1. Paano hiling-hiling sa mga lingkod nin Diyos an pagkamuot?

AN MGA lingkod nin Diyos sarong espirituwal na pamilya—na midbid sa saindang pagkamuot. (1 Juan 4:16, 21) An pagkamuot na iyan sa parati ipinapahiling bako sa pipira sanang pambihirang gibo, kundi sa kadakul na saradit na paagi, arog kan mabuot na mga tataramon asin gibo. Pag mabuot asin makonsiderasyon kita sa iba, nagigi kitang “paraarog . . . sa Diyos bilang mga aking namumutan.”—Efe. 5:1.

2. Paano inarog ni Jesus an pagkamuot kan saiyang Ama?

² Lubos na inarog ni Jesus an saiyang Ama. “Madya kamo sa sako, kamo gabos na nagpapagal saka nagagabatan,” an sabi ni Jesus, “asin papaginhawahon ko kamo . . . , huli ta ako may mahuyong buot saka may mapakumbabang puso.” (Mat. 11:28, 29) Pag inaarog ta si Jesus paagi sa “[pagpahiling] nin konsiderasyon sa sarong hamak,” aakuon niyato an pag-uyon kan satong Ama sa langit asin magigin maugmang marhay kita. (Sal. 41:1, NW) Pag-ulayan ta an mga paagi na maipapahiling niyato an pagigin makonsiderasyon sa laog kan pamilya, sa kongregasyon, asin sa ministeryo.

3. Paano maipapahiling nin sarong agom na lalaki an pagigin mapagsabot asin makonsiderasyon? (Hilingon an ritrato sa kapinunan kan artikulo.)

³ Dapat na manginot an mga agom na lalaki sa pagpahiling nin konsiderasyon sa laog kan pamilya. (Efe. 5:25; 6:4) Halimbawa, sinasadol an mga agom na lalaki na trataron an saindang agom “sa paaging nagpapahiling na nasasabutan” ninda an mga ini. Puwede man iyan itradusir na “nagpapahiling nin konsiderasyon sa sainda.” (1 Ped. 3:7; nota sa ibaba) Parehong kaipuhan an pagigin mapagsabot asin an pagigin makonsiderasyon. Halimbawa, aram kan mapagsabot na agom na lalaki na an saiyang agom, na saiyang kakomplemento, lain na marhay sa saiya sa dakul na aspekto, pero dai kaiyan buot sabihon na nakakalabi siya digdi. (Gen. 2:18) Kaya makonsiderasyon siya sa mga namamatian kaini asin tinatratar nin may dignidad asin respeto. Sarong agom na babayi sa Canada an nagsabi dapit sa saiyang agom: “Nungka niyang minemenos an mga namamatian ko o sinasabi na, ‘Bako dapat arog kaiyan an mamatian mo.’ Saka talagang dinadangog niya ako. Pag tinatabangan niya akong baguhon an kaisipan ko dapit sa sarong bagay, ginigibo niya iyan sa mabuot na paagi.”

4. Kun dapit sa pagtratar sa ibang mga babayi, paano maipapahiling kan agom na lalaki an konsiderasyon sa saiyang agom?

⁴ An sarong makonsiderasyon na agom na lalaki isinasaisip man an namamatian kan saiyang agom sa pagtratar niya sa ibang mga babayi. Nungka siyang nakikipag-flirt o mapahiling nin salang interes sa sainda. Dai man siya mapahiling nin arog kaiyan na interes pag naggagamit nin social media asin nin Internet. (Job 31:1) Iyo, sa gabos na pagkakataon nagdadanay siyang maimbod sa saiyang agom, bako sana huling namumutan niya siya kundi dahil sa namumutan niya man an Diyos asin ikinakaungis niya an maraot.—Basahon an Salmo 19:14; 97:10.

5. Paano maipapahiling kan agom na babayi an konsiderasyon sa saiyang agom?

⁵ Kun inaarog kan agom na lalaki an saiyang payo, si Jesu-Cristo, makakatabang iyan sa saiyang agom na magkaigwa nin “hararom na paggalang” sa saiya. (Efe. 5:22-25, 33) Dangan an paggalang na iyan mapahiro sa agom na babayi na magin makonsiderasyon sa saiyang agom, halimbawa sa mga pagkakataon na kaipuhan kaini nin ekstrang panahon para asikasuhon an teokratikong mga paninimbagan o pag may iniisip-isip ining problema. “May mga pagkakataon na naririsa ni agom base sa pagbabago sa hiro-hiro ko na may ikinakapurisaw ako,” an sabi nin sarong agom na lalaki sa Britania. “Dangan iaaplikar na niya an prinsipyo sa Talinhaga 20:5, dawa kun mangangahulugan iyan na hahalaton niya an tamang panahon para ‘sakduhon’ an mga iniisip ko kun sarong bagay iyan na puwede ko man iistorya sa saiya.”

