1, 2. (a) Bakong arog kan mga tawong may awtoridad, paano tinatratar ni Jehova an mga tawo? (b) Ano an pag-uulayan ta sa artikulong ini?

AN MGA tawong may awtoridad asin maimpluwensiya sa parati ‘dinodominar’ an iba. (Mat. 20:25; Par. 8:9) Ibang-iba nanggad sa sainda si Jehova! Siya an Makakamhan sa Gabos, pero makonsiderasyon nanggad siya sa bakong perpektong mga tawo. Mabuot siya asin mapagmalasakit. Iniisip niya an namamatian ta asin alisto siya sa satong mga pangangaipo. Nungka niyang hinahagad sa sato an dai ta kayang itao, “na ginigirumdom na kita alpog.”—Sal. 103:13, 14, NW.

² Igwa sa Bibliya nin dakul na halimbawa kun paano ipinahiling ni Jehova na makonsiderasyon siya sa saiyang mga lingkod. Pag-ulayan niyato an tulong halimbawa. An inot iyo an makonsiderasyon na pagtabang nin Diyos sa aking si Samuel na ipaabot sa Halangkaw na Saserdoteng si Eli an sarong mensahe nin paghukom; an ikaduwa iyo an mapasensiyang pagsimbag ni Jehova sa mga pagsayuma ni Moises na magin lider kan mga Israelita; asin an ikatulo iyo an pagigin makonsiderasyon nin Diyos sa pagpatalingkas sa mga Israelita hali sa Ehipto. Mantang tinutukar ta an mga halimbawang ini, hilingon kun ano an  itinutukdo kaini dapit ki Jehova asin an mga leksiyon na puwede tang iaplikar.

3. Ano an makangangalas na nangyari sarong banggi ki Samuel, asin ano an tibaad maihapot ta? (Hilingon an ritrato sa kapinunan kan artikulo.)

³ Nagpuon si Samuel na ‘maglingkod ki Jehova’ sa tabernakulo kan akion pa siya. (1 Sam. 3:1) Sarong banggi kan turog na si Samuel, may makangangalas na marhay na nangyari. * (Basahon an 1 Samuel 3:2-10.) Nakadangog siya nin boses na inaapod an saiyang pangaran. Huling iniisip na boses idto kan gurang nang Halangkaw na Saserdoteng si Eli, nagdalagan tulos siya pasiring ki Eli asin nagsabi: ‘Uya ako, ta pig-apod mo ako.’ Sinabi ni Eli na bako siya an nag-apod. Kan mangyari idto nin duwa pang beses, narealisar ni Eli na an Diyos an nag-aapod ki Samuel. Kaya sinabi niya sa aki kun paano masimbag, asin nagsunod si Samuel. Taano ta kan inot pa sana dai tulos sinabi ni Jehova ki Samuel, paagi sa Saiyang anghel, na siya an nag-aapod? Mayong sinasabi an Bibliya, alagad ipinaparisa kan suminurunod na pangyayari na magigin kapaki-pakinabang sa aking si Samuel an konsiderasyon na ipinahiling ni Jehova. Paano?

4, 5. (a) Ano an namatian ni Samuel dapit sa asignasyon nin Diyos sa saiya, asin ano an nangyari kinaagahan? (b) Ano an itinutukdo sa sato dapit ki Jehova kan istoryang ini?

⁴ Basahon an 1 Samuel 3:11-18. Ipinagbuot kan Katugunan ni Jehova na igalang kan mga aki an mga may edad na, lalo na an namamayo. (Ex. 22:28; Lev. 19:32) Maiisip mo daw si Samuel na maduman tulos ki Eli kinaagahan asin kusog-buot na ipapaabot an magabat na mensahe nin paghukom nin Diyos? Dai nanggad! Sa katunayan, sinasabi sa istorya na ‘natakot si Samuel na sabihon ki Eli [an dapit sa bisyon].’ Alagad, malinaw na ipinarisa nin Diyos ki Eli na Siya an nag-aapod ki Samuel. Kaya si Eli na an nag-inot asin sinabi ki Samuel na iistorya an nangyari. Ipinagbuot ni Eli: ‘[Dai mo] pagtaguon sa sako maski sarong tataramon sa gabos na itinaram niya saimo.’ Kaya ‘sinabi saiya [ni Samuel an] gabos.’

