1. Pag natiwalag an sarong mahal sa buhay, ano an puwedeng magin epekto kaiyan sa saro?

IGWA ka daw nin mahal sa buhay na natiwalag sa kongregasyon? Makulugon nanggad iyan! “Kan magadan an maimbod kong agom pagkatapos nin 41 taon na pag-ibanan mi,” an sabi kan sister na si Hilda, “paghuna ko iyo na idto an pinakamakulog na maeeksperyensiyahan ko. * Pero kan bayaan kan aki kong lalaki an kongregasyon, su agom niya, saka su mga aki niya, mas makulugon nanggad idto para sako.”

2-3. Uyon sa Salmo 78:40, 41, ano an namamatian ni Jehova pag binayaan siya kan saiyang mga lingkod?

² Isipa na sana kun gurano nanggad nakulgan si Jehova kan talikdan siya kan nagkapirang anghel, na parte kan saiyang pamilya! (Jud. 6) Asin imahinara na sana kun gurano kakulog saiya an pauruutrong pagrebelde kan saiyang namumutan na banwaan, an mga Israelita. (Basahon an Salmo 78:40, 41.) Kaya makakasigurado ka na an satong mamumuton na Ama sa langit nakukulgan man pag binayaan siya kan sarong mahal mo sa buhay. Nasasabutan niya an grabeng kamunduan na namamatian mo. Mapagmalasakit siyang matao saimo kan pampakusog asin suportang kaipuhan mo.

³ Sa artikulong ini, pag-uulayan ta kun ano an mga puwede tang gibuhon para mag-ako kan tabang ni Jehova pag an sarong mahal sa buhay bayaan si Jehova. Sisiyasaton ta man kun paano ta matatabangan an iba sa laog kan kongregasyon na napapaatubang sa arog kaiyan na kadipisilan. Alagad, pag-ulayan ta nguna an sarong negatibong kaisipan na dapat tang likayan.

4. Ano an namamatian kan dakul na magurang pag an saindang aki binayaan si Jehova?

⁴ Pag an sarong aki binayaan si Jehova, natural sana na isipon kan mga magurang kun ano pa kuta an dapat nindang ginibo tanganing natabangan ninda an saindang aki na magdanay sa katotoohan. Kan  matiwalag an aking lalaki kan brother na si Luke, inadmitir niya: “Binasol ko an sadiri ko. Nagkaigwa pa ngani ako nin maraot na mga pangaturugan manungod diyan. Kun minsan, naghihibi ako tapos magabaton sa pagmati.” An sister na si Elizabeth, na natiwalag man an aking lalaki, parating naiisip: “Sain ako napasala bilang ina? Pagmati ko dai ko talaga naitadom sa aki ko an katotoohan.”

5. Siisay an may sála pag an saro binayaan si Jehova?

⁵ Kaipuhan tang tandaan na tinawan ni Jehova an lambang saro sato kan regalong libertad na magdesisyon. Nangangahulugan iyan na puwede kitang pumili kun baga masunod kita saiya o dai. May mga aki na nagdakula na an mga magurang bakong marahay na halimbawa sa sainda, pero pinili nindang maglingkod ki Jehova asin magin maimbod saiya. An ibang mga aki man ginibo kan mga magurang an pinakamakakaya para padakulaon sinda kauyon kan mga prinsipyo sa Kasuratan, pero tinalikdan ninda an katotoohan pag-abot nin panahon. Kaya an kada saro sato dapat na magdesisyon kun baga malingkod kita ki Jehova. (Jos. 24:15) Kun siring, mga nagmumundong magurang, labanan nanggad an tendensiyang isipon na kamo an may sála sa nangyari!

6. Paano puwedeng maapektaran an aki pag an magurang binayaan an Diyos?

⁶ Kun minsan, an magurang an nagbabaya sa katotoohan asin pati pa ngani sa pamilya niya. (Sal. 27:10) Puwede ining makapangluya nin biyo sa mga aki dahil pighihiling ninda siya bilang arugan ninda. Si Esther, na natiwalag an ama, nagsabi: “Parati akong naghihibi ta narealisar ko na dai lang siya basta napaparayo sa katotoohan. Tuyo niyang pinili na bayaan na talaga si Jehova. Namumutan ko si Papa, kaya kan matiwalag siya, pirmi akong nahahadit kun kumusta na siya. Nagka-panic attack pa ngani ako.”

