1. Taano ta maugma an mga parasamba ni Jehova? (Hilingon an ritrato sa kapinunan kan artikulo.)

AN Mga Saksi ni Jehova maugma nanggad na mga tawo. Sa saindang mga pagtiripon, asembleya, asin mga pagtiripon-tipon pirmi kang makakadangog nin maugmang iristoryahan asin ngiriritan. Taano ta maugmahon sinda? An panginot na dahilan iyo na midbid, pinaglilingkudan, asin hinihinguwa nindang arugon si Jehova, an “maugmang Diyos.” (1 Tim. 1:11; Sal. 16:11) Bilang an Gikanan nin kaugmahan, gusto nin Diyos na magin maugma kita, asin tinatawan niya kita nin dakul na dahilan tanganing mag-ugma.—Deut. 12:7; Par. 3:12, 13.

2, 3. (a) Ano an kaugmahan? (b) Taano ta tibaad magin dipisil para sa sato na magin maugma?

² Kumusta ka man? Maugma ka daw? Puwede ka daw magin mas maugma? An kaugmahan puwedeng tawan nin kahulugan na “nagdadanay na marahay na pagmati, puon sa pakamati nin pagkakontento sagkod sa labi-labing kagaya-gayahan sa buhay, asin nin natural na pagmawot na magpadagos iyan.” Ipinaparisa kan Bibliya na an tunay na kaugmahan nanunungod sa kamugtakan nin saro na inuuyunan ni Jehova. Pero sa kinaban ngunyan, tibaad magin dipisil para sa sato na magin maugma. Taano?

 ³ Puwedeng makawara kan satong kaugmahan an nakakamundong mga pangyayari arog kan pagkagadan o pagkatiwalag nin sarong mahal sa buhay, diborsiyo, o pagkasisante. An iriwal sa pamilya asin mga dai pagkasinabutan puwedeng makahali kan satong kaugmahan. Kun tinutuya kita kan mga katrabaho o kaklase, pinepersegir o iprineso huli sa pagtubod, puwede man mawara an satong kaugmahan. Arog man kaiyan an puwedeng magin epekto kan nagluluyang hawak, pabalik-balik na hilang, o depresyon. Sa ibong kaiyan, ikinaugma ni Jesu-Cristo, an “maugma asin solamenteng Kagsakop,” an pagtao nin karangahan asin kaugmahan sa mga tawo. (1 Tim. 6:15; Mat. 11:28-30) Sa saiyang Sermon sa Bukid, sinambit ni Jesus an nagkapirang kuwalidad na makakatabang na magin maugma kita sa ibong kan nakakamundong mga pagbalo sa kinaban ni Satanas.

4, 5. Paano ta makakamtan asin mapagdadanay an kaugmahan?

⁴ An inot na bagay na sinambit ni Jesus mahalagang marhay: “Maugma an mga nakakamating kaipuhan ninda nin espirituwal na mga bagay, huli ta sa sainda an Kahadian kan kalangitan.” (Mat. 5:3) Paano ta ipinapahiling na namamatian niyatong kaipuhan ta an espirituwal na mga bagay? Paagi iyan sa pagkakan nin espirituwal na mga kakanon, pagsunod sa espirituwal na mga pamantayan, asin pagpriyoridad sa pagsamba sa maugmang Diyos. Kun ginigibo ta an mga iyan, magigin urog kitang maugma. Mapapakusog ta an satong pagtubod na mauutob an mga panuga nin Diyos. Asin mapaparigon kita kan “maugmang bagay na satuyang linalauman” na itinatao kan Tataramon nin Diyos sa tunay na mga parasamba.—Tito 2:13.

