1. Taano ta maninigo si Jehova sa satong eksklusibong debosyon?

MANINIGO si Jehova sa satong eksklusibong debosyon huling siya an satong Kaglalang asin Paratao nin Buhay. (Kap. 4:11) Minsan siring, napapaatubang kita sa sarong peligro. Dawa namumutan asin iginagalang ta si Jehova, may mga bagay na puwedeng makaulang sa sato na maitao an eksklusibong debosyon na maninigo sa saiya. Kaipuhan niyatong masabutan kun paano iyan puwedeng mangyari. Pero pag-ulayan ta nguna an buot sabihon kan eksklusibong debosyon.

2. Uyon sa Exodo 34:14, ano an gigibuhon ta kun eksklusibo an debosyon niyato ki Jehova?

² Sa Bibliya, an pagigin debotado sa Diyos nagpaparisa nin pagkaigwa nin hararom na pagkamuot sa saiya. Kun eksklusibo an debosyon niyato ki Jehova, siya sana an sasambahon ta. Dai niyato tutugutan an siisay man o an ano man na makaagaw kan saiyang lugar sa puso ta.—Basahon an Exodo 34:14.

3. Taano ta bakong buta an satong debosyon ki Jehova?

³ Bakong buta an satong debosyon ki Jehova. Taano? Huling nakabase iyan sa mga katotoohan na nanudan ta mapadapit sa saiya. Nagustuhan ta an saiyang magayon na mga kuwalidad. Aram niyato an mga gusto asin habo niya, asin inaarog ta siya. Nasasabutan asin sinusuportaran ta an katuyuhan niya para sa sato. Nakakamati kita nin onra huling tinutugutan niya kita na magin amigo niya. (Sal. 25:14) Urog kitang napaparani sa satong Kaglalang mantang nanunudan ta an lambang bagay mapadapit sa saiya.—Sant. 4:8.

4. (a) Ano an ginagamit kan Diyablo tanganing paluyahon an satong debosyon ki Jehova? (b) Ano an pag-uulayan niyato sa artikulong ini?

 ⁴ Kinokontrol kan Diyablo an sistemang ini nin mga bagay, asin ginagamit niya iyan tanganing aprobetsaran an satong natural na mga pagmawot asin makalaman na mga kaluyahan. (Efe. 2:1-3; 1 Juan 5:19) An katuyuhan niya iyo na kamutan ta an ibang mga bagay tanganing dai magin eksklusibo o bilog an satong debosyon ki Jehova. Pag-ulayan niyato an duwang paagi na tibaad magibo niya ini maski paano. Inot, tinetentaran niya kita na magmaigot na yumaman, asin ikaduwa, iniimpluwensiyahan niya kita na magin bakong madunong sa pagpili nin libangan.

5. Taano ta dapat kitang mag-ingat na dai tumubo sa satong puso an pagkamuot sa kuwarta?

⁵ Natural sana na magmawot kita na magkaigwa nin igong kakanon, angay na bado, asin disenteng maiistaran. Minsan siring, dapat kitang mag-ingat na dai tumubo sa satong puso an pagkamuot sa kuwarta. Dakul na tawo ngunyan an mga “mamumuton sa kuwarta” asin sa mga bagay na nababakal nin kuwarta. (2 Tim. 3:2) Aram ni Jesus na puwedeng magkaigwa kan pagkamuot na iyan an saiyang mga parasunod. Sinabi niya: “Dai nin siisay man na makakapaglingkod bilang uripon nin duwang kagurangnan; huli ta magsalang ikakaungis niya an saro asin mamumutan an saro, o magigin maimbod siya sa saro asin hahabuan an saro. Dai kamo makakapaglingkod bilang uripon nin Diyos asin nin Kayamanan.” (Mat. 6:24) An sarong indibidwal na nagsasamba ki Jehova asin kasabay kaiyan nagtatao nin sobra-sobrang panahon asin naglalapigot tanganing makamtan an mga kayamanan sa kinaban garo man sana naghihinguwang maglingkod sa duwang kagurangnan. Dai siya nagtatao nin eksklusibong debosyon ki Jehova.

