1. Ano an namamatian ni Jehova kun dapit sa mga tawong mapakumbaba? Ipaliwanag.

NAMUMUTAN ni Jehova an mga mapakumbaba. An mga tunay na mapakumbaba sana an puwedeng magkaigwa nin mamumuton asin dayupot na relasyon sa saiya. Alagad, “an mapalangkaw midbid lang niya sa harayo sana.” (Sal. 138:6, NW) Gusto niyato gabos na mapaugma si Jehova asin mamatian an saiyang mainit na pagkamuot, kaya may marahay kitang mga dahilan tanganing kultibaron an kapakumbabaan.

2. Ano an pag-uulayan ta sa artikulong ini?

² Pag-uulayan sa artikulong ini an simbag sa tulong hapot: (1) Ano an kapakumbabaan? (2) Taano ta dapat niyatong kultibaron an kuwalidad na iyan? (3) Anong mga sitwasyon an puwedeng magpadipisil sa sato na magin mapakumbaba? Siring kan mahihiling ta, pag kinukultibar niyato an kapakumbabaan, napapaugma ta an puso ni Jehova asin kita mismo nakikinabang diyan.—Tal. 27:11; Isa. 48:17.

3. Ano an kapakumbabaan?

³ An kapakumbabaan iyo an kababaan nin pag-iisip asin pagigin bakong mapalangkaw o arogante. Ipinaparisa kan Bibliya na an tawong mapakumbaba igwa nin tamang pagmansay sa saiyang relasyon sa Diyos na Jehova asin sa saiyang kapwa. Nasasabutan nin tawong mapakumbaba na may mga bagay na mas urog an iba kisa sa saiya.—Fil. 2:3, 4.

4-5. Taano ta an tunay na kapakumbabaan dai nakadepende sa kun ano an nahihiling ta?

⁴ May mga tawo na sa pangluwas sana mapakumbaba. Tibaad masusupgon sinda o bakong maginirong. O tibaad nagpapahiling sinda nin respeto o paggalang huli ta iyan an kultura o dinakulaan  ninda. Pero an totoo, posibleng mapalangkaw palan sindang marhay. Maabot an panahon, maluwas kun ano talaga sinda.—Luc. 6:45.

⁵ Sa ibong na lado, may mga tawo na prangka o bakong masusupgon, pero dai man buot sabihon na mapalangkaw na sinda. (Juan 1:46, 47) Dawa arog kaiyan, dapat sindang mag-ingat na dai manarig sa saindang sadiring kakayahan. Kita man masusupgon o bako, gabos kita dapat na maghinguwa na magkaigwa nin mapakumbabang puso.   

6. Arog kan mababasa niyato sa 1 Corinto 15:10, ano an manunudan ta sa halimbawa ni apostol Pablo?

⁶ Pag-isipan an halimbawa ni apostol Pablo. Lubos siyang ginamit ni Jehova sa pag-establisar nin bagong mga kongregasyon sa manlain-lain na siyudad. Posible ngani na mas dakul siyang naisagibo sa ministeryo kisa sa siisay man na apostol ni Jesu-Cristo. Pero dai inisip ni Pablo na mas urog siya kisa sa mga kapagtubod niya. Mapakumbaba niyang inadmitir: “Ako an pinakahababa an kamugtakan sa mga apostol, asin dai ako angay na apudon na apostol, dahil pinersegir ko an kongregasyon nin Diyos.” (1 Cor. 15:9) Dangan, sinabi ni Pablo an katotoohan na nagkaigwa siya nin marahay na relasyon ki Jehova bakong dahil sa saiyang mga kuwalidad o ginibo, kundi dahil sa daing kapantay na kabuutan nin Diyos. (Basahon an 1 Corinto 15:10.) Marahayon nanggad na leksiyon dapit sa kapakumbabaan an itinao ni Pablo sa saiyang surat sa mga tugang sa Corinto—lalo na ta an nagkapira sa kongregasyon gustong patunayan na mas urog sinda kisa ki Pablo!—2 Cor. 10:10.

