ARTIKULONG PAG-AADALAN 38
“Madya Kamo sa Sako, . . . Asin Papaginhawahon Ko Kamo”
“Madya kamo sa sako, kamo gabos na nagpapagal saka nagagabatan, asin papaginhawahon ko kamo.”—MAT. 11:28.
KANTA 17 “Buot Ko”
SUMARYO KAN PAG-AADALAN *
1. Arog kan mababasa sa Mateo 11:28-30, anong panuga an itinao ni Jesus?
MAY itinaong marahayon na panuga si Jesus sa sarong grupo nin mga tawo na nagdadangog sa saiya. “Madya kamo sa sako,” an sabi niya, “asin papaginhawahon ko kamo.” (Basahon an Mateo 11:28-30.) Dai masasabing mayong basehan an panugang ini. Halimbawa, pag-isipan an ginibo niya para sa sarong babayi na nagsasakit huli sa sarong malalang hilang.
2. Ano an ginibo ni Jesus para sa sarong may hilang na babayi?
2 Nangangaipong marhay nin tabang an babayi. Dakul na doktor an pigdumanan niya huling nag-aasa siyang mauumayan siya. Pero pagkatapos nin 12 taon na pagsakit, dai pa man giraray siya naumayan. Sigun sa Katugunan, maati siya. (Lev. 15:25) Dangan nabaretaan niyang nakakapaumay nin mga may hilang si Jesus, kaya hinanap niya ini. Kan mahanap niya si Jesus, dinutan niya an gayad kan pang-ibabaw na bado kaini, asin tulos siyang naumayan! Pero dai lang pinaumayan ni Jesus an babayi—ibinalik niya man an dignidad kaini. Halimbawa, kan kaulay niya ini, ginamit niya an mamumuton asin magalang na terminong “aki ko.” Siguradong nakapaginhawa, o nakapakusog, iyan sa babayi!—Luc. 8:43-48.
3. Anong mga hapot an sisimbagon niyato?
3 Mangnuhon na nagduman ki Jesus an babayi. Siya mismo an nagdulok ki Jesus. Arog man kaiyan ngunyan—dapat na hinguwahon niyato mismo na dumulok ki Jesus. Sa satong panahon, dai milagrosong papaumayan ni Jesus an mga kamatian kan mga minadulok sa saiya. Alagad ipinapaabot pa man giraray niya an imbitasyon: “Madya kamo sa sako, . . . asin papaginhawahon ko kamo.” Sa artikulong ini, sisimbagon niyato an limang hapot: Paano kita makakadulok ki Jesus? Ano an buot sabihon ni Jesus kan sabihon niya: “Pasanon nindo an sakuyang sakal”? Ano an manunudan ta ki Jesus? Taano ta nakakapaginhawa an gibuhon na itinao niya sa sato? Asin paano kita padagos na magiginhawahan sa pagpasan kan sakal ni Jesus?
“MADYA KAMO SA SAKO”
4-5. Ano an pirang paagi na makakadulok kita ki Jesus?
4 An sarong paagi na minadulok kita ki Jesus iyo an pag-adal kan mapadapit sa mga sinabi asin ginibo niya sagkod sa satong pinakamakakaya. (Luc. 1:1-4) Mayong ibang makakagibo kan pag-adal na iyan para sa sato—dapat na kita mismo an gumibo kaiyan. Minadulok man kita ki Jesus paagi sa pagdesisyon na magpabawtismo tanganing magin disipulo ni Cristo.
