ni Anel, “pero nanudan kong magtiwala ki Jehova paagi sa pamibi asin na dai tugutan na wara na akong magibo dahil sa pagkapurisaw.”

⁹ May sinabi pa si Anel na nakatabang saiya na matagalan an pagbalo—an pagigin masinunod. Sinabi niya: “An pagsunod sa paggiya kan organisasyon nakatabang sako na magdanay na kalmado. Nahiling ko an tabang ni Jehova paagi sa espirituwal na pampakusog na itinao sako pati man sa materyal na tabang na itinao kan mga tugang.” Sinabi niya pa: “Tinawan ako ni Jehova nin mas labi pa ngani sa puwede kong hagadon, asin talagang nagkusog na marhay an pagtubod ko.”

10. Ano an puwede mong gibuhon kun napapaatubang ka sa makusugon na bagyo?

¹⁰ Napapaatubang ka daw sa sarong makusugon na bagyo sa saimong buhay? Tibaad nagsasakit ka dahil sa mga epekto nin sarong kalamidad o tibaad piguratibong bagyo iyan, arog nin malalang hilang na dahil kaiyan pinangluluyahan kang marhay asin dai mo aram an gigibuhon. Tibaad  napupurisaw ka kun minsan, pero dai iyan pagtugutan na papunduhon ka sa pagtitiwala ki Jehova. Rumani saiya paagi sa udok na pagpamibi. Pakusugon an pagtubod mo paagi sa paghurop-hurop sa mga pagkakataon kaidto na tinabangan ka ni Jehova. (Sal. 77:11, 12) Makakasigurado ka na nungka ka niyang papabayaan—dai ngunyan asin dai nuarin man.

11. Taano ta dapat kitang magin determinado na magin masinunod sa mga nanginginot?

¹¹ Ano pa an makakatabang saimo na matagalan an mga pagbalo? Arog kan sinabi ni Anel, iyan an pagigin masinunod. Makanuod na magtiwala sa mga pinagtitiwalaan ni Jehova asin ni Jesus. Kun minsan, an mga ninombrahan na manginot tibaad magtao nin paggiya na para sato bakong praktikal. Dawa arog kaiyan, binebendisyunan ni Jehova an pagigin masinunod. Naaraman ta sa saiyang Tataramon asin sa mga eksperyensiya kan maimbod na mga lingkod na an pagigin masinunod nagliligtas-buhay. (Exo. 14:1-4; 2 Cron. 20:17) Hurop-hurupon an siring na mga halimbawa. An paggibo kaiyan makakapakusog kan determinasyon mo na magsunod sa mga areglo kan organisasyon ngunyan asin sa maabot. (Heb. 13:17) Sa siring, dai ka matatakot sa mas makusog na bagyo na madali nang umabot.—Tal. 3:25.

12. Paano ipinahiling kan Lucas 18:1-8 an koneksiyon kan pagkaigwa nin pagtubod asin pagtagal nin inhustisya?

¹² Aram ni Jesus na mababalo nin inhustisya an pagtubod kan saiyang mga disipulo. Para tabangan sinda na matagalan iyan, nagtao siya nin ilustrasyon na yaon sa libro nin Lucas. Sinambit ni Jesus an istorya manungod sa sarong babaying balo na sigeng agrangay sa sarong bakong matanos na hukom para sa hustisya. Tiwala siya na magbubunga an pagigin pursigido niya. Kan huri, dinangog kan hukom an mga pakiulay niya. An leksiyon? Si Jehova makatanusan. Kaya sinabi ni Jesus: “Kaya, bako daw na sisiguraduhon nin Diyos na matawan nin hustisya an saiyang mga pinili na nag-aagrangay sa saiya aldaw-banggi?” (Basahon an Lucas 18:1-8.) Sinabi pa ni Jesus: “Pag-abot kan Aki nin tawo, manunumpungan niya daw talaga an arog kaining pagtubod digdi sa daga?” Pag nag-aagi kita nin inhustisya, kaipuhan niyatong patunayan paagi kan satong pakatios asin pagmamaigot na igwa kita nin makusog na pagtubod arog kan sa balo. Kun igwa kita nin arog kaiyan na pagtubod, makakapagtiwala kita na mahiro si Jehova alang-alang sa sato, kun bako man tulos-tulos tibaad pag-abot nin panahon. Kaipuhan ta man magtubod sa kapangyarihan nin pamibi. Kun minsan, tibaad simbagon an mga pamibi ta sa paaging dai ta inaasahan.