⁵ Dai na gayong nasurpresa si Eli sa mensahe ni Samuel. Kauyon iyan kan sinabi kan dai pinangaranan na ‘lalaking [isinugo] nin Diyos’ na nakipag-ulay sa halangkaw na saserdote. (1 Sam. 2:27-36) Ipinapahiling kan istorya dapit ki Samuel asin Eli kun gurano kamakonsiderasyon asin kadunong si Jehova.

6. Ano an mga manunudan ta sa paagi nin pagtabang nin Diyos sa aking si Samuel?

⁶ Ika daw sarong aki o hoben? Kun iyo, ipinapahiling kan istorya dapit sa aking si Samuel na nasasabutan ni Jehova an mga kadipisilan na inaatubang mo asin an namamatian mo. Tibaad masusupgon ka asin nasasakitan na ihulit sa mga adulto an mensahe kan Kahadian o na mapalain sa mga kagurubay mo. Tandaan na gusto kang tabangan ni Jehova. Kaya, sabihon mo sa saiya sa pamibi an gabos na nasa puso mo. (Sal. 62:8) Isip-isipon an mga halimbawa sa Bibliya dapit sa mga hoben arog ni Samuel. Asin makipag-ulay sa mga kapwa Kristiyano—hoben o gurang—na tibaad may mga kadipisilan na napangganahan na kapareho kan inaagihan mo. Iyo, tibaad iistorya ninda sa saimo an mga pagkakataon na tinabangan sinda ni Jehova sa mga paaging tibaad dai ninda inaasahan.

7, 8. Paano si Jehova nagpahiling nin pambihirang konsiderasyon ki Moises?

⁷ Kan 80 anyos na si Moises, tinawan siya ni Jehova nin masakiton na asignasyon. Papatalingkason ni Moises an Israel sa pagkauripon sa Ehipto. (Ex. 3:10) Nagin pastor siya sa laog nin 40 taon sa Midian kaya posibleng marhay na ikinangalas niya an asignasyon na ini. ‘Siisay ako tanganing magduman ki Faraon, asin iluwas ko an mga Israelita  sa Ehipto?’ an sabi niya. Inasigurar nin Diyos si Moises: “Kaiba mo ako.” (Ex. 3:11, 12, An Banal na Biblia) Nanuga pa siya: ‘Dadangugon [kan kamagurangan kan Israel] an saimong tingog.’ Alagad nagsimbag si Moises: “[Paano] kun dai sinda sako . . . magdangog?” (Ex. 3:18; 4:1, An Banal na Biblia) Garo man sana kinokontra ni Moises an Diyos! Pero nagdanay na mapasensiya si Jehova. Sa katunayan, labi pa diyan an ginibo niya. Tinawan niya nin kapangyarihan si Moises na maggibo nin mga milagro, kaya siya an inot na tawo sa kasaysayan na nagkaigwa kan kapangyarihan na iyan.—Ex. 4:2-9, 21.

⁸ Nagdahilan pa si Moises na sinasabing bako siyang matibay magtaram. Bilang simbag, sinabi nin Diyos: ‘Yaon ako sa saimo, tutukduan taka kan itataram mo.’ Nakumbinsir na daw si Moises? Minalataw na dai pa, huling nakiulay siya sa Diyos na iba na sana an suguon. Huli kaiyan, tama sanang naanggot si Jehova. Pero dai siya nagin mapamirit. Imbes, nagpahiling pa an Diyos nin konsiderasyon ki Moises paagi sa pagnombra ki Aaron na magin tagapagtaram ni Moises.—Ex. 4:10-16, An Banal na Biblia.