5 An saro pang paagi na minadulok kita ki Jesus iyo an pagdulok sa mga elder kun kaipuhan niyato nin tabang. Ginagamit ni Jesus an ‘mga balaog na tawong’ ini tanganing pangatamanan an saiyang mga karnero. (Efe. 4:7, 8, 11; Juan 21:16; 1 Ped. 5:1-3) Dapat na kita mismo an maghagad nin tabang sa sainda. Dai niyato puwedeng asahan na babasahon kan mga elder an satong isip tapos maaaraman na ninda kun ano an pangangaipo ta. Pag-isipan an sinabi kan brother na si Julian: “Kinaipuhan kong bayaan an asignasyon ko sa Bethel dahil nagkahilang ako, asin sinabi sako kan saro kong amigo na magpasungko ako sa mga elder. Kan primero, inisip kong dai ko iyan kaipuhan. Pero naghagad man giraray ako nin tabang, asin nangyari na an pagsungkong iyan an saro sa pinakamagayon na regalong inako ko.” An maimbod na mga elder, arog kan duwang nagsungko ki Julian, makakatabang sa sato na maaraman “an pag-iisip ni Cristo,” o na masabutan asin maarog an saiyang kaisipan saka sabuot. (1 Cor. 2:16; 1 Ped. 2:21) Tunay na saro iyan sa pinakamagayon na regalong maitatao ninda sa sato.
“PASANON NINDO AN SAKUYANG SAKAL”
6. Ano an buot sabihon ni Jesus kan sabihon niya: “Pasanon nindo an sakuyang sakal”?
6 Kan sabihon ni Jesus: “Pasanon nindo an sakuyang sakal,” posibleng an buot sabihon niya, “Akua an sakuyang awtoridad.” Posible man na an buot sabihon niya, “Pasana an sakal kaiba ko, asin magtatrabaho kitang magkaibanan ki Jehova.” Arin man diyan, an pagpasan kan sakal nangangahulugan na may kaipuhan kitang gibuhon.
7. Sigun sa Mateo 28:18-20, anong gibuhon an itinao sa sato, asin sa ano kita makakasigurado?
7 Inaako niyato an imbitasyon ni Jesus paagi sa pagdusay ta kan satong buhay ki Jehova asin pagpabawtismo. Bukas sa gabos an imbitasyon na iyan—nungkang sasayumahan ni Jesus an siisay man na talagang gustong maglingkod sa Diyos. (Juan 6:37, 38) Gabos na parasunod ni Cristo tinawan kan pribilehiyo na makikabtang sa gibuhon na ipinagibo ni Jehova ki Jesus. Makakasigurado kita na pirming yaon si Jesus para tabangan kitang maisagibo an gibuhon na iyan.—Basahon an Mateo 28:18-20.
“MAKANUOD KAMO SA SAKO”
Paginhawahon an iba arog kan ginibo ni Jesus (Hilingon an parapo 8-11) *
8-9. Taano ta gustong-gusto si Jesus kan mapakumbabang mga tawo, asin ano an mga dapat tang ihapot sa sadiri?
8 Gustong-gusto si Jesus kan mapakumbabang mga tawo. (Mat. 19:13, 14; Luc. 7:37, 38) Taano? Pag-isipan an pagkakalain ni Jesus asin kan mga Fariseo. An mga lider na iyan nin relihiyon bakong mamumuton saka mga arogante. (Mat. 12:9-14) Alagad si Jesus mamumuton saka mapakumbaba. An mga Fariseo ambisyoso asin orgulyoso dahil sa halangkaw na posisyon ninda sa sosyedad. Pero si Jesus nagsabi na bakong marahay na magin arog kaiyan, saka itinukdo niya sa saiyang mga disipulo na magin mapakumbaba asin maglingkod sa iba. (Mat. 23:2, 6-11) Napapasunod kan mga Fariseo an mga tawo dahil takot an mga ini sa mangyayari kun dai sinda magsunod. (Juan 9:13, 22) Sa ibong na lado, pinaginhawa ni Jesus an mga tawo paagi sa mamumuton na mga gibo asin mabuot na mga tataramon.
9 Inaarog mo daw si Jesus sa mga bagay na ini? Haputon an sadiri: ‘An pakabisto daw sako mahuyo an buot saka mapakumbaba? Andam daw akong gumibo nin menos na trabaho para paglingkudan an iba? Mabuot daw ako?’