⁵ An pagpakusog kan satong relasyon ki Jehova mahalagang marhay tanganing makamtan niyato an nagdadanay na kaugmahan. Pinasabngan si apostol Pablo na isurat: “Danay kamong mag-ugma nin dahil sa Kagurangnan [na Jehova]. Sa giraray uutruhon ko, Mag-ugma kamo!” (Fil. 4:4) Tanganing magkaigwa nin makusog na relasyon sa Diyos, kaipuhan niyatong magkaigwa kan Saiyang kadunungan. An Tataramon nin Diyos nagsasabi: ‘[Maugma] an tawong nakakakua nin kadunungan asin an tawong nagkakamit nin pakasabot. An kadunungan sarong kahoy nin buhay para sa mga nangangapot [diyan]; an mga higot na nangangapot [diyan] aapudon na maugma.’—Tal. 3:13, 18, An Marahay na Bareta Biblia.

6. Sa ano nakadepende an satong kaugmahan?

⁶ Pero tanganing magdanay na maugma, mahalagang marhay na dai sana basahon an Tataramon nin Diyos kundi iaplikar iyan. Ipinahiling ni Jesus na mahalagang marhay na iaplikar an mga nanunudan ta kan sabihon niya: “Kun aram nindo an mga bagay na ini, maugma kamo kun ginigibo nindo iyan.” (Juan 13:17; basahon an Santiago 1:25.) Ini an pinakakaipuhan tanganing mapaniguan an saimong espirituwal na mga pangangaipo asin magdanay na maugma. Pero paano kita magigin maugma kun kadakul kan puwedeng makahali kan kaugmahan niyato? Pag-ulayan niyato an sunod na sinabi ni Jesus sa Sermon sa Bukid.

7. Paano masasabing maugma an mga nagmumundo?

⁷ “Maugma an mga nagmumundo, huli ta rarangahon sinda.” (Mat. 5:4) Tibaad maihapot nin nagkapira, ‘Paano man nasabing maugma an mga nagmumundo?’ Dai man digdi pinapanungdan ni Jesus an gabos na nagmumundo huli sa maski ano na sanang dahilan. Dawa an maraot na mga tawo nag-aagrangay huli sa nakakamundong mga kamugtakan sa “delikado asin masakit na mga panahon” na ini. (2 Tim. 3:1) Pero an pagmundo ninda nakasentro sana sa sadiri asin dai iyan nakakaparani sa sainda ki Jehova; kaya dai iyan nagtatao nin kaugmahan. Posibleng marhay na an nasa isip ni Jesus iyo an mga tawong nakakamating kaipuhan ninda nin espirituwal na mga bagay asin sa siring ikinakamundo ninda an kahirak-hirak na kamugtakan sa espirituwal kan dakul na tawo. Tibaad nahihiling ninda an sainda mismong  makasalan na kamugtakan asin an nakakamundong mga sitwasyon na resulta kaiyan. Naririsa ni Jehova an siring na sinserong mga nagmumundo; pinapagian niya an pagmati ninda asin binebendisyunan nin espirituwal na karangahan, kaugmahan, asin tatawan sinda nin buhay na daing katapusan.—Basahon an Ezequiel 5:11; 9:4.

8. Ipaliwanag kun paano nakakatabang an pagigin mahuyo tanganing magin mas maugma kita.

⁸ “Maugma an mga mahuyo an buot, huli ta mamanahon ninda an daga.” (Mat. 5:5) Paano nakakatabang an pagigin mahuyo tanganing magin mas maugma kita? Pagkatapos makaabot sa tamang kaaraman dapit sa katotoohan, nagbabago an mga indibidwal. Tibaad kaidto maringis sinda, parapakiiwal, asin agresibo. Pero ngunyan, isinulot na ninda “an bagong personalidad” asin ipinapahiling “an kapadangatan asin pagmalasakit, kabuutan, kapakumbabaan, kahuyuan, asin pagkamapasensiya.” (Col. 3:9-12) Bilang resulta, an saindang buhay ngunyan matuninong, pano nin pagkamuot, asin mas maugma. Apuwera kaiyan, nanunuga an Tataramon nin Diyos na “mamanahon ninda an daga.”—Sal. 37:8-10, 29.

