1-2. Anong simbolikong pagyugyog an ihinula na mangyayari sa panahon ta?

“SA LAOG sana nin pirang minuto, nagpuon na magbaragsakan an mga shop saka lumang mga edipisyo na garo mga baraha.” “Nagkakatararanta an gabos . . . Dakul an nagsabi na naghaloy iyan nin mga duwang minuto. Para sako, garo baga haluyon iyan.” Iyan an mga nagin komento kan nagkapirang nakaligtas sa linog na tuminama sa Nepal kan 2015. Kun makaeksperyensiya ka nin arog kaiyan na nakaka-traumang pangyayari, dai mo tulos iyan malilingawan.

² Minsan siring, ngunyan mismo, nakakaeksperyensiya kita nin kakaibang pagyugyog, sarong pagyugyog na bako lang sarong siyudad o nasyon an kalabot. Imbes, kalabot diyan an gabos na nasyon, asin nangyayari iyan sa laog na nin dakul na dekada. An pagyugyog na ini ihinula kan propetang si Hageo. Isinurat niya: “Ini an sabi ni Jehova na pamayo nin mga hukbo, ‘Saro pang beses—sa dai na mahahaloy—asin yuyugyugon ko an kalangitan asin an daga saka an dagat pati an marang kadagaan.’”—Hag. 2:6.

3. Sa anong paagi na an simbolikong pagyugyog na ini bakong kapareho kan ano man na literal na linog?

³ An pagyugyog na ilinaladawan ni Hageo bakong arog nin literal na linog, na nagdadara sana nin destroso. Imbes, nagdadara iyan nin marahay na mga resulta. Sinasabi mismo sa sato ni Jehova: “Yuyugyugon ko an gabos na nasyon, asin an mahahalagang bagay kan gabos na nasyon maralaog sa harong na ini; asin papanuon ko nin kamurawayan an harong na ini.” (Hag. 2:7) Ano an kahulugan kan propesiyang ini para sa mga nabuhay kan panahon ni Hageo? Asin ano an kahulugan kaiyan para sato ngunyan? Pag-uulayan ta an simbag sa mga hapot na iyan asin aaramon ta man kun paano kita makikikabtang sa pagyugyog sa mga nasyon ngunyan.

4. Taano ta isinugo ni Jehova an propetang si Hageo sa saiyang banwaan?

⁴ An propetang si Hageo nag-ako nin mahalagang pagbuot hali ki Jehova. Isip-isipon an mga pangyayari bago kaiyan. Posibleng marhay na saro si Hageo sa mga nagbalik sa Jerusalem kaidtong 537 B.C.E. hali sa pagkadistiyero sa Babilonya. Dai nahaloy pag-abot ninda sa Jerusalem, an maimbod na mga parasamba na idto pinunan an paglatag kan pundasyon kan harong ni Jehova, o kan templo. (Esd. 3:8, 10) Pero dai nahaloy, may nangyaring makamumundo. Nadisganar sinda asin ipinundo an proyekto dahil sa mga pagkontra. (Esd. 4:4; Hag. 1:1, 2) Kaya kan 520 B.C.E., pinagbutan ni Jehova si Hageo na pukawon liwat an saindang kaigutan asin pahiruon sinda na tapuson an pagtugdok kan templo. *—Esd. 6:14, 15.

5. Taano ta an mensahe ni Hageo siguradong nakakapakusog nin buot sa banwaan nin Diyos?

⁵ An katuyuhan kan mensahe ni Hageo iyo na pakusugon an pagtubod ki Jehova. May kusog nin buot na ipinahayag kan propeta an mga tataramon na ini sa mga pinangluluyahan nin buot na mga Judio: “‘Magpakakusog kamo, kamong bilog na banwaan kan dagang ini,’ an sabi ni Jehova, ‘asin magtrabaho kamo. Huli ta nasa kaibanan nindo ako,’ an sabi ni Jehova na pamayo nin mga hukbo.” (Hag. 2:4) An ekspresyon na “Jehova na pamayo nin mga hukbo” siguradong nakakapakusog nin buot. Igwa si Jehova nin dakulang hukbo nin mga parapakilaban na anghel, kaya an mga Judio kaipuhan na magtiwala sa saiya tanganing magin mapanggana.

