1-2. Paano an Parahulit 11:6 konektado sa paghuhulit kan maugmang bareta kan Kahadian?

MAY mga nasyon na an mga tawo gustong-gustong makanuod pa pag naaraman ninda an manungod sa maugmang bareta. Iyan mismo an hinahalat-halat ninda! Pero sa ibang mga kadagaan, an mga tawo dai gayong interesado sa Diyos o sa Bibliya. Ano sa parati an reaksiyon kan mga tawo sa lugar nindo? Ano man an magin reaksiyon ninda, inaasahan ni Jehova na padagos kitang maghuhulit sagkod na sabihon niyang tapos na an gibuhon.

² Sa itinalaan na panahon ni Jehova, matatapos an gibuhon na paghuhulit asin “maabot an katapusan.” (Mat. 24:14, 36) Bago mangyari iyan, paano ta masusunod an mga tataramon na “dai mo pagpahingaluon an saimong kamot”? *—Basahon an Parahulit 11:6. *

3. Ano an pag-uulayan niyato sa artikulong ini?

³ Sa sinundan na artikulo, pinag-ulayan ta an apat na bagay na kaipuhan tang gibuhon tanganing magin epektibong “mga parasira nin tawo.” (Mat. 4:19) Tutukaron sa artikulong ini an tulong paagi para mapakusog ta an satong determinasyon na maghulit, ano man na kamugtakan an napapaatubang sa sato. Manunudan niyato kun taano ta importanteng (1) magdanay na nakapokus, (2) magin mapasensiya, asin (3) pagdanayon na makusog an pagtubod.

4. Taano ta kaipuhan na magdanay kitang nakapokus sa gibuhon na itinao sa sato ni Jehova?

⁴ Ihinula ni Jesus an mga pangyayari asin kamugtakan na magigin tanda kan huring mga aldaw asin na puwedeng makadisturbo sa saiyang mga parasunod na maisagibo an gibuhon na paghuhulit. Sinadol niya an saiyang mga disipulo na ‘magdanay na mapagbantay.’ (Mat. 24:42) Ngunyan, napapaatubang kita sa kaagid na mga pandisturbo na nakaulang sa mga tawo kan panahon ni Noe na magdangog sa patanid na ibinalangibog niya. (Mat. 24:37-39; 2 Ped. 2:5) Kaya gusto niyatong magdanay na nakapokus sa gibuhon na itinao sa sato ni Jehova.

5. Paano ilinaladawan kan Gibo 1:6-8 kun gurano kahiwas an gibuhon na paghuhulit?

⁵ Ngunyan, kaipuhan nanggad niyatong magpokus sa gibuhon na paghuhulit kan Kahadian. Ihinula ni Jesus na an gibuhon na ini malakop nanggad asin magpapadagos maski pagkatapos niyang magadan. (Juan 14:12) Pagkagadan ni Jesus, nagbalik sa paninira an nagkapira sa mga disipulo niya. Pagkabuhay liwat ni Jesus, naggibo siya nin milagro na paagi kaiyan nakadakop nin kadakul na sira an nagkapira sa mga disipulo niya. Ginamit ni Jesus an pagkakataon na iyan para iduon na an asignasyon ninda bilang mga parasira nin tawo mas mahalaga kisa sa ano man na iba pang gibuhon. (Juan 21:15-17) Bago mismo magsakat si Jesus sa langit, sinabi niya sa saiyang mga disipulo na an gibuhon na pagpapatotoo na pinunan niya makakaabot sa pinakahararayong lugar sa luwas kan Israel. (Basahon an Gibo 1:6-8.) Pakalihis nin mga taon, tinawan ni Jesus nin sarong bisyon si apostol Juan para ipahiling digdi an mangyayari sa “aldaw kan Kagurangnan.” * Saro sa mga nahiling ni Juan iyo an makangangalas na pangyayaring ini: Sa paggiya nin sarong anghel, an “daing katapusan na maugmang bareta” ihinuhulit sa “gabos na nasyon asin tribo asin lengguwahe saka banwaan.” (Kap. 1:10; 14:6) Malinaw nanggad na an kabutan ni Jehova ngunyan iyo na makikabtang kita sa pambilog na kinaban na paghuhulit sagkod na matapos iyan.