6. Ano an manunudan niyato sa sinabi ni Jesus sa kongregasyon sa Laodicea?

⁶ Sa paghinanapos kan inot na siglo C.E., ipinaghambog kan mga miyembro kan kongregasyon sa siyudad nin Laodicea: “Mayaman ako asin  nakatipon na nin mga kayamanan saka dai ako nangangaipo nin ano man.” Alagad sa mata ni Jehova asin ni Jesus, sinda “miserable asin kahirak-hirak asin dukha asin buta saka huba.” Tinawan sinda nin konseho ni Jesus, bako dahil ta mayaman sinda, kundi dahil an pagkamuot ninda sa kayamanan nakakaraot na sa saindang relasyon ki Jehova. (Kap. 3:14-17) Kun marisa ta na may nagtatalubong pagmawot sa satong puso na magkamit nin kayamanan, dapat na humiro tulos kita para itanos an satong kaisipan. (1 Tim. 6:7, 8) Ta kun dai, an satong puso mababanga asin dai aakuon ni Jehova an satong pagsamba. Eksklusibong debosyon an hinahagad niya sa sato. (Deut. 4:24) Paano puwedeng magin bakong balanse an satong pagmansay sa kuwarta?

7-9. Ano an nanudan mo sa eksperyensiya kan elder na si David?

⁷ Pag-isipan an halimbawa ni David, na sarong mahigos na elder na nakaistar sa Estados Unidos. Sinabi niya na siya sarong empleyado na dedikado sa trabaho. Na-promote siya sa kompanyang pinagtatrabahuhan niya asin tinawan pa ngani nin pagmidbid bilang saro sa pinakamatibay sa saiyang trabaho sa saindang nasyon. “Kan panahon na iyan, naisip kong an mga bagay na ini ebidensiya na binebendisyunan ako ni Jehova,” an sabi ni David. Pero iyo daw talaga?

⁸ Dangan, nagpuon na marisa ni David an mga senyales na an trabaho niya nagkakaigwa na nin negatibong epekto sa pakikiamigo niya ki Jehova. “Sa mga pagtiripon kan kongregasyon saka dawa sa ministeryo, mga problema sa trabaho an pigpaparaisip ko,” an sabi niya. “Dakula an ginaganar kong kuwarta, pero lalo man akong nai-stress, saka apektado an relasyon mi ni agom.”

⁹ Narealisar ni David na kaipuhan niyang pag-isipan giraray an saiyang mga priyoridad. “Nagdesisyon talaga ako na itanos an sitwasyon ko,” an sabi niya. Gusto ni David na baguhon an iskedyul niya sa trabaho, tapos ipinakipag-ulay niya iyan sa saiyang amo. Ano an resulta? Sinisante si David! Ano an nagin reaksiyon niya?  “Kan mismong sunod na aldaw, nag-aplay ako na magin dagos-dagos na auxiliary payunir,” an sabi niya. Tanganing masuportaran an saindang sadiri, si David asin an saiyang agom nagpuon na magtrabaho bilang janitor. Dai nahaloy, nagregular payunir si David, asin nagsunod na man an agom niya. Pinili kan mag-agom na ini an sarong trabaho na minemenos kan dakul, pero bako an klase nin trabaho an pinakamahalaga sa sainda. Dawa an income ninda ngunyan dikiton na sana kumpara kan dati, igo na iyan para sa gastos ninda sa kada bulan. Gusto nindang ipriyoridad si Jehova, asin naeksperyensiyahan ninda mismo na nagmamalasakit siya sa mga nag-iinot sa intereses kan Kahadian.—Mat. 6:31-33.

10. Paano niyato iingatan an satong puso?

¹⁰ Dikit man o dakul an satong materyal na kayamanan, kaipuhan niyatong ingatan an satong puso. Paano? Dai pagpatalubuon sa puso mo an pagkamuot sa kayamanan. Asin dai pagtugutan na magin panginot saimo an sekular mong trabaho imbes na an paglilingkod ki Jehova. Paano mo maaaraman kun iyan na an nangyayari sa saimo? Puwede mong ihapot sa saimong sadiri: ‘Pag nasa mga pagtiripon o sa ministeryo, parati ko daw iniisip an sakong trabaho? Pirmi daw akong naghahadit kun baga may igo akong kuwarta pag-abot nin panahon? Nagigin dahilan daw nin problema samo ni agom an kuwarta asin mga pagsadiri? Andam daw akong gibuhon an sarong sekular na trabaho na minemenos kan iba kun paagi kaiyan makakatao ako nin mas dakul na panahon sa paglilingkod ki Jehova?’ (1 Tim. 6:9-12) Mantang pinag-iisipan an mga hapot na iyan, tandaan niyato na namumutan kita ni Jehova asin nanunuga siya sa mga debotado sa saiya: “Dai taka nuarin man tatalikudan, asin dai taka nuarin man papabayaan.” Kaya isinurat ni apostol Pablo: “An saindo lugod na pamumuhay dai mahilingan nin pagkamuot sa kuwarta.”—Heb. 13:5, 6.

