1-2. (a) Sigun sa Talinhaga 16:31, ano an dapat na magin pagmansay ta sa maimbod na mga may edad na? (b) Anong mga hapot an sisimbagon niyato sa artikulong ini?

AN MGA nagbibisita sa sarong state park sa Arkansas, U.S.A., puwedeng makahiling nin mga diyamante sa ibabaw kan daga. Pero an mga diyamanteng iyan dai pa natatabas asin dai pa napapakintab. Kaya, linalampasan lang iyan kan dakul sa mga nakakahiling kaiyan huling dai ninda aram na mga diyamante palan iyan.

² Sa nagkapirang paagi, an satong maimbod na mga may edad na siring sa mga diyamanteng iyan; mahalagang marhay sindang kayamanan. Sa Tataramon nin Diyos, an uban kan mga may edad na iinaagid sa sarong korona. (Basahon an Talinhaga 16:31; 20:29) Alagad, madali lang na dai mariparo an mga kayamanan na ini. An mga hoben na nasasabutan an halaga kan mga may edad na puwedeng makakua nin mas kapaki-pakinabang na bagay kisa sa literal na mga kayamanan. Sa artikulong ini, sisimbagon niyato an tulong hapot: Taano ta minamansay ni Jehova na kayamanan an maimbod na mga may edad na? Ano an lugar kan mga may edad na sa organisasyon ni Jehova? Ano an magigibo ta para lubos kitang makinabang sa saindang halimbawa?

3. Kauyon kan sinasabi sa Salmo 92:12-15, taano ta mahalagang marhay ki Jehova an maimbod na mga may edad na?

³ An maimbod na mga may edad na mahalagang marhay sa Diyos na Jehova. Hinihiling niya sinda sa kun ano talaga sinda sa saindang panglaog, asin aram niya saka pinapahalagahan niya an saindang magayunon na mga kuwalidad. Nauugma siya kun ihinihiras kan mga may edad na sa mga hoben an kadunungan na nakua  ninda sa dakul na taon nin maimbod na paglilingkod ninda. (Job 12:12; Tal. 1:1-4) Pinapahalagahan man ni Jehova an saindang pakatagal. (Mal. 3:16) Nagkaigwa man sinda nin mga problema; pero an saindang pagtubod ki Jehova dai lamang nagluya. An saindang paglaom para sa maabot na panahon mas maliwanag kisa kan inot nindang maaraman an katotoohan. Asin namumutan sinda ni Jehova huling padagos nindang ipinapahayag an saiyang pangaran “dawa sa saindang paggurang.”—Basahon an Salmo 92:12-15.

4. Ano an mga makakapakusog sa buot kan satong may edad nang mga tugang?

⁴ Kun nagkakaedad ka na, makakasigurado ka na ginigirumdom ni Jehova an mga ginibo mo kan nakaagi. (Heb. 6:10) Maigot mong sinuportaran an gibuhon na paghuhulit asin ikinakaugma iyan kan satong Ama sa langit. Tinagalan mo an mga pagbalo—dawa idtong mga makamumundong marhay—sinunod an matanos na mga pamantayan kan Bibliya, isinaabaga an magabat na mga responsabilidad, asin sinanay an iba. Ginibo mo an saimong pinakamakakaya para makasabay sa marikas na naghihiro na organisasyon ni Jehova. Sinuportaran mo asin pinakusog an iba na nasa bilog na panahon na ministeryo. Namumutan kang marhay kan Diyos na Jehova huli kan saimong kaimbudan. Nanunuga siya na “dai niya babayaan an mga maimbod sa saiya”! (Sal. 37:28) Sinisigurado niya sa saimo: “Sagkod na magin ubanon kamo, padagos ko kamong papasanon.” (Isa. 46:4) Kaya, dai pag-isipon na huling nagkakaedad ka na, mayo ka nang mahalagang papel sa organisasyon ni Jehova. Mahalaga kang marhay!

