1. Anong mahalagang tema an tinukar ni Jesus kan huring bangging kaiba niya an saiyang mga disipulo?

KAN huring bangging kaiba niya an saiyang mga disipulo, sinambit ni Jesus an pagkamuot nin haros 30 beses. Espesipiko niyang sinambit na dapat “kamutan [kan saiyang mga disipulo] an lambang saro.” (Juan 15:12, 17) An pagkamuot ninda sa lambang saro magigin pambihirang marhay kaya diyan sinda malinaw na mamimidbid bilang tunay na mga parasunod niya. (Juan 13:34, 35) An pagkamuot na ini bako sana basta makusog na emosyon. An nasa isip ni Jesus iyo an pinakanangungurog na kuwalidad—an mapagsakripisyong pagkamuot. Sinabi niya: “Mayo nin pagkamuot na malabi pa kaini, na itao kan saro an saiyang buhay para sa mga amigo niya. Mga amigo ko kamo kun ginigibo nindo an ipinagbubuot ko sa saindo.”—Juan 15:13, 14.

2. (a) Sa ano midbid an mga lingkod nin Diyos? (b) Anong mga hapot an sisimbagon niyato sa artikulong ini?

² An tunay asin mapagsakripisyong pagkamuot saka an dai kayang rauton na pagkasararo kan mga lingkod ni Jehova ngunyan an nagpapamidbid sa sainda bilang banwaan nin Diyos. (1 Juan 3:10, 11) Ipinagpapasalamat nanggad niyato na nangingibabaw sa mga lingkod ni Jehova  an arog-Cristong pagkamuot ano man an saindang nasyonalidad, tribo, lengguwahe, o pinaghalian! Pero tibaad maihapot niyato: ‘Taano ta lalo nang kaipuhan ngunyan an pagkamuot? Paano kita pinapakusog ni Jehova asin ni Jesus paagi kan saindang pagkamuot? Bilang indibidwal, paano ta maipapahiling an arog-Cristong pagkamuot na “nakakapakusog”?’—1 Cor. 8:1.

3. Paano nakakaapektar sa mga tawo an “delikado asin masakit na mga panahon” na ini?

³ Huling an buhay pano nin ‘kasakitan asin kamunduan,’ dakul na tawo sa “delikado asin masakit na mga panahon” na ini an nakakaeksperyensiya nin manlain-lain na kapurisawan. (Sal. 90:10, BPV *; 2 Tim. 3:1-5) Dakulon an nakakaisip na sumuko na lang. Kinakarkulo na labing 800,000 katawo an nagagadan kada taon huli sa paghugot—buot sabihon poko mas o menos sarong tawo an nagagadan kada 40 segundos. Nakakamundo huling dawa an pirang Kristiyano tinapos an sadiri nindang buhay huli sa mga kasakitan na iyan.

4. Sairisay na mga karakter sa Bibliya an nakamati na gusto na nindang magadan?

⁴ Kan mga panahon kan Bibliya, pira sa maimbod na mga lingkod nin Diyos an nakamating dai na ninda kaya an saindang mga problema kaya gusto na nindang magadan. Halimbawa, huli sa grabeng kulog, nag-agrangay si Job: ‘Habo ko na; habo ko nang mabuhay pa.’ (Job 7:16; 14:13, BPV) Nadisganar na marhay si Jonas sa kinaluwasan kan saiyang asignasyon kaya nasabi niya: ‘Ngunyan, [O Jehova, kuana] tabi sa sako an sakong buhay, huli ta marahay pang ako magadan kisa mabuhay.’ (Jon. 4:3, An Banal na Biblia) May pagkakataon man na naapektaran na marhay an maimbod na propetang si Elias huli sa saiyang kamugtakan kaya hinagad niyang magadan na siya. Sinabi niya: ‘Husto na, O Jehova, kuana an sakuyang buhay.’ (1 Ha. 19:4) Pero mahalaga ki Jehova an debotadong mga lingkod na idto asin gusto niyang magdanay sindang buhay. Imbes na sawayon huli sa nagin sabuot ninda, tinabangan niya sinda na mapangganahan an kamawutan nindang magadan asin pinakusog niya sinda paagi kan saiyang pagkamuot tanganing makapagpadagos sinda sa maimbod nindang paglilingkod.

