IPINAGPAPASALAMAT kong pinadakula ako nin Kristiyanong mga magurang, si Fred asin Edna Molohan, na nagtukdo sa sako na magkaigwa nin diyosnon na debosyon. Beynteng taon na sindang aktibong mga Estudyante sa Bibliya (Mga Saksi ni Jehova) kan mamundag ako kan 1934. Nakaistar kami sa Parsons, sarong sadit na banwaan sa timog-sirangan na parte kan Kansas. Nakaasosyar kami sa kongregasyon diyan na haros gabos na tugang linahidan na Kristiyano. Regular na nag-aatender an pamilya mi sa mga pagtiripon kan kongregasyon asin regular na naghuhulit kan katotoohan na nasa Tataramon nin Diyos. Sa parati, nakatagama an Sabadong hapon para sa pagpapatotoo sa tinampo, an apod kaidto sa pampublikong pagpapatotoo. Medyo nakakapagal kun minsan, pero pagkatapos, pirmi kaming ibinabakal ni Papa nin ice cream tanganing marepreskuhan kami.

Dakula an teritoryo kan sadit ming kongregasyon, kaiba diyan an nagkapirang saradit na banwaan saka an dakul na farm sa haraning mga distrito. Pag nagduduman kami sa mga kagsadiri nin farm o sa mga nagtatrabaho diyan, sa parati an samong mga literatura pigriribay nin mga tanom nindang gulay, mga sugok na kakukua pa sana sa salagan, o dawa ngani buhay na mga manok. Huling nainot nang nagtao si Papa nin kontribusyon para sa mga literatura, an mga itinatao sa samo nagigi nang pandagdag sa kakanon mi.

Nagkaigwa nin ponograpo an mga magurang ko, na ginamit ninda sa paghuhulit. Dawa saditon pa ako para mapaandar iyan, nag-i-enjoy ako sa pagtabang ki Papa saka ki Mama mantang pigpi-play ninda an mga rekording kan mga diskurso ni Brother Rutherford pag nagdadalaw liwat sinda asin nagkokondukta nin pag-adal sa Bibliya.

An samong 1936 Ford ginibo ni Papang sound car, na sarong awto na may loudspeaker sa atop. Epektibong marhay an awtong ini sa pagpalakop kan mensahe kan Kahadian. Sa parati, ma-play nguna nin musika para makua an atensiyon kan mga tawo, dangan ipi-play na an nakarekord na diskurso sa Bibliya.  Pagkatapos kan rekording, maalok na kami nin mga literatura sa mga interesado.

Sa sadit na banwaan nin Cherryvale, Kansas, sinabi kan pulis ki Papa na dai puwede an sound car sa laog kan parke kan banwaan, na diyan dakul na tawo an nagrerelaks pag Domingo, pero sinabi kaini sa saiya na puwede iyan iparada sa luwas. Nagsunod si Papa asin ibinalyo an awto sa kasunod na tinampo na nakaatubang sa parke tanganing dangog pa man giraray kan mga tawo an mensahe, dangan pig-play an programa. Nakakaugma talaga pirming mag-iba ki Papa asin ki Manoy Jerry sa arog kaining mga aktibidad.

Sa huring mga taon kan dekada nin 1930, nakikabtang kami sa espesyal na kampanyang inaapod na “blitz” tanganing makobrehan tulos an mga teritoryo na may grabeng pagkontra. Nagmamata kami bago magmaagahon (arog kan ginibo mi kaidto sa Joplin, Missouri) asin pasimpleng ilinalaag an mga tract asin buklet sa irarom kan pinto kan mga harong. Pagkatapos, mataragbuan kami sa luwas kan siyudad tanganing hilingon kun baga igwa samong nadakop asin inaresto nin pulis.

