1. Ano an espirituwal na pangangaipo niyato, asin ano an koneksiyon kaiyan sa kaugmahan?

 AN TUNAY na kaugmahan bako lang basta pakamati nin temporaryong kaugmahan. An tunay na kaugmahan puwedeng mamatian nin saro sa bilog niyang buhay. Paano? Ipinaliwanag ni Jesus sa saiyang Sermon sa Bukid: “Maugma an mga nakakamating kaipuhan ninda nin espirituwal na mga bagay.” (Mat. 5:3) Aram ni Jesus na ginibo an mga tawo na igwa nin makusog na pagmawot na mamidbid asin sambahon an saindang Kaglalang, an Diyos na Jehova. Iyan an “espirituwal na mga bagay” o espirituwal na pangangaipo niyato. Asin huling si Jehova an “maugmang Diyos,” an mga nagsasamba sa saiya puwede man na magin maugma.—1 Tim. 1:11.

2-3. (a) Uyon ki Jesus, sairisay pa an puwedeng magin maugma? (b) Ano an pag-uulayan niyato sa artikulong ini, asin taano ta kaipuhan iyan?

² Kaipuhan ta daw na magkaigwa nin marahayon na mga kamugtakan sa buhay para magin maugma? Dai. Sa sermon ni Jesus, may sinabi siyang nakakabigla. “An mga nagmumundo”—magsalang huli sa pangluluya nin buot dahil sa mga kasalan ninda o huli sa inaatubang nindang nakakamundong mga kamugtakan sa buhay—puwedeng magin maugma. Arog man kaiyan an sinabi ni Jesus manungod sa “mga pinepersegir dahil sa katanusan” o sa mga “pigtutuya” huli sa pagigin parasunod ni Cristo. (Mat. 5:4, 10, 11) Pero paano posible na magin tunay na maugma sa arog kaiyan na mga kamugtakan?

³ Itinutukdo sa sato ni Jesus na an kaugmahan bakong resulta nin marahayon na mga kamugtakan sa buhay kundi nin pagpanigo sa satong espirituwal na pangangaipo asin pagrani sa Diyos. (Sant. 4:8) Paano ta magigibo iyan? Sa artikulong ini, pag-uulayan niyato an tulong panginot na lakdang na minagiya sa tunay na kaugmahan.

4. Ano an inot na lakdang para magin tunay na maugma? (Salmo 1:1-3)

⁴ LAKDANG 1: Para magin tunay na maugma, dapat na magkakan kita nin espirituwal na kakanon. An mga tawo saka hayop pareho nangangaipo nin pisikal na kakanon para mabuhay. Pero mga tawo sana an puwedeng magkakan nin espirituwal na kakanon. Asin kaipuhan niyato iyan. Iyan an dahilan kaya sinabi ni Jesus: “Dapat na bakong sa tinapay sana mabuhay an tawo, kundi sa lambang tataramon na minaluwas sa nguso ni Jehova.” (Mat. 4:4) Kun siring, dai ta dapat palihison an sarong aldaw na dai nagkakakan nin espirituwal na kakanon sa mahalagang marhay na Tataramon nin Diyos, an Bibliya. Sinabi kan salmista: ‘Maugma an tawo na an ikinakaugmang marhay iyo an katugunan ni Jehova asin na binabasa iyan aldaw asin banggi.’—Basahon an Salmo 1:1-3.

5-6. (a) Ano an puwede tang maaraman sa Bibliya? (b) Sa anong mga paagi makakatabang sa sato an pagbasa nin Bibliya?

⁵ Sa Bibliya, mamumuton na nagtao sa sato si Jehova nin mahalagang marhay na impormasyon manungod sa kun paano magkakaigwa nin maugmang buhay. Naaaraman ta kun ano an katuyuhan niya para sa satong buhay. Naaaraman ta kun paano kita magigin harani sa saiya asin kun paano niyato makakamtan an pagpapatawad niya sa satong mga kasalan. Asin naaaraman ta an manungod sa marahayon na paglaom na ipinapanuga niya para sa satong puturo. (Jer. 29:11) Nakakapaugma nanggad sa sato an mga katotoohan na iyan na naaaraman niyato huli sa pag-adal sa Bibliya!