10. Ano an namatian kan mga tawong nagtrabaho kaiba ni Jesus?
10 An mga tawong nagtrabaho kaiba ni Jesus nakamati nin katuninungan asin kaugmahan; gustong-gusto man ni Jesus na sanayon sinda. (Luc. 10:1, 19-21) Dinagka ni Jesus an saiyang mga disipulo na maghapot, asin gusto niyang madangog an mga opinyon ninda. (Mat. 16:13-16) Siring sa mga tinanom na napoprotektaran sa maraot na kamugtakan nin panahon, an mga disipulo ni Jesus nagtalubo o nag-uswag. Iinaplikar ninda an mga itinukdo ni Jesus asin namunga nin marahay na mga gibo.
Magin madaling dulukon asin mainamigo
Magin aktibo asin maigot
Magin mapakumbaba asin mahigos *
11. Ano an mga dapat niyatong ihapot sa satong sadiri?
11 Ika daw nasa sarong katungdan na may awtoridad? Kun iyo, haputon an sadiri: ‘Paano ko tinatrato an mga katrabaho o kapamilya ko? Hinihinguwa ko daw na magkaigwa kami nin matuninong na relasyon? Dinadagka ko daw an iba na maghapot? Asin andam daw akong magdangog sa saindang mga opinyon?’ Habo nanggad niyatong magin arog kan mga Fariseo, na naanggot sa mga nagkukuwestiyon sa sainda asin pinersegir an mga nagpapahayag nin opinyon na kontra kan sa sainda.—Mar. 3:1-6; Juan 9:29-34.
“MAGIGINHAWAHAN KAMO”
12-14. Taano ta nakakapaginhawa an gibuhon na itinao sa sato ni Jesus?
12 Taano ta nakakapaginhawa sa sato an paggibo kan gibuhon na itinao sa sato ni Jesus? Dakul an dahilan, pero pag-uulayan ta an pira sana kaiyan.
13 Igwa kita kan pinakamarahay na mga paraataman. Si Jehova, an satong Supremong Paraataman, bakong maringis na kagurangnan na dai tataong magpasalamat. Inaapresyar niya an satong ginigibo. (Heb. 6:10) Asin itinatao niya sa sato an puwersa na kaipuhan niyato tanganing maisagibo an responsabilidad na itinao niya sa sato. (2 Cor. 4:7; Gal. 6:5, nota sa ibaba) Si Jesus, na satong Hadi, nagtao sa sato nin arugan. (Juan 13:15) Asin an mga elder na nagpapastor sa sato naghihinguwang arugon si Jesus, an “panginot na pastor.” (Heb. 13:20; 1 Ped. 5:2) Hinihinguwa nindang magin mabuot, nakakapakusog, asin makusog an buot mantang inaataman asin pinoprotektaran kita.
14 Igwa kita kan pinakamarahay na mga amigo. Mayo nang ibang grupo na igwa nin makahulugan na gibuhon asin mga amigong mamumuton arog kan sa sato. Isipa na sana: Igwa kita kan pribilehiyong makatrabaho an mga tawong may pinakahalangkaw na mga pamantayan sa moral pero bakong mapagpakangmatanos. Maabilidad sinda pero hababa an buot, asin ibinibilang nindang mas urog sa sainda an iba. Para sa sainda, bako lang kitang mga kapwa trabahador kundi mga amigo man. Asin namumutan nanggad ninda kitang marhay kaya andam pa ngani sindang magadan para sa sato!
15. Ano an dapat na mamatian niyato dapit sa satong gibuhon?
15 Igwa kita kan pinakamarahay na gibuhon. Tinutukduan niyato an mga tawo kan katotoohan dapit ki Jehova asin ibinubuyagyag ta an mga kaputikan kan Diyablo. (Juan 8:44) Pinapagabatan ni Satanas an mga tawo nin mga pasan na dai ninda kaya. Halimbawa, gusto niyang papaniwalaon kita na dai papatawadon ni Jehova an mga kasalan ta asin na dai kita maninigong kamutan. Grabeng pagabat asin kaputikan nanggad iyan! Kun madulok kita ki Cristo, papatawadon an satong mga kasalan. Asin an totoo, kita gabos namumutan na marhay ni Jehova. (Roma 8:32, 38, 39) Nakakaugma nanggad na tabangan an mga tawo na manudan na magtiwala ki Jehova asin na mahiling na nagigin mas marahay an saindang buhay!
