Inestablisar man kan treaty an sarong bagong organisasyon na inaapod na Liga de Naciones. Katuyuhan kan organisasyon na ini na “dagkahon an mga nasyon na magtinabangan asin makamtan an internasyonal na katuninungan asin katiwasayan.” Dakul na relihiyon sa Kakristiyanuhan an nagsuportar sa Liga. Inumaw iyan kan Federal Council of the Churches of Christ in America paagi sa pagsabing iyan “an pulitikal na representasyon sa daga kan Kahadian nin Diyos.” Ipinahiling kan konsilyo an suporta ninda sa Liga paagi sa pagpadara nin mga delegado sa Paris Peace Conference. Sinabi kan saro sa mga delegado na an kumperensiya iyo an “nagpuon nin bagong panahon sa kasaysayan kan kinaban.”

Iyo, may nagpupuon na bagong panahon, pero bako an mga tawong kalabot sa kumperensiya sa katuninungan an magpupuon kaiyan. Kan 1919, nagpuon an sarong bagong panahon sa gibuhon na paghuhulit kan pakusugon ni Jehova an saiyang mga lingkod na maghulit nin urog kisa kasuarin man. Alagad, kaipuhan nguna kan mga Estudyante sa Bibliya na magkaigwa nin dakulang pagbabago sa saindang sitwasyon.

An taunan na eleksiyon para sa magigin mga direktor kan Watch Tower Bible and Tract Society gigibuhon sa Sabado, Enero 4, 1919. Kan panahon na iyan, si Joseph F. Rutherford, na nanginginot kaidto sa mga lingkod ni Jehova, bakong makatanusan na iprineso sa Atlanta, Georgia, U.S.A., kaiba an pito pang iba. An hapot, Dapat daw ibalik sa posisyon an nakapresong mga brother na dating nagseserbing opisyal? O dapat na daw sindang salidahan?

Sa selda, nahahadit si Brother Rutherford sa magigin puturo kan organisasyon. Aram niya na iniisip nin nagkapirang brother na pinakamarahay na magpili na nin iba na magigin presidente. Huli kaini, naggibo siya nin surat para sa mga brother na nagkatiripon, asin irinekomendar niya si Evander J. Coward para magin presidente. Sinabi ni Rutherford na si Coward “kalmado,” “mapagmansay,” asin “dedikado sa Kagurangnan.” Alagad, ibang solusyon an gusto kan dakul na brother—saka na lang gibuhon an eleksiyon pakalihis nin anom na  bulan. Uminuyon diyan an grupo nin mga abogado na nagdedepensa sa nakapresong mga brother. Mantang pinag-uulayan kun ano an gigibuhon, may mga brother na naanggot.

Dangan, may nangyari na kan huri sinambit ni Richard H. Barber na garo ‘pagbubo nin lana sa maalon na tubig’ na an buot sabihon may sarong naghihinguwang resolberan an dipisil na sitwasyon. Saro sa mga brother na yaon an nagtaram: “Bako akong abogado, alagad pag-abot sa legalidad kan sitwasyon, may aram ako dapit sa ley nin kaimbudan. Kaimbudan an hinahagad nin Diyos. Mayo akong ibang naiisip na mas marahay na paagi na ikakapahiling ta iyan kundi an magkaigwa nin eleksiyon dangan pilion giraray si Brother Rutherford bilang presidente.”—Sal. 18:25.

Kan huri, sinabi ni A. H. Macmillan na kan sunod na aldaw an kapwa niya presong si Brother Rutherford nagtuktok sa pader kan selda niya asin sinabi, “Ilusot mo an kamot mo.” Dangan iinabot sa saiya ni Brother Rutherford an sarong telegrama. Nahiling ni Macmillan an halipot na mensahe asin narealisar niya tulos an buot sabihon kaiyan. Sabi sa surat: “RUTHERFORD WISE VAN BARBER ANDERSON BULLY ASIN SPILL DIREKTOR INOT TULO OPISYALES PAGKAMUOT SA GABOS.” Nangangahulugan ini na an gabos na direktor ibinalik sa dati nindang posisyon asin na si Joseph Rutherford saka William Van Amburgh pinagdanay sa pagigin nindang opisyal. Kaya, magpapadagos bilang presidente si Brother Rutherford.

Mantang nakapreso an walong brother, an maimbod na mga Estudyante sa Bibliya nakiulay sa mga tawo na pirmahan an sarong petisyon sa gobyerno na palibrehon an mga brother. An mga tugang na ini na makusog an buot nakatipon nin labing 700,000 na pirma. Kan Miyerkules, Marso 26, 1919, bago maisumitir an petisyon, pinalibre si Brother Rutherford asin an iba pang responsableng brother.   

Sa pahayag ni Brother Rutherford sa mga tugang na nagsabat saiya pagpuli niya, sinabi niya: “Kumbinsido ako na an gabos na inagihan tang ini pag-andam sana sa sato para sa mas masakit pang mga panahon. . . . An pakikipaglaban nindo bako lang para palibrehon an saindong mga tugang sa presuhan. Sekondaryong isyu sana iyan. . . . An katuyuhan kan pakikipaglaban nindo iyo na magpatotoo para sa Katotoohan, asin an gabos na nagsagibo kaini nag-ako nin marahayon na bendisyon.”

