1. Nuarin tibaad dipisil na maglingkod ki Jehova?

SA HILING mo, nuarin mas dipisil na maglingkod ki Jehova—pag may inaatubang kang masakit na mga problema o pag trangkilo an buhay mo? Pag may mga kadipisilan kita, nagtitiwala tulos kita ki Jehova. Pero ano an ginigibo niyato pag matuninong an buhay ta? Nawawara daw an pokus ta sa paglilingkod ki Jehova? Pinatanidan ni Jehova an mga Israelita na posibleng mangyari ini.—Deut. 6:10-12.

2. Anong halimbawa an ipinahiling ni Hading Asa?

² Si Hading Asa sarong marahayon na halimbawa nin saro na huminiro nin may kadunungan paagi sa lubos na pagtitiwala ki Jehova. Naglingkod siya ki Jehova bako lang sa masakit na mga panahon kundi pati man sa mga panahon nin katuninungan. Puon pa kaidto, “bilog an debosyon kan puso ni Asa ki Jehova.” (1 Ha. 15:14, NWT) An sarong paagi na ipinahiling ni Asa an saiyang debosyon iyo an paghali sa palsong pagsamba sa Juda. Sinabi kan Bibliya na “hinali niya an mga altar para sa mga diyos kan ibang mga nasyon saka an sagradong mga halangkaw na lugar, pinasa an mga sagradong harigi, asin pinutol an mga sagradong poste.” (2 Cron. 14:3, 5, NWT) Hinali pa ngani niya si Maaca, an saiyang lola, sa posisyon kaini bilang inang reyna sa kahadian. Taano? Huling pinalakop kaini an palsong pagsamba sa sarong idolo.—1 Ha. 15:11-13.

3. Ano an pag-uulayan ta sa artikulong ini?

³ Bako lang paghali sa palsong pagsamba an ginibo ni Asa. Pinalakop niya an dalisay na pagsamba asin nakatabang iyan para bumalik ki Jehova an kahadian nin Juda. Binendisyunan ni Jehova si Asa asin an mga Israelita nin sarong panahon nin katuninungan. * Sa laog nin sampulong taon durante kan pamamahala ni Asa, “matuninong  . . . an nasyon.” (2 Cron. 14:1, 4, 6, NWT) Sa artikulong ini, pag-uulayan ta kun paano ginamit ni Asa an panahon na iyan nin katuninungan. Dangan pag-uulayan niyato an halimbawa kan mga Kristiyano kan inot na siglo, na arog ni Asa, inaprobetsaran an matuninong na panahon. Ultimo, sisimbagon niyato an hapot na ini: Kun nakaistar ka sa nasyon na may katalingkasan sa pagsamba, paano mo gagamiton sa madunong na paagi an panahon na iyan nin katuninungan?

4. Sigun sa 2 Cronica 14:2, 6, 7, paano ginamit ni Asa an panahon nin katuninungan?

⁴ Basahon an 2 Cronica 14:2, 6, 7. Sinabi ni Asa sa banwaan na si Jehova an ‘nagtao sainda nin katuninungan sa gabos nindang kalaban sa palibot.’ Dai inisip ni Asa na an peryodong ini nin katuninungan panahon para magrelaks. Imbes, nagpuon siyang magtugdok nin mga siyudad, pader, tore, asin mga trangkahan. Sinabi niya sa banwaan nin Juda: “Kapot ta pa an nasyon.” Ano an buot sabihon ni Asa? An buot sabihon niya iyo na an banwaan libreng makakahiro sa daga na itinao sa sainda nin Diyos asin makakatugdok na mayong pagkontra kan mga kaiwal. Dinagka niya an banwaan na aprobetsaran an panahon na ini nin katuninungan.

5. Taano ta pinakusog ni Asa an saiyang puwersa militar?

⁵ Ginamit man ni Asa an panahon nin katuninungan tanganing pakusugon an saiyang puwersa militar. (2 Cron. 14:8) Nangangahulugan daw ini na dai siya nagtitiwala ki Jehova? Dai. Imbes, aram ni Asa na obligasyon niya bilang hadi na iandam an banwaan sa mga kadipisilan na tibaad mapaatubang sainda. Aram ni Asa na an panahon na ini nin katuninungan sa Juda posibleng marhay na dai magdadanay, asin iyan man nanggad an nangyari.

