1. Taano ta dakul na tawo an nariribong?

DAKUL na relihiyon ngunyan an nagsasabi na mga Kristiyano sinda asin na tama an paagi ninda nin pagsamba sa Diyos. Kaya bakong makangangalas na dakul na tawo an nariribong! Ihinahapot ninda, “Saro sana daw an tunay na relihiyon, o an gabos daw na relihiyon inaako nin Diyos?” Kumbinsido daw kitang marhay na an itinutukdo ta iyo an katotoohan asin an arugan kan pagsamba na sinusunod kan Mga Saksi ni Jehova ngunyan iyo an inaako ni Jehova? May basehan daw talaga para magin arog kita kaiyan kakumbinsido? Hilingon ta an mga patunay.

2. Sigun sa 1 Tesalonica 1:5, taano ta kumbinsido si apostol Pablo sa katotoohan?

² Kumbinsidong marhay si apostol Pablo sa katotoohan. (Basahon an 1 Tesalonica 1:5.) An pagigin kumbinsido niya bako sanang dahil sa emosyon. Si Pablo mahigos na estudyante kan Tataramon nin Diyos. Nagtutubod siya na “an bilog na Kasuratan ipinasabong nin Diyos.” (2 Tim. 3:16) Ano an mga naaraman niya diyan? Sa Kasuratan, naaraman ni Pablo an dai maninigaran na mga patunay na si Jesus an ipinangakong Mesiyas—mga patunay na binaliwala kan Judiong mga lider nin relihiyon. Mga mapagsagin-sagin sinda na nagsasabing mga representante sinda nin Diyos pero naggigibo man kan mga bagay na ikinakaanggot niya. (Tito 1:16) Bakong arog ninda, dai si Pablo nagpipili kan mga gusto sana niyang paniwalaan sa Tataramon nin Diyos. Andam siya na itukdo asin isabuhay “an gabos na kabutan nin Diyos.”—Gibo 20:27.

3. Dapat daw na masimbag an gabos na hapot niyato para magin kumbinsido kitang marhay? (Hilingon man an kahon na “ An mga Gibo Asin Kaisipan ni Jehova—‘Dakulon Nanggad Para Maisaysay.’”)

³ Iniisip kan iba na dapat na masimbag kan tunay na relihiyon an ano man na hapot, dawa idtong mga hapot na mayo man nin espesipikong  simbag an Bibliya. Realistiko daw iyan? Pag-isipan an halimbawa ni Pablo. Sinabi niya sa saiyang mga kapagtubod na “siyertuhon an gabos na bagay,” pero inako man niya na dakul pang bagay an dai niya nasasabutan. (1 Tes. 5:21) Isinurat niya: “An satuyang kaaraman bakong kumpleto,” asin sinabi pa niya, “malabog na mga ladawan an nahihiling niyato paagi sa salming na metal.” (1 Cor. 13:9, 12) Bakong gabos na bagay naintindihan ni Pablo, asin iyo man kita. Pero nasabutan niya an panginot na mga katotoohan manungod ki Jehova. An mga naaraman niya igo na para makumbinsir siya na yaon sa saiya an katotoohan!

4. Paano kita magigin mas kumbinsido na yaon sa sato an katotoohan, asin ano an pag-uulayan ta manungod sa tunay na mga Kristiyano?

⁴ An sarong paagi para magin mas kumbinsido kita na yaon sa sato an katotoohan iyo an pagkumparar kan paagi nin pagsamba na ipinahiling ni Jesus saka kan pagsamba na ginigibo ngunyan kan Mga Saksi ni Jehova. Sa artikulong ini, mahihiling ta na an tunay na mga Kristiyano (1) dai nagsasamba sa idolo, (2) iginagalang an pangaran ni Jehova, (3) namumutan an katotoohan, asin (4) namumutan na marhay an lambang saro.

5. Ano an manunudan ta ki Jesus manungod sa tamang paagi nin pagsamba sa Diyos, asin paano ta masusunod an itinukdo niya?