PADAGOS NA MAGINHAWAHAN SA PAGPASAN KAN SAKAL NI JESUS
16. Ano an pagkakalain kan pasan ni Jesus asin kan iba pang mga pasan niyato?
16 An pasan na ipinapapasan sa sato ni Jesus lain sa iba pang mga pasan niyato. Halimbawa, pagpuli haling trabaho, dakul an pagal-pagal saka bakong maugma. Sa kabaliktaran, pagkatapos magtao nin panahon sa paglilingkod ki Jehova asin ki Cristo, maugma kitang marhay. Tibaad pagkatapos nin maghapon na trabaho pagal-pagal na kita asin kaipuhan na puwersahon an sadiri na umatender sa pagtiripon kan kongregasyon sa banggi. Pero pagpuli ta hali sa pagtiripon, sa parati maginhawa an satong pagmati saka may panibagong kusog. Totoo man iyan pag hinihinguwa niyatong maghulit asin mag-personal study. An balos na nakakamtan niyato labi nanggad kisa sa kusog na ginagamit ta!
17. Taano ta dapat kitang magin realistiko asin maingat?
17 Dapat na magin realistiko kita. An lambang saro sa sato may limitasyon an kusog. Kaya dapat na magin maingat kita kun dapit sa mga hinihinguwa tang gibuhon. Halimbawa, puwedeng masayang an satong kusog sa paghihinguwang magtipon nin materyal na mga pagsadiri. Risahon an sinabi ni Jesus sa mayaman na hoben na lalaki na naghapot saiya: “Ano an dapat kong gibuhon tanganing magmana nin buhay na daing katapusan?” Nagsusunod na man sa Katugunan an hoben na lalaki. Siguradong marahay man siyang tawo ta espesipikong sinabi sa Ebanghelyo ni Marcos na “may pagkamuot na hiniling ni Jesus an lalaki.” Inalukan ni Jesus nin imbitasyon an hoben na tagapamahala. “Sige, ipabakal mo kun ano man an igwa ka,” an sabi ni Jesus, “asin madya, magin parasunod taka.” Dai makapagdesisyon an lalaki, pero maririsa na dai niya kayang bayaan an “dakul [niyang] pagsadiri.” (Mar. 10:17-22) Bilang resulta, sinayumahan niya an sakal na iinalok sa saiya ni Jesus asin padagos na nagin uripon nin “Kayamanan.” (Mat. 6:24) Kun ika, ano an pipilion mo?
18. Ano an dapat na gibuhon niyato sa pana-panahon, asin taano?
18 Sa pana-panahon, marahay na pag-isipan ta giraray an satong mga priyoridad sa buhay. Taano? Tanganing masigurado niyato na nagagamit ta sa madunong na paagi an satong kusog. Pag-isipan an sinabi kan hoben na si Mark: “Sa laog nin dakul na taon, paghuna ko namumuhay ako nin simple. Payunir ako, pero pirmi kong iniisip an kuwarta saka an pagkaigwa nin mas komportableng buhay. Inisip-isip ko kun taano ta nagagabatan akong marhay sa buhay. Dangan narealisar ko na nakapokus palan ako sa pag-inot sa sadiri kong kapakanan asin tada-tada na sana kan panahon saka kusog ko an itinatao ko ki Jehova.” Binago ni Mark an saiyang kaisipan asin istilo nin pamumuhay tanganing urog pang makapaglingkod ki Jehova. “Kun minsan nahahadit ako,” an sabi ni Mark, “pero sa tabang ni Jehova asin ni Jesus, nakakayanan ko an mga kadipisilan.”