9. (a) Ano an buot sabihon ni Jesus kan sabihon niya na ‘mamanahon kan mga mahuyo an buot an daga’? (b) Taano ta puwedeng mag-ugma an mga “nagugutom asin napapaha sa katanusan”?

⁹ Ano an buot sabihon ni Jesus kan sabihon niya na ‘mamanahon kan mga mahuyo an buot an daga’? An daga mamanahon kan linahidan nin espiritu na mga disipulo ni Jesus kun pamahalaan na ninda iyan bilang mga hadi asin saserdote. (Kap. 20:6) Sa ibong na lado, sinambit na an daga mamanahon kan minilyon na iba pa na mayo kan paglaom na mabuhay sa langit huling tutugutan sindang mag-istar sagkod lamang digdi bilang mga tawong perpekto, matuninong, asin maugma. Sinda man idtong mga maugma huling “nagugutom asin napapaha [sinda] sa katanusan.” (Mat. 5:6) An pagkagutom ninda sa espirituwal asin pagkapaha sa katanusan lubos na mapapaniguan sa bagong kinaban. (2 Ped. 3:13) Sa katapos-tapusi pag hinali na nin Diyos an gabos na karatan, mayo na nin katampalasanan asin kawaran nin katanusan na makakaapekto sa kaugmahan kan mga matanos.—Sal. 37:17.

10. Ano an buot sabihon kan pagigin mahihirakon?

¹⁰ “Maugma an mga mahihirakon, huli ta papahilingan sinda nin pagkahirak.” (Mat. 5:7) An Hebreong pandiwa na konektado sa pagkahirak nangangahulugan na “maglaad, makamati nin init na may pagpadangat; . . . magin mapagmalasakit.” Kaagid kaiyan, kaiba sa kahulugan kan Griegong pandiwa an pakamati nin simpatiya sa iba. Alagad, an pagkahirak labi pa sa mamumuton na pagmati sana. Sa Bibliya, kaiba diyan an pagpahiling nin pagkahirak paagi sa gibo.

11. Ano an manunudan ta sa ilustrasyon manungod sa mapagmalasakit na Samaritano kun dapit sa pagigin mahihirakon?

¹¹ Basahon an Lucas 10:30-37. Malinaw na ipinapahiling kan ilustrasyon ni Jesus dapit sa mapagmalasakit na Samaritano kun paano ta maipapahiling an pagkahirak. Huli sa udok sa pusong pagmalasakit asin pagkahirak, napahiro an Samaritano na tabangan an nagsasakit na biktima. Pagkasambit kan ilustrasyon, sinabi ni Jesus: “Kun siring, arog man kaiyan an gibuhon mo.” Kaya, puwede tang ihapot sa satong sadiri: ‘Arog man daw kaiyan an ginigibo ko? Ginigibo ko daw an ginibo kan mapagmalasakit na Samaritano? Puwede ko daw mas maipahiling an sakong pagkahirak paagi sa paggibo nin mga akto nin kabuutan sa mga nagsasakit? Halimbawa, may praktikal daw akong maitatabang sa may edad nang mga kapwa Kristiyano, sa mga balo, asin sa mga ilo sa espirituwal? Puwede daw akong mag-inot sa “[pagtaram] na may pagranga sa mga nagmumundo nin grabe”?’—1 Tes. 5:14; Sant. 1:27.

12. Paano nakakatabang an pagigin mahihirakon tanganing magin maugma kita?

¹² Pero paano nagbubunga nin kaugmahan an pagigin mahihirakon? Pag nagpapahiling kita nin pagkahirak sa iba, namamatian ta an kaugmahan sa pagtao. Dugang pa, aram niyato na napapaugma ta si Jehova. (Gibo 20:35; basahon an  Hebreo 13:16.) Mapadapit sa tawong nagpapahiling nin konsiderasyon, sinabi ni Hading David: “Babantayan siya ni Jehova asin papagdanayon siyang buhay. Ibibilang siyang maugma sa daga.” (Sal. 41:1, 2, NW) Kun ipinapahiling niyato sa gibo an satong pagmalasakit, makakabilang kita sa mga papahilingan man ni Jehova nin pagkahirak, na maresulta sa satong kaugmahan na daing katapusan.—Sant. 2:13.