⁵ Huling namumutan na marhay ni Jesus si Jehova, siya sana an sinasamba niya, kan nasa langit siya pati man kan nasa daga siya. (Luc. 4:8) Iyan man an itinukdo niyang gibuhon kan mga disipulo niya. Si Jesus saka an saiyang maimbod na mga disipulo dai nuarin man naggamit nin imahen sa saindang pagsamba. Dahil an Diyos sarong Espiritu, dai nin siisay man na makakagibo nin ano man na puwedeng magrepresentar sa kamurawayan ni Jehova! (Isa. 46:5) Pero paano man pag-abot sa mga imahen kan inaapod na  mga santo saka an pagpamibi sa sainda? Sa ikaduwang tugon kan Sampulong Tugon, sinabi ni Jehova: “Dai ka maggibo nin inukit na imahen o nin ladawan kan ano man na nasa kalangitan o nasa daga . . . Dai ka magduko sa sainda.” (Exo. 20:4, 5) Malinaw an mga tataramon na iyan sa mga gustong mapaugma an Diyos.

6. Anong arugan nin pagsamba an sinusunod kan Mga Saksi ni Jehova ngunyan?

⁶ Sinasabi kan mga historyador na sa Diyos sana itinatao kan mga Kristiyano kan inot na siglo an saindang eksklusibong debosyon. Halimbawa, sinasabi kan librong History of the Christian Church na para sa mga inot na Kristiyano “makangingiri” an ideya na magkaigwa nin mga imahen sa saindang lugar nin pagsamba. Sa ngunyan, sinusunod kan Mga Saksi ni Jehova an arugan na itinao kan mga Kristiyano kan inot na siglo. Dai kita namimibi sa mga imahen nin “mga santo” o mga anghel; dai ngani kita namimibi dawa ki Jesus. Asin dai man kita naggigibo nin ano man na klase nin pagsamba sa mga simbolo kan nasyon. Ano man an mangyari, determinado kitang sunudon an sinabi ni Jesus: “Si Jehova na saimong Diyos an dapat mong sambahon.”—Mat. 4:10.

7. Sa anong mga paagi ibang-iba an Mga Saksi ni Jehova sa gabos na relihiyon?

⁷ Sa ngunyan, dakul an gustong-gustong magdangog sa popular na mga lider nin relihiyon. Dahil sa sobrang paghanga, haros sambahon na sinda kan mga tawo. Tinatawo an mga simbahan ninda, binabakal an mga libro ninda, saka dakula an donasyon na nakukua ninda saka kan mga organisasyon na sinusuportaran ninda. May mga tawo na pinapaniwalaan an gabos na sinasabi ninda. Ugmahon an mga tawo na mahiling an mga lider na iyan na garo baga si Jesus an nahihiling ninda! Sa kabaliktaran, an tunay na mga parasamba ni Jehova mayo nin mga klero. Dawa iginagalang ta an mga nanginginot sa sato, malinaw sa sato an itinukdo ni Jesus: “Gabos kamo magturugang.” (Mat. 23:8-10) Mayo kitang iniidolong tawo, mga lider man sinda nin relihiyon o mga pulitiko. Asin dai ta sinusuportaran an saindang mga mobimiyento. Imbes, nagdadanay kitang neutral asin bakong parte kan kinaban. Sa mga bagay na iyan, kita nagigin ibang-iba sa kadakul na relihiyon na nagsasabing mga Kristiyano sinda.—Juan 18:36.

8. Taano ta masasabi ta na gusto ni Jehova na mapamuraway an saiyang pangaran asin maaraman iyan kan gabos?

⁸ Sarong beses, namibi si Jesus: “Ama, pamurawaya an saimong pangaran.” Sinimbag ni Jehova an pamibing iyan paagi sa makusog na boses hali sa langit, na nangangako na papamurawayon niya an saiyang pangaran. (Juan 12:28) Sa bilog na ministeryo ni Jesus, pinamuraway niya an pangaran kan saiyang Ama. (Juan 17:26) Kaya tama sanang asahan ta na dakulang onra para sa tunay na mga Kristiyano na gamiton an pangaran nin Diyos asin ipamidbid iyan sa iba.

9. Paano pinatunayan kan mga Kristiyano kan inot na siglo na iginagalang ninda an pangaran nin Diyos?

⁹ Kan inot na siglo C.E., dai nahaloy pagkatapos na maestablisar an Kristiyanong kongregasyon, ‘tinawan ni Jehova nin atensiyon an mga nasyon tanganing kumua hali sa sainda nin sarong banwaan para sa saiyang pangaran.’ (Gibo 15:14) Dakulang pribilehiyo para sa mga Kristiyano kan inot na siglo na gamiton an pangaran nin Diyos asin ipamidbid iyan sa iba. Ginamit ninda an pangaran nin Diyos sa saindang ministeryo saka sa mga libro sa Bibliya na isinurat ninda. * Pinatunayan ninda na sinda sarong banwaan para sa pangaran nin Diyos.—Gibo 2:14, 21.

