1. Taano ta dapat kitang magpasakop ki Jehova?

DAPAT kitang magpasakop * ki Jehova huling siya an satong Kaglalang. Sa siring, may deretso siyang magtao nin mga pamantayan para sa saiyang mga linalang. (Kap. 4:11) Alagad may saro pa kitang mapuwersang dahilan na magsunod sa saiya—an paagi niya nin pamamahala iyo an pinakamarahay. Sa bilog na kasaysayan, dakul na tawong tagapamahala an may kapangyarihan asin awtoridad sa iba. Kumpara sa sainda, si Jehova an pinakamadunong asin an pinakamamumuton, pinakamahihirakon, asin pinakamapagmalasakit na Tagapamahala sa gabos.—Ex. 34:6; Roma 16:27; 1 Juan 4:8.

2. Anong mga dahilan an itinatao sa sato kan Hebreo 12:9-11 kaya nagpapasakop kita ki Jehova?

² Gusto ni Jehova na magkuyog kita sa saiya, bako sana ta natatakot kita sa saiya, kundi panginot na dahil namumutan ta siya asin ibinibilang ta siyang satuyang mamumuton na Ama. Sa surat ni Pablo para sa mga Hebreo, sinabi niya na “lalo kitang dapat na magpasakop sa . . . Ama” huling sinasanay niya kita “para sa satong ikakarahay.”—Basahon an Hebreo 12:9-11.

3. (a) Paano niyato ipinapahiling na nagpapasakop kita ki Jehova? (b) Anong mga hapot an sisimbagon niyato?

³ Nagpapasakop kita ki Jehova paagi sa paggibo kan satong pinakamakakaya na masunod siya sa gabos na bagay asin paagi sa paglaban sa tendensiyang manarig sa sadiri niyatong pakasabot.  (Tal. 3:5) Pag naaaraman ta an dapit sa magagayon na kuwalidad ni Jehova, nagigin mas madali sa sato na magpasakop sa saiya. Taano? Huling an mga kuwalidad na ini mahihiling sa gabos na ginigibo niya. (Sal. 145:9) Mantang nagdadakul an aram ta dapit ki Jehova, mas mamumutan ta siya. Asin pag namumutan ta si Jehova, dai niyato kaipuhan nin dakul na susundon na nagsasabi sa sato kan dapat asin dai dapat gibuhon. Hinihinguwa niyato na iuyon an satong mga iniisip asin sabuot sigun sa gusto ni Jehova para sa sato asin na likayan kun ano an maraot. (Sal. 97:10) Pero kun minsan, tibaad madipisilan kita na magsunod ki Jehova. Taano? Asin ano an manunudan kan mga elder, mga ama, asin ina sa halimbawa na ipinahiling ni Gobernador Nehemias; Hading David; asin Maria, an ina ni Jesus? Sisimbagon kan artikulong ini an mga hapot na iyan.

4-5. Sigun sa Roma 7:21-23, taano ta puwedeng magin dipisil na magpasakop ki Jehova?

⁴ An sarong dahilan kun taano ta tibaad magin dipisil para sa sato na magpasakop ki Jehova iyo na gabos kita nagmana nin kasalan asin bakong perpekto. Kaya may tendensiya kita na magin rebelyoso. Pagkatapos na magrebelde sa Diyos si Adan saka Eva asin magkakan kan ipinagbabawal na bunga, sinda na an naggibo kan sadiri nindang mga pamantayan. (Gen. 3:22) Ngunyan, kadaklan sa mga tawo pinipili pa man giraray na baliwalaon si Jehova asin sinda an nagdedesisyon para sa sadiri ninda kun ano an tama asin kun ano an sala.

⁵ Dawa an mga tawong midbid si Jehova asin namumuot sa saiya puwedeng madipisilan na lubos na magpasakop sa saiya. Naeksperyensiyahan iyan ni apostol Pablo. (Basahon an Roma 7:21-23.) Arog ni Pablo, gusto niyatong gibuhon kun ano an tama sa paghiling ni Jehova. Pero dapat na padagos niyatong labanan an tendensiya na gumibo nin sala.

6-7. Ano an ikaduwang dahilan kun taano ta puwedeng magin dipisil na magpasakop ki Jehova? Magtao nin halimbawa.

⁶ An saro pang dahilan kun taano ta puwedeng magin dipisil na magpasakop ki Jehova iyo an impluwensiya sa sato kan kultura na dinakulaan niyato. Dakul na ideya nin tawo an kontra sa kabutan ni Jehova, kaya kaipuhan niyatong padagos na pagmaigutan na dai magin kapareho kan mga tawong iyan an satong kaisipan. Hilinga an sarong halimbawa.