Kan mga panahon na idto, may saro pang nakakaugmang kabtang an samong ministeryo—an inaapod na information march. Tanganing ipaisi an dapit sa Kahadian, igwa kaming sulot na mga plakard asin nakalinyang nagmamartsa sa siyudad. Nagigirumduman ko na sa saro sa mga pagmartsang ini sa samong banwaan, nagsulot an mga amigo mi nin plakard na an nakasurat “An Relihiyon Sarong Siod Asin Raket.” Naglakaw sinda nin mga 1.6 kilometros sa laog kan banwaan dangan nagbalik sa samong harong. Marahay na sana ta dai sinda napaatubang sa ano man na pagkontra mantang nagmamartsa, pero may mga nasabatan sindang mga interesadong nagmamasid.

Parating nagbibiyahe an samong pamilya haling Kansas pasiring sa Texas tanganing umatender sa mga kumbensiyon. Nagtatrabaho kaidto si Papa sa Missouri-Kansas-Texas Railroad (na inaapod man na M-K-T, o Katy, Railroad) kaya puwede kaming magsakay sa tren gamit an saiyang pass bilang empleyado. Huli kaiyan nakakaduman kami sa mga paryente asin magkairibanan na nakakaatender sa mga kumbensiyon. An mas matuang tugang ni Mama na si Fred Wismar asin an agom kaining si Eulalie, nakaistar sa Temple, Texas. Nanudan ni Tiyo Fred an katotoohan kan siya hoben pa sa inot na mga taon kan dekada nin 1900, nabawtismuhan siya, asin ihiniras an saiyang mga nanudan sa mga tugang niya, kaiba na diyan si Mama. Bisto siyang marhay kan mga tugang sa bilog na sentral Texas kun sain dati siyang naglingkod bilang zone servant (inaapod ngunyan na paraataman nin sirkito). Mabuot siya saka pirming maugma, asin maugmang kaibanan. Maigot siya para sa katotoohan, asin talagang marahay na impluwensiya sako kan hoben pa ako.

Kan 1941, nagbiyahe an samong pamilya sakay nin tren pa-St. Louis, Missouri tanganing umatender sa sarong dakulang kumbensiyon. Inimbitaran an gabos na hoben na tumukaw sa sarong espesyal na parte kan arena tanganing magdangog sa pahayag ni Brother Rutherford na may temang “Mga Aki kan Hadi.” Sa pagtatapos kan saiyang pahayag, may surpresang regalo para sa kada saro sa grupo mi—an librong Children na itinao mismo ni Brother Rutherford asin kan saiyang mga assistant. Labing 15,000 na hoben an nakinabang sa espirituwal na bendisyon na ini.

Kan Abril 1943, nag-atender kami sa sadit pero pambihirang “Call to Action” Assembly sa Coffeyville, Kansas. Inintrodusir an bagong Teokratikong Paadalan  sa Pagmiministro na gigibuhon sa gabos na kongregasyon, asin pig-release an buklet na may 52 na leksiyon na gagamiton sa paadalan. Dangan kan taon man sanang iyan, iprinesentar ko an inot na kabtang ko bilang estudyante. Espesyal man para sa sako an asembleyang iyan huling diyan ako nabawtismuhan kaiba nin pirang iba pa sa sarong malipot na danaw-danaw na harani sa lugar.

Nakatapos ako sa pag-eskuwela kan 1951 asin kinaipuhan kong gumibo nin pirang desisyon dapit sa puturo ko. Talagang gusto kong maglingkod sa Bethel, kun sain naglingkod dati si Manoy Jerry, kaya dai nahaloy ipinadara sa opisina sa Brooklyn an aplikasyon ko. Nagin kapaki-pakinabang nanggad sa espirituwalidad ko an desisyon na ini. Naaprubaran tulos an aplikasyon ko, asin inimbitaran na maglingkod sa Bethel puon kan Marso 10, 1952.