13. Paano an pamibi nakatabang sa sarong pamilya na nakaeksperyensiya nin inhustisya?

¹³ Estudyari an eksperyensiya kan sister na si Vero na nakaistar sa Democratic Republic of the Congo. Si Vero, an saiyang bakong kapagtubod na agom, saka an saindang 15 anyos na aking babayi kinaipuhan na magdulag pahali sa saindang baryo kan atakihon iyan nin sarong grupo nin mga suldados. Mantang nasa dalan, pinapundo kan mga suldados an pamilya sa sarong barikada asin tinakot na gagadanon sinda. Kan naghihibi na si Vero, pigpakalma siya kan aki niya paagi sa pagpamibi nin makusog asin pauruutrong paggamit kan  pangaran ni Jehova sa saiyang pamibi. Pagkatapos niyang mamibi, hinapot siya kan komandante kan mga suldados, “Ne, si’say an nagtukdo saimo na mamibi?” Nagsimbag an aki, “Si Mama po. Nakabase po iyan sa modelong pamibi na nasa Mateo 6:9-13.” Sinabi kan komandante, “Ne, sige na, maghali na kamo kan mga magurang mo, asin lugod na protektaran kamo ni Jehova na saindong Diyos!”

14. Ano an puwedeng makabalo sa satong pagtubod, asin ano an makakatabang sato na makatagal?

¹⁴ An arog kaiyan na mga eksperyensiya nagtutukdo sato na nungkang menuson an halaga nin pamibi. Pero paano kun an saimong mga pamibi dai tulos sinimbag o dai sinimbag sa pambihirang paagi. Arog kan babaying balo sa ilustrasyon ni Jesus, padagos na mamibi na nagtitiwala na dai ka papabayaan kan satong Diyos asin na sisimbagon niya an saimong pamibi pag-abot nin panahon asin sa sarong partikular na paagi. Padagos na makimahirak ki Jehova na tawan ka kan saiyang banal na espiritu. (Fil. 4:13) Girumdumon na madali nang umabot an panahon na abunda kang marhay na bebendisyunan ni Jehova, na huli kaiyan malilingawan mo na an ano man na kasakitan na inagihan mo. Mantang maimbod mong tinatagalan an mga pagbalo sa tabang ni Jehova, magigin mas makusog ka asin matatagalan mo an maabot na mga pagbalo.—1 Ped. 1:6, 7.

15. Arog kan mababasa sa Mateo 17:19, 20, anong kadipisilan an napaatubang sa mga disipulo ni Jesus?

¹⁵ Itinukdo ni Jesus sa mga disipulo niya na makakatabang sainda an pagtubod na mapangganahan an mga ulang. (Basahon an Mateo 17:19, 20.) Sarong beses, dai ninda mapalayas an sarong demonyo, dawa ngani nagibo na man ninda iyan sa ibang mga pagkakataon. Ano an problema? Ipinaliwanag ni Jesus na kaipuhan nindang dagdagan an saindang pagtubod. Sinabi niya sainda na kun igwa sinda nin igong pagtubod, magigibo nindang mapangganahan an arog-bukid na mga ulang! Sa ngunyan, tibaad mapaatubang man kita sa mga kadipisilan na garo baga dai ta kaya.

16. Paano an pagtubod nakatabang ki Geydi na makayanan an trahedya asin grabeng kamunduan?

¹⁶ Mangnuhon an halimbawa ni Geydi, sarong sister sa Guatemala. Ginadan an agom niyang si Edi mantang papuli sinda hali sa sarong pagtiripon kan kongregasyon. Paano nakatabang ki Geydi an pagtubod niya na makayanan an grabeng kamunduan niya? Sinabi niya: “Nakakatabang sako an pagpamibi na ipasa ki Jehova an sakong pasan, kaya nakakamati ako nin katuninungan. Namamatian ko an pagmakulog sako ni Jehova paagi sa pamilya ko saka mga amigo sa kongregasyon. Pirmi akong sibot sa paglilingkod ki Jehova, kaya nababawasan kaiyan an namamatian kong kulog. Saka nakakatabang iyan sako na magpadagos sa kada aldaw na dai gayong napupurisaw para sa masunod na aldaw. Sa eksperyensiya kong ini, nanudan ko na ano man na pagbalo an agihan ko sa maabot, makakayanan ko iyan sa tabang ni Jehova, ni Jesus, asin kan organisasyon.”

