1. Ano an puwedeng gibuhon ni Jehova tanganing maisagibo an saiyang katuyuhan?

KAYA ni Jehova na magin ano man na kinakaipuhan tanganing mautob an saiyang katuyuhan. Halimbawa, si Jehova nagin Paratukdo, Paratao nin Karangahan, asin Ebanghelisador. Pira sana ini sa dakul niyang papel. (Isa. 48:17; 2 Cor. 7:6; Gal. 3:8) Dawa arog kaiyan, parati siyang naggagamit nin mga tawo para isagibo an saiyang mga katuyuhan. (Mat. 24:14; 28:19, 20; 2 Cor. 1:3, 4) Puwede man na tawan ni Jehova an siisay man sa sato kan kadunungan asin kusog na kaipuhan niyato tanganing magi kitang ano man na kinakaipuhan para mautob an saiyang kabutan. Gabos ini kabtang kan kahulugan kan pangaran ni Jehova, arog kan isinuherir nin dakul na iskolar sa Bibliya.

2. (a) Taano ta tibaad magduda kita kun minsan kun baga ginagamit kita ni Jehova? (b) Ano an pag-uulayan ta sa artikulong ini?

² Gabos kita gustong magin kapaki-pakinabang ki Jehova, pero tibaad magduda an iba kun baga ginagamit sinda ni Jehova. Taano? Huling namamatian ninda na nalilimitaran sinda kan saindang edad, sitwasyon sa buhay, o mga kakayahan. Sa ibong na lado, may mga indibidwal na tibaad kontento na sa kun ano an ginigibo na ninda ngunyan, asin dai ninda namamatian na kaipuhan nindang umuswag pa. Sa artikulong ini, tutukaron ta kun paano ni Jehova puwedeng andamon an siisay man sa sato para mautob an saiyang katuyuhan. Dangan, pag-uulayan ta an mga istorya sa Bibliya kun paano tinawan ni Jehova an saiyang mga lingkod—mga lalaki asin babayi—kan pagmawot asin kakayahan na gumibo. Panghuri, pag-uulayan ta kun paano niyato tutugutan si Jehova na gamiton kita.

3. Kun dapit sa sinasabi sa Filipos 2:13, paano kita puwedeng tawan ni Jehova kan pagmawot na gumibo?

³ Basahon an Filipos 2:13. * Kaya kitang tawan ni Jehova kan pagmawot na gumibo. Paano niya ini puwedeng gibuhon? Tibaad may maaraman kitang sarong partikular na pangangaipo sa kongregasyon. O may binasa an mga elder na surat hali sa sangang opisina dapit sa sarong pangangaipo sa luwas kan teritoryo kan satong kongregasyon. Mapadapit diyan, tibaad maihapot niyato sa satong sadiri, ‘Paano daw ako makakatabang?’ O tibaad imbitaran kita para sa sarong dipisil na asignasyon, alagad nagduduwa-duwa kita kun baga magigibo ta iyan nin mahusay. O pagkatapos na magbasa nin sarong porsiyon kan Tataramon nin Diyos, tibaad maihapot niyato, ‘Paano ko iaaplikar an tekstong ini sa Bibliya para matabangan an iba?’ Dai kita pipiriton ni Jehova na gibuhon an sarong bagay. Pero pag nahihiling niyang pinag-iisipan ta kun ano an kaya tang gibuhon, puwede niya kitang tawan kan pagmawot na gibuhon an pinag-iisipan ta.