6. Ano an magigin resulta kan pagyugyog na ihinula ni Hageo?

⁶ Pinasabngan ni Jehova si Hageo para ipahayag an sarong mensahe na naglaladawan sa sarong simbolikong pagyugyog sa gabos na nasyon. Napakusog kan kapahayagan na ini an mga paratugdok na idto nin templo na pinangluyahan nin buot. Inasigurar kan bisyon na ini na yuyugyugon ni Jehova an Persia, an pambilog na kinaban na kapangyarihan kan panahon na idto. Asin ano an magigin resulta kan pagyugyog na iyan? Inot, matatapos kan banwaan nin Diyos an pagtugdok kan templo. Dangan, pati an mga bakong Judio maiba sa pagsamba ki Jehova sa itinugdok liwat na templo. Nakakapakusog nanggad nin buot na mensahe para sa banwaan nin Diyos!—Zac. 8:9.

7. Anong gibuhon na pagyugyog an kalabot kita ngunyan? Ipaliwanag.

⁷ Ano an kahulugan para sa sato ngunyan kan propesiya ni Hageo? Sa giraray, pigyuyugyog ni Jehova an gabos na nasyon, asin sa pagkakataon na ini kalabot kita. Pag-isipan ini: Kan 1914, pinatukaw ni Jehova si Jesu-Cristo bilang Hadi kan Saiyang langitnon na Kahadian. (Sal. 2:6) An pagkaestablisar kan Kahadian na iyan bakong marahay na bareta para sa mga lider kan kinaban. Nangangahulugan iyan na “an itinalaan na mga panahon para sa mga nasyon”—an peryodo nin panahon na mayo nin namamahala na direktang representante ni Jehova—nautob na, o natapos na. (Luc. 21:24) Huli kaiyan, partikular na puon kan 1919, ipinapahayag kan banwaan ni Jehova na an Kahadian nin Diyos iyo an solamenteng paglaom kan katawuhan. An paghuhulit na ini kan “maugmang bareta kan Kahadian” yuminugyog sa bilog na kinaban.—Mat. 24:14.

8. Sigun sa Salmo 2:1-3, ano an nagin reaksiyon kan kadaklan kan mga nasyon sa mensaheng ini?

⁸ Ano an nagin reaksiyon kan mga tawo sa mensaheng ini? An kadaklan sa sainda negatibo an reaksiyon. (Basahon an Salmo 2:1-3.) Nagkariribok an mga nasyon. Habo nindang akuon an Tagapamahala na ninombrahan ni Jehova. Dai ninda ibinibilang na “maugmang bareta” an mensahe kan Kahadian na ihinuhulit ta. Sa  katunayan, ipinagbawal pa ngani kan nagkapirang gobyerno an gibuhon na paghuhulit! Dawa ngani dakul sa mga namamahala kan mga nasyon na ini naghihingako na naglilingkod sa Diyos, habo nindang butasan an saindang kapangyarihan asin awtoridad. Kaya arog kan ginibo kan mga namamahala kan panahon ni Jesus, an mga namamahala ngunyan kinokontra an Linahidan ni Jehova paagi sa pag-atake sa saiyang maimbod na mga parasunod.—Gibo 4:25-28.

9. Ano an reaksiyon ni Jehova sa negatibong reaksiyon kan mga nasyon?

⁹ Ano an reaksiyon ni Jehova sa negatibong reaksiyon kan mga nasyon? Sinisimbag iyan kan Salmo 2:10-12: “Kaya ngunyan, mga hadi, magpahiling kamo nin pakasabot; kamong mga hukom sa daga, akuon nindo an pagtatanos. May pagkatakot na maglingkod kamo ki Jehova, asin may pagtakig na mag-ugma. Tawan nindo nin onra an aki, ta kun dai, maaanggot an Diyos asin mapapara kamo sa dalan, huling minalaad tulos an kaanggutan Niya. Maugma an gabos na nagpapaili sa Saiya.” May kabuutan na tinatawan ni Jehova nin oportunidad an mga parakontrang ini. Puwede pa sindang magbago asin akuon an Kahadian ni Jehova. Alagad, paubos na an panahon. Nabubuhay kita sa “huring mga aldaw” kan sistemang ini nin mga bagay. (2 Tim. 3:1; Isa. 61:2) Mas kaipuhan nanggad kan mga tawo ngunyan na aramon an katotoohan asin gumibo nin tamang desisyon.