5. Taano ta lalo nang kaipuhan ngunyan kan mga tugang an satong pagkamuot?

⁵ Bako man gabos na tugang niyato nakakamati na gusto na nindang magadan, alagad dakul ngunyan an may inaatubang na nakaka-stress na mga sitwasyon asin kaipuhan ninda an satong pagkamuot tanganing mapakusog. May mga nagtatagal nin persekusyon asin pagtuya. An iba biktima nin mga pagkritika asin pagpakaraot kan saindang mga katrabaho. Igwa man nin pagal-pagal na huli sa kaka-overtime o sa pag-abot sa kadakul na deadline. May iba man na may inaatubang na nakakapangluyang mga problema sa pamilya, na posibleng pagkontra kan bakong kapagtubod na agom. Huli kaini asin sa iba pang mga problema, namamatian kan dakul sa kongregasyon na mayo na sindang kusog. Siisay an makakatabang sa mga pinangluluyahan nin buot na padagos na magtagal?

6. Paano pinapakusog ni Jehova an saiyang mga lingkod paagi kan saiyang pagkamuot?

⁶ Pinapakusog ni Jehova an saiyang mga parasamba paagi sa pagsiyerto sa sainda na danay niya sindang mamumutan. Siguradong napakusog an maimbod na mga Israelita sa sinabi sa sainda ni Jehova: ‘Nagi kang mahalaga sa sakong mga mata, [tinawan ka nin onra], asin namumutan ko ika. Dai ka matakot, ta kaiba mo ako’! (Isa. 43:4, 5, An Banal na Biblia) Bilang saro sa mga lingkod ni Jehova, makakasiyerto ka na padangaton ka ni Jehova. * Nanunuga an Tataramon nin Diyos para sa mga nagsasagibo kan tunay na pagsamba: “Bilang makakamhan na Saro, siya magliligtas. Siya  mag-uugma sa saimo na may dakulang kagaya-gayahan.”—Sof. 3:16, 17, NW.

7. Paano nakakaagid sa pagpadangat nin sarong ina sa saiyang umboy an pagkamuot sa sato ni Jehova? (Hilingon an ritrato sa kapinunan kan artikulo.)

⁷ Ano man na pagbalo an mapaatubang sa saiyang mga lingkod, nanunuga si Jehova na tatabangan asin rarangahon niya sinda. ‘Masuso kamo, kikilikon kamo, asin [papauruuntol-untulon] kamo sa mga tuhod. Siring kaidtong pigraranga kan saiyang ina, siring man sana rarangahon ko kamo.’ (Isa. 66:12, 13) Marahayon nanggad paghilingon an sarong mamumuton na ina na kilik-kilik an saiyang umboy o na pinapauruuntol-untol ini sa may tuhod niya! Sa arog kaining paagi iinilustrar ni Jehova kun gurano niya kapadangat asin kanamumutan an saiyang tunay na mga parasamba. Nungkang magduda na mahalaga kang marhay ki Jehova asin na padangaton ka niya.—Jer. 31:3.

8, 9. Paano kita napapakusog kan pagkamuot ni Jesus?

⁸ May saro pang dahilan an tunay na mga Kristiyano kaya kumbinsido sindang namumutan sinda nin Diyos: Siya “namuot na gayo sa kinaban kaya itinao niya an saiyang bugtong na Aki, tanganing an siisay man na nagtutubod sa saiya dai malaglag kundi magkaigwa nin buhay na daing katapusan.” (Juan 3:16) Dakula nanggad na pagkamuot an ipinahiling man ni Jesus sa pagtao niya kan saiyang buhay para sa sato! Asin dakulang motibasyon nanggad sa sato an pagkamuot na iyan! Nanunuga an Tataramon nin Diyos na dawa an “kasakitan . . . o kahaditan” dai “makakapasuway sa sato sa pagkamuot kan Cristo.”—Roma 8:35, 38, 39.

⁹ Pag napapaatubang kita sa mga pagbalong nakakaubos kan satong kusog sa pisikal, emosyon, o sa espirituwal, an nakakamotibar na puwersa kan pagkamuot ni Cristo makakatao sa sato kan kusog na kaipuhan tanganing magtagal. (Basahon an 2 Corinto 5:14, 15.) May puwersa an pagkamuot ni Jesus na tabangan kitang makatagal asin dai sumuko, dawa napapaatubang kita sa mga pagbalong arog nin kalamidad, persekusyon, pagkadisganar, o grabeng kahaditan.

10, 11. Sairisay an may paninimbagan na pakusugon an mga tugang na pinangluluyahan nin buot? Ipaliwanag.

¹⁰ Ginagamit man ni Jehova an Kristiyanong kongregasyon tanganing pakusugon kita paagi kan saiyang pagkamuot. Bilang indibidwal, mababalusan ta an saiyang pagkamuot kun mamumutan ta an satong mga tugang sa espirituwal asin papakusugon an saindang buot bako lang an saindang espirituwalidad. (1 Juan 4:19-21) Dinagka ni apostol Pablo an mga Kristiyano: “Padagos na rangahon asin pakusugon an lambang saro, na sa katunayan iyo na an piggigibo nindo.” (1 Tes. 5:11) Iyo, gabos  sa kongregasyon—bako lang mga elder—puwedeng arugon si Jehova asin si Jesus sa pagranga asin pagpakusog sa mga tugang.—Basahon an Roma 15:1, 2.