4. Paano kita puwedeng tawan ni Jehova kan kakayahan na gumibo?

⁴ Kaya man kitang tawan ni Jehova kan kakayahan na gumibo. (Isa. 40:29) Kaya niyang pauswagon an satong natural na mga abilidad paagi kan saiyang banal na espiritu. (Ex. 35:30-35) Paagi sa saiyang organisasyon, puwede kitang tukduan ni Jehova kun paano gigibuhon an partikular na mga trabaho. Kun halimbawang dai ka sigurado kun paano gigibuhon an sarong asignasyon, maghagad nin tabang. Saka dai mag-alangan na hagadon sa satong bukas-palad na Ama sa langit an “puwersa na urog kisa sa ordinaryo.” (2 Cor. 4:7; Luc. 11:13) Igwa sa Bibliya nin dakul na halimbawa kun paano inandam kaidto ni Jehova an saiyang mga lingkod na lalaki asin babayi paagi sa pagtao sa sainda kan pagmawot asin kakayahan na gumibo. Mantang pinag-uulayan ta an pira sa mga istoryang ini, mag-isip nin mga paagi kun paano ka puwedeng gamiton ni Jehova kapareho kan mga lingkod na iyan.

5. Ano an manunudan niyato sa kun paano asin kun nuarin ginamit ni Jehova si Moises para iligtas an Saiyang banwaan?

⁵ Pinangyari ni Jehova na magin paraligtas kan mga Israelita si Moises. Alagad kasuarin siya ginamit ni Jehova? Kan panahon daw na pighuhuna ni Moises na andam na siya pagkatapos na ‘matukduan siya kan gabos na kadunungan kan mga Ehipsiyo’? (Gibo 7:22-25) Dai. Ginamit sana ni Jehova si Moises kan tapos na niya ining tabangan na magin mapakumbaba asin mahuyo an buot. (Gibo 7:30, 34-36) Tinawan ni Jehova si Moises kan kusog nin buot na umatubang sa pinakamakapangyarihan na tagapamahala sa Ehipto. (Ex. 9:13-19) Ano an manunudan ta sa kun paano asin kun nuarin ginamit ni Jehova si Moises? Ginagamit ni Jehova an mga nagpapahiling nin diyosnon na mga kuwalidad asin an mga nagsasarig sa saiya para sa kusog.—Fil. 4:13.

6. Ano an manunudan ta sa kun paano ginamit ni Jehova si Barzilai para tabangan si Hading David?

⁶ Pakalihis nin ginatos na taon, ginamit ni Jehova si Barzilai tanganing tabangan si Hading David. Si David asin an mga kairiba niya ‘nagugutom asin pagal saka paraha’ mantang nagdudulag sa aki ni David na si Absalom. Kaiba an iba pa, si Barzilai, na gurang na kan panahon na idto, isinapeligro an saiyang buhay para tabangan si David asin an mga kairiba kaini. Dai inisip ni Barzilai na miling gurang na siya, bako na siyang kapaki-pakinabang ki Jehova. Imbes, bukas-palad niyang ginamit kun ano an igwa siya tanganing tabangan an mga lingkod nin Diyos na nangangaipo. (2 Sam. 17:27-29) Ano an manunudan ta digdi? Ano man an satong edad, puwede kitang gamiton ni Jehova tanganing itao an mga pangangaipo kan satong mga kapagtubod, iyan man sa  satong lugar o sa ibang nasyon, na nagkukulang nin panginot na mga pangangaipo. (Tal. 3:27, 28; 19:17) Dawa dai ta sinda maaasikaso nin personal, puwede kitang magkontribwir sa pambilog na kinaban na gibuhon tanganing magkaigwa nin pondo para magtao nin ayuda sa panahon asin lugar na kaipuhan iyan.—2 Cor. 8:14, 15; 9:11.