5. Ano an dapat tandaan kan mga may edad na?

⁵ Dakul pa an magigibo kan mga may edad na. Dawa ngani an kusog ninda tibaad bako nang arog kan dati, nagkaigwa sinda nin dakulon na eksperyensiya sa nag-aging mga taon. Padagos sindang magagamit ni Jehova sa manlain-lain na paagi arog kan ipinapahiling kan minasunod na mga halimbawa kan suanoy asin sa presenteng panahon.

6-7. Magtao nin mga halimbawa sa Bibliya nin mga may edad na na nag-ako nin mga bendisyon nin huli sa saindang maimbod na paglilingkod.

⁶ Sa Bibliya, makakahiling kita nin marahay na mga halimbawa nin mga maimbod na aktibong naglingkod ki Jehova dawa gurang na sinda.  Halimbawa, mga 80 anyos kaidto si Moises kan siya magpuon na maglingkod bilang propeta asin representante ni Jehova para sa nasyon nin Israel. Kan an propetang si Daniel mga labing 90 anyos na, ginagamit pa man giraray siya ni Jehova bilang Saiyang tagapagtaram. Asin si apostol Juan posibleng mga labing 90 anyos man kan siya pinasabngan na isurat an libro nin Kapahayagan.

⁷ Dakul na iba pang mga maimbod an bakong prominente o dai midbid, asin madali lang kutana sindang mababaliwala kan mga tawo kaidto. Pero, tinawan sinda nin atensiyon ni Jehova asin binalusan an saindang kaimbudan. Halimbawa, halipot sana an pagkasambit kan Bibliya manungod sa “matanos saka maki-Diyos” na lalaking si Simeon, pero midbid siya ni Jehova asin tinawan siya kan pribilehiyo na mahiling an umboy na si Jesus asin na magpropesiya manungod sa aki asin sa saiyang ina. (Luc. 2:22, 25-35) Isip-isipon man an balong propetisa na si Ana. Dawa 84 anyos na siya, “dai siya nagpapalta sa templo.” Huli sa saiyang regular na pagduman sa templo, binendisyunan siya ni Jehova—nahiling niya man an umboy na si Jesus. Si Simeon asin si Ana parehong mahalagang marhay ki Jehova.—Luc. 2:36-38.

8-9. Ano an padagos na magigibo kan mga balo?

⁸ Sa presenteng panahon, dakul na maimbod na mga may edad na an marahayon na mga halimbawa para sa mga hoben. Pag-isipan an eksperyensiya ni Sister Lois Didur. Beynte uno anyos sana siya kan siya magpuon na maglingkod bilang espesyal payunir sa Canada. Pagkatapos, siya asin an saiyang agom na si John, dakul na taon na naglingkod sa pansirkitong gibuhon. Pag-abot nin panahon, naglingkod sinda sa Bethel sa Canada sa laog nin labing 20 taon. Kan si Lois 58 anyos na, siya saka si John inimbitaran para sa sarong asignasyon sa Ukraine. Ano an gigibuhon ninda? Iisipon daw ninda na gurangon na sinda para maglingkod sa ibang nasyon? Inako ninda an asignasyon, asin si John ninombrahan na magin miyembro kan Komite kan Sangay duman. Pakalihis nin pitong taon pagkagadan ni John, nagdesisyon si Lois na magdanay sa saiyang asignasyon. Ngunyan 81 anyos na si Lois, pero maimbod pa man giraray siyang naglilingkod ki Jehova kaibanan kan pamilyang Bethel sa Ukraine asin namumutan ninda siyang marhay.

⁹ An mga balong arog ni Lois tibaad dai nang gayo mariparo kumpara kan panahon na buhay pa an saindang agom; dawa siring, an pagigin balo ninda dai nakakabawas sa saindang halaga. Pinapahalagahan na marhay ni Jehova an mga sister na sinuportaran an saindang agom sa laog nin dakul na taon asin padagos na ipinapahiling ngunyan an arog kaiyan na karigunan. (1 Tim. 5:3) Apuwera kaiyan, napapakusog man ninda an mga hoben.

