1. Ano an kaipuhan na gibuhon nin saro kun gusto niyang dumulok sa hadi kan Persia?

NAKAISTAR ka ngaya sa Persia mga 2,500 na taon na an nakaagi. May gusto kang ipakipag-ulay sa hadi, kaya nagbiyahe ka pasiring sa palasyo niya sa siyudad nin Susan. Pero dai mo lamang pupurbaran na dumulok sa hadi kun mayo ka pa kan permiso niya. Huling kun gigibuhon mo iyan, puwede nanggad iyan mangahulugan kan saimong buhay!—Est. 4:11.

2. Ano an gusto ni Jehova na mamati ta pag nagdudulok kita saiya?

² Marahay na sana ta si Jehova bako nanggad arog kan hading iyan nin Persia! Si Jehova mas nakakalabing marhay kisa sa siisay man na tawong tagapamahala, alagad puwede kitang dumulok sa saiya ano man na oras. Gusto niya na dai kita mag-alangan na dumulok sa saiya. Halimbawa, dawa igwa si Jehova kan halangkawon na mga titulo arog kan Kahuruhalangkawing Kaglalang, Makakamhan sa Gabos, asin Soberanong Kagurangnan, dinadagka niya kita na makipag-ulay sa saiya gamit an pamilyar na terminong “Ama.” (Mat. 6:9) Talagang nakakaugmang isipon na gusto ni Jehova na ibilang ta siya sa arog kaiyan kamamumuton asin kadayupot na paagi!

3. Taano ta puwede tang apudon si Jehova na “Ama,” asin ano an pag-uulayan sa artikulong ini?

³ Tama sanang apudon ta si Jehova na “Ama”—siya an Burabod kan satong buhay. (Sal. 36:9) Huling siya an satong Ama, responsabilidad tang magsunod sa saiya. Kun ginigibo niyato kun ano an hinahagad niya sa sato, magkakamit kita nin marahayon na mga bendisyon. (Heb. 12:9) Kaiba sa mga bendisyon na iyan an buhay na daing katapusan, sa langit man o sa daga. May nakakamtan man kitang mga bendisyon ngunyan. Pag-uulayan sa artikulong ini kun paano ipinapahiling ngunyan ni Jehova na saro siyang mamumuton na Ama asin kun taano ta makakasigurado kita na dai niya kita nuarin man papabayaan sa maabot na panahon. Pero, pag-ulayan ta  nguna kun taano ta makakapagtiwala kita na an satong Ama sa langit namumutan kitang marhay asin nagmamalasakit sa sato.

4. Taano ta may mga tawong nasasakitan na ibilang na Ama ninda si Jehova?

⁴ Nasasakitan ka daw na mansayon an Diyos bilang saimong Ama? Iniisip kan iba na dahil halangkawon asin dakulaon si Jehova, ano na lang sinda kumpara sa saiya? Nagdududa sinda kun baga nagmamalasakit sa sainda bilang indibidwal an Diyos na Makakamhan sa Gabos. Pero, bakong arog kaiyan an gusto kan satong mamumuton na Ama na mamati niyato. Tinawan niya kita nin buhay asin gusto niya na magkaigwa kita nin dayupot na relasyon sa saiya. Pagkatapos na sabihon an katotoohan na ini, ipinaliwanag ni apostol Pablo sa mga nagdadangog sa saiya sa Atenas, na si Jehova “bako man . . . harayo sa lambang saro sa sato.” (Gibo 17:24-29) Gusto nin Diyos na an lambang saro sa sato dumulok sa saiya arog kan pagdulok nin sarong aki sa mamumuton asin mapagmalasakit niyang magurang.

5. Ano an manunudan ta sa eksperyensiya nin sarong sister?

⁵ An iba posibleng nasasakitan na mansayon si Jehova bilang saindang Ama huling an sainda mismong ama dai gayo o dai ngani nagpahiling nin pagkamuot saka pagmalasakit sa sainda. Pag-isipan an sinabi nin sarong sister: “Mapang-abusong marhay an ama ko. Kaya kan magpuon akong mag-adal nin Bibliya, nasakitan akong magin dayupot sa sarong langitnon na Ama. Pero kan mamidbid ko na si Jehova, biyong nagbago iyan.” Arog man daw kaiyan an namamati mo? Kun iyo, makakasigurado ka man na pag-abot nin panahon marerealisar mong si Jehova an pinakamarahay na Ama.