6. Paano kita makakapagdanay na nakapokus sa gibuhon na paghuhulit?

 ⁶ Makakapagdanay kitang nakapokus sa gibuhon na paghuhulit kun huhurop-hurupon ta an gabos na ginigibo ni Jehova para tabangan kita. Halimbawa, nagtatao siya nin abundang espirituwal na kakanon paagi sa imprentado asin digital na mga publikasyon, mga audio asin video recording, saka mga Internet broadcast. Isipa na sana: An mga impormasyon sa satong opisyal na website makukua na sa labing 1,000 lengguwahe! (Mat. 24:45-47) Sa sarong kinaban na nagkakabaranga huli sa pulitika, relihiyon, asin estado sa buhay, an labing walong milyon na lingkod nin Diyos tunay nanggad na nagkakasararo sa pambilog na kinaban na kasararuan nin magturugang. Halimbawa, kan Biyernes, Abril 19, 2019, an mga Saksi sa bilog na kinaban nagkakasararo na tinukar an teksto sa aldaw na iyan. Kan banggi na, 20,919,041 katawo an nagtiripon tanganing iselebrar an Memoryal kan kagadanan ni Jesus. Napapahiro kitang magdanay na nakapokus sa gibuhon na pang-Kahadian pag hinuhurop-hurop niyato an satong pribilehiyo na mahiling an milagrong iyan sa satong panahon asin magin kabtang kaiyan.

7. Paano makakatabang sa sato an halimbawa ni Jesus na magdanay na nakapokus?

⁷ An saro pang paagi tanganing magdanay kitang nakapokus sa paghuhulit iyo an pagsunod sa halimbawa ni Jesus. Dai niya tinugutan an ano man na bagay na makadisturbo sa saiya sa pagpapatotoo manungod sa katotoohan. (Juan 18:37) Dai siya naakit kan ialok saiya ni Satanas an “gabos na kahadian kan kinaban pati an kamurawayan kan mga iyan”; dai man siya natentaran kan gusto kan iba na gibuhon siyang hadi. (Mat. 4:8, 9; Juan 6:15) Dai siya nagpadara sa pagmawot sa materyal na kayamanan; ni tinugutan niyang makadisganar sa saiya an grabeng pagkontra. (Luc. 9:58; Juan 8:59) Pag napapaatubang kita sa mga pagbalo sa satong pagtubod, makakapagdanay kitang nakapokus kun gigirumdumon ta an sadol ni apostol Pablo. Inenkaminar niya an mga Kristiyano na sunudon an halimbawa ni Jesus tanganing dai sinda “mapagal asin magsuko”!—Heb. 12:3.

8. Ano an pagigin mapasensiya, asin taano ta kaipuhan na marhay iyan ngunyan?

⁸ An pagigin mapasensiya iyo an kakayahan na kalmadong maghalat na magbago an sarong sitwasyon. Tibaad gustong-gusto na niyatong matapos an sarong bakong magayon na sitwasyon o tibaad hinahalat-halat na niyatong mangyari an sarong bagay na haloy nang minamawot. Arin man diyan, kaipuhan niyatong magin mapasensiya o matinios. Gustong-gusto nang matapos kaidto ni propeta Habacuc an kadahasan sa Juda. (Hab. 1:2) Inisip man kaidto kan mga disipulo ni Jesus na lugod na ‘biglang dumatong’ an Kahadian tanganing iligtas sinda sa maringis na pamamahala kan Roma. (Luc. 19:11) Hinahalat-halat man niyato an aldaw na hahalion na kan Kahadian nin Diyos an karatan asin maestablisar nin sarong matanos na bagong kinaban. (2 Ped. 3:13) Minsan siring, kaipuhan tang magin mapasensiya asin maghalat sa itinalaan na panahon ni Jehova. Pag-isipan an nagkapirang paagi na tinutukduan kita ni Jehova na magin mapasensiya.