7. Paano ginamit ni Jehova si Simeon, asin taano ta nakakapakusog iyan?

⁷ Nanuga si Jehova ki Simeon, na sarong maimbod na may edad nang lalaki sa Jerusalem, na mahihiling niya an Mesiyas bago siya magadan. An panugang iyan siguradong nakapakusog na marhay ki Simeon huling dakul na taon niya nang hinahalat an Mesiyas. Binalusan ni Jehova an saiyang kaimbudan asin pakatagal. Sarong aldaw, “sa paggiya kan espiritu,” naglaog siya sa templo. Diyan nahiling niya an umboy na si Jesus, asin ginamit ni Jehova si Simeon para itao an sarong propesiya mapadapit sa aking ini na magigin an Cristo. (Luc. 2:25-35) Dawa posibleng marhay na dai na inabutan ni Simeon an ministeryo ni Jesus digdi sa daga, nagpasalamat siyang marhay sa pribilehiyong itinao sa saiya, asin dakulon pang marahay na bagay an naghahalat sa saiya sa ngapit! Sa bagong kinaban, mahihiling kan maimbod na lalaking iyan kun paano magigin bendisyon an pamamahala ni Jesus sa gabos na pamilya digdi sa daga. (Gen. 22:18) Ipinagpapasalamat man niyato an ano man na pribilehiyong itinatao sa sato ni Jehova sa paglilingkod ta sa saiya.

8. Paano kita puwedeng gamiton ni Jehova arog ki Bernabe?

⁸ Kan inot na siglo C.E., sarong bukas-palad na lalaki na an pangaran Jose an andam na magpagamit ki Jehova. (Gibo 4:36, 37) Posibleng marhay na mahusay talaga siya sa pagranga sa iba, kaya inapod siya kan mga apostol na Bernabe, na nangangahulugan na “Aki nin Karangahan.” Halimbawa, kan magin Kristiyano si Saulo, dakul na tugang an natatakot na magdulok saiya huling midbid siya kaidto na parapersegir kan mga kongregasyon. Minsan siring, tinabangan siya kan madinamayon na si Bernabe, asin siguradong naapresyar na marhay ni Saulo an ginibong ini ni Bernabe. (Gibo 9:21, 26-28) Pag-abot nin panahon, nahiling kan mga elder sa Jerusalem na kaipuhan na pakusugon an buot kan mga tugang na nakaistar sa Antioquia kan Siria na harayong lugar. Siisay an ipinadara ninda? Si Bernabe! Asin dai nanggad sinda napasala. Mababasa niyato na “pinakusog . . . sinda gabos [ni Bernabe] na padagos na magkaigwa nin udok sa pusong determinasyon na magin maimbod sa Kagurangnan.” (Gibo 11:22-24) Puwede man kitang tabangan ni Jehova ngunyan na magin “aki nin karangahan” para sa satong mga kapwa Kristiyano. Halimbawa, tibaad gamiton niya kita para rangahon an mga nagadanan nin mahal sa buhay. O tibaad pahiruon niya kita na bisitahon o apudan an sarong may hilang o nagmumundong marhay tanganing mabuot na rangahon sinda. Tutugutan mo daw si Jehova na gamiton ka arog ki Bernabe?—1 Tes. 5:14.

9. Ano an nanudan niyato sa kun paano tinabangan ni Jehova an brother na si Vasily na magin mahusay na espirituwal na pastor?

⁹ Tinabangan ni Jehova an brother na si Vasily tanganing magin mahusay na espirituwal na pastor. Kan nombrahan si Vasily bilang elder sa edad na 26, natakot siya huling iniisip niyang bako siyang kuwalipikado na tabangan sa espirituwal an kongregasyon, lalo na an mga may inaatubang na mga kadipisilan. Minsan siring, nag-ako siya nin marahayon na pagsasanay hali sa eksperyensiyadong mga elder asin sa pagklase sa Pang-Kahadian na Paadalan sa Pagmiministro. Nagmaigot si Vasily na umuswag. Halimbawa, naglista siya nin saradit na mga pasuhan. Mantang naaabot niya an kada saro kaiyan, luway-luway niyang nadadaog an saiyang mga ikinakatakot. Sinasabi niya na ngunyan: “An ikinakatakot ko kaidto, nakakapaugmang marhay na sa sako ngunyan. Pag tinatabangan ako ni Jehova na mahanap an angay na teksto para rangahon an sarong brother o sister sa kongregasyon, nagtatao iyan sa sako nin dakulang satispaksiyon.” Mga brother, kun  andam kamong magpagamit ki Jehova arog ki Vasily, puwede niya kamong tawan kan kakayahan na isaabaga an mas dakulang mga responsabilidad sa kongregasyon.