9. Paano nakatabang ki Moises sa saiyang asignasyon an pagigin mapasensiya asin makonsiderasyon ni Jehova?

⁹ Ano an itinutukdo sa sato dapit ki Jehova kan istoryang ini? Bilang Diyos na Makakamhan sa Gabos, puwede niya kutanang gamiton an saiyang kapangyarihan tanganing magsunod tulos si Moises. Imbes, mapasensiya saka mabuot si Jehova asin hininguwang asiguraron an mahuyo asin mapakumbabang lingkod niya. Epektibo daw an makonsiderasyon na pamamaaging ini ni Jehova? Iyo nanggad! Nagin marahayon na lider si Moises na trinatar an iba sa mahuyo asin makonsiderasyon na paagi arog kan pagtratar sa saiya ni Jehova.—Bil. 12:3.

10. Paano kita makikinabang sa pag-arog sa pagigin makonsiderasyon ni Jehova?

¹⁰ Mga leksiyon na puwede tang iaplikar: Ika daw sarong agom na lalaki, magurang, o sarong elder? Kun iyo, may awtoridad ka maski paano. Kun siring, mahalaga nanggad na arugon mo si Jehova asin magin makonsiderasyon, mabuot, saka mapasensiya sa pagtratar sa mga nasa pangangataman mo! (Col. 3:19-21; 1 Ped. 5:1-3)  Kun hinihinguwa mong arugon si Jehova asin an Urog na Dakulang Moises, si Jesu-Cristo, magigi kang madaling dulukon saka nakakapaginhawa. (Mat. 11:28, 29) Apuwera kaiyan, magigi ka man marahay na halimbawa na angay arugon.—Heb. 13:7.

11, 12. Ano an ginibo ni Jehova tanganing mamatian kan mga Israelita na ligtas asin tiwasay sinda mantang ginigiyahan niya sinda paluwas sa Ehipto?

¹¹ Kan maghali sa Ehipto an mga Israelita kan 1513 B.C.E., posibleng nasa labing tulong milyon sinda. Kaiba diyan an tulo o apat na henerasyon, kaya igwa nin mga aki, may edad na, asin siguradong may mga maluya an hawak o baldado. Tanganing magiyahan an dakulang grupong ini paluwas sa Ehipto, kaipuhan nanggad an mapagsabot asin makonsiderasyon na Lider. Paagi ki Moises, pinatunayan ni Jehova na arog Siya kaiyan. Bilang resulta, namatian kan mga Israelita na ligtas sinda mantang pahali sa nagimatan nindang lugar.—Sal. 78:52, 53.

¹² Ano an ginibo ni Jehova tanganing mamatian kan saiyang banwaan na ligtas asin tiwasay sinda? An saro iyo na paghali ninda sa Ehipto, inorganisar niya sinda “siring sa hukbo na makikilaban.” (Ex. 13:18, NW) An pagkaorganisar na iyan siguradong nakaasegurar sa mga Israelita na kontrolado nin Diyos an mga bagay-bagay. Ipinahiling man ni Jehova an saiyang presensiya paagi sa ‘panganuron kun aldaw, asin liwanag nin kalayo’ kun banggi. (Sal. 78:14) Garo man sana sinasabi ni Jehova: “Dai kamo matakot. Kaibanan nindo ako tanganing giyahan asin protektaran kamo.” Kinaipuhan nanggad ninda an asigurasyon na iyan huli sa sunod na nangyari!

13, 14. (a) Paano si Jehova nagpahiling nin konsiderasyon sa mga Israelita kan nasa Dagat na Pula? (b) Paano ipinahiling ni Jehova sa mga Ehipsiyo an saiyang kapangyarihan?

¹³ Basahon an Exodo 14:19-22. Imahinara na yaon ka duman asin napapatahawan kan hukbo ni Faraon asin kan Dagat na Pula. Dangan nag-interbenir an Diyos. An hariging panganuron nagbalyo sa likod kan kampo kaya nauulang kaiyan an mga Ehipsiyo asin pinagdadanay na madiklom an kinamumugtakan kan mga ini. Pero, sa milagrosong paagi, maliwanagon an mahiwas na kampo nindo! Dangan nahiling mo si Moises na inunat an saiyang kamot sa ibabaw kan dagat, asin naghuyop an sarong makusog na duros hali sa sirangan kaya nagkaigwa nin mahiwas na dalan pabalyo sa ibong. Sa organisadong paagi, naglakaw ka, an saimong pamilya, asin an saindong ataman na mga hayop sa marang daga sa tahaw kan dagat kaiba kan banwaan. May narisa ka tulos na kakaiba. Bakong malaboy ni nagyeyelo an pinakasalog kan dagat; mara iyan asin matagas kaya madaling lakawan. Huli kaiyan, maski an pinakamaluway maglakaw ligtas na nakaantos sa ibong na tampi.