6. Paano kita gabos makakatabang sa pagtukdo sa mga aki na magin makonsiderasyon, asin ano an pakinabang kaiyan sa sainda?

⁶ Pag an mag-agom nagpapahiling nin konsiderasyon sa lambang saro, nagtatao sinda nin marahay na halimbawa sa saindang mga aki. Siyempre an mga magurang an may panginot na responsabilidad na tukduan an saindang mga aki na magin makonsiderasyon. Halimbawa, puwede nindang tukduan an saindang mga aki na dai magdurudalagan sa laog kan Kingdom Hall. Pag nasa pagtiripon-tipon, puwedeng sabihan kan mga magurang an saindang mga aki na painuton an mga may edad na sa pagkua nin kakanon. Siyempre, gabos sa kongregasyon puwedeng tumabang sa mga magurang sa bagay na ini. Halimbawa, pag tinabangan kita nin sarong aki—tibaad sa pagbukas nin pinto—dapat niyato siyang komendaran. May marahay na epekto iyan sa aki, huling nakakatabang iyan na maitadom sa saiyang puso na “igwang urog na kaugmahan sa pagtao kisa sa pag-ako.”—Gibo 20:35.

7. Paano si Jesus nagpahiling nin konsiderasyon sa bungog na lalaki, asin ano an mga manunudan ta sa halimbawa ni Jesus?

⁷ Sarong beses kan si Jesus nasa rehiyon nin Decapolis, “dinara [sa saiya kan mga tawo] an sarong  lalaking bungog na may diperensiya sa pagtaram.” (Mar. 7:31-35) Imbes na paumayan sa publiko, “irinayo [ni Jesus] sa mga tawo an lalaki” saka pinaumayan. Taano? Huli sa saiyang kabiyadian, posibleng dai komportable an lalaki sa dakul na tawo. Posibleng narisa iyan ni Jesus kaya pinaumayan niya ini na sinda sanang duwa. Siyempre, dai ta kayang milagrosong makapaumay. Pero kaya niyato asin dapat kitang magpahiling nin pagigin makonsiderasyon sa mga pangangaipo asin namamatian kan satong mga kapagtubod. Si apostol Pablo nagsurat: “Padagos tang isip-isipon an kada saro sa katuyuhan na mapahiro an lambang saro na magpahiling nin pagkamuot asin marahay na mga gibo.” (Heb. 10:24) Nasabutan ni Jesus an pagmati kan bungog na lalaki asin pinahilingan ini nin konsiderasyon. Marahayon nanggad siyang halimbawa!

8, 9. Paano kita makakapahiling nin konsiderasyon sa mga may edad na asin maluya an hawak? (Magtao nin mga halimbawa.)

⁸ Magpahiling nin konsiderasyon sa mga may edad na asin sa mga maluya an hawak. An Kristiyanong kongregasyon panginot nang midbid sa pagkamuot, bako sa pagigin episiyente. (Juan 13:34, 35) Pinapahiro kita kan pagkamuot na iyan na tabangan an mga may edad na asin maluya an hawak na makaatender sa Kristiyanong mga pagtiripon asin makapaghulit kan maugmang bareta dawa bako iyan kumbenyente sa sato. Asin ginigibo ta iyan dawa kun limitado lang an magigibo ninda. (Mat. 13:23) Si Michael, na naka-wheelchair na sana, nagpapasalamat na marhay sa pagtabang sa saiya kan saiyang mga kapamilya asin mga kagrupo sa paglilingkod sa langtad. “Huli sa gabos na tabang ninda,” an sabi niya, “nakakaatender ako sa haros gabos na pagtiripon asin regular na nakakaluwas sa ministeryo. Gustong-gusto ko lalo na an pagpapatotoo sa publiko.”