7. Ano an namamatian ni Jehova para sa sarong aki na an magurang natiwalag?

⁷ Mga aki, kun natiwalag an saro sa mga magurang nindo, namumundo kaming marhay para saindo! Magtiwala na aram na aram ni Jehova an kulog na namamatian mo. Namumutan ka niya asin pinapahalagahan niya an kaimbudan mo, asin iyan man an namamatian mi—na mga tugang mo. Tandaan man na bako ika an may sála sa mga desisyon kan mga magurang mo. Arog kan sinambit sa inutan, tinawan ni Jehova nin pagpipilian an lambang tawo. Asin an lambang dusay asin bawtisadong indibidwal dapat na “[magdara] kan sadiri niyang pasan nin responsabilidad.”—Gal. 6:5, nota sa ibaba.

8. Ano an puwedeng gibuhon kan maimbod na mga miyembro kan pamilya mantang hinahalat na bumalik ki Jehova an saindang mahal sa buhay? (Hilingon an kahon na “ Bumalik Ka ki Jehova.”)

⁸ Pag an sarong mahal mo sa buhay binayaan si Jehova, natural sana na maglaom ka na sarong aldaw mabalik siya Saiya. Ano an puwede mong gibuhon mantang hinahalat iyan? Hinguwahon na pakusugon an saimong espirituwalidad. Kun gigibuhon mo iyan, magigin marahay na halimbawa ka sa iba pang miyembro kan pamilya asin tibaad pati pa ngani sa natiwalag. Magkakaigwa ka man kan kinakaipuhan na kusog para makayanan an makulog na mga emosyon. Pag-ulayan ta an nagkapirang praktikal na bagay na magigibo mo.

9. Sa anong mga paagi ka makakakua nin kusog hali ki Jehova? (Hilingon man an kahon na “ Nakakarangang mga Teksto Kun an Mahal Mo sa Buhay Binayaan si Jehova.”)

⁹ Pagdanayon an marahay na rutina sa espirituwal. Mahalagang marhay na padagos mong  pakusugon an sadiri mo saka an iba pang mga miyembro kan pamilya. Paano mo magigibo iyan? Kumua nin kusog hali ki Jehova paagi sa regular na pagbasa kan Tataramon nin Diyos asin paghurop-hurop diyan pati man paagi sa pag-atender sa mga Kristiyanong pagtiripon. Si Joanna, na an ama saka tugang na babayi binayaan an katotoohan, nagsabi: “Nagigin kalmado ako pag binabasa ko an manungod sa mga karakter sa Bibliya arog ni Abigail, Esther, Job, Jose, saka Jesus. An halimbawa ninda nakakatabang sako na magin positibo asin mabawasan an kulog na namamatian ko. Nakakapakusog man na marhay sako an satong orihinal na mga kanta.”

10. Paano makakatabang sato an Salmo 32:6-8 na makayanan an pagkapurisaw?

¹⁰ Sabihon ki Jehova an gabos na ikinakahadit mo. Pag napupurisaw ka, danay na mamibi sa saiya. Makimahirak sa satong mamumuton na Diyos na tabangan kang hilingon an sitwasyon uyon sa pagmansay niya asin na ‘tawan ka nin pakasabot asin tukduan manungod sa dalan na dapat mong lakawan.’ (Basahon an Salmo 32:6-8.) Siyempre, puwedeng magin makulugon para saimo na sabihon ki Jehova an talagang namamatian mo. Pero lubos na nasasabutan ni Jehova an kulog na namamatian mo. Namumutan ka niyang marhay, asin dinadagka ka niya na sabihon saiya an gabos na nasa puso mo.—Exo. 34:6; Sal. 62:7, 8.

11. Uyon sa Hebreo 12:11, taano ta dapat kitang magtiwala sa mamumuton na disiplina ni Jehova? (Hilingon man an kahon na “ Pagtitiwalag—Kapahayagan kan Mamumuton na Disiplina ni Jehova.”)

¹¹ Suportaran an desisyon. An pagtitiwalag parte kan areglo ni Jehova. An mamumuton niyang pagtatanos para sa pinakaikakarahay kan gabos, kaiba na kan nagkasala. (Basahon an Hebreo 12:11.) An ano man na negatibong komento manungod sa kun paano inasikaso kan mga elder an sarong kaso nin pagdidisiplina posibleng marhay na hali sa sarong indibidwal na dai nagtao nin mga detalye na madara nin maraot na impresyon sa nagkasala. Dai ta man talaga aram an gabos na  detalye. Kun siring, madunong na magtiwala na an mga elder na nagsagibo kan hudisyal na aksiyon ginibo an gabos na paghihinguwa na sunudon an mga prinsipyo sa Kasuratan asin na maghusgar “para ki Jehova.”—2 Cron. 19:6.