10. Ano an ginibo ni Abigail, asin ano an mga manunudan mo sa saiyang halimbawa?

¹⁰ Si David asin an maimbod niyang mga kairiba linalapag ni Hading Saul, asin nangangaipo sinda nin tabang. Naghagad an mga tawuhan ni David nin dikit na kakanon sa mayaman na Israelitang si Nabal—dawa ano lamang na maitatao kaini. Dai sinda nag-alangan na maghagad ta pinoprotektaran man ninda an mga aripumpon ni Nabal sa kaawagan. Pero an maimot na si Nabal nagsayumang tawan sinda nin ano man. Naanggot na marhay si David asin gusto nang gadanon si Nabal asin an gabos na lalaki na kairiba niya sa harong. (1 Sam. 25:3-13, 22) Minsan siring, may pakasabot na marhay an magayon na agom ni Nabal na si Abigail. Nagpahiling siya nin dakulang kusog nin buot kan lumuhod siya sa atubangan ni David asin pinugulan ini tanganing dai makakomiter nin pagkakasala sa dugo paagi sa pagbalos. Mataktika niyang sinadol si David na ipabaya na sana ki Jehova an mga bagay-bagay. Napahiro si David kan mapakumbabang mga tataramon asin kan madunong na ginibo ni Abigail. Narealisar niya na ginagamit ni Jehova si Abigail. (1 Sam. 25:23-28, 32-34) Pinauswag ni Abigail an mga kuwalidad na nagpangyari sa saiya na magin kapaki-pakinabang ki Jehova. Kaagid kaiyan, an mga sister na naghihinguwang magin mataktika asin pinapauswag an pakasabot puwedeng gamiton ni Jehova na pakusugon an saindang pamilya asin mga kakongregasyon.—Tal. 24:3; Tito 2:3-5.

11. Ano an ginibo kan mga aking babayi ni Salum, asin sairisay ngunyan an nag-aarog sa sainda?

¹¹ Pakalihis nin ginatos na taon, an mga aking babayi ni Salum kaiba sa mga ginamit ni Jehova para magtabang sa paghirahay kan mga pader kan Jerusalem. (Neh. 2:20; 3:12) Maski ngani pamayo an saindang ama, andam an mga aking babayi ni Salum na gibuhon an dipisil asin peligrosong trabahong iyan. (Neh. 4:15-18) Kabaliktaran nanggad sa sainda an prominenteng mga lalaking Tekoita, na “nagsayumang maggibo kan trabahong itinao sainda”! (Neh. 3:5, An Marahay na Bareta Biblia) Imahinara na sana an kaugmahan kan mga aking babayi ni Salum kan matapos an proyekto sa laog sana nin 52 na aldaw! (Neh. 6:15) Sa satong panahon, may mga sister man na maugmang nagboboluntaryo sa sarong espesyal na klase nin sagradong paglilingkod—an pagtugdok asin pagmentenar kan mga edipisyo na ginagamit sa pagsamba ki Jehova. An saindang mga kasanayan, entusiyasmo, asin kaimbudan mahalagang marhay tanganing matapos an mga trabahong ini.

12. Paano kita puwedeng gamiton ni Jehova arog ki Tabita?

¹² Pinahiro ni Jehova si Tabita na gumibo nin kadakul na “karahayan asin [tabang]” lalo na para sa mga balo. (Gibo 9:36) Huli sa saiyang pambihirang pagkabukas-palad asin kabuutan, dakul an nagmundo kan siya magadan. Alagad naugma sindang marhay kan binuhay siya liwat ni apostol Pedro. (Gibo 9:39-41) Ano an manunudan ta ki Tabita? Hoben man kita o gurang, lalaki o babayi, gabos kita puwedeng magtao nin praktikal na tabang para sa satong mga tugang.—Heb. 13:16.