6. Paano ginamit kan mga Kristiyano kan inot na siglo an panahon nin katuninungan?

⁶ Dawa ngani parating pinepersegir an mga Kristiyano kan inot na siglo, nakaeksperyensiya  man sinda nin mga panahon nin katuninungan. Ano an ginibo ninda sa mga panahon na iyan? An maimbod na mga lalaki asin babaying idto dai nagpundo sa paghulit kan maugmang bareta. Sinasabi kan pagkasaysay sa Gibo na ‘nagpahiling sinda nin pagkatakot ki Jehova.’ Padagos sindang naghulit kan maugmang bareta, asin bilang resulta, “padagos sindang nagdadakul.” Malinaw na binendisyunan ni Jehova an saindang maigot na paghuhulit durante kan mga panahon nin katuninungan.—Gibo 9:26-31.

7-8. Ano an ginibo ni Pablo asin kan iba pa kan magkaigwa sinda nin oportunidad? Ipaliwanag.

⁷ Inaprobetsaran kan mga disipulo kan inot na siglo an lambang oportunidad na ipalakop an maugmang bareta. Bilang sarong halimbawa, kan marealisar ni apostol Pablo na sarong dakulang pinto an nabuksan saiya mantang nasa Efeso siya, inaprobetsaran niya an oportunidad na maghulit asin gumibo nin mga disipulo sa siyudad na iyan.—1 Cor. 16:8, 9.

⁸ Saro pang oportunidad an uminabot ki Pablo asin sa iba pang mga Kristiyano kan naresolberan kan 49 C.E. an isyu manungod sa pagturi. (Gibo 15:23-29) Pagkatapos na maipaabot sa mga kongregasyon an desisyon, naghinguwang marhay an mga disipulo na ipahayag an “maugmang bareta mapadapit sa tataramon ni Jehova.” (Gibo 15:30-35) Ano an resulta? Sinasabi kan Bibliya na “padagos nanggad na [napakusog] an pagtubod kan mga kongregasyon asin padagos na [nagdakul] an bilang kan mga tugang aroaldaw.”—Gibo 16:4, 5.

9. Ano an sitwasyon sa dakul na kadagaan ngunyan, asin ano an puwede tang ihapot sa satong sadiri?

⁹ Sa dakul na kadagaan ngunyan, nakakapaghulit kita na mayo nin ulang. Nakaistar ka daw sa sarong nasyon na may katalingkasan sa pagsamba? Kun iyo, haputon an sadiri, ‘Paano ko ginagamit an katalingkasan na ini?’ Durante kan mga huring aldaw na ini, pinanginutan kan organisasyon ni Jehova an pinakadakulang kampanya nin paghuhulit asin pagtutukdo na dai pa nangyari sa kinaban kasuarin man. (Mar. 13:10) Iyo, dakul na oportunidad an bukas sa mga lingkod ni Jehova.

10. Dinadagka kita kan 2 Timoteo 4:2 na gibuhon an ano?

¹⁰ Paano mo aaprobetsaran an panahon nin katuninungan? (Basahon an 2 Timoteo 4:2.) Taano ta dai isip-isipon an saimong kamugtakan asin hilingon kun ika o an saro mong kapamilya puwedeng urog na makikabtang sa gibuhon na paghuhulit, tibaad maglingkod pa ngani bilang payunir? Bako ini an panahon para magtipon nin kayamanan asin materyal na mga pagsadiri—mga bagay na magigin daing pakinabang durante kan grabeng kasakitan.—Tal. 11:4; Mat. 6:31-33; 1 Juan 2:15-17.

11. Ano an ginibo kan iba tanganing mapaabutan kan maugmang bareta an pinakadakul na tawong posible?

¹¹ Dakul na parahayag an nag-adal nin bagong lengguwahe tangani na magamit ninda iyan sa paghuhulit asin pagtutukdo. Sinusuportaran sinda kan organisasyon nin Diyos paagi sa pagprodusir nin basado sa Bibliyang mga publikasyon sa padakul nin padakul na lengguwahe. Halimbawa, kan 2010, an satong mga literatura makukua sa mga 500 na lengguwahe. Ngunyan, an bilang na iyan uminabot na sa labing 1,000 lengguwahe.