12. Anong mga pakinabang an naeksperyensiyahan nin nagkapira dahil sinuportaran ninda an areglo ni Jehova sa pagdidisiplina?

¹² Paagi sa pagsuportar sa desisyon kan mga elder na itiwalag an saimong mahal sa buhay, an totoo, tibaad matabangan mo pa ngani siya na bumalik ki Jehova. “Masakiton para samo bilang pamilya na ipundo an pakikiiba-iba sa adulto ming aking lalaki,” an inadmitir ni Elizabeth, na sinambit sa inutan. “Pero kan bumalik na siya ki Jehova, inadmitir niya na tama sanang itiniwalag siya. Sa paglihis nin panahon, ipinahayag kan aki ko na nagpapasalamat siya sa mga nanudan niya. Dahil diyan, napahalagahan ko an disiplina ni Jehova,” an sabi ni Elizabeth. Sinabi man kan agom niyang si Mark: “Kan huri, sinabi sako kan aki mi na an sarong dahilan kaya nagdesisyon siyang bumalik iyo na talagang ginibo mi kun ano an kaipuhan ming gibuhon. Ugmahon ako na tinabangan kami ni Jehova na magin masinunod.”

13. Ano an makakatabang saimo na makayanan an kulog na namamatian mo?

¹³ Sabihon an mga namamatian mo sa mapagsabot na mga amigo. Makiasosyar sa maygurang na mga Kristiyano na makakatabang saimo na magdanay na positibo. (Tal. 12:25; 17:17) Si Joanna, na sinambit kasubago, nagsabi: “Pagmati ko nagsosolo ako. Pero an pakikipag-ulay sa mapagtitiwalaan na mga amigo nakatabang sako na makayanan iyan.” Pero paano kun garo baga may nagkapira sa laog kan kongregasyon na nagsasabi saimo nin mga bagay na mas nakakapagrabe pa lugod sa namamatian mo?

14. Taano ta kaipuhan tang “padagos na pagpasensiyahan an lambang saro asin lubos na patawadon an lambang saro”?

¹⁴ Magin mapasensiya sa mga tugang. Siyempre, dai ta puwedeng asahan na pirming tama an sasabihon kan gabos. (Sant. 3:2) Gabos kita bakong perpekto, kaya dai magngalas kun an nagkapira nasasakitan sa kun ano an sasabihon ninda o makataram pa ngani saimo nin nakakakulog na dai man ninda tinutuyo. Tandaan an sadol ni apostol Pablo: “Padagos na pagpasensiyahan an lambang saro asin lubos na patawadon an lambang saro dawa pa kun an siisay man igwa nin dahilan na ireklamo an saro.” (Col. 3:13) Sarong sister na natiwalag an sarong kapamilya nagsabi: “Tinabangan ako ni Jehova na patawadon an mga tugang na pinurbaran na gibuhon an tama kaso sa bakong marahay na paagi.” Ano an puwedeng gibuhon kan kongregasyon para tabangan an maimbod na mga miyembro nin pamilya?

15. Ano an makakatabang sa mga miyembro kan pamilya na an sarong mahal sa buhay dai pa sana nahahaloy na natiwalag?

¹⁵ Magin mabuot asin mainamigo sa maimbod na mga miyembro kan pamilya. Inadmitir kan sister na si Miriam na nahadit siyang mag-atender sa mga pagtiripon pagkatapos na matiwalag an tugang niyang lalaki. “Natakot ako sa sasabihon kan mga tawo. Pero may marahayon na mga amigo na nakimundo sako asin dai nagtaram  nin ano man na negatibo manungod sa natiwalag kong tugang. Salamat sainda, dai ko namatian na solo ako sa pagmundo ko.” Saro pang sister an nagsabi: “Pagkatapos na matiwalag an aki ming lalaki, nagduruman samo an mga namumutan ming amigo para rangahon kami. Inadmitir kan iba na dai ninda aram an sasabihon. May mga nakihibi sako, tapos an iba man nagtao sako nin nakakapakusog na surat. Nakatabang talagang marhay sako an ginibo ninda!”