7. Paano ipinahiling nin sarong prominenteng brother sa satong panahon na siya mapakumbaba?

⁷ Dakul na lingkod ni Jehova an napakusog kan istorya nin buhay ni Brother Karl F. Klein, na naglingkod kaidto bilang miyembro kan Namamahalang Grupo. Sa saiyang istorya nin buhay, mapakumbabang inadmitir ni Brother Klein na nasakitan siyang paglabanan an nagkapira sa saiyang mga kaluyahan asin problema sa buhay. Halimbawa kan 1922, nagpatotoo siya sa  harong-harong sa inot na pagkakataon asin nasakitan siyang marhay. Kaya pagkatapos kaiyan, dai siya nagharong-harong giraray sa laog nin mga duwang taon. Pag-abot nin panahon, mantang naglilingkod sa Bethel, may panahon na nagraot an buot niya pagkatapos matawan nin konseho. Nagka-nervous breakdown man siya, pero narahay man siya. Sa ibong kaiyan, nagkaigwa siya nin nakakaugma asin marahayon na mga pribilehiyo. Isipa na sana an kapakumbabaan na kinaipuhan kan prominenteng brother na ini tanganing ikaistorya na mayong pag-alangan an saiyang mga kaluyahan! Dakul na tugang an nauugma pag nagigirumduman ninda si Brother Klein asin an saiyang onesto saka magayon na istorya nin buhay. *

8. Paano kita tinatabangan kan 1 Pedro 5:6 na mahiling na nakakapaugma ki Jehova an kapakumbabaan?

⁸ An pinakamahalagang dahilan niyato kaya kinukultibar ta an kapakumbabaan iyo na nakakapaugma iyan ki Jehova. Malinaw iyan na sinabi ni apostol Pedro. (Basahon an 1 Pedro 5:6.) Mapadapit sa mga tataramon ni Pedro, an librong “Madia Magin Parasunod Taka” nagsabi: “An kaabhawan [o kapalangkawan] garo hilo. Grabe an puwedeng magin mga epekto kaiyan. Iyan kuwalidad na puwedeng gibuhon na daing serbi sa Diyos an pinakamaabilidad na tawo. Sa ibong na lado, an kapakumbabaan puwedeng gibuhon na kapaki-pakinabang na marhay para ki Jehova dawa an pinakahababa. . . . Mauugma man [siyang] marhay . . . na tawan kamo nin balos huli sa kapakumbabaan nindo.” * Iyo, bako daw na mayo na kitang ibang gugustuhon kundi an mapaugma an puso ni Jehova?—Tal. 23:15.

9. Taano ta napaparani sa sato an iba pag mapakumbaba kita?

⁹ Apuwera sa napapaugma ta si Jehova, dakul an pakinabang niyato kun kukultibaron ta an kapakumbabaan. Kun mapakumbaba kita, marani sa sato an iba. Tanganing masabutan kun taano, ibugtak an sadiri sa sitwasyon kan iba. (Mat. 7:12) Habo niyatong makaiba-iba an sarong tawo na gustong siya pirmi an nasusunod saka dai nagdadangog sa suhestiyon nin iba. Sa kabaliktaran, nauugma kitang makaiba-iba an satong mga kapagtubod pag nagpapahiling sinda nin “pakikidamay, nin pagkamuot na siring kan sa magturugang, nin mamumuton na pagmalasakit, asin nin kapakumbabaan.” (1 Ped. 3:8) Kun gusto niyatong maparani sa arog kaiyan na mga tawo, posibleng marhay na gusto man nindang maparani sa sato—basta mapakumbaba kita.

