1. Ano an puwedeng magin praktikal na pasuhan niyato mantang nagkakaedad kita?

MANTANG nagkakaedad kita, tibaad ikahadit niyato na an magigibo ta ngunyan para ki Jehova bako nang arog kan dati. Totoo na bako na kitang arog kakusog kan dati, pero magagamit niyato an kadunungan asin eksperyensiya na nakamtan ta para tabangan an mga hoben na maipahiling an bilog nindang potensiyal asin magsaabaga nin bagong mga responsabilidad. Sinabi nin sarong haloy nang elder, “Kan namamatian ko na an mga limitasyon huli sa paggurang, nagpasalamat ako na igwa nin kuwalipikadong hoben na mga brother na andam para gibuhon an trabaho.”

2. Ano an pag-uulayan ta sa artikulong ini?

² Pinag-ulayan sa sinundan na artikulo kun paano nakikinabang an mga hoben pag nakikipag-amigo sinda sa mga may edad na. Sa artikulong ini, aaramon ta kun paano an mga kuwalidad na kapakumbabaan, kababaan nin buot, pagigin mapagpasalamat, asin pagigin bukas-palad makakatabang sa mga may edad na na magtrabahong kaiba nin mga hoben na minaresulta sa bendisyon para sa bilog na kongregasyon.

3. Sigun sa Filipos 2:3, 4, ano an kapakumbabaan, asin paano iyan makakatabang sa sarong Kristiyano?

³ Kaipuhan kan mga may edad na magin mapakumbaba kun gusto nindang tabangan an mga hoben. An tawong mapakumbaba minamansay an iba na mas urog kisa saiya. (Basahon an Filipos 2:3, 4.) Nasasabutan kan mga may edad na na nagpapahiling kan mga kuwalidad na ini na an sarong asignasyon puwedeng gibuhon sa manlain-lain na paagi pero epektibo pa man giraray asin kauyon kan Kasuratan. Kaya dai ninda inaasahan na aarugon kan iba  an paagi ninda nin paggibo kaidto nin mga bagay-bagay. (Ecl. 7:10) Bagaman igwa sindang dakul na magagayon na eksperyensiya na maihihiras sa mga hoben, aram ninda na “an eksena sa kinaban na ini nagbabago” asin na tibaad kaipuhan nindang makibagay sa bagong mga kamugtakan.—1 Cor. 7:31.

4. Paano ipinapahiling kan mga paraataman nin sirkito an sabuot na kapareho kan sa mga Levita?

⁴ Inaako kan mapakumbabang mga may edad na na mantang nagkakaedad sinda, dai na ninda magigibo an arog kan dati nindang nagigibo. Halimbawa, isip-isipa an satong mga paraataman nin sirkito. Pag mag-70 anyos na sinda, iniimbitaran sinda na akuon an iba na man na asignasyon. Tibaad dipisil iyan. Pinapahalagahan nindang marhay an pribilehiyong maglingkod sa mga tugang ninda. Gustong-gusto ninda an asignasyon na iyan, asin yaon pa man giraray an pagmawot ninda na gamiton sinda sa arog kaiyan na paagi. Pero nasasabutan ninda na mas marahay na itao sa mas hoben na mga brother an asignasyon na iyan. Sa siring, ipinapahiling ninda an sabuot na kapareho kan mga Levita sa suanoy na Israel na pag nag-50 anyos na, kaipuhan na nindang magpundo sa saindang paglilingkod sa tabernakulo. An kaugmahan kan mga may edad nang Levitang idto dai nakadepende sa sarong partikular na pribilehiyo. Lubos nindang inaaprobetsaran an mga pribilehiyong bukas sa sainda, na ginigibo an saindang pinakamakakaya tanganing tabangan an mga hoben. (Bil. 8:25, 26) Ngunyan, an dating mga paraataman nin sirkito, dawa dai na naglilingkod sa dakul na kongregasyon, talagang sarong bendisyon sa kongregasyon ninda.