10. Anong marahayon na halimbawa an ipinahiling ni Tony?

¹⁰ An dakul na maimbod na mga may edad na nakaistar sa mga pasilidad na nag-aataman sa mga may edad na mahalagang marhay man. Halimbawa, an brother na si Tony nakaistar ngunyan sa arog kaiyan na pasilidad. Nabawtismuhan  siya sa Pennsylvania, U.S.A., kan Agosto 1942 sa edad na 20. Napaatubang tulos siya sa isyu nin neutralidad asin huli kaiyan, duwa may kabangang taon siyang napreso. Siya asin an saiyang agom na si Hilda, pinadakula sa katotoohan an saindang duwang aki. Sa laog nin dakul na taon, naglingkod si Tony sa tulong kongregasyon bilang nanginginot na paraataman (ngunyan inaapod na koordineytor kan grupo nin kamagurangan) asin bilang circuit assembly overseer. Nagkondukta siya nin mga pagtiripon asin mga pag-adal sa Bibliya sa sarong state prison. Sa edad na 98, padagos pa man giraray na naglilingkod si Tony. Padagos niyang ginigibo an saiyang pinakamakakaya para paglingkudan si Jehova kaiba kan mga tugang sa saiyang kongregasyon!

11. Paano ta maipapahiling na pinapahalagahan ta an mga nakaistar sa mga pasilidad na nag-aataman sa mga may edad na?

¹¹ Paano kita makakapahiling nin onra sa mga may edad nang nakaistar sa mga pasilidad na nag-aataman sa mga may edad na? Puwede sindang iiba kan mga elder sa mga aktibidad kan kongregasyon sagkod na posible. Puwede ta sindang tawan nin atensiyon paagi sa pagbisita sa sainda o pag-video call sa sainda. Gusto tang tawan nin espesyal na atensiyon an mga may edad nang tibaad nakaistar sa sarong pasilidad na harayo sa saindang kongregasyon. Kun dai kita magigin alisto, puwede ta sindang mabaliwala. Para sa nagkapira sa sainda, tibaad bakong madali o bakong angay na mag-istorya sinda manungod sa sadiri ninda. Pero makikinabang kitang marhay kun tatawan ta nin panahon na paistoryahon sinda asin magdangog sa sainda mantang iniistorya ninda an manungod sa kaugmahan na namatian ninda sa organisasyon ni Jehova.

12. Sa satong kongregasyon, makakasumpong kita nin anong klaseng mga tugang?

¹² Tibaad magngalas kita kun maaraman ta an pambihirang mga halimbawa kan maimbod na mga may edad na sa satuyang kongregasyon. An sister na si Harriette maimbod na naglingkod ki Jehova sa laog nin mga dekada sa saiyang kongregasyon sa New Jersey, U.S.A. Dangan naghali siya tanganing mag-istar kaiba kan saiyang aking babayi. An mga tugang sa bago niyang kongregasyon nagtao nin panahon tanganing mamidbid siya, asin may nadiskubre sindang sarong kayamanan. Napakusog niya sinda kan iistorya niya an manungod sa saiyang paglilingkod sa langtad kan inot niyang manudan an katotoohan kan dekada nin 1920. Kan panahon na idto, pirmi siyang nagdadara nin sipilyo pag naghuhulit siya—enkaso maaresto siya. Sa katunayan, kan 1933 duwang beses siyang napreso nin sarong semana. Sa mga pagkakataon na idto, an bakong Saksi niyang agom na mapagsuportar sa saiya iyo an nag-asikaso sa tulo nindang saradit pang mga aki. Tunay nanggad, an maimbod na mga may edad na arog ni Harriette dapat sanang pahalagahan na marhay!