⁷ Komun sa nagkapirang lugar na i-pressure an mga hoben na magpokus sa paghanap nin dakul na kuwarta. Napaatubang sa problemang iyan an sister na si Mary. * Bago niya naaraman an dapit ki Jehova, nagklase siya sa saro sa pinakaprestihiyosong eskuwelahan sa nasyon ninda. Pig-pressure si Mary kan pamilya niya na kumua nin iginagalang na propesyon na may halangkaw na suweldo. Gusto niya man iyan. Alagad, kan mamidbid asin mamutan na niya si Jehova, binago niya an saiyang mga pasuhan. Dawa arog kaiyan, sinabi niya: “Kun minsan nakakahiling ako nin marahayon na mga oportunidad sa negosyo na diyan makakaganar ako nin dakul na kuwarta kaso makakaulang sa espirituwal na rutina ko. Huli sa dinakulaan ko, nasasakitan pa man giraray akong magsayuma. Kaipuhan kong makimahirak ki Jehova na tabangan ako na dai matentaran na akuon an trabahong makakaulang sa paglilingkod ko sa saiya.”—Mat. 6:24.

8. Ano an pag-uulayan ta ngunyan?

⁸ Kapaki-pakinabang sa sato an pagpapasakop ki Jehova. Alagad an mga indibidwal na may awtoridad, arog nin mga elder, ama, asin ina, igwa nin dagdag na dahilan na magsunod sa paggiya nin Diyos; igwa sinda kan oportunidad na makatabang sa iba. Pag-ulayan ta an pirang halimbawa sa Bibliya na nagtutukdo sa sato kun paano ipapautob an awtoridad sa paaging nakakapaugma ki Jehova.

9. Anong mga kadipisilan an napaatubang ki Nehemias?

⁹ Ipinagkatiwala ni Jehova sa mga elder an mahalagang responsabilidad na pasturan an saiyang banwaan. (1 Ped. 5:2) Dakul an manunudan kan mga elder sa pag-adal dapit sa kun paano trinatar ni Nehemias an banwaan ni Jehova. Bilang gobernador kan Juda, dakula an awtoridad ni Nehemias. (Neh. 1:11; 2:7, 8; 5:14) Isipa an pira sa mga kadipisilan na napaatubang ki Nehemias. Naaraman niya na dai iginagalang kan mga tawo an templo asin dai ninda sinusuportaran sa pinansiyal an mga Levita arog kan ipinapagibo kan Katugunan. Binabalga kan mga Judio an katugunan nin Sabbath, asin may mga lalaki na nag-agom nin mga babaying dayuhan. Kaipuhan na asikasuhon ni Gobernador Nehemias an dipisil na sitwasyon na ini.—Neh. 13:4-30.

10. Ano an ginibo ni Nehemias sa mga kadipisilan na napaatubang sa saiya?

¹⁰ Dai ginamit ni Nehemias an saiyang awtoridad tanganing puwersahon an banwaan nin Diyos na magsunod sa sadiri niyang mga pamantayan. Imbes, naghagad siya nin paggiya ki Jehova paagi sa udok sa pusong pagpamibi, asin itinukdo niya sa banwaan an Katugunan ni Jehova. (Neh. 1:4-10; 13:1-3) Mapakumbaba man na nagtrabaho si Nehemias kaiba kan banwaan; tinabangan niya pa ngani sinda sa pagtugdok liwat kan mga pader kan Jerusalem.—Neh. 4:15.

11. Sigun sa 1 Tesalonica 2:7, 8, paano dapat trataron kan mga elder an kongregasyon?

¹¹ Tibaad dai man napapaatubang sa kaparehong mga problema an mga elder, pero maaarog ninda si Nehemias sa nagkapirang paagi. Halimbawa, nagmamaigot sindang marhay para tabangan an saindang mga tugang. Asin dai ninda iniisip na mas urog sinda kisa sa iba huli sa saindang awtoridad. Imbes, pinapadaba ninda an kongregasyon. (Basahon an 1 Tesalonica 2:7, 8.) Huli sa saindang makusog na pagkamuot asin pagigin mapakumbaba, nagtataram sinda nin may kabuutan sa mga tugang. Si Andrew na haloy nang elder nagsabi: “Narisa ko na pag an elder mabuot saka mainamigo, marahay an nagigin reaksiyon kan mga tugang. An mga kuwalidad na ini nakakamotibar sa kongregasyon na  makikooperar sa mga elder.” Si Tony na haloy na man na elder nagsabi: “Hinihinguwa kong iaplikar an sadol na nasa Filipos 2:3 saka pirmi kong pinagmamaigutan na ibilang an iba na mas urog kisa sako. Nakakatabang iyan sa sako na dai magin arog sa diktador.”