An gusto ko magtrabaho sa imprentahan tanganing makatabang sa pagprodusir nin mga magasin asin literatura. Pero, iinasignar ako bilang waiter dangan kan huri sa kusina. Nakakaugma iyan saka dakul akong nanudan. Dai ako nagkapribilehiyo na magtrabaho sa imprentahan. Pero pabor sako an iskedyul para sa mga nagtatrabaho sa kusina huling nagkaigwa ako nin libreng oras sa aldaw tanganing maka-personal study gamit an librarya kan Bethel na may dakulon na reperensiya. Nakatabang ini sako na mag-uswag sa espirituwal asin napakusog kaini an pagtubod ko. Napakusog man kaiyan an determinasyon kong magdanay sa paglilingkod ki Jehova sa Bethel sagkod sa kaya ko. Nagluwas si Manoy Jerry sa Bethel kan 1949 asin nagpakasal sinda ni Patricia, pero sa Brooklyn sinda nag-istar harani sa Bethel. Pirmi ninda akong tinatabangan asin pinapakusog kan inot na mga taon kan paglilingkod ko sa Bethel.

Dai nahaloy pag-abot ko sa Bethel, nag-areglo nin mga tryout tanganing madagdagan an mga brother sa listahan nin mga ispiker na Bethelite. An mga brother sa listahan iinaasignar sa laog kan taon na magbisita sa mga kongregasyon na nasa palibot kan Brooklyn sagkod sa distansiyang 322 kilometros tanganing magtao nin pampublikong pahayag asin maglingkod sa langtad kaiba kan kongregasyon. Nagkapribilehiyo akong makaiba sa listahan na ini. Dawa ninenerbiyos, iprinesentar ko an inot kong pampublikong pahayag na kaidto sarong oras pa. Sa parati, nagsasakay ako sa tren pasiring sa mga kongregasyon. Tanda ko pang marhay sarong maliputon na Domingong hapon kan 1954. Nagsakay ako sa tren pa-New York asin dapat kuta makakapuli ako sa Bethel nin amay na banggi. Pero nagraot an panahon—makusugon an duros asin may kaibang niyebe. Narautan an de-kuryenteng makina kaya nagpundo an tren. Sa katapos-tapusi, nakaabot an tren sa istasyon sa New York City mga alas singko nin aga nin Lunes. Hali duman, nagsakay ako sa subway train pa-Brooklyn asin deretso nang nagtrabaho sa kusina. Medyo huri na ako asin pagal-pagal sa pagparatukaw magdamlag sa narautan na tren. Pero dai ko na naiisip an mga kadipisilan huli sa kaugmahan sa paglilingkod sa mga tugang asin sa pagkaigwa nin dakul na bagong mga amigo sa espesyal na mga Sabado asin Domingong ini nin paglilingkod.

Kan inot na mga taon ko sa Bethel, naimbitaran ako na makikabtang sa mga pagbrodkast sa radyo sa WBBR. Yaon kaidto an mga istudyo sa ikaduwang eskalon kan 124 Columbia Heights. Inasignaran akong magboses sa saro sa mga karakter sa programa nin pag-adal sa Bibliya na ibinobrodkast surusemana. Regular na nagpapartisipar sa mga programang ini sa radyo si Brother A. H. Macmillan, sarong haluyan nang miyembro kan pamilyang Bethel. Inaapod mi man siyang Brother Mac. Marahayon siyang halimbawa para sa samong hoben na mga miyembro kan pamilyang Bethel kun dapit sa pakatagal sa paglilingkod ki Jehova.

Kan 1958, inimbitaran ako sa asignasyon na may koneksiyon sa Gilead School. Trabaho ko na tabangan an mga naggradwar sa pagkua nin visa asin asikasuhon an pagbiyahe kan maigot na mga tugang na ini. Mahalon an tiket sa eroplano kan panahon na idto, kaya pipirang naggradwar lang an nagbibiyahe sa eroplano. Kadaklan na pasiring sa Aprika asin sa Far East nagsakay sa mga barkong pangkargamento. Kan magkaigwa na nin commercial jet service, nagin mas barato na an pamasahe sa eroplano asin dai nahaloy sa eroplano na pinapasakay an kadaklan sa mga misyonero pasiring sa saindang asignasyon.