5. Ano an nanudan mo sa halimbawa ni Dan asin ni Katie?

 ⁵ Pag-isipan an halimbawa ni Dan, na naglingkod bilang paraataman nin sirkito sa laog nin 23 na taon. Kan 70 anyos na si Dan, siya asin an agom niyang si Katie, inasignaran na magin espesyal payunir. Paano sinda nag-adjust sa saindang bagong kamugtakan? Sinabi ni Dan na mas sibot siyang marhay ngunyan! Inaasikaso niya an saiyang mga responsabilidad sa kongregasyon, tinatabangan niya an mga brother na makuwalipikar bilang mga ministeryal na lingkod, asin sinasanay an iba na makikabtang sa pagpapatotoo sa darakulang siyudad saka sa mga presuhan. Mga may edad na, kamo man nasa bilog na panahon na paglilingkod o dai, dakul kamong magigibo para tabangan an iba. Paano? Makibagay sa bago nindong kamugtakan, magkaigwa nin bagong mga pasuhan, asin magpokus sa magigibo nindo imbes na sa dai nindo magigibo.

6. Taano ta madunong na magin hababa an buot? Iilustrar.

⁶ An tawong hababa an buot inaako na may mga limitasyon siya. (Tal. 11:2) Huli sa kababaan nin buot, dai siya nag-aasa na magibo an mga bagay nin labi pa sa makakaya niya. Huli kaiyan, magdadanay siyang maugma asin produktibo. An tawong hababa an buot puwede tang ikumparar sa saro na nagmamaneho nin behikulo sa sarong patukad na lugar. Kaipuhan kan drayber na ilipat sa mas hababang kambiyo an saiyang behikulo tanganing dagos-dagos siyang makatukad. Iyo, tibaad magluya an saiyang dalagan, pero dagos-dagos siyang maabante. Kaagid kaiyan, aram kan tawong hababa an buot kun nuarin siya malipat sa mas hababang kambiyo, sabi ngani, tanganing padagos na magin aktibo asin produktibo sa paglilingkod ki Jehova.—Fil. 4:5.

7. Paano ipinahiling ni Barzilai an kababaan nin buot?

⁷ Isip-isipa an halimbawa ni Barzilai na 80 anyos kaidto kan imbitaran ni Hading David na magin saro sa mga opisyal kan palasyo. Sinayumahan kan hababa an buot na si Barzilai an alok kan hadi. Huling aram niya an mga limitasyon niya huli sa saiyang edad, irinekomendar ni Barzilai na an hoben na sanang si Kimham an iiba. (2 Sam. 19:35-37) Arog ni Barzilai, maugma an may edad nang mga lalaki na itao sa hoben na mga lalaki an oportunidad na maglingkod.

8. Paano nagpahiling si Hading David nin kababaan nin buot kun manungod sa pagtugdok kan templo?

⁸ Nagpahiling man si Hading David nin marahayon na halimbawa nin kababaan nin buot. Gustong-gusto niyang magtugdok nin harong para ki Jehova. Pero kan sabihon sa saiya ni Jehova na an pribilehiyong ini itatao sa hoben na si Solomon, inako ni David an desisyon ni Jehova asin bilog na puso niyang sinuportaran an proyekto. (1 Cron. 17:4; 22:5) Dai inisip ni David na mas kuwalipikado siya para sa asignasyon na iyan ta si Solomon “hoben pa asin dai pang eksperyensiya.” (1 Cron. 29:1) Aram ni David na an kapangganahan kan proyekto nin pagtugdok nakadepende sa bendisyon ni Jehova bako sa edad o sa eksperyensiya kan mga nanginginot. Bilang pag-arog ki David, an mga may edad na ngunyan nagdadanay na aktibo dawa nagbago na an saindang asignasyon. Asin aram ninda na bebendisyunan ni Jehova an mga hoben na nagsasagibo kan dating gibuhon ninda.

9. Paano nagpahiling nin kababaan nin buot an sarong miyembro nin Komite kan Sangay?

⁹ An sarong halimbawa nin kababaan nin buot sa presenteng panahon iyo an brother na si Shigeo. Kan 1976, sa edad na 30, ninombrahan siya na magin miyembro nin Komite kan Sangay. Kan 2004, nagin koordineytor siya kan Komite kan Sangay. Pag-abot nin panahon, narealisar niya na bako na siyang arog kakusog kan dati saka bako na siyang arog karikas kan dati sa paggibo kan saiyang trabaho. Ipinamibi niya asin pinag-isipan na marhay an mga pakinabang kun sarong mas hoben na brother an magigin koordineytor.  Dawa bako nang si Shigeo an koordineytor, padagos pa man giraray siyang naglilingkod bilang mapagsuportar na miyembro kan Komite kan Sangay. Arog kan nahiling ta sa mga halimbawa ni Barzilai, Hading David, asin Shigeo, an tawong mapakumbaba asin hababa an buot mapokus bako sa pagigin daing eksperyensiya kan mga hoben kundi sa saindang kakusugan. Mamansayon niya sinda bako bilang mga kakumpetensiya kundi bilang mga kapwa trabahador.—Tal. 20:29.