⁶ Arog kan aram ta, igwa man an Bibliya nin kadakul na praktikal na sadol na makakatabang sa aroaldaw na pamumuhay. Pag sinusunod niyato an mga sadol na iyan, magigin  maugma kita. Pag pinangluluyahan ka nin buot huli sa mga problema sa buhay, magtao nin mas dakul na panahon sa pagbasa kan Tataramon ni Jehova asin sa paghurop-hurop diyan. Sinabi ni Jesus: “Maugma an mga nagdadangog kan tataramon nin Diyos asin nag-uutob kaiyan!”—Luc. 11:28.

7. Paano ka lubos na makikinabang sa panahon na itinatao mo sa pagbasa kan Tataramon nin Diyos?

⁷ Mantang binabasa mo an Tataramon nin Diyos, magtao nin panahon para namnamon an saimong binabasa. Tanganing iilustrar, naeksperyensiyahan mo na daw ini? May nagluto nin saro sa paborito mong kakanon. Pero huling naghihidali ka o kadakul kang iniisip, hinahalon mo lang ’yan na dai na lamang pignanamnam an kada hungit mo. Pagkatapos mong magkakan, napag-isip-isip mo na marikason palan su pagkakan mo asin na kun nagluway-luway ka kuta sa pagkakan, mananamitan mo an siram kan kada hungit mo. Nangyari na man daw saimo na naghidali ka sa pagbasa nin Bibliya kaya dai mo na lugod nanamnam an mensahe kaiyan? Dai maghidali sa pagbasa mo kan Tataramon nin Diyos; imahinara an mga eksena saka an mga boses asin isip-isipa an binasa mo. Magigin mas maugma ka pag ginibo mo iyan.

8. Paano inuutob kan “maimbod asin mapagmansay na uripon” an papel kaiyan? (Hilingon man an nota sa ibaba.)

⁸ Ninombrahan ni Jesus “an maimbod asin mapagmansay na uripon” tanganing magtao nin espirituwal na kakanon sa tamang panahon, asin abunda nanggad kitang pinapakakan sa espirituwal. * (Mat. 24:45) An ipinasabong na Kasuratan an panginot na sangkap sa gabos na pinoprodusir kan maimbod na uripon. (1 Tes. 2:13) Kaya an espirituwal na kakanon na iyan nakakatabang sa sato na maaraman an kaisipan ni Jehova na ihinayag niya sa Bibliya. Iyan an dahilan kaya binabasa ta an magasin na An Torrengbantayan asin Awake! saka an mga artikulo sa jw.org. Nag-aandam kita para sa mga pagtiripon kan kongregasyon sa tahaw kan semana saka sa katapusan kan semana. Asin hinihiling ta an lambang programa kada bulan sa JW Broadcasting^® kun available iyan. An pagkakan niyato nin dakul na espirituwal na kakanon makakatabang sa sato na magibo an ikaduwang lakdang na minagiya sa tunay na kaugmahan.

9. Ano an ikaduwang lakdang na minagiya sa tunay na kaugmahan?

⁹ LAKDANG 2: Para magin tunay na maugma, kaipuhan niyatong mamuhay kauyon kan mga pamantayan ni Jehova. An salmista nagsurat: “Maugma an lambang saro na may pagkatakot ki Jehova, na naglalakaw sa mga dalan Niya.” (Sal. 128:1) An pagkaigwa nin pagkatakot ki Jehova nangangahulugan na iginagalang ta siyang marhay kaya linilikayan tang gumibo nin ano man na makakapaanggot sa saiya. (Tal. 16:6) Sa siring, padagos tang pinagmamaigutan na sunudon an mga pamantayan nin Diyos sa kun ano an tama saka sala na ipinaliwanag niya sa Bibliya. (2 Cor. 7:1) Magigin maugma kita kun ginigibo ta an mga bagay na namumutan ni Jehova asin isinisikwal an mga bagay na ikinakaungis niya.—Sal. 37:27; 97:10; Roma 12:9.

10. Sigun sa Roma 12:2, ano an satong paninimbagan?

¹⁰ Basahon an Roma 12:2. Tibaad aram nin sarong tawo na si Jehova an may awtoridad na magdesisyon kun ano an tama asin kun ano an sala, pero dapat man niyang akuon an mga pamantayan nin Diyos para magin pamantayan niya na man iyan. Halimbawa, tibaad aram nin sarong tawo na may deretso an gobyerno na magbugtak nin mga limitasyon sa rikas nin pagmaneho  sa highway. Pero tibaad habo niyang akuon an mga limitasyon na iyan para magin iyo na man an limitasyon niya sa pagmaneho. Kaya nagmamaneho siya nin mas marikas kisa sa maninigong rikas. Paagi sa satong paggawi, ipinapahiling ta na talagang nagtutubod kita na an pagsunod sa mga pamantayan ni Jehova iyo an pinakamarahay na paagi nin pamumuhay. (Tal. 12:28) Arog kaiyan an namatian ni David, kaya sinabi niya ki Jehova: “Ipinaaram mo sa sako an dalan nin buhay. Sa saimong presensiya may abundang kagaya-gayahan; may kaugmahan sa may tuo mo sagkod lamang.”—Sal. 16:11.