10. Ano an mga patunay na an Mga Saksi ni Jehova sarong banwaan para sa pangaran ni Jehova?

¹⁰ An Mga Saksi ni Jehova daw sarong banwaan  para sa pangaran ni Jehova? Pag-isipan an mga patunay. Sa ngunyan, ginibo kan mga lider nin relihiyon an gabos tanganing maitago an katotoohan na an Diyos igwa nin personal na pangaran. Hinali ninda iyan sa mga bersiyon ninda nin Bibliya, asin may mga pagkakataon pa ngani na ipinagbawal ninda an paggamit kan pangaran na iyan sa saindang mga seremonya. * Malinaw nanggad, an Mga Saksi ni Jehova sana an nagpapahiling nin maninigong paggalang asin onra sa pangaran ni Jehova. Mas ipinapamidbid ta kisa sa ibang mga relihiyon an personal na pangaran nin Diyos! Sa bagay na iyan, ginigibo ta an satong pinakamakakaya na mamuhay kauyon kan apod sato, Mga Saksi ni Jehova. (Isa. 43:10-12) Nakaprodusir kita nin labing 240 milyones na kopya kan New World Translation of the Holy Scriptures, na naggagamit kan pangaran ni Jehova sa mga parte kan Bibliya na diyan hinali iyan kan ibang mga paratradusir kan Bibliya. Asin nagpoprodusir man kita nin mga basado sa Bibliyang publikasyon na naggagamit kan pangaran ni Jehova sa labing 1,000 lengguwahe!

11. Paano ipinahiling kan inot na mga Kristiyano an saindang pagkamuot sa katotoohan?

¹¹ Namumutan ni Jesus an katotoohan, an katotoohan manungod sa Diyos asin sa Saiyang mga katuyuhan. Namuhay si Jesus kauyon kan katotoohan, asin sinabi niya sa iba an katotoohan na iyan. (Juan 18:37) Namumutan man na  marhay kan tunay na mga parasunod ni Jesus an katotoohan. (Juan 4:23, 24) Sa katunayan, inapod ni apostol Pedro an Kristiyanismo na “dalan kan katotoohan.” (2 Ped. 2:2) Huling namumutan na marhay kan inot na mga Kristiyano an katotoohan, isinikwal ninda an mga katukduan kan mga relihiyon, mga tradisyon, asin personal na mga opinyon na kontra sa katotoohan. (Col. 2:8) Sa ngunyan, pinagmamaigutan man kan tunay na mga Kristiyano na “padagos na maglakaw sa katotoohan” paagi sa pagsigurado na nakabasar sa Tataramon ni Jehova an gabos nindang tinutubod asin an saindang pamumuhay.—3 Juan 3, 4.

12. Ano an ginigibo kan mga nanginginot sa sato pag may nahiling sindang kaipuhan liwaton sa satong pakasabot, asin taano ta ginigibo ninda iyan?

¹² Dai sinasabi kan Mga Saksi ni Jehova na igwa na sinda nin lubos na pakasabot manungod sa katotoohan. May mga pagkakataon na nasasala sinda sa pagpaliwanag kan sarong katukduan sa Bibliya o sa pag-organisar kan kongregasyon. Dai kita dapat magngalas diyan. Malinaw na sinasabi kan Kasuratan na an tamang kaaraman nadadagdagan sa paglihis nin panahon. (Col. 1:9, 10) Padikit-dikit na ihinahayag ni Jehova an katotoohan, kaya dapat na mapasensiya kitang maghalat sagkod na magliwanag nin magliwanag an katotoohan. (Tal. 4:18) Pag nahihiling kan mga nanginginot sa sato na may kaipuhan liwaton sa satong pakasabot manungod sa sarong katotoohan, dai sinda nag-aalangan na gibuhon iyan. Dakul na denominasyon nin Kakristiyanuhan an binabago an saindang mga tukdo tanganing mapaugma an mga miyembro ninda o magin popular sa kinaban. Sa kabaliktaran, may ginigibong pagliliwat an organisasyon ni Jehova tanganing mas maparani sinda sa Diyos asin maarog an paagi nin pagsamba na inestablisar ni Jesus. (Sant. 4:4) Pag naggigibo kita nin mga pagliliwat, bako iyan dahil nagbago naman an opinyon kan mga tawo sa kinaban, kundi dahil iyan sa mas malinaw na pakasabot ta sa Kasuratan. Namumutan ta an katotoohan!—1 Tes. 2:3, 4.