10. Ano an pagmansay kan mga may edad na sa mga hoben sa kongregasyon?

¹⁰ Minamansay kan mga may edad na an mga hoben bilang mga regalo hali ki Jehova asin huli diyan, nagigin mapagpasalamat sinda. Mantang nagluluya na sinda, nagpapasalamat an mga may edad na ta igwa nin makukusog na hoben na andam saka may kakayahan para gibuhon an paglilingkod sa kongregasyon.

11. Ano an sinasabi kan Ruth 4:13-16 manungod sa mga bendisyon na puwedeng kamtan huli sa mapagpasalamat na pag-ako nin tabang hali sa mga hoben?

¹¹ An karakter sa Bibliya na si Noemi sarong marahayon na halimbawa nin sarong may edad na na mapagpasalamat na inako an tabang nin sarong hoben. Kan inot, sinabihan ni Noemi an saiyang balong manugang na si Ruth na magbalik sa saiyang sadiring banwaan. Pero kan magpirit si Ruth na ibanan si Noemi pabalik sa Betlehem, maugmang inako ni Noemi an tabang ni Ruth. (Ruth 1:7, 8, 18) Asin sarong bendisyon nanggad iyan para sa duwang babayi! (Basahon an Ruth 4:13-16.) An kapakumbabaan mapahiro sa mga may edad na na arugon an halimbawa ni Noemi.

12. Paano ipinahiling ni apostol Pablo an saiyang pasasalamat?

¹² Si apostol Pablo nagin mapagpasalamat sa tabang na inako niya. Halimbawa, nagpasalamat siya sa mga Kristiyano sa Filipos huli sa materyal na mga regalo na ipinadara ninda sa saiya. (Fil.  4:16) Nagpasalamat man siya para sa tabang na itinao sa saiya ni Timoteo. (Fil. 2:19-22) Asin nagpasalamat si Pablo sa Diyos para duman sa mga nag-arabot tanganing pakusugon siya kan dinadara siya pasiring sa Roma bilang sarong preso. (Gibo 28:15) Si Pablo sarong maigot na tawo na nagbiyahe nin rinibong kilometro para maghulit asin pakusugon an mga kongregasyon. Pero mapakumbaba niyang inako an suporta kan mga tugang.

13. Paano maipapahiling kan mga may edad na an saindang pasasalamat sa mga hoben?

¹³ Mga may edad na, maipapahiling nindo sa dakul na paagi an saindong pasasalamat para sa mga hoben sa saindong kongregasyon. Kun gusto nindang tabangan kamo sa transportasyon, pamamakal, o iba pang mga pangangaipo, mapagpasalamat na akuon an saindang tabang. Mansayon an arog kaiyan na tabang bilang kapahayagan kan pagkamuot ni Jehova. Tibaad huli kaiyan magin dayupot nindong amigo an mga nagtabang sa saindo. Pirming magpahiling nin interes sa espirituwal na pag-uswag kan hoben na mga amigo nindo, asin sabihon sa sainda kun gurano kamo kaugma na mahiling sinda na naghihinguwang urog na makatabang sa kongregasyon. Asin magin andam na magtao nin panahon para iistorya sa sainda an saindong mga eksperyensiya. Pag ginibo nindo iyan, ‘maipapahiling nindo na mapagpasalamat kamo’ ki Jehova para sa mga hoben na irinani niya sa kongregasyon.—Col. 3:15; Juan 6:44; 1 Tes. 5:18.