19. Taano ta mahalagang marhay an pagkaigwa nin tamang pagmansay?
19 Padagos kitang magiginhawahan sa pagpasan kan sakal ni Jesus kun gigibuhon ta an tulong bagay. Inot, papagdanayon an tamang pagmansay. An ginigibo ta gibuhon ni Jehova, kaya dapat na isagibo ta iyan sigun sa pamamaagi niya. Kita an mga trabahador, asin si Jehova an Kagurangnan. (Luc. 17:10) Kun ginigibo ta sa sadiri tang pamamaagi an saiyang gibuhon, madidipisilan kita huling kinokontra niyato an sakal na pasan ta. Dawa an sarong makusugon na toro malulugadan saka mapapagal kun pirmi ining nagsasadiri nin direksiyon asin nagkokontra sa sakal na kinokontrol kan naggigiya sa saiya. Sa ibong na lado, makakagibo kita nin pambihirang mga bagay asin makakayanan an ano man na ulang kun masunod kita sa paggiya ni Jehova. Tandaan na mayo nanggad nin siisay man na makakapugol na mangyari an saiyang kabutan!—Roma 8:31; 1 Juan 4:4.
20. Ano an dapat na magin motibo niyato sa pagpasan kan sakal ni Jesus?
20 Ikaduwa, magtrabaho na may tamang motibo. An pasuhan niyato iyo na makatao nin kamurawayan sa satong mamumuton na Ama, si Jehova. May nagkapira kan inot na siglo na mahanab asin makasadiri an motibo, kaya dai nahaloy nagin bako sindang maugma asin binayaan ninda an sakal ni Jesus. (Juan 6:25-27, 51, 60, 66; Fil. 3:18, 19) Sa kabaliktaran, idtong mga pinahiro nin bakong makasadiring pagkamuot sa Diyos asin sa kapwa maugmang pinasan an sakal sa bilog nindang buhay sa daga, asin igwa sindang paglaom na maglingkod kaiba ni Cristo sa langit. Arog ninda, magdadanay kitang maugma kun pinapasan niyato na may tamang motibo an sakal ni Jesus.
21. Sigun sa Mateo 6:31-33, sa ano kita makakaasa ki Jehova?
21 Ikatulo, magkaigwa nin tamang mga inaasahan. Pinili niyato an buhay na diyan kaipuhan niyatong magsakripisyo asin magpagal. Nagpatanid sa sato si Jesus na pepersegiron kita. Pero makakaasa kita na tatawan kita ni Jehova nin kusog na matagalan an ano man na kadipisilan. Mantang urog kitang nagtatagal, urog man kitang magigin makusog. (Sant. 1:2-4) Makakaasa man kita na sususteniran kita ni Jehova, na papasturan kita ni Jesus, asin na papakusugon kita kan satong mga tugang. (Basahon an Mateo 6:31-33; Juan 10:14; 1 Tes. 5:11) Igwa nanggad kita kan gabos na kaipuhan niyato para matagalan an ano man na kadipisilan!
22. Ano an ipinagpapasalamat niyato?
22 Naginhawahan an babaying pinaumayan ni Jesus kan aldaw man sanang naumayan ini. Pero magkakamit sana siya nin daing sagkod na kaginhawahan kun nagin maimbod siyang disipulo ni Cristo. Ano kaya an ginibo niya? Kun pinili man nanggad niyang pasanon an sakal ni Jesus, isipa an balos—an maglingkod kaiba ni Jesus sa langit! Magigin sulit nanggad an ano man na isinakripisyo niya tanganing magsunod ki Cristo. Ano man an paglaom niyato—buhay na daing katapusan sa langit o sa daga—ipinagpapasalamat ta nanggad na inako niyato an imbitasyon ni Jesus: “Madya kamo sa sako!”
KANTA 13 Si Cristo, an Arugan Niyato
^ par. 5 Iniimbitaran kita ni Jesus na dumulok sa saiya. Ano an kaipuhan niyatong gibuhon tanganing akuon an saiyang imbitasyon? Sisimbagon kan artikulong ini an hapot na iyan, asin ipapagirumdom sa sato kun paano kita magiginhawahan paagi sa pagtrabaho kaiba ni Cristo.