13, 14. Paano konektado sa kaugmahan an dalisay na puso?

¹³ “Maugma an mga dalisay an puso,” an sabi ni Jesus, “huli ta mahihiling ninda an Diyos.” (Mat. 5:8) Tanganing mapagdanay na dalisay an satong puso, dapat na magin malinig an satong mga kaisipan asin pagmawot. Kaipuhan niyatong pagdanayon iyan na malinig tanganing magdanay na daing digta an satong debosyon ki Jehova.—Basahon an 2 Corinto 4:2; 1 Tim. 1:5.

¹⁴ An mga dalisay an puso puwedeng magin malinig sa paghiling ni Jehova asin magkaigwa nin maugmang relasyon sa saiya. Sinabi ni Jehova: “Maugma idtong mga linalabhan an saindang haralabang bado.” (Kap. 22:14) Ano an buot sabihon kan “linalabhan an saindang haralabang bado”? Garo man sana “linalabhan [kan linahidan na mga Kristiyano] an saindang haralabang bado” huling malinig sinda sa paghiling ni Jehova asin tatawan nin imortal na buhay saka makakamati sinda nin daing katapusan na kaugmahan sa saindang katungdan sa langit. An dakulang kadaklan na may paglaom na mabuhay sa daga puwede man magkaigwa nin matanos na kamugtakan sa atubangan nin Diyos bilang mga amigo niya. Ngunyan pa sana, ‘linalabhan na ninda an saindang haralabang bado saka pinapaputi an mga iyan sa dugo kan Kordero.’—Kap. 7:9, 13, 14.

15, 16. Paano an Diyos puwedeng mahiling kan mga dalisay an puso?

¹⁵ Pero kun ‘dai nin tawong makakahiling sa Diyos asin mabubuhay,’ paano ‘an Diyos nahihiling’ kan mga dalisay an puso? (Ex. 33:20) An Griegong termino na itrinadusir na ‘mahiling’ puwedeng mangahulugan na “maghiling paagi sa isip, masabutan, maaraman.” An mga nakakahiling sa Diyos paagi kan mata kan saindang puso iyo an mga tawong talagang midbid siya asin pinapahalagahan an saiyang mga kuwalidad. (Efe. 1:18) Perpektong naipahiling ni Jesus an personalidad nin Diyos, kaya masasabi niya: “An siisay man na nakahiling na sa sako nakahiling na man sa Ama.”—Juan 14:7-9.

¹⁶ Apuwera sa pag-aram sa mga kuwalidad nin Diyos, mahihiling man kan tunay na mga parasamba an Diyos paagi sa pag-obserbar kun paano niya sinda tinatabangan. (Job 42:5) Ipinopokus man ninda an mga mata kan saindang puso sa pambihirang mga bendisyon na itinatagama ni Jehova para sa mga naghihinguwang magdanay na dalisay asin maimbod na naglilingkod sa saiya. Siyempre, an binuhay liwat na mga linahidan literal na mahihiling si Jehova pag itao na sa sainda an saindang balos sa langit.—1 Juan 3:2.

17. Taano ta maugma an mga parapatuninong?

¹⁷ Sunod na sinabi ni Jesus: “Maugma an mga parapatuninong.” (Mat. 5:9) May marahay na dahilan na mag-ugma an mga nag-iinot na makipagkatuninungan sa iba. An disipulong si Santiago nagsurat: “An mga nakikipagkatuninungan nagsasabwag sa matuninong na mga kamugtakan asin nag-aani kan bunga nin pagigin matanos.” (Sant. 3:18) Kun may kakongregasyon o kapamilya kita na nasasakitan kitang pakiibanan, puwede kitang makimahirak sa Diyos na tabangan kitang magin parapatuninong. Dangan, itatao sa sato ni Jehova an saiyang banal na espiritu na matabang sa sato na maipahiling an matanos na paggawi, asin sa siring magin maugma kita. Idinuon ni Jesus na mahalaga na kita an mag-inot na makipagkatuninungan kan sabihon niya: “Kun siring, pag dinadara mo sa altar an saimong dulot asin nagirumduman mo duman na  may kulog nin buot sa saimo an tugang mo, bayaan mo sa atubangan kan altar an saimong dulot, asin maghali ka. Makipagkatuninungan ka nguna sa tugang mo, dangan magbalik ka asin ipresentar mo an saimong dulot.”—Mat. 5:23, 24.