14. Paano ipinahiling ni Hading David an saiyang pagigin bukas-palad?

¹⁴ Mahihiling ta sa halimbawa ni Hading David an saro pang mahalagang marhay na kuwalidad na kaipuhan na ipahiling kan mga may edad na—an pagigin bukas-palad. Nagtao siya nin dakul na donasyon hali sa saiyang sadiring kayamanan para suportaran an pagtugdok kan templo. (1 Cron. 22:11-16; 29:3, 4) Ginibo niya ini dawa ngani an kredito para sa proyekto mapapaduman sa saiyang aking si Solomon. Pag mayo na kita nin pisikal na kusog para makikabtang sa teokratikong mga proyekto sa pagtugdok, makakasuportar pa man giraray kita sa mga proyektong ini paagi sa pagdonar nin kuwarta na kaya tang itao. Asin matatabangan niyato an mga hoben na makinabang sa mga nagin eksperyensiya niyato sa nag-aging mga taon.

15. Anong mahalagang mga regalo an itinao ni apostol Pablo ki Timoteo?

¹⁵ Mapadapit sa pagigin bukas-palad, pag-isipan an halimbawa na ipinahiling ni apostol Pablo. Inimbitaran niya si Timoteo na ibanan siya sa gibuhon na pagmimisyonero, asin lubos na itinukdo ni Pablo sa hoben na ini an saiyang mga pamamaagi sa paghuhulit asin pagtutukdo. (Gibo 16:1-3) Nakatabang ki Timoteo an pagsasanay sa saiya ni Pablo na magin epektibo sa pagpalakop kan maugmang bareta. (1 Cor. 4:17) Dangan, ginamit man ni Timoteo an mga pamamaagi ni Pablo para sanayon an iba.

16. Taano ta sinanay ni Shigeo an iba?

¹⁶ An mga may edad na ngunyan dai nahahadit na dai na sinda magigin kapaki-pakinabang kun sasanayon ninda an mga hoben na gibuhon an mga dati nindang ginigibo sa kongregasyon. Halimbawa, sa nag-aging mga taon, si Shigeo na sinambit kasubago, nagtao nin praktikal na pagsasanay sa mas hoben na mga miyembro kan Komite kan Sangay. Ginibo niya ini tanganing makatabang sa gibuhon na pang-Kahadian sa nasyon kun sain siya naglilingkod. Bilang resulta, kan mag-abot an panahon na dai na siya makakapaglingkod bilang koordineytor, sarong sinanay na marhay na brother an andam na magsalida sa saiya. Padagos pa man giraray na ihinihiras ni Shigeo sa mas hoben na mga brother an saiyang labing 45 taon na eksperyensiya bilang miyembro kan Komite kan Sangay. Sarong bendisyon nanggad sa banwaan nin Diyos an mga arog ninda!

17. Kauyon kan sinasabi sa Lucas 6:38, ano an maitatao sa iba kan mga may edad na?

 ¹⁷ Kamo na mga may edad nang brother asin sister buhay na patotoo na an paglilingkod ki Jehova na may pagtubod asin integridad iyo an pinakamarahay na paagi nin pamumuhay. Paagi sa saindong halimbawa, ipinapahiling nindo na sulit na manudan an mga prinsipyo sa Bibliya saka iaplikar iyan sa saindong buhay. Aram nindo base sa saindong eksperyensiya kun paano ginigibo an mga bagay-bagay kaidto, pero nahihiling man nindo an pangangaipo na makibagay sa nagbabagong mga kamugtakan. Kamo na mga may edad na na dai pa sana nahahaloy mabawtismuhan, dakul man an saindong maitatao; puwede nindong sabihon sa iba an kaugmahan na namidbid nindo si Jehova ngunyan na may edad na kamo. Ikakaugma kan mga hoben na madangog an saindong mga eksperyensiya asin an mga leksiyon na nanudan nindo. Kun ‘uugalion nindo an pagtao’ hali sa natipon nindong eksperyensiya, abunda kamong bebendisyunan ni Jehova.—Basahon an Lucas 6:38.

18. Paano matatabangan kan mga may edad na asin mga hoben an kada saro?

¹⁸ Kamo na mga may edad na, mantang mas nagigin harani kamo sa mga hoben, magigibo nindong suportaran an kada saro. (Roma 1:12) An lambang saro igwa nin kapaki-pakinabang na bagay na mayo sa iba. An mga may edad na igwa kan kadunungan asin eksperyensiya na nakamtan ninda sa pag-agi nin panahon. An mga hoben igwa kan kakusugan. Pag an mga hoben saka an mga may edad na nagtitinarabangan bilang mag-aramigo, nagtatao sinda nin kaumawan sa satong mamumuton na Ama sa langit saka bendisyon sinda sa gabos na nasa kongregasyon.