6. Sigun sa Mateo 11:27, ano an sarong paagi na tinabangan kita ni Jehova na ibilang siya na satong mamumuton na Ama?

⁶ An sarong paagi na tinabangan kita ni Jehova na ibilang siya na satong mamumuton na Ama iyo an pagpasurat niya sa Bibliya kan mga sinabi saka ginibo ni Jesus. (Basahon an Mateo 11:27.) Perpekto nanggad na ipinahiling ni Jesus an personalidad kan saiyang Ama kaya masasabi niya: “An siisay man na nakahiling na sa sako nakahiling na man sa Ama.” (Juan 14:9) Parating binabanggit ni Jesus si Jehova bilang sarong Ama. Sa apat na Ebanghelyo pa sana, mga 165 beses na inapod ni Jesus si Jehova na “Ama.” Taano ta arog kaiyan kadakul na beses na binanggit ni Jesus si Jehova bilang Ama? An sarong dahilan iyo na tanganing kumbinsiron an mga tawo na si Jehova sarong mamumuton na Ama.—Juan 17:25, 26.

7. Ano an manunudan niyato sa paagi nin pagtratar ni Jehova sa saiyang Aki?

⁷ Pag-isipan kun ano an manunudan niyato sa paagi nin pagtratar ni Jehova sa saiyang Aki, si Jesus. Pirming dinadangog ni Jehova an mga pamibi ni Jesus. Pero dai sana niya dinangog an mga pamibi ni Jesus, sinimbag niya man iyan. (Juan 11:41, 42) Ano man na pagbalo an napaatubang ki Jesus, namati niya an pagkamuot asin tabang kan saiyang Ama.—Luc. 22:42, 43.

8. Sa anong mga paagi itinao ni Jehova an mga pangangaipo ni Jesus?

⁸ Minidbid ni Jesus na an saiyang Ama an Burabod asin Parasustenir kan saiyang buhay kan sabihon niya: “Nabubuhay ako dahil sa Ama.” (Juan 6:57) Lubos na nagtiwala si Jesus sa saiyang Ama, asin itinao ni Jehova an pisikal na mga pangangaipo niya. An pinakamahalaga, itinao ni Jehova an espirituwal na mga pangangaipo ni Jesus.—Mat. 4:4.

9. Paano ipinahiling ni Jehova na saro siyang mamumuton saka mapagmalasakit na Ama ki Jesus?

⁹ Bilang sarong mamumuton na Ama, sinigurado ni Jehova na aram ni Jesus na igwa siya kan suporta kan saiyang Ama. (Mat. 26:53; Juan 8:16) Dai ni Jehova prinotektaran si Jesus sa gabos na kakulugan, pero tinabangan niya si Jesus na matagalan an mga pagbalo. Nagtitiwala si Jesus na temporaryo sana an ano man na kakulugan na tibaad maeksperyensiyahan niya. (Heb. 12:2) Ipinahiling ni Jehova na nagmamalasakit siya ki  Jesus paagi sa pagdangog sa saiya, pagtao kan mga pangangaipo niya, pagsasanay saiya, asin pagsuportar sa saiya. (Juan 5:20; 8:28) Aramon ta na man ngunyan kun paano nagmamalasakit sa sato an satong Ama sa langit sa kaagid na mga paagi.

10. Sigun sa Salmo 66:19, 20, paano ipinapahiling ni Jehova na namumutan niya kita?

¹⁰ Dinadangog ni Jehova an satong mga pamibi. (Basahon an Salmo 66:19, 20.) Habo niyang limitaran ta kun gurano kaparati o kalaba an satong mga pamibi, asin kun ano an mga ipapamibi ta, imbes dinadagka niya kita na parating mamibi. (1 Tes. 5:17) Puwede kitang magalang na dumulok sa satong Diyos dawa nuarin asin maski sain. Pirmi siyang may panahon para magdangog sa sato; pirmi siyang andam na magdangog. Pag narerealisar tang dinadangog ni Jehova an satong mga pamibi, lalo ta siyang namumutan. Sinabi kan salmista: ‘Namumutan ko [si Jehova], huli ta dinadangog niya an sakong tingog.’—Sal. 116:1, An Marahay na Bareta Biblia.