12. Paano nakikinabang an mga tawo pag nadadangog ninda sa kinagimatan nindang lengguwahe an mensahe kan Kahadian? Magtao nin halimbawa.

¹² Ano an epekto sa mga tawo pag nadadangog ninda sa kinagimatan nindang lengguwahe an katotoohan hali sa Tataramon nin Diyos? Pag-isipan an eksperyensiya nin sarong sister na nakinabang sa pag-atender sa sarong pangrehiyon na kumbensiyon sa Memphis, Tennessee, U.S.A. An kumbensiyon na iyan nasa lengguwaheng Kinyarwanda, na panginot nang itinataram sa Rwanda, Congo (Kinshasa), asin Uganda. Pagkatapos kan kumbensiyon, sinabi kan sister na nagtataram nin Kinyarwanda: “Ini an inot na beses na lubos  kong nasabutan an kumbensiyon puon kan magbalyo ako sa Estados Unidos 17 taon na an nakaagi.” Malinaw na napahirong marhay an sister kan madangog niya an kumbensiyon sa kinagimatan niyang lengguwahe. Kun itinutugot kan saimong kamugtakan, puwede ka daw na mag-adal nin ibang lengguwahe tanganing matabangan an nagkapirang tawo sa saindong teritoryo? Mas nakakaengganyar iyan lalo na kun may mga tawo sa teritoryo nindo na mas komportable sa ibang lengguwahe. An saimong paghihinguwa sulit nanggad sa mga aakuon mong balos.

13. Paano ginamit kan satong mga tugang sa Russia an panahon nin katuninungan?

¹³ Bakong gabos sa satong mga tugang may katalingkasan na makapaghulit nin hayagan. Kun minsan, huli sa mga restriksiyon kan gobyerno, nalilimitaran na marhay kun paano ta isinasagibo an satong ministeryo. Halimbawa, pag-isipan an satong mga tugang sa Russia. Pagkatapos nin dakul na taon na persekusyon, tinawan sinda kan gobyerno nin katalingkasan sa pagsamba kan Marso 1991. Kan panahon na iyan, mga 16,000 an parahayag kan Kahadian sa Russia. Pakalihis nin 20 taon, an bilang na iyan uminabot na sa labing 160,000 na parahayag! Malinaw na huminiro nin may kadunungan an satong mga tugang kan nagkaigwa sinda nin oportunidad na maghulit nin may katalingkasan. An panahon na iyan nin katuninungan dai naghaloy. Dawa nagbago an saindang kamugtakan, dai kaiyan nabawasan an saindang kaigutan sa pagpalakop kan dalisay na pagsamba. Padagos sindang naglingkod ki Jehova, na ginagamit an gabos na paaging posible para magibo iyan.

14-15. Paano ipinahiling ni Jehova an saiyang kapangyarihan para tabangan si Asa?

¹⁴ Kan panahon ni Asa, an panahon nin katuninungan natapos man giraray pag-abot nin panahon. Sarong dakulaon na puwersa militar—sarong milyon na suldados—an nag-abot hali sa Etiopia. Tiwala an komandante kaiyan na si Zera na kaya niya asin kan saiyang hukbo na  daugon an Juda. Pero, nagtiwala si Hading Asa, bako sa kun gurano kadakula an saiyang hukbo, kundi sa saiyang Diyos na si Jehova. Namibi si Asa: “Tabangi kami, O Jehova na samuyang Diyos, huli ta sa saimo kami nananarig, asin sa ngaran mo kami napadigdi tanganing labanan an dakulang hukbong ini.”—2 Cron. 14:11, NWT.

¹⁵ Maski ngani haros doble an bilang kan mga suldados kan hukbo nin Etiopia, aram ni Asa na makapangyarihan si Jehova asin kaya Niyang tabangan an Saiyang banwaan. Asin talagang tinabangan sinda ni Jehova; nadaog an hukbo nin Etiopia sa makasusupog na paagi.—2 Cron. 14:8-13.