Kan 1960, kaiba sa nagin trabaho ko an pag-arkila nin mga eroplano haling Estados Unidos pa-Europa  para sa internasyonal na mga kumbensiyon sa 1961. Nagsakay ako sa saro sa mga inarkilang eroplanong idto haling New York pasiring sa Hamburg, Germany para sa kumbensiyon duman. Pagkatapos kan kumbensiyon, nag-arkila kami kan tulong Bethelite na brother nin kotse asin haling Germany nagbiyahe kami pa-Italia tanganing magbisita sa sangang opisina sa Roma. Hali duman, nagpasiring kami sa Pransia, nag-agi sa Kabukidan nin Pyrenees, asin nakaabot sa Espanya kun sain ipinagbabawal an gibuhon na paghuhulit. Ihinatod mi an nagkapirang literatura na ipinatos na garo mga regalo sa satong mga tugang sa Barcelona. Naugma nanggad kaming mamidbid sinda! Nagbiyahe kami pa-Amsterdam asin diyan kami nag-eroplano pabalik sa New York.

Mga sarong taon pakalihis kaiyan, iiniba sa asignasyon ko sa Bethel an pag-asikaso sa pagbiyahe kan piling mga delegado pasiring sa espesyal na serye nin internasyonal na mga kumbensiyon sa manlain-lain na parte kan globo. Ini an “Everlasting Good News” Assembly kan 1963. Naggibo nin mga areglo sa pagbiyahe tanganing an 583 na delegado makaatender sa mga kumbensiyon sa Europa, Asia, saka sa Timog Pasipiko, asin matatapos an tour sa Honolulu, Hawaii, saka sa Pasadena, California. Kaiba sa dudumanan an partikular na mga lugar sa Lebanon asin Jordan para sa espesyal na educational tour dapit sa mga lugar na nasambit sa Bibliya. Apuwera sa pag-iskedyul nin mga flight asin pag-asikaso sa mga hotel na dadagusan, an samong departamento sa Bethel an naglakaw kan gabos na visa na kaipuhan sa dudumanan na mga nasyon.

Espesyal para sako an taon 1963 huli sa saro pang marahayon na rason. Kan Hunyo 29, nagpakasal kami ni Lila Rogers na taga Missouri na nagin miyembro kan pamilyang Bethel tulong taon na an nakaagi. Sarong semana pagkatapos kan kasal mi, nag-iba kami ni Lila sa pag-tour sa manlain-lain na lugar sa kinaban—sa Grecia, Ehipto, asin Lebanon. Nag-eroplano kami haling Beirut pasiring sa sarong sadit na airport sa Jordan. May restriksiyon kaidto sa satuyang gibuhon sa Jordan asin sinabi samo na dai tinatawan an mga Saksi ni Jehova nin visa para makalaog sa nasyon, kaya inisip mi kun ano an mangyayari pag-abot mi duman. Pag-abot mi, talagang nasurpresa kami na mahiling an sarong grupo na nakatindog sa itaas kan terminal kan airport na may darang banner na nakasurat an “Welcome Jehovah’s Witnesses”! Asin naugma nanggad kami na mahiling mismo an mga lugar na nasambit sa Bibliya! Nagduman kami sa mga lugar kun sain nag-istar an suanoy na mga patriyarka, kun sain naghulit si Jesus asin an mga apostol, asin kun sain nagpuon na maglakop sa kapuro-puruhi kan daga an Kristiyanismo.—Gibo 13:47.

Singkuwenta y singkong taon ko nang kaibanan an maimbod kong agom na si Lila sa gabos na asignasyon sa samo. Nakabisita kami nin nagkapirang beses sa Espanya asin Portugal kan ipinagbabawal pa duman an gibuhon. Pinakusog mi an mga amigo asin dinarahan sinda nin mga literatura saka iba pang kaipuhan ninda. Nakabisita pa ngani kami sa nagkapirang tugang na nakapreso sa sarong luma nang kuta nin militar sa Cádiz, Espanya. Nakakaugma talagang marhay na pakusugon sinda paagi sa sarong basado sa Kasuratan na pahayag.