10. Anong positibong reaksiyon sa gibuhon na pagyugyog an ilinadawan sa Hageo 2:7-9?

¹⁰ An piguratibong pagyugyog na ihinula ni Hageo igwa nin positibong epekto sa nagkapirang tawo. Sinasabi niya sa sato na bilang resulta kan pagyugyog, “an mahahalagang bagay [mga tawong sadiyosan an puso] kan gabos na nasyon maralaog sa harong na ini” tanganing magsamba ki Jehova. * (Basahon an Hageo 2:7-9.) Naghula man si Isaias asin Mikas nin kaagid na mga pangyayari na mangyayari “sa huring mga aldaw.”—Isa. 2:2-4, nota sa ibaba; Mik. 4:1, 2, nota sa ibaba.

11. Ano an nagin epekto sa sarong brother kan inot niyang madangog an mensahe kan Kahadian?

¹¹ Isip-isipa an nagin epekto kan nakakatanyog  na mensahe sa brother na si Ken, na naglilingkod sa world headquarters. Malinaw niya pang nagigirumduman kan inot niyang madangog an mensahe kan Kahadian mga 40 taon na an nakaagi. Sinabi ni Ken: “Kan inot kong madangog an katotoohan hali sa Tataramon nin Diyos, naugma ako na naaraman ko na nabubuhay na kita sa huring mga aldaw kan sistemang ini nin mga bagay. Nasabutan ko na tanganing kamtan an pag-uyon nin Diyos asin an buhay na daing katapusan, kaipuhan kong dumulag sa daing kasiguruhan na kinaban na ini asin marigon na manindugan sa kampi ni Jehova. Namibi ako tapos ginibo ko iyan tulos. Binayaan ko an kinaban asin nagpaili ako sa Kahadian nin Diyos na dai mayuyugyog.”

12. Paano napapano nin kamurawayan sa huring mga aldaw na ini an espirituwal na templo ni Jehova?

¹² Malinaw nanggad na binebendisyunan ni Jehova an saiyang banwaan. Sa huring mga aldaw na ini, nahiling ta an dakulang paglangkaw kan bilang kan mga nagsasamba sa saiya. Kan 1914 pipirang ribo sana kita. Ngunyan, igwa na nin labing walong milyon na aktibong nagsasamba sa Diyos, asin minilyon pa an nag-iiba sa sato kada taon para girumdumon an Memoryal. Sa paaging ini, an daganon na mga patyo kan espirituwal na templo ni Jehova—an saiyang areglo para sa dalisay na pagsamba—napapano nin “mahahalagang bagay kan gabos na nasyon.” Napapamuraway man an pangaran ni Jehova paagi sa mga pagbabago na ginigibo kan mga ini pag isinusulot ninda an bagong personalidad.—Efe. 4:22-24.

13. Anong iba pang propesiya an nautob kan nakakaugmang mga pangyayaring ini? (Hilingon an ritrato sa cover.)

¹³ Nautob kan nakakaugmang mga pangyayaring ini an iba pang mga propesiya, arog kan nasa Isaias kapitulo 60. An bersikulo 22 kan kapitulong iyan nagsasabi: “An dikit magigin sangribo asin an sadit magigin makusog na nasyon. Ako mismo, si Jehova, an maparikas kaiyan sa sadiri kaiyan na panahon.” Huli sa pagdakul kan tunay na mga parasamba, igwang marahayon na bagay na nangyayari. An “mahahalagang bagay” na ini igwa nin manlain-lain na kakayahan saka abilidad, asin andam man sinda na umiba sa paghuhulit kan ‘maugmang bareta kan Kahadian.’ Bilang resulta, arog kan sinabi ni Isaias, nagagamit kan banwaan ni Jehova “an gatas kan mga nasyon.” (Isa. 60:5, 16) Sa tabang kan mahahalagang mga lalaki asin babaying ini, an gibuhon na paghuhulit naisasagibo na sa 240 nasyon asin an  mga literatura pinoprodusir sa labing 1,000 lengguwahe.