9. Anong mga halimbawa an nagpapahiling kan pagigin mapasensiya ni Jehova?

⁹ Nagpahiling si Jehova nin perpektong halimbawa nin pagigin mapasensiya. Tinawan niya nin igong panahon si Noe para maitugdok an arka asin maglingkod bilang “sarong parahulit nin katanusan.” (2 Ped. 2:5; 1 Ped. 3:20) Nagdangog si Jehova ki Abraham kan pauruutro kaining kinuwestiyon an Saiyang desisyon na laglagon an mga nakaistar sa maraot na mga siyudad nin Sodoma asin Gomora. (Gen. 18:20-33) Sa laog nin mga siglo, grabe an pagpapasensiya ni Jehova sa bakong maimbod na nasyon nin Israel. (Neh. 9:30, 31) Nahihiling ta ngunyan an ebidensiya kan pagigin mapasensiya ni Jehova mantang tinatawan niya nin panahon an gabos na tawo na irinarani  niya tanganing “magkaigwa [sinda] nin oportunidad na magsulsol.” (2 Ped. 3:9; Juan 6:44; 1 Tim. 2:3, 4) An halimbawa ni Jehova nagtatao sa sato nin marahay na dahilan na magin mapasensiya mantang padagos kitang naghuhulit asin nagtutukdo. Tinutukduan niya man kita na magin mapasensiya paagi sa sarong ilustrasyon na yaon sa saiyang Tataramon.

10. Ano an itinutukdo sa sato kan halimbawa nin sarong parauma na mababasa sa Santiago 5:7, 8?

¹⁰ Basahon an Santiago 5:7, 8. An halimbawa kan paraumang nagpapatalubo nin mga pananom nagtutukdo sato kun paano magigin mapasensiya. Iyo, may mga pananom na marikas magtalubo. Pero, an kadaklan sa mga pananom, lalo na idtong mga namumunga, mas haloy na panahon an hinahalat bago mamunga. Sa Israel, an panahon nin pagtalubo inaabot nin mga anom na bulan. Itinanom kan parauma an mga banhi pagkatapos kan inot na mga pag-uran sa tigrakdag asin nag-ani pagkatapos kan huring mga pag-uran sa tigsuli. (Mar. 4:28) Sarong kadunungan na arugon an pagkamapasensiya kan parauma. Pero, tibaad bakong madali ini.

11. Paano an pagigin mapasensiya makakatabang sato sa satong ministeryo?

¹¹ Sa parati, an bakong perpektong mga tawo gusto tulos na mahiling an resulta kan saindang mga paghihinguwa. Pero kun gusto tang makaani sa satong tanuman, dapat na pirmi tang tawan iyan nin atensiyon—bubungkalon iyan, tatanuman, hihilamunan, saka babaribian. An paggibo nin disipulo nangangaipo man nin padagos na paghihinguwa. Nangangaipo nin panahon an pagtabang sa satong mga tinutukduan sa Bibliya na magabot an mga duot nin pagpalain-lain asin pagkaindiperente na igwa sinda. An pagigin mapasensiya ta makakatabang sa sato na dai madisganar pag dai nagdadangog sato an mga tawo. Asin maski pag igwa nin nagpahiling nin interes, kaipuhan man giraray na magin mapasensiya kita. Dai niyato puwedeng piriton an sarong tinutukduan sa Bibliya na magkaigwa nin pagtubod. Kun minsan, maski an mga disipulo ni Jesus kaidto dai tulos nasasabutan an kahulugan kan itinukdo niya. (Juan 14:9) Tandaan niyato na maski kita an nagtatanom saka nagbabaribi, an Diyos an nagpapatalubo kaiyan.—1 Cor. 3:6.