Sa nag-aging mga taon puon 1963, sarong pribilehiyo na magtabang sa pag-asikaso sa mga tour para sa internasyonal na mga kumbensiyon sa Aprika, Australia, Europa, Far East, Hawaii, New Zealand, Puerto  Rico, asin Sentral saka Timog Amerika. Nakaatender kami ni Lila sa dakul na dai mi malilingawan na kumbensiyon, kaiba diyan an kumbensiyon sa Warsaw, Poland, kan 1989. Dakul na tugang na taga Russia an nakaatender sa dakulang kumbensiyon na iyan sa inot na pagkakataon! Nagkapira sa mga nabisto ming brother asin sister an napreso nin dakul na taon sa mga presuhan sa Sobyet huli sa saindang pagtubod.

Nakakaugmang marhay man na pribilehiyo para sako an pagbisita sa mga sangang opisina sa manlain-lain na parte kan kinaban tanganing pakusugon an mga pamilyang Bethel asin an mga misyonero. Sa huri ming pagbisita sa sangay kan South Korea, nabisita mi an 50 brother na nakapreso sa Suwon. Positibo an pananaw kan gabos na brother na idto asin hinahalat-halat na nindang makapagpadagos giraray sa saindang ministeryo. Napakusog nanggad kami sa pagbisita sa sainda!—Roma 1:11, 12.

Sa paglihis nin mga taon, nahiling ko kun paano ni Jehova binendisyunan nin pag-uswag an saiyang banwaan. Kan mabawtismuhan ako kan 1943, mga 100,000 an parahayag, pero ngunyan labing 8,000,000 na an bilang kan mga lingkod ni Jehova sa 240 kadagaan. Sa pag-uswag na ini, dakula an nagin papel kan mga naggradwar sa Gilead sa panginginot ninda sa gibuhon na paghuhulit. Dakulang kaugmahan nanggad an makipagtabangan sa dakul sa mga misyonerong ini sa nag-aging mga taon asin matabangan sindang makaabot sa saindang asignasyon sa ibang nasyon!

Nagpapasalamat ako huling kan ako hoben nagdesisyon akong pahiwason an sakong ministeryo paagi sa pag-aplay na maglingkod sa Bethel. Abunda akong binendisyunan ni Jehova sa lambang desisyon na ginibo ko. Apuwera sa kaugmahan sa paglilingkod sa Bethel, nagkapribilehiyo man kami ni Lila sa laog nin dakul na taon na makaibanan sa paghuhulit an mga kongregasyon sa Brooklyn, kun sain dakul kaming nagin dayupot na amigo.

Padagos an sakong paglilingkod sa Bethel sa suporta ni Lila aroaldaw. Dawa labing 84 anyos na ako ngunyan, kaya ko pa man an mahalagang trabaho na pagtabang sa correspondence kan sangang opisina.

Magaya-gaya nanggad na magin parte kan pambihirang organisasyon ni Jehova asin mahiling an grabeng pagkakalain kan mga naglilingkod ki Jehova saka kan mga dai naglilingkod sa saiya. Mas malinaw ta nang nasasabutan an mga tataramon sa Malaquias 3:18: “Mahihiling giraray nindo an kalainan kan matanos na tawo asin kan maraot na tawo, kan naglilingkod sa Diyos asin kan dai naglilingkod sa saiya.” (NW) Sa paglihis nin mga aldaw, nahihiling ta an pagruro kan sistema nin mga bagay ni Satanas. Kadakul diyan nin tawong mayong paglaom asin kakadikit kan kaugmahan sa buhay. Pero an mga namumuot asin naglilingkod ki Jehova igwa nin maugmang buhay—sa ibong kan masakit na mga panahon na ini—asin igwa nin siyertong paglaom sa maabot. Pribilehiyo nanggad para sa sato na ibalangibog an maugmang mensahe kan Kahadian! (Mat. 24:14) Hinahalat-halat ta na asin dai na mahahaloy maabot na an aldaw na tatapuson kan Kahadian nin Diyos an lumang kinaban na ini asin sasalidahan iyan nin bagong kinaban kaiba an gabos na ipinanugang bendisyon na dara kaiyan, kaiba an perpektong salud asin buhay na mayong katapusan. Dangan, makakamtan na kan maimbod na mga lingkod ni Jehova an buhay na daing sagkod digdi sa daga.