An mga nangyari durante kan pagbista sa satong mga tugang puwedeng magparisa kan paggiya ni Jehova. Kan Mayo 14, 1919, an korte nin apelasyon nagdesisyon: “An mga akusado sa kasong ini dai natawan [nin] patas na pagbista na deretso ninda, asin sa dahilan na iyan kaya binabawi an nainot na desisyon.” Nasentensiyahan na nagkasala nin magagabat na krimen an mga brother, asin dai kuta mahahali sa rekord ninda an desisyon na iyan kun tinawan sana sinda nin pardon o kun pinagian lang an mga sentensiya sa sainda. Mayo nang iba pang kasong isinangat. Huli kaiyan, napagdanay ni Judge Rutherford an saiyang legal na mga  kuwalipikasyon para idepensa an mga lingkod ni Jehova sa atubangan kan Korte Suprema kan Estados Unidos, sarong bagay na dakul na beses niyang ginibo pagkatapos niyang makalibre.

“Dai kami matukaw na sana saka mayong gigibuhon mantang naghahalat sa Kagurangnan na darahon kami sa langit,” an sabi ni Brother Mcmillan. “Narealisar ming may kaipuhan kaming gibuhon para maaraman kun ano talaga an kabutan kan Kagurangnan.”

Alagad dai puwedeng basta na sana ipadagos kan mga tugang sa headquarters an gibuhon na dakul na taon na nindang ginigibo. Taano? Huling kan panahon na nakapreso sinda, rinaot an gabos na printing plate na ginamit kaidto sa pag-imprenta nin mga literatura. Nakakapangluya ini sa buot, asin may mga tugang na nag-iisip kun baga tapos na an gibuhon na paghuhulit.

Igwa pa daw nin interesado sa mensahe kan Kahadian na ihinuhulit kan mga Estudyante sa Bibliya? Tanganing masimbag an hapot na iyan, nagdesisyon si Brother Rutherford na magtao nin diskurso. Imbitado diyan an gabos. “Kun mayong nagduman sa pagtiripon na iyan,” an sabi ni Brother Macmillan, “buot sabihon tapos na an gibuhon na paghuhulit.”

Kaya kan Domingo, Mayo 4, 1919, dawa malainon an pagmati, itinao ni Brother Rutherford an diskurso na “The Hope for Distressed Humanity” sa Los Angeles, California. Mga 3,500 an nag-atender sa diskurso, asin ginatos an dai na nakalaog. Kan sunod na aldaw, 1,500 pa an nag-atender. Aram na kan mga tugang an simbag—interesado talaga an mga tawo!

An sunod na ginibo kan mga tugang nagkaigwa nin epekto sa gibuhon na paghuhulit kan mga Saksi ni Jehova sagkod ngunyan.

Ipinaisi kan The Watch Tower na Agosto 1, 1919, na sa amay na parte kan Setyembre, may gigibuhon na dakulang kumbensiyon sa Cedar Point,  Ohio. “Namatian kan gabos na kaipuhan nindang makaatender,” an sabi ni Clarence B. Beaty, sarong hoben na Estudyante sa Bibliya na taga Missouri. Labing 6,000 na tugang an nag-atender, labi nanggad sa inaasahan. An nakakaugma pa ta labing 200 an binawtismuhan sa karaning Lake Erie.

Kan Setyembre 5, 1919, na ikalimang aldaw kan kumbensiyon, sa diskurso ni Brother Rutherford na “Address to Co-laborers,” ipinaisi niya an bagong magasin na may titulong The Golden Age. * Ipupublikar diyan an “mahalagang mga bareta ngunyan, na nagtatao nin basado sa Kasuratan na paliwanag kun taano ta nangyayari an mga iyan.”

Dinagka an gabos na Estudyante sa Bibliya na kusog-buot na maghulit gamit an bagong publikasyon na ini. Sa surat na nagsasambit kun paano oorganisaron an gibuhon, mababasa: “Dapat na girumdumon kan lambang dusay [bawtisado] na lingkod na sarong dakulang pribilehiyo an maglingkod, asin aprobetsaran an oportunidad ngunyan asin makikabtang sa pagtao kan dakulang patotoong ini sa kinaban.” Dakul nanggad an napahiro kan imbitasyon na maghulit! Pag-abot kan Disyembre, an maigot na mga parahayag kan Kahadian nakakua nin labing 50,000 na subskripsiyon kan bagong magasin.

Kan madali nang matapos an 1919, naorganisar na giraray an mga lingkod ni Jehova asin napakusog. Dugang pa, nagkapirang mahalagang propesiya mapadapit sa huring mga aldaw an nautob. Natapos na an pagbalo asin pagdalisay sa banwaan nin Diyos, na ihinula sa Malaquias 3:1-4. Pinatalingkas na an banwaan ni Jehova sa simbolikong pagkabihag sa “Dakulang Babilonya,” asin ninombrahan na ni Jesus an “maimbod asin mapagmansay na uripon.” * (Kap. 18:2, 4; Mat. 24:45) Andam na ngunyan an mga Estudyante sa Bibliya para sa gibuhon na itatao sa sainda ni Jehova.