11. Ano an puwedeng magin epekto nin libangan sa mga tawo?

¹¹ Gusto ni Jehova na ikaugma niyato an buhay, asin makakatabang sato an libangan na magibo iyan. Sa katunayan, sinasabi kan Tataramon nin Diyos na “mayo nang mas marahay sa tawo kundi an magkakan asin mag-inom saka mag-ugma sa saiyang pagpapagal.” (Par. 2:24, NW) Minsan siring, an dakul sa mga libangan sa kinaban puwedeng magkaigwa nin maraot na epekto sa sato. Pinapababa kaiyan an pamantayan sa moral kan mga tawo, asin ineengganyar sinda na kunsintihon—o ikaugma pa ngani—an mga bagay na kinokondenar kan Tataramon nin Diyos.

12. Sigun sa 1 Corinto 10:21, 22, taano ta dapat kitang magin maingat sa pagpili nin libangan?

¹² Gusto niyatong itao ki Jehova an satong  eksklusibong debosyon, kaya dai kita puwedeng magkakan sa “lamesa ni Jehova” asin sa “lamesa nin mga demonyo.” (Basahon an 1 Corinto 10:21, 22.) Sa parati, an pagkakan mo kaiba nin saro nagpapahiling na mag-amigo kamo. Kun pinipili niyato an mga libangan na nagtatampok nin kadahasan, espiritismo, imoralidad, o iba pang makalaman na mga pagmawot asin kaisipan, garo man sana kita nagkakakan nin mga kakanon na prineparar kan mga kaiwal nin Diyos. Bilang resulta, dai lang niyato dinadanyaran an satong sadiri kundi pati man an pakikiamigo niyato ki Jehova.

13-14. Base sa Santiago 1:14, 15, taano ta dapat na pag-isipan niyatong marhay an dapit sa pinipili niyatong libangan? Iilustrar.

¹³ Pag-isipan an pirang espesipikong pagkakaagid nin libangan asin nin kakanon. Pag nagkakakan kita, nakokontrol ta kun ano an hinuhungit niyato. Pero pag nahalon ta na an kakanon, minaagi iyan sa awtomatikong proseso dangan an mga sustansiya sa kakanon nagigin nang kabtang kan satong hawak. An masustansiyang mga kakanon puwedeng makapakusog sa satong salud; an bakong masustansiyang mga kakanon makakaraot sa satong salud. An resulta kaiyan tibaad dai man tulos magin risa, pero magigin risa iyan sa paglihis nin panahon.

¹⁴ Kaagid kaiyan, pag nagpipili kita nin libangan, kontrolado ta kun ano an ilinalaog niyato sa satong isip. Pagkatapos kaiyan, awtomatikong proseso na an nangyayari dangan nagkakaigwa na iyan nin epekto sa satong isip asin puso. An marahay na libangan puwedeng magkaigwa nin marahay na epekto sa sato; an maraot na libangan makakaraot sa sato. (Basahon an Santiago 1:14, 15.) An mga epekto nin maraot na libangan tibaad dai man tulos magin risa, alagad magigin risang-risa iyan pag-abot nin panahon. Iyan an dahilan kaya pinapatanidan kita kan Bibliya: “Dai kamo magpadaya: An Diyos dai maloloko. Huli ta ano man an itinatanom nin sarong tawo, iyo man ini an saiyang aanihon; dahil an saro na nagtatanom na kauyon kan saiyang laman mag-aani nin kalaglagan na dara kan saiyang laman.” (Gal. 6:7, 8) Mahalagang marhay nanggad na isikwal niyato an gabos na libangan na nagtatampok nin mga bagay na ikinakaungis ni Jehova!—Sal. 97:10.