13. Ano an pinakaimportanteng kuwalidad na ipinapahiling kan tunay na mga Kristiyano, asin paano iyan ipinapahiling kan mga Saksi ni Jehova ngunyan?

¹³ Sa gabos na kuwalidad na nagpapamidbid sa Kristiyanong kongregasyon kan inot na siglo, an pinakaimportante iyo an pagkamuot. Sinabi ni Jesus: “Paagi kaini maaraman kan gabos na kamo sakuyang mga disipulo—kun igwa kamo nin pagkamuot sa lambang saro.” (Juan 13:34, 35) Sa ngunyan, naeeksperyensiyahan kan mga Saksi ni Jehova sa bilog na kinaban an tunay na pagkamuot asin pagkasararo. Ibang-iba nanggad kita sa gabos na iba pang relihiyon huling garo kita magkakapamilya dawa magkakalain an satong nasyon, rasa, asin kultura. An tunay na pagkamuot na iyan hiling-hiling sa satong mga pagtiripon, mga asembleya, saka mga kumbensiyon. An mga patunay na iyan nakakatabang sa sato na magin mas kumbinsido na an paagi ta nin pagsamba iyo an inuuyunan ni Jehova.

14. Uyon sa Colosas 3:12-14, ano an sarong importanteng paagi na naipapahiling ta an makusog na pagkamuot sa lambang saro?

¹⁴ Dinadagka kita kan Kasuratan na “magkaigwa nin makusog na pagkamuot sa lambang saro.” (1 Ped. 4:8) An sarong paagi na maipapahiling ta an pagkamuot na iyan iyo an pagpapatawad sa lambang saro saka pagpapasensiya sa pagkabakong perpekto kan iba. Naghahanap man kita nin mga oportunidad para magin matinao asin mapag-istimar sa gabos sa kongregasyon, dawa sa mga tibaad nakakulog sa sato. (Basahon an Colosas 3:12-14.) Pag nagpapahiling kita nin arog kaiyan na pagkamuot, pinapatunayan ta na talagang kita an tunay na mga Kristiyano.

15. Sa ano pang ibang mga paagi sinusunod ta an arugan nin pagsamba na itinao kan mga Kristiyano kan inot na siglo?

¹⁵ Sinusunod ta man sa iba pang mga paagi an arugan nin pagsamba na itinao kan Kristiyanong kongregasyon kan inot na siglo. Halimbawa, an pagkaorganisar sa sato kapareho kan panahon kan mga apostol kan inot na siglo. Arog ninda, igwa kita nin nagbibiyaheng mga paraataman, elder, asin mga ministeryal na lingkod. (Fil. 1:1; Tito 1:5) Saka arog ninda, iginagalang ta an pagbuot ni Jehova manungod sa sekso asin pag-aguman, an sinasabi nin Diyos manungod sa paggamit nin dugo, saka pinoprotektaran ta an kongregasyon sa mga habong magsunod sa mga pagbuot nin Diyos.—Gibo 15:28, 29; 1 Cor. 5:11-13; 6:9, 10; Heb. 13:4.

16. Ano an manunudan ta sa sinasabi kan Efeso 4:4-6?

¹⁶ Sinabi ni Jesus na dakul an masabing mga disipulo niya sinda, pero bako gabos tunay. (Mat. 7:21-23) Nagpatanid man an Kasuratan na sa huring mga aldaw, dakul an ‘masagin-sagin man ngayang maki-Diyos.’ (2 Tim. 3:1, 5) Pero, malinaw na itinutukdo sato kan Bibliya na may “sarong pagtubod” na inaako nin Diyos.—Basahon an Efeso 4:4-6.

17. Sairisay ngunyan an nagsusunod ki Jesus asin nagsasagibo kan sarong tunay na pagtubod?

¹⁷ Siisay an nagsasagibo ngunyan kan sarong tunay na pagtubod na iyan? Nahiling ta na an mga patunay. Inaram ta an arugan nin pagsamba na itinukdo ni Jesus asin isinagibo kan mga Kristiyano kan inot na siglo. Saro sana an simbag—an Mga Saksi ni Jehova. Dakulang pribilehiyo nanggad na mapabilang sa banwaan ni Jehova asin maaraman an katotoohan manungod saiya asin sa saiyang mga katuyuhan! Padagos lugod niyatong pangaptan nin higot an katotoohan asin lubos na magin kumbinsido diyan.