12. Paano kita makakapahiling nin pasensiya pag nagpapatotoo sa bakong kapagtubod na mga kapamilya o kaparyente?

 ¹² An sarong aspekto na tibaad madipisilan kitang magin mapasensiya iyo an pagpapatotoo sa satong bakong kapagtubod na mga kapamilya o kaparyente. Makakatabang sa sato an prinsipyo na nasa Parahulit 3:1, 7. Sinabi diyan: “May panahon na . . . magsilensiyo asin panahon na magtaram.” (NWT) Puwedeng magin silensiyong patotoo an satong marahay na paggawi, pero pirmi pa man giraray kitang alisto sa mga oportunidad na ipakipag-ulay an manungod sa katotoohan. (1 Ped. 3:1, 2) Mapasensiya kita sa gabos na tawo—kaiba na an satong mga kapamilya—mantang maigot kitang naghuhulit asin nagtutukdo.

13-14. Ano an nagkapirang halimbawa nin pagigin mapasensiya na puwede tang arugon?

¹³ Makakanuod kitang magin matinios paagi sa mga halimbawa kan maimbod na mga lingkod sa Bibliya pati man sa presenteng panahon. Gustong-gusto na ni Habacuc na matapos an karatan, pero may pagtitiwala siyang nagsabi: “Sa puwestong pigbabantayan ko magdadanay akong nakatindog.” (Hab. 2:1, NWT) Ipinahayag ni apostol Pablo an saiyang udok sa pusong pagmawot na “matapos” an saiyang ministeryo. Pero may pakatios siyang nagpadagos na “lubos na magpatotoo manungod sa maugmang bareta.”—Gibo 20:24.

¹⁴ Pag-isipan an halimbawa nin sarong mag-agom na naggradwar sa Gilead asin iinasignar sa nasyon na dikit an Saksi asin kadaklan sa mga tawo bakong Kristiyano. Dikiton sana an gustong mag-adal nin Bibliya. Sa kabaliktaran, an mga kaklase ninda sa Gilead na naglilingkod sa ibang mga nasyon nagpapadara sainda nin magagayon na bareta manungod sa dakul nindang nag-uuswag na mga tinutukduan sa Bibliya. Sa ibong kan maluway na pag-uswag sa saindang teritoryo, padagos na mapasensiyang naghulit an mag-agom. Pagkatapos maghulit nin walong taon sa garo baga bakong mabungang teritoryo, namatian man giraray ninda an kaugmahan na mahiling na mabawtismuhan an saro sa mga tinutukduan ninda sa Bibliya. Ano an pagkakapareho kan mga halimbawang ini kan suanoy asin sa presenteng panahon? An maimbod na mga lingkod na ini dai nabawasan an kaigutan o pinagpahingalo an saindang kamot, asin binalusan sinda ni Jehova sa pagigin mapasensiya ninda. Lugod na “magi kamong mga paraarog sa mga uminako kan mga panuga dahil sa pagtubod asin pakatios.”—Heb. 6:10-12.

15. Ano an sarong paagi na pinapakusog nin pagtubod an satong determinasyon na maghulit?

¹⁵ Nagtutubod kita sa mensaheng ihinuhulit niyato, kaya gustong-gusto tang sabihon iyan sa pinakadakul na tawong posible. Nagtitiwala kita sa mga panuga na nasa Tataramon nin Diyos. (Sal. 119:42; Isa. 40:8) Nahiling ta an mga propesiya sa Bibliya na nauutob sa satong panahon. Nahiling niyato kun paano nagbago an buhay kan mga tawo kan pinunan nindang iaplikar an konseho kan Bibliya. An mga ebidensiyang ini nagpapakusog kan satong kumpiyansa na an maugmang bareta kan Kahadian iyo an mensaheng kaipuhan na madangog kan gabos na tawo.