14. Anong desisyon an kinakaipuhan na gibuhon kan mga tawo ngunyan?

¹⁴ Sa panahon na ini kan katapusan, dahil sa pagyugyog sa mga nasyon, kinakaipuhan kan mga tawo na gumibo nin desisyon. Susuportaran daw ninda an Kahadian nin Diyos, o magtitiwala sinda sa mga gobyerno kan kinaban na ini? Sarong desisyon ini na kaipuhan gibuhon kan gabos. Dawa ngani sinusunod kan banwaan ni Jehova an mga ley kan gobyerno sa nasyon na iniistaran ninda, nagdadanay sindang lubos na neutral kun manungod sa pulitika kan kinaban na ini. (Roma 13:1-7) Aram ninda na an Kahadian iyo an solamenteng tunay na solusyon sa mga problema kan katawuhan. An Kahadian na iyan bakong kabtang kan kinaban na ini.—Juan 18:36, 37.

15. Anong dakulang pagbalo sa kaimbudan an ilinadawan sa libro nin Kapahayagan?

¹⁵ Ilinaladawan kan libro nin Kapahayagan na mababalo an kaimbudan kan banwaan nin Diyos sa huring mga aldaw. An pagbalong iyan padagos na matao sato nin grabeng panggigipit. An pulitikal na mga sistema kan kinaban na ini hahagadon an satong pagsamba asin pepersegiron an mga masayuma na suportaran sinda. (Kap. 13:12, 15) “[Oobligaron ninda] an gabos na tawo—an mga hamak asin an mga midbid, an mga mayaman asin an mga pobre, an mga talingkas asin an mga uripon—na magkaigwa sinda nin marka sa saindang tuong kamot o sa saindang angog.” (Kap. 13:16) An mga uripon kan suanoy na mga panahon binubugtakan nin marka para ipahiling kun siisay an may sadiri sa sainda. Kaagid kaiyan, an gabos na tawo sa panahon ta ngunyan inaasahan na magkaigwa nin simbolikong marka sa saindang kamot o angog. An saindang mga kaisipan asin mga paggawi mapahiling na sadiri sinda kan pulitikal na mga sistema asin na sinusuportaran ninda iyan.

16. Taano ta kaipuhan na marhay na pakusugon ta an satong kaimbudan ki Jehova ngunyan?

¹⁶ Aakuon ta daw an simbolikong markang ini asin itatao an satong kaimbudan sa pulitikal na mga gobyerno? An mga masayuma na mag-ako kan marka mapapaatubang sa mga kadipisilan asin peligro. Sinasabi pa kan libro nin Kapahayagan: “Mayo nin siisay man an makakabakal o makakapabakal apuwera sa tawong igwa kan marka.” (Kap. 13:17) Pero aram kan banwaan nin Diyos kun ano an gigibuhon kan Diyos sa mga igwa kan marka na sinambit sa Kapahayagan 14:9, 10. Imbes na magkaigwa kan markang iyan, magkakaigwa sinda kan marka na “Ki Jehova,” na garo baga isinurat ninda sa saindang kamot. (Isa. 44:5) Ngunyan na an panahon para siguraduhon ta na an satong kaimbudan ki Jehova masarig. Kun arog kaiyan, mauugma nanggad si Jehova na sabihon na sadiri niya kita!