18, 19. Taano ta nagigibo kan mga Kristiyano na maggaya-gaya dawa kun pinepersegir sinda?

¹⁸ “Maugma kamo kun pigtutuya kamo nin mga tawo asin kun pinepersegir ninda kamo saka kun sinda putik na nagtataram laban sa saindo nin gabos na klase nin maraot na bagay nin huli sa sako.” Ano an buot sabihon ni Jesus? Sinabi niya: “Mag-ugma kamo asin maggaya-gayang marhay ta dakula an saindong balos sa langit, huli ta arog man kaiyan an pagpersegir ninda sa mga propetang nainot sa saindo.” (Mat. 5:11, 12) Kan hinampak an mga apostol asin pinagbutan na pumundo sa paghuhulit, “nagluwas sinda sa Sanhedrin na nag-uugma.” Siyempre dai sinda naugma sa makulog na paghampak sa sainda. Imbes, nag-ugma sinda “dahil para sa sainda sarong pribilehiyo an mag-agi nin kasusupgan alang-alang sa ngaran ni Jesus.”—Gibo 5:41.

¹⁹ Nagtatagal man nin may kagaya-gayahan an mga lingkod ni Jehova ngunyan pag nag-aagi sinda nin mga kasakitan alang-alang sa ngaran ni Jesus o pag napapaatubang sinda sa masakit na mga pagbalo. (Basahon an Santiago 1:2-4.) Arog kan mga apostol, dai kita nauugma sa ano man na klase nin pagsakit. Pero kun pinagdadanay ta an satong integridad sa Diyos pag nasa pagbalo, tatabangan kita ni Jehova na magtagal na may kusog nin buot. Halimbawa, kan Agosto 1944, ipinadara kan gobyernong totalitaryo si Henryk Dornik asin an tugang niya sa kampo de konsentrasyon. Pero, inadmitir kan mga parakontra: “Mayo na kitang magigibo sa sainda. Maugma sinda sa pagigin martir ninda.” Sinabi ni Brother Dornik: “Habo kong magin martir, pero an pagsakit na may kusog nin buot asin dignidad tanganing magdanay na maimbod ki Jehova talagang nagtao sa sako nin kagaya-gayahan. . . . An udok kong mga pagpamibi mas nakaparani sako ki Jehova, saka pinatunayan niyang saro siyang maaasahan na Paratabang.”

20. Taano ta maugma kita na maglingkod sa “maugmang Diyos”?

²⁰ Kun aram tang igwa kita kan pag-uyon kan “maugmang Diyos,” puwede kitang magin maugma dawa pinepersegir huli sa pagtubod, kinokontra kan mga kapamilya, dawa may hilang, o may edad na. (1 Tim. 1:11) Nauugma man kita huli sa marahayon na mga panuga kan satong Diyos, “na dai makakapagputik.” (Tito 1:2) An kautuban kan mga panuga ni Jehova magigin labi-labi karahay na dai ta na lamang magigirumduman an mga kadipisilan asin pagbalo ngunyan. Sa maabot na Paraiso, magigin labi pa sa naiimahinar ta an mga bendisyon ni Jehova. Asin siyertong makakamati kita nin kaugmahan na dai ta pa lamang namatian. Iyo, “magigin labi-labi an [satong] kaugmahan huli sa lubos na katuninungan.”—Sal. 37:11, NW.