12. Taano ta mahalaga na magin mapakumbaba an mga elder?

¹² An mga elder dapat na magin mapakumbaba, kun paanong si Jehova mapakumbaba. Dawa si Jehova an Soberano kan uniberso, “minaduko” siya tanganing ibangon ‘hali sa alpog an tawong hamak.’ (Sal. 18:35; 113:6, 7, NW) Sa katunayan, ikinakabaldi ni Jehova an mga mapalangkaw asin arogante.—Tal. 16:5.

13. Taano ta kaipuhan kan mga elder na ‘pugulan an saindang dila’?

¹³ An sarong elder na nagpapasakop ki Jehova kaipuhan na ‘pugulan an saiyang dila.’ Huli ta kun dai, tibaad makataram siya nin bakong mabuot pag may saro na tinatrato siya nin daing galang. (Sant. 1:26; Gal. 5:14, 15) Si Andrew na sinambit kasubago nagsabi: “May mga pagkakataon na garo gusto kong simbagon sa bakong mabuot na paagi an sarong brother o sister na garo baga daing galang sa sako. Pero, hinurop-hurop ko an halimbawa kan maimbod na mga lingkod sa Bibliya, asin nakatabang iyan sa sako na manudan na mahalaga na magin mapakumbaba saka mahuyo.” Ipinapahiling kan mga elder na nagpapasakop sinda ki Jehova paagi sa pagigin mapakumbaba asin mabuot pag nakikipag-ulay sa mga miyembro kan kongregasyon, pati na sa kapwa ninda mga elder.—Col. 4:6.

14. Anong papel an iinasignar ni Jehova sa mga ama, asin ano an inaasahan niya sa sainda?

¹⁴ Iinasignar ni Jehova an ama bilang payo kan pamilya, asin inaasahan nin Diyos na sasanayon asin didisiplinahon niya an saiyang mga aki. (1 Cor. 11:3; Efe. 6:4) Alagad, limitado an awtoridad nin sarong ama. Maninimbag siya ki Jehova sa kun paano niya tinatrato an saiyang pamilya huling si Jehova an saro na sa Saiya utang kan gabos na pamilya an saindang pangaran. (Efe. 3:14, 15) Ipinapahiling kan mga ama na nagpapasakop sinda ki Jehova paagi sa paggamit kan saindang awtoridad sa paaging nakakapaugma sa Diyos. Dakul sindang manunudan kun pag-aadalan ninda an buhay ni Hading David.

15. Taano ta marahay na pag-isipan nin mga ama an halimbawa ni Hading David?

¹⁵ Ninombrahan ni Jehova si David bilang payo bako lang kan saiyang pamilya kundi kan bilog na nasyon nin Israel. Bilang hadi, dakula an awtoridad ni David. May mga pagkakataon na ginamit niya sa salang paagi an awtoridad na iyan asin nakagibo nin magabat na mga sala. (2 Sam. 11:14, 15) Alagad ipinahiling niyang nagpapasakop siya ki Jehova paagi sa pag-ako sa disiplina. Paagi sa pamibi, sinabi niya ki Jehova an gabos na nasa puso niya. Asin ginibo niya an saiyang  pinakamakakaya na masunod an konseho ni Jehova. (Sal. 51:1-4) Apuwera kaiyan, nagpahiling siya nin kapakumbabaan paagi sa pag-ako nin marahay na sadol bako lang hali sa mga lalaki kundi pati man sa mga babayi. (1 Sam. 19:11, 12; 25:32, 33) Nakanuod si David sa mga sala niya asin ipinokus an saiyang buhay sa paglilingkod ki Jehova.

16. Ano an mga manunudan nin mga ama ki David?

¹⁶ Pag-isipan an pira sana sa mga manunudan nin mga ama ki Hading David: Dai abusuhon an awtoridad na itinao ni Jehova sa saimo. Admitiron an saimong mga sala, asin akuon an basado sa Bibliyang konseho hali sa iba. Kun gigibuhon mo iyan, igagalang ka kan saimong pamilya huli sa kapakumbabaan mo. Pag namimibi ka kaiba an saimong pamilya, sabihon ki Jehova an gabos na nasa puso mo—ipadangog sa sainda kun gurano kakusog an pagtitiwala mo ki Jehova. Asin urog sa gabos, isentro an saimong buhay sa paglilingkod ki Jehova. (Deut. 6:6-9) An saimong marahay na halimbawa an saro sa pinakamahalagang regalo na maitatao mo sa saimong pamilya.   