16. Paano niyato naaraman na matatapos an panahon nin katuninungan?

¹⁶ Dai niyato aram an mga detalye kun ano an mangyayari sa lambang saro sa sato sa maabot na panahon, pero aram ta na magigin temporaryo sana an ano man na panahon nin katuninungan na igwa an mga lingkod nin Diyos. Sa katunayan, ihinula ni Jesus na sa huring mga aldaw, an saiyang mga disipulo “ikakaungis . . . kan gabos na nasyon.” (Mat. 24:9) Kaagid kaiyan, sinabi ni apostol Pablo na “an gabos na nagmamawot na mabuhay na igwa nin debosyon sa Diyos bilang mga parasunod ni Cristo Jesus pepersegiron man.” (2 Tim. 3:12) “Grabe an kaanggutan” ni Satanas, asin pigdadaya ta an satong sadiri kun iisipon ta na malilikayan ta maski paano an kaanggutan niya.—Kap. 12:12.

17. Sa anong mga paagi tibaad mabalo an satong pagtubod?

¹⁷ Sa madali nang panahon, gabos kita mapapaatubang sa mga pagbalo sa satong pagtubod. Dai na mahahaloy, an kinaban makakaeksperyensiya nin “grabeng kasakitan na dai pang kaagid na nangyari puon sa kapinunan kan kinaban sagkod ngunyan.” (Mat. 24:21) Sa panahon na iyan, tibaad mga kapamilya man sana niyato an magin kaiwal ta asin tibaad ipagbawal an satong gibuhon. (Mat. 10:35, 36) Arog ni Asa, magtitiwala ka daw ki Jehova para sa proteksiyon asin tabang?

18. Sigun sa Hebreo 10:38, 39, ano an makakatabang sa sato na makaandam para sa katapusan kan katuninungan?

¹⁸ Inaandam na kita ngunyan ni Jehova tanganing magin makusog an satong pagtubod para sa mga mangyayari sa maabot. Ginigiyahan niya “an maimbod asin mapagmansay na uripon” tanganing tawan kita nin masustansiyang espirituwal na “kakanon sa tamang panahon” para tabangan kitang magdanay na marigon sa satong pagsamba. (Mat. 24:45) Pero dapat na gibuhon niyato  an satong gabos na makakaya tanganing magkaigwa nin dai natatanyog na pagtubod ki Jehova.—Basahon an Hebreo 10:38, 39.

19-20. Pagkatapos basahon an 1 Cronica 28:9, ano an mga dapat niyatong ihapot sa satong sadiri, asin taano?

¹⁹ Arog ni Hading Asa, kaipuhan niyatong ‘hanapon si Jehova.’ (2 Cron. 14:4; 15:1, 2) Pinupunan niyato an paghanap na iyan paagi sa pagmidbid ki Jehova asin pagpabawtismo. Inaaprobetsaran ta an lambang oportunidad para pakusugon an satong pagkamuot ki Jehova. Para maaraman kun nagigibo ta ini, puwede niyatong ihapot sa satong sadiri, ‘Regular daw akong nag-aatender sa mga pagtiripon kan kongregasyon?’ Pag nag-aatender kita sa mga pagtiripon na itinatao kan organisasyon ni Jehova, nakakaeksperyensiya kita nin tunay na espirituwal na kaginhawahan asin nin nakakapakusog na pag-iribanan. (Mat. 11:28) Puwede man niyatong ihapot sa satong sadiri, ‘May marahay daw akong rutina nin personal na pag-adal?’ Kun nakaistar ka kaiba kan saimong pamilya, nagtatagama ka daw nin panahon kada semana para sa pampamilyang pagsamba? Kun solo ka lang, nagtatagama ka pa man daw giraray nin panahon para diyan na garo baga kabtang ka nin sarong pamilya? Saka, ginigibo mo daw an saimong pinakamakakaya sa paghulit asin sa paggibo nin disipulo?

²⁰ Taano ta dapat niyatong ihapot an mga iyan? Sinasabi sato kan Bibliya na sinisiyasat ni Jehova an satong kaisipan asin kun ano an nasa puso ta, kaya dapat na gibuhon ta man iyan. (Basahon an 1 Cronica 28:9.) Kun mahiling ta na may kaipuhan kitang baguhon sa satong mga pasuhan, ugali, o kaisipan, dapat na hagadon niyato an tabang ni Jehova para magibo ta an mga pagbabagong iyan. Ngunyan na an panahon tanganing iandam ta an satong sadiri para sa maabot na mga pagbalo. Dai nanggad pagtugutan an ano man na papunduhon ka na gamiton sa madunong na paagi an panahon nin katuninungan!