11-12. (a) Pag napupurisaw kita o pinangluluyahan nin buot, sa ano kita dapat na mag-ingat? (b) Paano makakatabang sa sato an mga tataramon na nasa Filipos 4:8 pag nagpipili kita nin libangan?

¹¹ Pag napupurisaw kita o pinangluluyahan nin buot, tibaad mamatian niyato na kaipuhan ta nin pampalipas oras para malingawan an satong mga problema. Natural sana iyan, pero dapat na mag-ingat kita para dai kita makagibo nin ano man na ikinakaungis ni Jehova.—Efe. 5:10-12, 15-17.

¹² Sa surat ni apostol Pablo sa mga taga Filipos, sinadol niya an mga Kristiyano na padagos na isip-isipon an mga bagay na “matanos, . . . malinig, . . . kawili-wili, [asin] igwang karahayan.” (Basahon an Filipos 4:8.) Maski ngani dai man espesipikong pinapanungdan diyan ni Pablo an manungod sa libangan, an isinurat niya dapat na makaimpluwensiya sato sa pinipili tang mga libangan. Purbaran ini: Sa kada pagsambit kan tataramon na “bagay” sa bersikulo, ribayan iyan kan tataramon na “kanta,” “pelikula,” “nobela,” o “video game.” Makakatabang iyan sa saimo na maaraman kun arin na mga libangan an tibaad akseptable sa pagmansay nin Diyos asin kun arin an tibaad bako. Gusto tang iuyon an satong pamumuhay sa halangkaw na mga pamantayan ni Jehova. (Sal. 119:1-3) Dangan, dahil igwa kita nin malinig na konsiyensiya, puwede ta nang gibuhon an sunod na lakdang na minagiya sa tunay na kaugmahan.—Gibo 23:1.

13. Ano an ikatulong lakdang na minagiya sa tunay na kaugmahan? (Juan 4:23, 24)

¹³ LAKDANG 3: Siguraduhon na iniinot mo sa saimong buhay an pagsamba ki Jehova. Bilang an satong Kaglalang, maninigo nanggad si Jehova sa satong pagsamba. (Kap. 4:11; 14:6, 7) Huli kaiyan, kaipuhan tang magin priyoridad an pagsamba sa saiya sa paaging inuuyunan niya, “sa espiritu asin katotoohan.” (Basahon an Juan 4:23, 24.) Gusto niyatong giyahan kan banal na espiritu nin Diyos an satong pagsamba tanganing magin kauyon iyan kan mga katotoohan na yaon sa saiyang Tataramon. Dapat na panginot sa sato an satong pagsamba dawa kun nakaistar kita sa nasyon na may restriksiyon sa satong gibuhon o ipinagbabawal iyan. Sa ngunyan, labing 100 sa satong mga tugang an nakapreso dahil lang ta mga Saksi ni Jehova sinda. * Dawa arog kaiyan, maugma nindang ginigibo an gabos na magigibo ninda para mamibi, mag-adal, asin sabihon sa iba an manungod sa satong Diyos asin sa saiyang Kahadian. Pag tinutuya kita o pinepersegir, puwede kitang magin maugma huling aram niyato na kaibanan ta si Jehova asin na babalusan niya kita.—Sant. 1:12; 1 Ped. 4:14.