11. Paano sinisimbag ni Jehova an satong mga pamibi?

¹¹ Dai sana dinadangog kan satong Ama an mga pamibi ta, kundi sinisimbag niya man iyan. Inaasigurar kita ni apostol Juan: “Ano man na bagay na hagadon niyato kauyon kan kabutan [nin Diyos], dinadangog niya kita.” (1 Juan 5:14, 15) Siyempre, posibleng simbagon ni Jehova an satong mga pamibi bako sa paaging inaasahan ta. Aram niya kun ano an pinakamarahay para sa sato, kaya kun minsan dai an simbag niya o gusto niya na maghalat kita.—2 Cor. 12:7-9.

12-13. Sa anong mga paagi itinatao kan satong Ama sa langit an mga pangangaipo niyato?

¹² Itinatao ni Jehova an mga pangangaipo niyato. Ginigibo niya kun ano an hinahagad niyang gibuhon kan gabos na ama. (1 Tim. 5:8) Itinatao niya an materyal na mga pangangaipo kan saiyang mga aki. Habo niya kitang maghadit manungod sa kun ano an satong kakakanon, isusulot, o iistaran. (Mat. 6:32, 33; 7:11) Bilang sarong mamumuton na magurang, naggibo pa ngani si Jehova nin areglo na itao an gabos niyatong pangangaipo sa maabot na panahon.

¹³ An pinakamahalaga, itinatao ni Jehova an satong espirituwal na mga pangangaipo. Paagi sa saiyang Tataramon, ihinayag niya an katotoohan manungod sa saiya, sa katuyuhan niya, sa kahulugan kan buhay, saka sa mga mangyayari sa ngapit. Pinahilingan niya kita nin personal na atensiyon kan maaraman niyato an katotoohan paagi sa paggamit sa satong mga magurang o iba pang paratukdo para tabangan kitang mamidbid siya. Asin padagos kitang nag-aako nin mabuot na tabang hali sa mamumuton na mga elder sa kongregasyon asin sa iba pang maygurang na mga tugang. Saro pa, tinutukduan kita ni Jehova paagi sa satong mga pagtiripon kan kongregasyon, na diyan nakakanuod kita kaiba kan satong espirituwal na pamilya. Sa mga ini asin sa iba pang mga paagi, ipinapahiling ni Jehova bilang Ama an saiyang interes sa sato gabos.—Sal. 32:8.

14. Taano ta sinasanay kita ni Jehova, asin paano niya iyan ginigibo?

¹⁴ Sinasanay kita ni Jehova. Si Jesus perpekto, pero kita bako. Kaya bilang parte kan pagsasanay sa sato, dinidisiplina kita kan satong mamumuton na Ama pag kaipuhan. Ipinapagirumdom sa sato kan saiyang Tataramon: “An mga namumutan ni Jehova dinidisiplina niya.” (Heb. 12:6, 7) Dinidisiplina kita ni Jehova sa dakul na paagi. Halimbawa, tibaad may mabasa kita sa saiyang Tataramon o madangog sa satong mga pagtiripon na puwedeng magtanos sa sato. O tibaad maghali sa mga elder an tabang na kaipuhan ta. Ano man na klase an pagdisiplina sa sato ni Jehova, iyan pirming motibado nin pagkamuot.—Jer. 30:11.

15. Sa anong mga paagi kita pinoprotektaran ni Jehova?

¹⁵ Tinatabangan kita ni Jehova na matagalan an mga pagbalo. Kun paanong tinatabangan nin sarong mapagmalasakit na magurang an saiyang mga aki sa masakit na mga panahon, tinatabangan man kita kan satong Ama sa langit na matagalan an mga pagbalo. Ginagamit niya an saiyang  banal na espiritu para protektaran kita laban sa espirituwal na danyos. (Luc. 11:13) Tinatabangan man kita ni Jehova pag pinangluluyahan kita nin buot. Halimbawa, tinatawan niya kita nin sarong pambihirang paglaom. An paglaom na iyan sa maabot nagtatabang sa sato na matagalan an mga kadipisilan. Pag-isipan ini: Ano man na maraot na mga bagay an mangyari sa sato, lubos na hahalion kan satong mamumuton na Ama an ano man na danyos na resulta kaiyan. Temporaryo sana an ano man na pagbalong napapaatubang sa sato, pero an mga bendisyon na itinatao ni Jehova nagdadanay sagkod lamang.—2 Cor. 4:16-18.