17. Ano an dapat tang tandaan manungod sa pagpapasensiya ni Jehova?

¹⁷ Ipinapahiling ni Jehova an dakulaon na pasensiya sa huring mga aldaw na ini. Habo niyang malaglag an siisay man. (2 Ped. 3:9) Tinatawan niya an gabos nin oportunidad na magsulsol asin gumibo nin tamang desisyon. Pero an saiyang pasensiya may sagkudan. An mga nagsasayuma sa oportunidad na ini magigin arog an kamugtakan sa nangyari ki Faraon kan panahon ni Moises. Sinabi ni Jehova ki Faraon: “Puwede ko kutang gamiton an sakuyang kamot para padusahan ka asin an saimong banwaan nin nakakagadan na hilang, asin napara ka na kuta digdi sa daga. Pero sa mismong dahilan na ini pinapabayaan takang magdanay na buhay: tanganing ikapahiling ko sa saimo an sakuyang kapangyarihan asin tanganing ikapahayag ko an sakuyang pangaran sa bilog na daga.” (Exo. 9:15, 16) Mamimidbid nanggad kan gabos na nasyon na si Jehova an iyo sanang tunay na Diyos. (Ezek. 38:23) Paano ini mangyayari?

18. (a) Anong ibang klase nin pagyugyog an ilinadawan sa Hageo 2:6, 20-22? (b) Paano niyato naaraman na an mga tataramon ni Hageo magkakaigwa nin kautuban sa maabot na panahon?

 ¹⁸ Dakul na siglo pagkatapos kan panahon ni Hageo, pinasabngan si apostol Pablo na isurat na an mga tataramon sa Hageo 2:6, 20-22 magkakaigwa nin kautuban sa maabot na panahon. (Basahon.) Isinurat ni Pablo: “Ngunyan nanunuga siya: ‘Saro pang beses, yuyugyugon ko bako sana an daga kundi pati an langit.’ Ngunyan an mga tataramon na ‘saro pang beses’ nagpaparisa nin paghali sa mga bagay na yinuyugyog, mga bagay na ginibo, tanganing magdanay an mga bagay na dai yinuyugyog.” (Heb. 12:26, 27) Bakong arog kan pagyugyog na sinambit sa Hageo 2:7, an pagyugyog na ini mangangahulugan nin daing sagkod na kalaglagan para sa mga arog ki Faraon na nagsayuma na midbidon an deretso ni Jehova na mamahala.

19. Ano an dai mayuyugyog, asin paano ta naaraman iyan?

¹⁹ Ano an dai mayuyugyog, o dai mahahali? Nagpadagos si Pablo: “Mantang mag-aako kita nin sarong Kahadian na dai mayuyugyog, padagos lugod kitang mag-ako nin daing kapantay na kabuutan, na paagi kaiyan makakatao kita sa Diyos nin akseptableng sagradong paglilingkod na may diyosnon na pagkatakot sa saiya asin hararom na paggalang.” (Heb. 12:28) Iyo, pagkatapos kan pangultimong dakulang pagyugyog na ini, an Kahadian nin Diyos na sana an matatada. Magdadanay pa man giraray iyan na marigon sa kinamumugtakan kaiyan!—Sal. 110:5, 6; Dan. 2:44.

20. Anong pagpili an kaipuhan na gibuhon kan mga tawo, asin paano ta sinda matatabangan?

²⁰ Mayong panahon na dapat sayangon! Kaipuhan na pumili kan mga tawo: Padagos daw nindang susuportaran an paagi nin pamumuhay na pinapalakop kan kinaban na ini, na pasiring sa kalaglagan, o magmamaigot sinda na mamuhay kauyon kan kabutan nin Diyos, na pasiring sa buhay na daing katapusan? (Heb. 12:25) Paagi sa satong gibuhon na paghuhulit, matatabangan ta an mga tawo na magdesisyon kun sain sinda makampi sa importanteng isyung ini. Lugod na dakul pang mahahalagang bagay an matabangan niyato na manindugan para sa Kahadian nin Diyos. Asin lugod na pirmi niyatong isaisip an mga tataramon kan satong Kagurangnan na si Jesus: “An maugmang baretang ini kan Kahadian ihuhulit sa bilog na kinaban bilang patotoo sa gabos na nasyon, dangan maabot an katapusan.”—Mat. 24:14.