15. Anong nakakaugmang regalo an itinao ni Jehova sa sato?

¹⁵ Dakul na lingkod ni Jehova an nauugmang maghiling nin JW Broadcasting^®, an satuyang Internet television station. An sister na si Marilyn nagsabi: “Nakatabang sa sako an JW Broadcasting na magin mas positibo, saka gabos puwede kong hilingon ta gabos man na laog kaiyan marahay. Pag napupungaw ako o namumundo, naghahanap ako nin nakakapakusog na pahayag o Morning Worship program para hilingon. Paagi kaiyan namamatian kong mas harani ako ki Jehova saka sa saiyang organisasyon. An JW Broadcasting lubos na nakapabago sa buhay ko.” Nakikinabang ka daw sa regalo ni Jehova? Apuwera sa bagong programa kada bulan, an JW Broadcasting igwa man nin mga audio asin video program saka nakakapakusog na mga kanta na puwede mong hilingon asin dangugon ano man na oras.

16-17. Taano ta dapat na maingat niyatong kontrulon an lawig nin panahon na ginagamit ta sa paglilibang, asin paano ta iyan magigibo?

¹⁶ Dapat na magin maingat kita bako lang sa klase nin libangan na pinipili ta kundi pati man sa lawig nin panahon na ginagamit ta diyan. Ta kun dai, tibaad mas dakul na panahon na an itinatao niyato sa paglilibang kisa sa paglilingkod ki Jehova. Dakul an nadidipisilan na kontrulon an lawig nin panahon na ginagamit ninda sa paglilibang. An 18 anyos na sister na si Abigail nagsabi: “Narerelaks ako pag naghihiling nin TV pagkatapos nin sibot na maghapon. Pero kun dai ako mag-iingat, puwedeng dakul na oras an maubos ko sa pag-TV.” An hoben na brother na si Samuel nagsabi: “Kun minsan dakulon na haralipot na video na palan an nahihiling ko sa Internet.  Pag napunan ko nang maghiling nin saro, dai ko naririsa, tulo o apat na oras na palan an naglihis.”

¹⁷ Paano mo makokontrol an panahon na ginagamit mo sa paglilibang? Inot, aramon kun pirang oras talaga an ginagamit mo diyan. Puwede mong ilista an panahon na itinatao mo diyan sa sarong semana. Isurat sa sarong kalendaryo kun gurano kadakul na oras an nagagamit mo sa pag-TV, pag-Internet, asin sa pagkawat nin mga mobile game. Kun sa hiling mo dakulon na panahon an nagagamit mo diyan, gumibo nin iskedyul. Inuton nguna sa iskedyul an mas mahalagang mga bagay, tapos isunod na an para sa paglilibang. Dangan, hagadon ki Jehova na tabangan kang masunod an saimong iskedyul. Paagi kaiyan, magkakaigwa ka nin panahon asin kusog na kaipuhan para sa personal na pag-adal nin Bibliya, pampamilyang pagsamba, mga pagtiripon kan kongregasyon, asin pagmiministeryo. Posible man na dai ka na gayong makakamati nin pagkakonsiyensiya sa panahon na ginagamit mo sa paglilibang.

18-19. Paano niyato mapapatunayan na eksklusibo an satong debosyon ki Jehova?

¹⁸ Pagkatapos magsurat mapadapit sa katapusan kan kinaban ni Satanas asin mapadapit sa madali nang umabot na bagong kinaban, sinabi ni apostol Pedro: “Mga namumutan, huling hinahalat nindo an mga bagay na ini, gibuhon nindo an saindong pinakamakakaya tanganing sa huri mahiling nin Diyos na kamo lubos na malinig asin daing digta saka may katuninungan.” (2 Ped. 3:14) Pag sinusunod niyato an sadol na iyan asin ginigibo an satong pinakamakakaya na magdanay na malinig sa moral asin espirituwal, pinapatunayan niyato na eksklusibo an satong debosyon ki Jehova.

¹⁹ Padagos kitang tetentaran ni Satanas asin kan saiyang kinaban na gibuhon na priyoridad an ibang bagay. (Luc. 4:13) Alagad sa ibong kan ano man na kadipisilan na napapaatubang sa sato, dai ta tutugutan an siisay man o an ano man na agawon an lugar ni Jehova sa satong puso. Determinado kitang itao ki Jehova an maninigo sana sa saiya—an satong eksklusibong debosyon!