⁹ Sa dakul na pamilyang Bethel, igwang mga miyembrong may edad na asin maluya an hawak. Nagpapahiling nin konsiderasyon an mapagmakulog na mga paraataman paagi sa paggibo nin areglo na makapartisipar sinda sa pagpapatotoo paagi sa surat asin telepono. “Ipinagpapasalamat mi an pribilehiyo na makapagpatotoo paagi sa surat,” an sabi ni Bill na 86 anyos asin nagsusurat sa mga tawong nasa hararayong teritoryo. Si Nancy na ma-90 anyos na, nagsabi: “Para sako, bako sana ini basta pagpadara nin surat. Paghuhulit ini. Kaipuhan na maaraman kan mga tawo an katotoohan!” Si Ethel na namundag kan 1921, nagsabi: “Parte na kan buhay ko an kulog. May mga aldaw na maski pagbulos masakit na para sako.” Dawa arog kaiyan, nauugma siya sa pagpapatotoo paagi sa telepono asin may mga nakakaulay giraray. Si Barbara na 85 anyos, nagsabi: “Huling maluya na an salud ko, nasasakitan na akong marhay sa pagluwas sa langtad. Pero huli sa pagpapatotoo paagi sa telepono, nakakaulay ko an mga tawo. Salamat po, Jehova!” Sa laog nin mayo pang sarong taon, sarong grupo nin namumutan na mga may edad na an naggamit nin 1,228 oras sa ministeryo, nakapadara nin 6,265 surat, nakagibo nin labing 2,000 na pag-apod sa telepono, asin nakapasakamot nin 6,315 publikasyon! Siguradong nakapaugma ki Jehova an paghihinguwa nindang ini!—Tal. 27:11.

10. Paano ta matatabangan an satong mga tugang na lubos na makinabang sa Kristiyanong mga pagtiripon?

¹⁰ Magpahiling nin konsiderasyon pag nasa Kristiyanong mga pagtiripon. Gusto niyatong lubos na makinabang sa mga pagtiripon an satong mga tugang. An satong pagigin makonsiderasyon makakatabang sa sainda na magibo iyan. Paano? An sarong paagi iyo an pag-abot nin nasa oras tanganing dai makadisturbo sa iba. Siyempre, may mga dai inaasahan na pangyayari na puwedeng makapahuri sa sato. Pero kun pirmi na sana kitang huri, dapat tang pag-isipan kun paano kita magigin mas makonsiderasyon. Tandaan man na si Jehova asin an saiyang Aki an nag-imbitar sa sato. (Mat. 18:20) Maninigo nanggad sinda sa satong hararom na paggalang!

11. Taano ta dapat sunudon kan mga may kabtang sa pagtiripon an instruksiyon sa 1 Corinto 14:40?

¹¹ An pagigin makonsiderasyon sa mga tugang nangangahulugan man na susunudon ta an instruksiyon na: “Gibuhon nindo an gabos na bagay sa kagalang-galang asin aregladong paagi.” (1 Cor. 14:40) Sinusunod ini kan mga brother na may mga  kabtang sa pagtiripon paagi sa dai paglampas sa oras na itinalaan para sa kabtang ninda. Pagpapahiling ini nin konsiderasyon bako sana sa masunod na ispiker, kundi pati sa kongregasyon. May mga tugang na tibaad kaipuhan pang magbiyahe nin harayo papuli. An iba tibaad kaipuhan magsakay sa pampublikong transportasyon. Asin an iba tibaad may bakong kapagtubod na agom na langkag na sa paghalat sa sainda.

12. Taano ta maninigong pahilingan nin “mas urog na pagpapahalaga na may pagkamuot” an mahigos na mga elder? (Hilingon an kahon na “ Magpahiling nin Konsiderasyon sa mga Nanginginot.”)

¹² An espirituwal na mga pastor na mahigos sa saindang gibuhon sa kongregasyon asin maigot na nanginginot sa ministeryo maninigo nanggad pahilingan nin espesyal na konsiderasyon. (Basahon an 1 Tesalonica 5:12, 13.) Siguradong naaapresyar mo an pagtabang ninda sa saimo. Kaya ipahiling iyan paagi sa saimong gikan sa buot na pakikikooperar asin suporta. Tutal, “binabantayan ninda kamo asin ibinibilang nindang kargo ninda kamo.”—Heb. 13:7, 17.

13. Ano an manunudan ta sa pagtratar ni Jesus sa mga tawo?

¹³ Ihinula ni Isaias dapit ki Jesus: “Dai siya mabari nin runot nang gaho, asin dai niya paparungon an nagkikimat-kimat na mitsa.” (Isa. 42:3, NW) An pagkamuot ni Jesus sa mga tawo nagpahiro sa saiya na magpahiling nin empatiya. Nasabutan niya an namamatian kan mga tawong maiaagid sa runot nang gaho o mitsa nin lampara na madali nang maparong. Kaya, makonsiderasyon siya, mabuot, asin mapasensiya. Maski mga aki, gustong-gusto siya. (Mar. 10:14) Siyempre, mayo nanggad kita kan pakasabot asin kakayahan ni Jesus sa pagtukdo! Pero kaya ta asin dapat kitang magin makonsiderasyon sa mga tawo sa satong teritoryo. Kaiba diyan kun paano, nuarin, asin gurano kahaloy kitang nakikipag-ulay sa sainda.