13. Ano an nanudan ta manungod sa papel kan mga may edad na sa organisasyon ni Jehova?

¹³ An may edad nang mga tugang niyatong lalaki asin babayi igwa nin importanteng papel sa organisasyon ni Jehova. Nahiling ninda kun paano binendisyunan ni Jehova sa dakul na manlain-lain na paagi an saiyang organisasyon asin pati man sinda. Nakanuod sinda nin mahalagang mga leksiyon sa mga sala na nagibo ninda. Mansayon sinda bilang sarong “burabod nin kadunungan,” asin makanuod sa saindang eksperyensiya. (Tal. 18:4) Kun tatawan mo nin panahon na mamidbid sinda, mapapakusog nanggad an saimong pagtubod asin dakul kang manunudan!

14. Ano an dinadagka kan Deuteronomio 32:7 na gibuhon kan mga hoben?

¹⁴ Gumibo nin paagi para makaulay an mga may edad na. (Basahon an Deuteronomio 32:7.) Totoo, tibaad maluya na an saindang paghiling, tibaad bako na sinda maliksing humiro, asin tibaad maluway na sindang magtaram, pero  pagmati ninda garo baga dai sinda naggugurang, asin nakagibo sinda nin “marahay na pangaran” ki Jehova. (Ecl. 7:1) Girumdumon kun taano ta mahalagang marhay sinda ki Jehova. Padagos na tawan sinda nin onra. Arugon si Eliseo. Desidido siyang dai bayaan si Elias kaidtong ultimong aldaw na magkaibanan sinda. Tulong beses na sinabi ni Eliseo: “Dai taka babayaan.”—2 Ha. 2:2, 4, 6.

15. Ano an mga puwede niyatong ihapot sa mga may edad na?

¹⁵ Magpahiling nin tunay na interes sa mga may edad na paagi sa mabuot na pagdagka sa sainda na mag-istorya. (Tal. 1:5; 20:5; 1 Tim. 5:1, 2) Haputon sinda: “Kan hoben pa kamo, ano an nakakumbinsir saindo na nanumpungan na nindo an katotoohan?” “Paano nakatabang an saindong mga eksperyensiya na magin mas harani ki Jehova?” “Ano an nagin sekreto nindo para magdanay na maugma sa paglilingkod ki Jehova?” (1 Tim. 6:6-8) Dangan, magdangog mantang nag-iistorya sinda.

16. Pag nag-uulay an sarong may edad na saka an sarong hoben, paano sinda parehong nakikinabang?

¹⁶ Pag nag-uulay an sarong may edad na saka an sarong hoben, pareho sindang nakikinabang. (Roma 1:12) Mas maaapresyar kan mga hoben an paagi nin pag-ataman ni Jehova sa saiyang maimbod na mga lingkod asin mamamati kan may edad na na namumutan siya. Mauugma siyang iistorya sa saimo kun paano siya binendisyunan ni Jehova.

17. Taano ta masasabi niyato na an satong maimbod na mga may edad na nagigin mas magayon sa pag-agi nin mga taon?

¹⁷ An pisikal na kagayunan sa parati nawawara man sana mantang naggugurang, pero para ki Jehova an mga maimbod sa saiya nagigin mas magayon sa kada taon na minaagi. (1 Tes. 1:2, 3) Taano man? Huling sa paglihis nin mga taon, tinugutan ninda an espiritu nin Diyos na moldehon asin dalisayon sinda. Mantang mas namimidbid niyato an satong mahalagang marhay na mga may edad nang tugang, tinatawan sinda nin onra, asin nakakanuod sa sainda, mas mamansayon man niyato sinda bilang mga kayamanan na daing kaagid an halaga!

18. Ano an pag-uulayan ta sa masunod na artikulo?

¹⁸ An kongregasyon nagigin mas makusog bako sana pag pinapahalagahan kan mga hoben an mga may edad na kundi pag pinapahalagahan man kan mga may edad na an mga hoben. Sa masunod na artikulo, pag-uulayan niyato kun paano maipapahiling kan mga may edad na na pinapahalagahan nindang marhay an mga hoben sa kongregasyon.