¹⁴ Basahon an Exodo 14:23, 26-30. Mantang nangyayari an gabos na iyan, an mapalangkaw asin mangmang na si Faraon nagdaguso sa marang daga kan dagat tanganing lapagon kamo. Inunat giraray ni Moises sa dagat an saiyang kamot. Sa pagkakataon na ini, buminagsak an duwang lanob na tubig. Ruminagasa an tubig arog sa masalpukan na duwang tsunami. Mayo na nanggad naginibo si Faraon asin an saiyang hukbo!—Ex. 15:8-10.

15. Ano an itinutukdo sa saimo dapit ki Jehova kan istoryang ini?

¹⁵ Maririsa ta sa istoryang ini na si Jehova sarong Diyos nin areglo—kuwalidad na nakakatabang sa sato na mamatian na ligtas asin tiwasay kita. (1 Cor. 14:33) Ipinahiling man ni Jehova na siya sarong mamumuton na pastor na inaataman an saiyang mga lingkod sa praktikal na mga paagi. Mamumuton niyang pinoprotektaran sinda laban sa saindang mga kaiwal. Nakakapakusog nanggad ini sa satong buot mantang padangadang na an katapusan kan sistemang ini nin mga bagay!—Tal. 1:33.

16. Ano an pakinabang niyato sa paghurop-hurop sa paagi nin pagliligtas ni Jehova sa mga Israelita?

 ¹⁶ Inaataman man ni Jehova—sa espirituwal asin pisikal—an saiyang mga lingkod ngunyan bilang grupo. Asin padagos niyang gigibuhon iyan sa panahon kan grabeng kasakitan na madali nang mag-abot. (Kap. 7:9, 10) Kaya an mga lingkod nin Diyos—hoben man o may edad na, makusog man o may kabiyadian—dai matataranta o magtatakig sa takot pag nag-abot na iyan. * Sa katunayan, kabaliktaran kaiyan an gigibuhon ninda! Isasaisip ninda an sinabi ni Jesu-Cristo: “Tumindog kamo nin tanos asin iitaas nindo an saindong mga payo, huli ta naghaharani na an pagliligtas sa saindo.” (Luc. 21:28) Pagdadanayon ninda an pagtitiwalang iyan sa atubang kan pag-atake ni Gog—an koalisyon nin mga nasyon na mas mapuwersa nanggad kisa sa suanoy na Faraon. (Ezeq. 38:2, 14-16) Taano ta magdadanay sindang may kumpiyansa? Aram kaya ninda na dai nagbabago si Jehova. Papatunayan niya giraray na siya mapagmakulog asin makonsiderasyon na Paraligtas.—Isa. 26:3, 20.

17. (a) Paano kita makikinabang sa mga istorya sa Bibliya dapit sa kun paano inaataman ni Jehova an saiyang mga lingkod? (b) Ano an pag-uulayan ta sa masunod na artikulo?

¹⁷ An nasa artikulong ini pira sana sa dakul na halimbawa na nagpapahiling na si Jehova mabuot asin mamumuton sa saiyang pag-ataman, paggiya, asin pagliligtas sa saiyang mga lingkod. Mantang hinuhurop-hurop mo an mga ini, risahon an mga detalye na nagpapahiling kan dai gayong risang mga aspekto kan mga kuwalidad ni Jehova. Paagi kaiyan, mas maisasaisip asin maisasapuso mo an magagayon na kuwalidad na iyan, saka mapapakusog an saimong pagkamuot asin pagtubod sa Diyos. Sa sunod na artikulo, pag-uulayan an mga paagi kun paano ta maaarog an pagigin makonsiderasyon ni Jehova. Mapokus kita kun paano ta iyan ipapahiling sa laog kan pamilya, Kristiyanong kongregasyon, asin sa ministeryo.