14. Ano an nangyari sa sarong hoben na brother sa Tajikistan, asin taano?

¹⁴ Pinapatunayan nin mga eksperyensiya sa totoong buhay na an tulong lakdang na napag-ulayan ta pa sana talagang minagiya sa tunay na kaugmahan, ano man an satong mga kamugtakan. Pag-isipan an nangyari sa 19 anyos  na si Jovidon Bobojonov, na taga Tajikistan, na nagsayumang magserbisyo sa militar. Kan Oktubre 4, 2019, puwersahan siyang kinua sa saiyang harong, iprineso nin nagkapirang bulan, asin trinato na garo kriminal. Nakaabot sa ibang mga nasyon an manungod sa inhustisyang iyan. Sigun sa bareta, binugbog siya tanganing piriton na manumpa nin kaimbudan sa militar asin magsulot nin uniporme. Pagkatapos kaiyan, hinatulan siyang nagkasala asin ipinadara sa sarong kampo nin puwersahan na pagtrabaho sagkod na sa katapos-tapusi tinawan siya nin pardon kan presidente kan nasyon asin ipinagbuot na paluwason siya. Sa bilog na panahon na idto, napagdanay ni Jovidon an saiyang integridad asin kaugmahan. Paano? Paagi sa pirming pagsaisip kan saiyang espirituwal na pangangaipo.

15. Mantang nakapreso si Jovidon, paano siya nagkakan nin espirituwal na kakanon?

¹⁵ Mantang nakapreso si Jovidon, padagos siyang nagkakan nin espirituwal na kakanon, dawa kan mayo siya nin Bibliya o ano man na publikasyon niyato. Paano nagin posible iyan? Dinadarahan siya kan mga tugang duman nin pisikal na kakanon asin isinusurat ninda an teksto kan aldaw sa mga piglagan nin groseri. Huli kaiyan, aroaldaw siyang nakakapagbasa nin Bibliya asin nakakapaghurop-hurop diyan. Pagkaluwas niya sa presuhan, ini an nagin sadol niya sa mga dai pa napaatubang sa grabeng mga pagbalo: “Kaipuhan nanggad nindong lubos na  gamiton an saindong katalingkasan para pararumon an saindong kaaraman manungod ki Jehova paagi sa pagbasa kan saiyang Tataramon asin kan satong mga publikasyon.”

16. Sain ipinokus ni Jovidon an saiyang kaisipan?

¹⁶ An satong tugang namuhay kauyon kan mga pamantayan ni Jehova. Imbes na pagparaisipon an salang mga pagmawot asin gumibo nin maraot, nagpokus siya ki Jehova asin sa kun ano an mahalaga sa Saiya. Pighurop-hurop ni Jovidon an kagayunan kan mga linalang nin Diyos. Kada aga, napapagmata siya sa huni nin mga gamgam. Pag banggi, pigmamasdan niya an bulan saka an mga bituon. Sinabi niya: “Dahil sa mga regalong iyan ni Jehova, nauugma ako saka napapakusog.” Pag mapagpasalamat kita sa espirituwal asin pisikal na mga probisyon ni Jehova, nagkakaigwa kita nin maugmang puso, asin an kaugmahan na iyan makakapauswag kan satong kakayahan na magtagal.

17. Paano an mga tataramon sa 1 Pedro 1:6, 7 puwedeng iaplikar sa sarong tawo na nasa sitwasyon na tibaad arog kan ki Jovidon?

¹⁷ Ininot man ni Jovidon an pagsamba ki Jehova. Aram niya na mahalagang mapagdanay niya an saiyang integridad sa tunay na Diyos. Sinabi ni Jesus: “Si Jehova na saimong Diyos an dapat mong sambahon, asin sa saiya mo sana dapat itao an sagradong paglilingkod.” (Luc. 4:8) Gusto kan mga komandante militar asin mga suldados na bayaan ni Jovidon an saiyang relihiyon. Sa kabaliktaran, aroaldaw asin burubanggi siyang udok na nagparapamibi, na hinahagad ki Jehova na tabangan siyang dai sumuko asin dai ikompromiso an saiyang pagtubod. Sa ibong kan bakong makatanusan na pagtrato sa saiya, nungkang nagkompromiso si Jovidon. Bilang resulta, makakapag-ugma na siyang marhay ngunyan huling igwa na siya kan sarong bagay na mayo siya kaidto bago siya puwersahan na kuanon, bugbugon, asin ipreso—an nabalong pagtubod.—Basahon an 1 Pedro 1:6, 7.

18. Paano ta mapapagdanay an satong kaugmahan?

¹⁸ Aram ni Jehova kun ano an kaipuhan ta para magin tunay na maugma. Kun susunudon mo an tulong lakdang na minagiya sa tunay na kaugmahan, mapapagdanay mo an saimong kaugmahan sa ibong nin mga kadipisilan. Dangan masasabi mo man: “Maugma an banwaan na an Diyos iyo si Jehova!”—Sal. 144:15.