14. Taano ta dapat kitang magin maingat sa paagi nin pakikipag-ulay ta sa mga tawo?

 ¹⁴ Paano kita dapat na makipag-ulay sa mga tawo? Milyon-milyon ngunyan an “naanitan asin napabayaan” kan maraot asin daing hirak na mga negosyante, pulitiko, asin mga lider nin relihiyon. (Mat. 9:36) Bilang resulta, nasasakitan sindang magtiwala sa iba asin mayo sindang paglaom. Kaya importante nanggad na mabuot asin makonsiderasyon an pinipili tang mga tataramon asin an tono kan satong boses! Iyo, dakul an naaakit sa satong mensahe bako sanang huli sa kaaraman ta sa Bibliya o sa satong mahusay na pagpapaliwanag, kundi huli man sa satong sinserong interes sa sainda asin sa pagigin makonsiderasyon ta.

15. Sa anong praktikal na mga paagi maipapahiling niyato an konsiderasyon sa mga hinuhulitan ta?

¹⁵ Dakul na praktikal na paagi na maipapahiling ta an pagigin makonsiderasyon sa mga hinuhulitan ta. Halimbawa, marahayon na pantabang sa pagtutukdo an mga hapot. Pag naghahapot kita, dapat na gibuhon ta iyan sa mabuot asin magalang na paagi. Sarong payunir na naghuhulit sa teritoryo na igwa nin mga tawong bakong paragirong asin masusupgon an nakanuod na dai maggamit nin hapot na puwedeng makapasupog sa sainda. Kaiba diyan an mga hapot na tibaad dai ninda kayang simbagon o tibaad mapasala sinda sa simbag. Halimbawa, linilikayan niya an paghapot kan, ‘Aram mo daw an pangaran nin Diyos?’ o ‘Aram mo kun ano an Kahadian nin Diyos?’ Imbes, masabi siya, “Nanudan ko sa Bibliya na igwang personal na pangaran an Diyos. Puwede ko daw iyan ipahiling sa saimo?” Siyempre, magkakalain an kultura asin personalidad, kaya dai ta man kaipuhan nin espesipikong susundon dapit digdi. Alagad, dapat na pirmi kitang magin makonsiderasyon asin magalang. Tanganing magibo iyan, kaipuhan tang magin pamilyar sa mga tawo sa satong teritoryo.

16, 17. Kun makonsiderasyon kita sa mga hinuhulitan ta, (a) nuarin ta sinda dapat dalawon? (b) gurano dapat kahaloy an pakikipag-ulay ta sa sainda?

¹⁶ Nuarin ta dapat dalawon an mga tawo? Pag naghaharong-harong kita, dai man inaasahan kan mga kagharong na maabot kita. Kaya mahalaga nanggad na magduman kita sa oras na mas gugustuhon nindang makipag-ulay! (Mat. 7:12) Halimbawa, kinatudan daw kan mga tawo sa teritoryo nindo na maglamaw pag Sabado asin Domingo? Kun iyo, tibaad marahay na punan nindo an saindong ministeryo paagi sa pagpapatotoo sa tinampo, pagpapatotoo sa publiko, o pagdalaw liwat sa mga tawong aram mong andam nang makipag-ulay.

¹⁷ Gurano dapat kahaloy an pag-uulay? Dakul na tawo an sibot-sibot, kaya tibaad angay na pagdanayon na halipot an pag-uulay, lalo na sa inot na mga pagdalaw. Mas marahay na halipot sana an pag-uulay imbes na pahaluyon iyan. (1 Cor. 9:20-23) Pag namamatian kan mga tawo na nasasabutan ta an sitwasyon ninda o an sibot nindang iskedyul, posibleng marhay na makipag-ulay na sinda sa sato sa sunod. Malinaw na dapat niyatong ipahiling sa satong ministeryo an bunga kan espiritu nin Diyos. Kun ginigibo ta iyan, magigi nanggad kitang “mga kapwa trabahador nin Diyos.” Asin tibaad gamiton pa ngani kita ni Jehova na madagka an saro sa katotoohan.—1 Cor. 3:6, 7, 9.

18. Kun makonsiderasyon kita sa iba, anong mga bendisyon an puwede tang makamtan?

¹⁸ Kaya lugod na gibuhon ta an pinakamakakaya ta na magin makonsiderasyon—sa laog kan pamilya, sa kongregasyon, asin sa ministeryo. Kun gigibuhon ta iyan, magkakamit kita nin dakul na bendisyon ngunyan asin sa maabot na panahon. Sinasabi kan Salmo 41:1, 2: “Maugma an siisay man na nagpapahiling nin konsiderasyon sa sarong hamak; ililigtas siya ni Jehova sa aldaw nin kapahamakan. [Ipapahayag] siyang maugma sa daga.” (NW)