16. Ano an nangyari kan suwayon ni Adan an saiyang mamumuton na Ama?

¹⁶ An sarong patunay na namumutan kita ni Jehova mahihiling niyato sa paagi nin pag-asikaso niya sa mga problema na nagpuon sa laog kan saiyang daganon na pamilya. Kan suwayon ni Adan an saiyang Ama sa langit, naiwara niya an pagigin parte niya kan maugmang pamilya ni Jehova, asin nadamay pati an mga magigin gikan niya. (Roma 5:12; 7:14) Pero may ginibo si Jehova para tabangan an mga gikan ni Adan.

17. Pagkatapos kan pagrebelde ni Adan, ano tulos an ginibo ni Jehova?

¹⁷ Pinadusahan ni Jehova si Adan, pero tinawan niya nin paglaom an mga magigin gikan ni Adan. Nanuga tulos siya na an makinuyog na mga tawo ibabalik sa saiyang pamilya. (Gen. 3:15; Roma 8:20, 21) Inareglo iyan ni Jehova basado sa atang na pantubos kan saiyang namumutan na Aki, si Jesus. Paagi sa pagtao kan saiyang Aki alang-alang sa sato, pinatunayan ni Jehova kun gurano niya kita kanamumutan.—Juan 3:16.

18. Taano ta makakasigurado kita na gusto ni Jehova na magin mga aki niya kita, dawa kun naparayo kita sa saiya?

¹⁸ Dawa bako kitang perpekto, gusto ni Jehova na magin parte kita kan saiyang pamilya, asin para saiya bako nanggad kitang pagabat. Tibaad mapamundo ta siya o maparayo kita sa halipot na panahon, pero pirmi siyang naglalaom na mabalik kita sa saiya. Iinilustrar ni Jesus an rarom kan sa-amang  pagmalasakit ni Jehova paagi sa istorya manungod sa aking lalaki na naparaot an buhay. (Luc. 15:11-32) An ama sa ilustrasyon na idto nungkang nagpundong maglaom na mabalik an saiyang aki. Kan magbalik na an saiyang aki, ugmahon niya ining sinabat. Kun naparayo kita ki Jehova alagad nagsusulsol na, makakasigurado kita na an satong mamumuton na Ama andam asin gustong-gusto kitang akuon giraray.

19. Paano papakarhayon ni Jehova an danyos na resulta kan ginibo ni Adan?

¹⁹ Papakarhayon kan satong Ama an gabos na danyos na resulta kan ginibo ni Adan. Pagkatapos kan pagrebelde ni Adan, nagdesisyon si Jehova na mag-ampon nin 144,000 na indibidwal hali sa katawuhan para maglingkod bilang mga hadi asin saserdote sa langit kaiba kan saiyang Aki, si Jesus. Sa bagong kinaban, an makinuyog na mga tawo tatabangan ni Jesus saka kan kairiba niyang mga tagapamahala na magin perpekto. Pagkatapos kan pangultimong pagbalo sa pagigin makinuyog, an Diyos tatawan sinda nin buhay na daing katapusan. Dangan an satong Ama makakamati nin kaugmahan na mahiling na an Daga iniistaran kan saiyang perpektong mga aking tawo. Talagang magigin mamuraway nanggad na panahon iyan!

20. Sa anong mga paagi ipinapahiling ni Jehova na namumutan niya kitang marhay, asin ano an pag-uulayan sa sunod na artikulo?

²⁰ Ipinapahiling ni Jehova na namumutan niya kitang marhay. Siya an pinakamarahay na Ama. Dinadangog niya an satong mga pamibi asin itinatao kun ano an kaipuhan ta—sa materyal man o sa espirituwal. Sinasanay asin tinatabangan niya kita. Igwa man siya nin itinagamang marahayon na mga bendisyon para sa sato. Talagang nakakaugmang maaraman na namumutan kita kan satuyang Ama asin nagmamalasakit siya sa sato! Pag-uulayan sa sunod na artikulo an mga paagi na maipapahiling niyato, bilang saiyang mga aki, na nagpapasalamat kita sa saiyang pagkamuot.