16. Kauyon kan Salmo 46:1-3, paano an pagtubod ki Jehova asin ki Jesus nagpapakusog kan satong determinasyon na maghulit?

¹⁶ Nagtutubod man kita ki Jehova, an Gikanan kan mensaheng ihinuhulit niyato, asin sa saro na pinatukaw niya bilang Hadi kan Kahadian, si Jesus. (Juan 14:1) Ano man an mapaatubang sa sato, si Jehova pirming magigin pailihan asin kakusugan niyato. (Basahon an Salmo 46:1-3.) Dugang pa, nagtitiwala kita na ginigiyahan ni Jesus hali sa langit an satong gibuhon na paghuhulit, gamit an kapangyarihan asin awtoridad na itinao sa saiya ni Jehova.—Mat. 28:18-20.

17. Magtao nin halimbawa kun taano ta dapat kitang padagos na maghulit.

¹⁷ An pagtubod pinapakusog an satong pagtitiwala na bebendisyunan ni Jehova an mga paghihinguwa  niyato, na kun minsan sa mga paaging dai ta inaasahan. (Par. 11:6) Halimbawa, ribo-ribong tawo kada aldaw an nakakahiling sa satong mga displey nin literatura asin cart. Epektibo daw an paaging ini nin paghuhulit? Iyo nanggad! Sinabi sa Nobyembre 2014 na isyu kan An Satong Ministeryo sa Kahadian an manungod sa sarong estudyante sa unibersidad na gustong magsurat nin essay manungod sa mga Saksi ni Jehova. Dai siya nakahanap nin Kingdom Hall, pero nahiling niya an satong displey nin literatura sa kampus ninda, asin nahanap niya man an impormasyon na kaipuhan niya para sa essay niya. Dai nahaloy, nagin siyang bawtisadong Saksi asin naglilingkod na ngunyan bilang regular payunir. An arog kaiyan na mga eksperyensiya nakakamotibar sa sato na padagos na maghulit huling ipinapahiling kaiyan na igwa pa man giraray nin mga tawong kaipuhan na mahanap asin madangog an mensahe kan Kahadian.

18. Taano ta makakasigurado kita na an gibuhon na paghuhulit kan Kahadian matatapos sa panahon na itinalaan ni Jehova?

¹⁸ Makakasigurado kita na an gibuhon na paghuhulit kan Kahadian matatapos sa tamang panahon. Pag-isipan an nangyari kan panahon ni Noe. Pinatunayan ni Jehova na siya an perpektong Paratalaan nin Panahon. Mga 120 taon bago an Baha, itinalaan na ni Jehova kun nuarin iyan mangyayari. Pakalihis nin mga dekada, sinabi ni Jehova ki Noe na gibuhon an arka. Tibaad sa laog nin mga 40 o 50 taon bago an Baha, padagos na maigot na nagtrabaho si Noe. Dawa ngani dai nagdadangog saiya an mga tawo, padagos niyang ihinulit an nagpapatanid na mensahe sagkod na sabihon na ni Jehova na oras na para ilaog sa arka an mga hayop. Dangan, sa tamang panahon, “isinara ni Jehova an pinto.”—Gen. 6:3; 7:1, 2, 16, NWT.

19. Ano an lalauman niyatong mangyayari kun dai ta papahingaluon an satong kamot?

¹⁹ Dai mahahaloy, tatapuson na ni Jehova an gibuhon na paghuhulit kan Kahadian; ‘sasarahan niya nin pinto’ an sistema nin mga bagay ni Satanas asin maestablisar nin sarong matanos na bagong kinaban. Mantang dai pa nangyayari iyan, lugod na arugon niyato si Noe, Habacuc, asin an iba pa na dai pinagpahingalo an saindang kamot. Lugod na magdanay kitang nakapokus, magin mapasensiya, asin pagdanayon na makusog an satong pagtubod ki Jehova asin sa saiyang mga panuga.