¹¹ May mga tugang sa kongregasyon na igwang emotional disorder na tibaad kaipuhan na magpabulong sa doktor. (Luc. 5:31) Mapakumbabang inaako kan mga elder asin kan iba pa sa kongregasyon na bako sindang kuwalipikado na mag-asikaso nin siring na mga hilang. Pero, sinda asin an iba pa sa kongregasyon igwang mahalagang marhay na magigibo—“magtaram na may pagranga sa mga nagmumundo nin grabe, tabangan an mga maluya, magin mapasensiya sa gabos.” (1 Tes. 5:14) Kaipuhan kan gabos na Kristiyano na magpahiling nin mamumuton na empatiya asin pasensiya, na nagtataram na may pagranga tanganing mapakusog an mga pinangluluyahan nin buot. Gikanan ka daw nin karangahan asin pampakusog nin buot? Kun pag-aadalan mo kun paano itatao an siring na tabang, magigin mas epektibo ka sa pagtao kaiyan.

12. Magtao nin halimbawa nin saro na napakusog kan pagkamuot kan kongregasyon.

¹² Paano mapapakusog kan satong pagkamuot an mga pinupurisaw kan makulog na inagihan ninda? “Kun minsan nagsasabong sa isip ko na maghugot,” an sabi nin sarong sister sa Europa. “Pero may marahay akong mga nakukuanan nin tabang. Ilinigtas kan kongregasyon an buhay ko. Pirming nakakapakusog asin mamumuton an mga tugang. Pipira sana an nakakaaram kan depresyon ko, pero pirming yaon para sa sako an kongregasyon. May mag-agom na garo ko na mga magurang sa espirituwal. Inaasikaso ninda akong marhay, saka literal na yaon sinda para sako 24 oras kada aldaw.” Totoo na dai gabos makakatabang sa arog kaiyan na paagi. Pero an satong sinserong mga kapahayagan nin pagsuporta dakula an naitatabang sa mga pinupurisaw nin makulog na inagihan. *

13. Ano an kaipuhan na marhay para mapakusog an iba?

¹³ Magin marahay na paradangog. (Sant. 1:19) An pagdangog na may empatiya sarong kapahayagan nin pagkamuot. Puwede kang maghapot sa mataktika asin madinamay na paagi na may katuyuhan na masabutan an sabuot kan saimong tinatabangan. Paagi kaiyan, makakapahiling ka nin empatiya asin mapapakusog mo an saimong kapwa lingkod. Ipahiling sa saimong lalawgon an saimong sinsero asin mamumuton na pagmakulog. Kun buot niyang iistorya sa saimo nin detalyado an mga bagay-bagay, magin mapasensiya asin likayan mong magsaliot. Kun mapasensiya kang magdadangog sa saiya, mas dakula an posibilidad na masabutan mo an saiyang namamatian. Makakatabang iyan sa saiya na magtiwala sa saimo asin sa siring mas gugustuhon na niyang magdangog sa saimong mga sinasabi tanganing pakusugon siya. Pag ipinapahiling mong talagang nagmamakulog ka, magigin nakakaranga nanggad an saimong mamumuton na pagmakulog.

14. Taano ta gusto niyatong likayan na magin mapagkritika?

¹⁴ Likayan na magin mapagkritika. Kun magigi kitang mapagkritika sa mga nakakamati nin depresyon, puwede iyan makadagdag sa saindang pagsakit asin puwede kaiyan mabaliwala an sinsero niyatong paghihinguwa na mapakusog sinda kan satong pagkamuot. “An dai pinag-iisipan na pagtaram siring sa mga saksak nin espada, pero an dila kan mga madunong bulong.” (Tal. 12:18, NW) Siyempre, dai ta tutuyuhon na ‘saksakon’ nin nakakakulog na mga tataramon an mga nakakamati nin depresyon. Alagad, dawa kun an saro dai tuyong ‘nasaksak,’ puwede iyan makakulog na marhay sa saiya. Tanganing mapakusog nin pagkamuot an iba, kaipuhan niyatong magpahiling nin empatiya, na ibinubugtak an satong sadiri sa saindang sitwasyon sagkod na posible.—Mat. 7:12.