17. Anong papel an iinasignar ni Jehova sa mga ina?

¹⁷ Iinasignar ni Jehova sa ina an sarong kagalang-galang na papel sa pamilya, asin tinawan niya siya nin awtoridad sa saiyang mga aki. (Tal. 6:20) Sa katunayan, an sinasabi asin ginigibo nin sarong ina puwedeng magkaigwa nin dakulang epekto sa saiyang mga aki sa bilog nindang buhay. (Tal. 22:6) Mangnuhon kun ano an manunudan nin mga ina ki Maria, an ina ni Jesus.

18-19. Ano an manunudan nin mga ina sa halimbawa ni Maria?

¹⁸ Kabisadong marhay ni Maria an Kasuratan. Igwa siya nin hararom na paggalang ki Jehova asin dayupot na pakikiamigo sa Saiya. Andam siyang sunudon an paggiya ni Jehova, dawa ngani nangangahulugan iyan na mababago an gabos sa saiyang buhay.—Luc. 1:35-38, 46-55.

¹⁹ Mga ina, maaarog nindo si Maria sa nagkapirang paagi. Paano? Inot, papagdanayon na dayupot an pakikiamigo mo ki Jehova paagi sa personal na pag-adal kan Bibliya asin personal na pagpamibi. Ikaduwa, magin andam na gumibo nin mga pagbabago sa saimong buhay tanganing mapaugma si Jehova. Halimbawa, tibaad pinadakula ka nin mga magurang na arangguton asin makulog magtaram sa saindang mga aki. Kaya tibaad ngunyan, hinuhuna mong iyan an normal na pagpadakula sa mga aki. Dawa nanudan mo na an dapit sa mga pamantayan ni Jehova, tibaad madipisilan kang magdanay na kalmado asin mapasensiya sa saimong mga aki, lalo na kun nagpapasaway sinda pag pagal ka. (Efe. 4:31) Sa arog kaiyan na mga pagkakataon, lalo nang kaipuhan mong manarig ki Jehova paagi sa pagpamibi. Si Lydia na sarong ina nagsabi: “Minsan, kaipuhan kong udok talagang mamibi tanganing  dai ako anggot na makataram pag dai nagsusunod sako an aki ko. Bigla pa ngani akong minapundo sa pagtaram tanganing silensiyong mamibi ki Jehova para sa tabang. Paagi sa pagpamibi, nakakapagdanay akong kalmado.”—Sal. 37:5.

20. Anong kadipisilan an napapaatubang sa nagkapirang ina, asin paano iyan mapapangganahan?

²⁰ May sarong kadipisilan na komun sa nagkapirang ina—nasasakitan sindang ipahayag an pagkamuot ninda sa saindang mga aki. (Tito 2:3, 4) May mga babayi na nagdakula sa pamilya na an mga magurang bakong ugos sa saindang mga aki. Pero dawa arog kaiyan an dinakulaan mo, dai paggibuhon an mga sala kan saimong mga magurang. An sarong ina na nagpapasakop sa kabutan ni Jehova kaipuhan na manudan na ipahayag an pagkamuot ninda sa saindang mga aki. Tibaad madipisilan siyang baguhon an saiyang kaisipan, sabuot, saka paggawi. Pero posible iyan, asin makikinabang siya asin an saiyang pamilya sa mga pagbabagong iyan.

21-22. Uyon sa Isaias 65:13, 14, ano an mga pakinabang niyato pag nagpapasakop kita ki Jehova?

²¹ Aram ni Hading David na kapaki-pakinabang an pagpapasakop ki Jehova. Isinurat niya: “An mga pagbuot ni Jehova matanos, sa puso nakakapaugma; an tugon ni Jehova malinig, nagpapakinang sa mga mata. Paagi sa mga iyan, an saimong lingkod napapatanidan; may dakulang balos kun uutubon an mga iyan.” (Sal. 19:8, 11, NW) Ngunyan, hiling-hiling ta an pagkakalain kan mga nagpapasakop ki Jehova asin kan mga nagsasayumang magdangog sa saiyang mamumuton na konseho. An mga nagpapasakop ki Jehova “maugmang makururahaw . . . huli sa marahay na kamugtakan kan puso.”—Basahon an Isaias 65:13, 14. *

²² Pag andam na nagpapasakop ki Jehova an mga elder, mga ama, asin mga ina, napaparahay an buhay ninda, nagigin maugma an saindang pamilya, asin mas nagkakasararo an bilog na kongregasyon. Asin an pinakamahalaga sa gabos, napapaugma ninda an puso ni Jehova. (Tal. 27:11) May mas maurog pa daw diyan na balos?