10. Taano ta mas magian an buhay kan mga tawong mapakumbaba?

¹⁰ An kapakumbabaan nakakapagian man sa  satong buhay. An totoo, sa satong buhay may mahihiling o maeeksperyensiyahan kita na sa hiling ta bakong tama o makatanusan. An madunong na hading si Solomon nagsabi: “May nahiling akong mga suruguon na nakasakay sa kabayo pero an mga pamayo naglalakaw nin siring sa mga suruguon.” (Par. 10:7, NW) An mga tawong may pambihirang abilidad dai pirming natatawan nin pag-umaw o pagmidbid. Asin kun minsan, an mga tawong bakong gayong maabilidad natatawan nin mas urog na pag-umaw. Dawa arog kaiyan, sinabi ni Solomon na madunong para sa sato na akuon an realidad imbes na magparahadit sa bakong marahay na mga nangyayari sa buhay. (Par. 6:9) Kun mapakumbaba kita, mas madali niyatong maaako na arog talaga kaiyan an buhay—dai pirming nangyayari an gusto ta.

11. Ano an dapat na magin reaksiyon niyato pag tinatawan kita nin konseho?

¹¹ Kada aldaw, dakul kitang oportunidad na magpahiling nin kapakumbabaan. Pag-isipan an pirang sitwasyon. Pag tinatawan kita nin konseho. Marahay na isaisip niyato na kun may saro na nagtao nin panahon tanganing itanos kita, posibleng marhay na huli iyan ta nakagibo na palan kita nin medyo magabat na sala. Sa arog kaiyan na mga sitwasyon, tibaad an inot na tendensiya niyato iyo na dai akuon an konseho. Tibaad kritikaron niyato an nagtao kan konseho o an paagi niya nin pagtao kaiyan. Alagad kun mapakumbaba kita, hihinguwahon niyato na magpahiling nin tamang sabuot.

12. Uyon sa Talinhaga 27:5, 6, taano ta dapat niyatong apresyaron an saro na nagtatao sato nin konseho? Iilustrar.

¹² An tawong mapakumbaba mapag-apresyar sa konseho. Bilang pag-ilustrar: Nasa Kristiyanong pagtiripon ka ngaya. Pagkatapos makipag-ulay sa nagkapirang tugang, isinuway ka sa gilid kan saro sainda dangan pahinghing na sinabi saimo na may tinga ka. Siyempre, masusupog ka. Pero bako daw na maaapresyar mo man na sinabi niya iyan saimo? An totoo, tibaad gusto mo pa ngani na may mas nainot kutang nagsabi saimo! Kaagid kaiyan, dapat na mapakumbaba niyatong pasalamatan an sarong kapagtubod na nagkusog-buot na tawan kita nin konseho pag kaipuhan ta iyan. Para sa sato amigo ta siya, bakong kaiwal.—Basahon an Talinhaga 27:5, 6; Gal. 4:16.

13. Paano niyato maipapahiling an kapakumbabaan pag natatawan nin mga pribilehiyo sa paglilingkod an iba?

¹³ Pag natatawan nin mga pribilehiyo sa paglilingkod an iba. “Pag nahihiling ko na natatawan nin mga pribilehiyo an iba, kun minsan naiisip ko kun ta’no ta bako ako an tinawan,” an inadmitir kan elder na si Jason. Namatian mo na man daw iyan? Bako man sala na ‘maghinguwang  mag-abot’ nin dagdag na mga pribilehiyo sa paglilingkod. (1 Tim. 3:1) Pero, dapat niyatong bantayan an satong kaisipan. Kun dai kita mag-iingat, puwedeng magpuon na magtalubo sa satong puso an kapalangkawan. Halimbawa, tibaad magpuon na mag-isip an sarong brother na siya an pinakakuwalipikado sa sarong partikular na asignasyon. O tibaad isipon nin sarong Kristiyanang agom, ‘Mas kuwalipikadong marhay si agom kisa ki ano!’ Alagad kun tunay kitang mapakumbaba, lilikayan niyato an siring na mapalangkaw na kaisipan.