15. Ano an sarong mahalagang marhay na kasangkapan na magagamit ta para pakusugon an iba paagi sa pagkamuot?

 ¹⁵ Rangahon an iba gamit an Tataramon nin Diyos. (Basahon an Roma 15:4, 5.) An Banal na Kasuratan gikanan nin karangahan. An Bibliya hali sa “Diyos na nagtatao nin kakayahan na makatagal asin nin karangahan.” Apuwera sa nakakarangang mga teksto, dakul kitang mga pantabang sa pag-adal nin Bibliya. Puwede tang gamiton an Watch Tower Publications Index asin an Giya sa Pag-research Para sa Mga Saksi ni Jehova. Makakatabang an mga ini sa sato na mahanap an nakakapakusog na mga kaisipan sa Kasuratan tanganing makayanan an gabos na klase nin problema. Kaya, makakatabang sa sato an mga ini tanganing magin mas may empatiya kita asin, sa siring, magin mas epektibo an satong mamumuton na mga paghihinguwa.

16. Anong mga kuwalidad an kaipuhan ta pag pinapakusog niyato an sarong Kristiyanong napupurisaw?

¹⁶ Magin mapagpadangat asin mabuot. Mahalagang marhay na mga aspekto ini kan bakong makasadiring pagkamuot na ipinapahiling ta pag pinapakusog ta an iba. Si Jehova mismo “an Ama nin mamumuton na pagkahirak asin an Diyos nin gabos na karangahan,” asin may “mamumuton [siyang] pagmalasakit” sa mga lingkod niya. (Basahon an 2 Corinto 1:3-6; Luc. 1:78; Roma 15:13) Marahayon na halimbawa si Pablo sa bagay na ini. Isinurat niya: “Nagin mabuot an pagtrato mi sa saindo kan kaibanan nindo kami, arog baga nin sarong nagpapasusong ina na padaba an saiyang mga aki. Kaya dahil sa hararom niyamong pagkamuot sa saindo, andam kaming itao sa saindo, bako sana an maugmang bareta nin Diyos kundi pati mismo an samuyang mga sadiri, huli ta napamahal na nanggad kamo sa samo.” (1 Tes. 2:7, 8) Pag inaarog niyato an pagigin mapagpadangat nin Diyos, puwedeng kita an magin simbag sa mga pamibi nin saro na napupurisaw.

17. Anong balanseng pagmansay sa satong mga tugang an makakatabang sa sato na mapakusog sinda paagi sa pagkamuot?

¹⁷ Dai mag-asa nin pagkaperpekto sa mga tugang. Pagdanayon na balanse an satong pagmansay sa mga tugang niyato sa espirituwal. Bakong realistiko asin madidisganar ka sana kun aasahan mong dai masasala an saimong mga tugang. (Par. 7:21, 22) Tandaan na realistiko si Jehova sa mga hinahagad niya sa saiyang mga lingkod. Kun aarugon ta siya, magigin andam kitang pagpasensiyahan an pagkabakong perpekto kan iba. (Efe. 4:2, 32) Imbes na magtao nin impresyon na pirming dai ka kontento sa nagigibo kan iba, komendaran sinda sa saindang mga ginigibo. Mapapakusog sinda kaiyan. An sinserong komendasyon makakapakusog sa iba asin makakatabang iyan sa sainda na magkaigwa nin “dahilan para mag-ugma” sa saindang sagradong paglilingkod. Mas marahay nanggad iyan kisa sa nakakapaluya sa buot na pagkumparar sa iba.—Gal. 6:4.

18. Ano an makakamtan ta kun papakusugon niyato an lambang saro paagi sa pagkamuot?

¹⁸ An kada saro sa mga karnero ni Jehova mahalagang marhay sa saiya asin ki Jesus, na nagtao kan atang na pantubos. (Gal. 2:20) Namumutan tang marhay an satong mga tugang sa espirituwal. Asin gusto niyatong trataron sinda sa mamumuton na paagi. Tanganing magin gikanan nin kaginhawahan, “pagmaigutan tang gibuhon an mga bagay na nagdadara nin katuninungan asin an mga bagay na nakakapakusog sa lambang saro.” (Roma 14:19) Hinahalat-halat na nanggad niyato an panahon pag nag-abot na an Paraiso na dai na magkakaigwa nin dahilan na pangluyahan nin buot! Dai na magkakaigwa nin hilang, giyera, minanang kagadanan, persekusyon, problema sa pamilya, asin pagkadisganar. Pagkatapos kan Sangribong Taon na Paghadi ni Cristo, magigin perpekto na an mga tawo. Dangan, an makakapasar sa pangultimong pagbalo aampunon bilang daganon na mga aki kan Diyos na Jehova asin magkakaigwa nin “mamuraway na katalingkasan bilang mga aki nin Diyos.” (Roma 8:21) Lugod na kita gabos padagos na ipahiling an pagkamuot na nakakapakusog asin tabangan an lambang saro na maabot an magaya-gaya asin nakakakontentong pasuhan na iyan.