13. Paano ginamit ni Jehova an masusupgon na sister na si Ruth, asin ano an nasabi kaini?

¹³ Si Ruth na sarong masusupgon na sister gustong magin misyonera. Kan aki pa siya, excited siyang manao nin mga tract sa kada harong. “Gustong-gusto ko talaga iyan,” an sabi niya. Pero, nasasakitan siya pag-abot sa pakikipag-ulay sa kagharong asin sa pagsabi sa iba kan mapadapit sa Kahadian nin Diyos. Dawa masusupgon, nagin regular payunir si Ruth sa edad na 18. Kan 1946, nagklase siya sa Watchtower Bible School of Gilead asin pag-abot nin panahon  naglingkod sa Hawaii asin Japan. Ginamit siya ni Jehova sa pambihirang paagi tanganing ipalakop an maugmang bareta sa mga nasyon na iyan. Pakalihis nin haros 80 taon na pakikikabtang sa ministeryo, ini an nasabi ni Ruth: “Pinapakusog ako pirmi ni Jehova. Tinabangan niya ako na madaog an pagkamasusupgon ko. Tubod talaga ako na puwedeng gamiton ni Jehova an siisay man na nagtitiwala sa saiya.”

14. Uyon sa Colosas 1:29, ano an dapat niyatong gibuhon kun kita andam na magpagamit ki Jehova?

¹⁴ Sa bilog na kasaysayan, pinangyari ni Jehova na gamiton sa manlain-lain na paagi an saiyang mga lingkod. Sa anong paagi ka gagamiton ni Jehova? Nakadependeng marhay iyan sa kun gurano ka kaandam na maigot na maghinguwa. (Basahon an Colosas 1:29.) Kun ika andam na magpagamit ki Jehova, papangyarihon niya na magi kang sarong maigot na ebanghelisador, epektibong paratukdo, mahusay na pararanga, matibay na trabahador, matinabang na amigo, o ano man na kinakaipuhan niya para mautob an saiyang kabutan.

15. Sigun sa 1 Timoteo 4:12, 15, ano an dapat na ipakimahirak ki Jehova kan mga hoben na brother ngunyan?

¹⁵ Kumusta kamong mga hoben na brother na madali nang magin adulto? Kaipuhan na marhay an makusog pang mga lalaki para magsaabaga nin dagdag na responsabilidad bilang ministeryal na lingkod. Sa dakul na kongregasyon, mas dakul an mga elder kisa sa ministeryal na mga lingkod. Mga hoben na brother, puwede daw nindong patalubuon an pagmawot na magsaabaga nin dagdag na responsabilidad sa kongregasyon? Kun minsan may mga brother na nagsasabi, “Kontento na ako sa pagigin regular na parahayag.” Kun arog kaiyan an namamatian mo, makimahirak ki Jehova na tabangan kang magkaigwa kan pagmawot na makuwalipikar bilang ministeryal na lingkod asin na tawan ka kan kakayahan na magibo an pinakamakakaya mo na maglingkod sa saiya. (Par. 12:1) Kaipuhan ming marhay an saimong tabang!—Basahon an 1 Timoteo 4:12, 15.

16. Ano an dapat na hagadon niyato ki Jehova, asin taano?

¹⁶ Puwedeng pangyarihon ni Jehova na ika magin ano man na kinakaipuhan niya tanganing mautob an saiyang kabutan. Kaya hagadon sa saiya an pagmawot na gibuhon an saiyang trabaho, dangan hagadon sa saiya na tawan ka kan kakayahan na kaipuhan mo. Ika man hoben o may edad na, gamiton mo an saimong panahon, kusog, asin mga pagsadiri tanganing tawan nin onra si Jehova ngunyan. (Par. 9:10) Nungkang tugutan an takot o pakamati nin kawaran nin kakayahan na magin dahilan na mapalampas mo an mahalagang marhay na mga oportunidad na gibuhon an gabos mong makakaya sa paglilingkod ki Jehova. Sarong pribilehiyo nanggad para sa sato gabos na magkaigwa dawa nin sadit na kabtang sa pagtao sa satong mamumuton na Ama kan onra na maninigo sa saiya!