17. Ano an puwede tang gibuhon pag napapaatubang kita sa arog-bukid na ulang?

¹⁷ Nagmumundo ka daw dahil sa pagkagadan nin sarong mahal sa buhay? Magtao nin panahon  para pakusugon an saimong pagtubod sa paglaom na pagkabuhay liwat paagi sa pagbasa sa mga istorya sa Bibliya manungod sa mga ibinangon hali sa mga gadan. Nagmumundo ka daw na marhay dahil sa natiwalag an sarong kapamilya mo? Mag-adal tanganing makumbinsir ka na an paagi nin Diyos nin pagtao nin disiplina iyo pirmi an pinakamarahay. Ano man an problema na napapaatubang saimo, gamiton iyan bilang oportunidad para pakusugon an saimong pagtubod. Sabihon ki Jehova an gabos na nasa puso mo. Dai isuway an sadiri, imbes magdanay na harani sa mga tugang. (Tal. 18:1) Makikabtang sa mga aktibidad na makakatabang saimo na makatagal, dawa kun napapaluha ka pag nagigirumduman mo an nangyari saimo. (Sal. 126:5, 6) Magdanay na regular sa mga pagtiripon, sa paglilingkod sa langtad, asin sa pagbasa nin Bibliya. Asin magdanay na nakapokus sa magayunon na mga bendisyon na itinatagama ni Jehova para sa saimo. Mantang nahihiling mo kun paano ka tinatabangan ni Jehova, mas lalo man na magkukusog an pagtubod mo sa saiya.

18. Kun madiskubre mong bako pang gayong makusog an pagtubod mo, ano an puwede mong gibuhon?

¹⁸ Kun sa mga pagbalo na inagihan o inaagihan mo madiskubre mong bako pang gayong makusog an pagtubod mo, dai madisganar. Ibilang ining oportunidad na pakusugon an pagtubod mo. Hagadon an arog kan hinagad kan mga apostol ni Jesus, na nagsabi: “Dagdagi an samong pagtubod.” (Luc. 17:5) Hurop-hurupon man an mga halimbawa na pinag-ulayan ta sa artikulong ini. Arog ni Miguel asin Yurai, girumdumon an gabos na pagkakataon na tinabangan ka ni Jehova. Arog kan aking babayi ni Vero asin ni Anel, udok na mamibi ki Jehova lalo na pag napapaatubang sa dakulang problema. Asin arog ni Geydi, tandaan na puwedeng itao ni Jehova an tabang na kaipuhan mo paagi sa pamilya o mga amigo mo. Pag tinutugutan mo si Jehova na tabangan kang matagalan an presenteng mga pagbalo, magigin mas makusog an pagtitiwala mo na tatabangan ka niyang matagalan an ano man na mga pagbalo na tibaad mapaatubang saimo sa maabot.

19. Sa ano tiwala si Jesus, asin sa ano ka makakasigurado?

¹⁹ Sinambit ni Jesus kun sa anong mga aspekto kaipuhan na pakusugon kan saiyang mga disipulo an saindang pagtubod, pero nungka siyang nagduda na sa tabang ni Jehova makakayanan ninda an maabot na mga pagbalo. (Juan 14:1; 16:33) Tiwala siya na paagi sa makusog na pagtubod, magigibo nin sarong dakulang kadaklan na makaligtas sa papaabot na dakulang kasakitan. (Kap. 7:9, 14) Makakabilang ka daw sainda? Paagi sa daing kapantay na kabuutan ni Jehova, mapapabilang ka sainda kun aaprobetsaran mo ngunyan an lambang oportunidad na magkaigwa nin pagtubod asin pakusugon iyan!—Heb. 10:39.