16. Paano padagos na makakatao nin suporta an kongregasyon?

¹⁶ Padagos na suportaran an maimbod na mga miyembro nin pamilya. Lalong-lalo nang kaipuhan ninda ngunyan an saimong pagkamuot asin pampakusog nin buot. (Heb. 10:24, 25) Kun minsan, namamatian kan mga kapamilya kan mga natiwalag na garo baga pati sainda habo nang makiasosyar an mga kakongregasyon ninda. Habo ta nanggad na mangyari iyan! An mga aki na an mga magurang binayaan an katotoohan lalo nang nangangaipo nin komendasyon asin pampakusog nin buot. Si Maria, na an agom natiwalag asin binayaan an pamilya, nagsabi: “May mga amigo ako na nagduduman sa harong asin nagluluto nin kakanon tapos tinatabangan ako sa pag-Bible study sa mga aki ko. Nasasabutan ninda an kulog na namamatian ko asin naghihibi sinda kaiba ko. Idinedepensa ninda ako pag may mga nagsasabi nin bakong totoo manungod sako. Pinagian talaga ninda an pagmati ko!”—Roma 12:13, 15.

17. Ano an puwedeng gibuhon kan mga elder para rangahon an mga nagmumundo?

¹⁷ Mga elder, aprobetsaran an gabos na oportunidad na pakusugon an maimbod na mga miyembro nin pamilya. May espesyal kamong paninimbagan na rangahon an mga kapwa parasamba na may mahal sa buhay na binayaan si Jehova. (1 Tes. 5:14) Dulukon sinda para pakusugon bago asin pagkatapos kan Kristiyanong mga pagtiripon. Dalawon sinda asin mamibi kaiba sinda. Partneran sinda sa ministeryo, o imbitaran sinda kun minsan na umiba sa saindong pampamilyang pagsamba. Kaipuhan na ipahiling kan espirituwal na mga pastor sa nagmumundong mga karnero ni Jehova an pagmalasakit, pagkamuot, asin atensiyon na kaipuhan ninda.—1 Tes. 2:7, 8.

18. Uyon sa 2 Pedro 3:9, ano an gusto nin Diyos para sa mga nagkasala?

¹⁸ “Habo [ni Jehova na] malaglag an siisay man, imbes, gusto niya na an gabos makapagsulsol.” (Basahon an 2 Pedro 3:9.) Dawa makagibo nin magabat na kasalan an saro, mahalagang marhay pa man giraray sa Diyos an saiyang buhay. Pag-isipan an dakulang halaga na ibinayad ni Jehova—an atang na pantubos kan saiya mismong namumutan na Aki—para sa buhay kan mga parakasala. Mapagmalasakit na hinihinguwa ni Jehova na tabangan sinda na bumalik saiya. Naglalaom siya na pipilion nindang gibuhon iyan, arog kan mahihiling ta sa ilustrasyon ni Jesus manungod sa aking naparaot an buhay. (Luc. 15:11-32) Dakul na nagbaya sa katotoohan an nagbalik pag-abot nin panahon sa saindang mamumuton na Ama sa langit. Asin maugma nanggad sindang inako kan kongregasyon. Si Elizabeth, na sinambit sa inutan, naeksperyensiyahan an kaugmahan na mahiling na nakabalik sa kongregasyon an saiyang aking lalaki. Manungod sa nangyari kaidto, sinabi niya, “Nagpapasalamat talaga ako sa mga nagpakusog samo na dai mawaran nin paglaom.”

19. Taano ta padagos kitang makakapagtiwala ki Jehova?

¹⁹ Pirmi kitang makakapagtiwala ki Jehova. Nungka niya kitang tatawan nin paggiya na makakadanyar sato. Saro siyang matinao asin mapagmalasakit na Ama na namumutan na marhay an gabos na namumuot asin nagsasamba saiya. Makakasigurado ka na dai ka babayaan ni Jehova sa panahon kan saimong grabeng kamunduan. (Heb. 13:5, 6) “Nungka kaming binayaan ni Jehova,” an sinabi ni Mark, na sinambit kasubago. “Pirmi siyang yaon para sato pag nag-aagi kita nin mga kadipisilan.” Padagos kang tatawan ni Jehova kan “puwersa na urog kisa sa ordinaryo.” (2 Cor. 4:7) Iyo, magigibo mong magdanay na maimbod asin dai nawawaran nin paglaom pag an saro mong mahal sa buhay binayaan si Jehova.