14. Ano an manunudan niyato sa nagin reaksiyon ni Moises kan tinawan nin mga pribilehiyo an iba?

¹⁴ May manunudan kita sa nagin reaksiyon ni Moises kan tinawan nin mga pribilehiyo an iba. Pinapahalagahan niya an saiyang asignasyon na panginutan an nasyon nin Israel. Ano an nagin reaksiyon ni Moises kan tugutan ni Jehova an iba na maglingkod kaibanan niya? Dai siya nauri. (Bil. 11:24-29) Kun mapadapit sa trabaho na pagigin hukom sa mga tawo, mapakumbaba niyang tinugutan an iba na tabangan siya sa trabahong iyan. (Ex. 18:13-24) Natawan nin mas marahay na serbisyo an mga Israelita na iinasignar sa saiya na hukuman. Ipinapahiling kaiyan na mas mahalaga ki Moises an kapakanan kan iba kisa sa saiyang mga pribilehiyo. Marahayon nanggad na halimbawa para sa sato! Tandaan na kun gusto niyatong magin tunay na kapaki-pakinabang ki Jehova, mas mahalaga sa sato an pagigin mapakumbaba kisa sa pagigin maabilidad. “Tinatawan ni Jehova nin atensiyon an mapakumbaba dawa nasa halangkaw Siya.”—Sal. 138:6, NW.

15. Anong bagong mga kamugtakan an napaatubang sa dakul na tugang?

¹⁵ Pag napapaatubang kita sa bagong mga kamugtakan. Sa nakaagi pa sanang mga taon, dakul na tugang na haloy nang naglilingkod ki Jehova an tinawan nin bagong asignasyon. Halimbawa kan 2014, an mga paraataman nin distrito asin an saindang agom inimbitaran na maglingkod sa sarong klase nin bilog na panahon na paglilingkod. Puon kan taon man sanang iyan, mapundo na an mga paraataman nin sirkito sa saindang asignasyon pag mag-70 anyos na sinda. An mga  brother man na 80 anyos pataas dai na maglilingkod bilang koordineytor kan grupo nin kamagurangan. Siring man, sa nakalihis na mga taon, dakul sa pamilyang Bethel an iinasignar bilang payunir. An iba nagpundo sa saindang espesyal na bilog na panahon na paglilingkod huli sa problema sa salud, responsabilidad sa pamilya, o iba pang personal na mga dahilan.

16. Paano nagpahiling nin kapakumbabaan an mga tugang niyato mantang nag-a-adjust sa bago nindang kamugtakan?

¹⁶ Bakong madali para sa mga tugang na ini an pag-adjust na iyan. Siyempre, napamahal na sinda sa dati nindang asignasyon na sa dakul na kaso, sarong asignasyon na dakul na taon nindang ginibo. May mga nakakamati nin grabeng kamunduan mantang nag-a-adjust sinda sa bago nindang kamugtakan. Pero pag-abot nin panahon, naka-adjust sinda. Taano? An panginot na dahilan iyo an pagkamuot ninda ki Jehova. Aram nindang sa Diyos sinda nagdusay—bako sa trabaho, sa titulo, o sa asignasyon. (Col. 3:23) Maugma sinda na padagos na mapakumbabang maglingkod ki Jehova sa ano man na paagi. “Ipinapasa [ninda] sa saiya an gabos [nindang] kahaditan,” huling aram ninda na nagmamakulog sa sainda si Jehova.—1 Ped. 5:6, 7.

17. Taano ta ipinagpapasalamat niyato na dinadagka kita kan Tataramon nin Diyos na kultibaron an kapakumbabaan?

¹⁷ Bako daw na ipinagpapasalamat niyato na dinadagka kita kan Tataramon nin Diyos na kultibaron an kapakumbabaan? Pag kinukultibar niyato an magayunon na kuwalidad na ini, nakikinabang kita asin an iba. Mas magigin pasil sato na atubangon an mga problema sa buhay. Urog sa gabos, mas napaparani kita sa satong Ama sa langit. Nauugma nanggad kitang maaraman na dawa siya ‘Halangkaw asin Banal na Diyos,’ namumutan asin pinapahalagahan niya an saiyang mapakumbabang mga lingkod!—Isa. 57:15, An Marahay na Bareta Biblia.