ARTIKULONG PAG-AADALAN 39
An Pangaran Mo Daw Yaon sa “Libro nin Buhay”?
“Sarong libro nin girumduman an isinurat sa atubangan niya para sa mga may pagkatakot ki Jehova.”—MAL. 3:16.
KANTA 61 Abante, Kamong mga Saksi!
SUMARYO KAN PAG-AADALAN a
Sa bilog na kasaysayan, nagdagdag si Jehova nin mga pangaran sa “libro nin buhay” (Hilingon an parapo 1-2)
1. Uyon sa Malakias 3:16, anong libro an isinusurat ni Jehova, asin ano an yaon diyan?
SA LAOG na nin ribo-ribong taon, nagsusurat si Jehova nin sarong espesyal na libro. An librong ini igwa nin lista nin mga pangaran, puon sa pangaran kan pinakainot na maimbod na saksi, si Abel. b (Luc. 11:50, 51) Dangan mga siglo puon kaidto, nagdagdag si Jehova nin mga pangaran sa librong iyan, asin ngunyan minilyon nang pangaran an yaon diyan. Sa Bibliya, an librong iyan inapod na “sarong libro nin girumduman,” “libro nin buhay,” asin “rolyo nin buhay.” Sa artikulong ini, aapudon ta iyan na “libro nin buhay.”—Basahon an Malakias 3:16; Kap. 3:5; 17:8.
2. Kairisay na pangaran an nakasurat sa libro nin buhay, asin paano maisusurat sa librong iyan an satong pangaran?
2 Yaon sa espesyal na librong ini an pangaran kan gabos na nagsasamba ki Jehova nin may pagkatakot—o hararom na paggalang—asin namumuot sa saiyang pangaran. Magkakaigwa sinda kan oportunidad na magkamit nin buhay na daing katapusan. Ngunyan, puwede man na maisurat an pangaran ta sa librong iyan kun magkakaigwa kita nin harani asin personal na relasyon ki Jehova basado sa atang na pantubos kan saiyang Aki, si Jesu-Cristo. (Juan 3:16, 36) Gabos kita gusto nanggad na maisurat an satong pangaran sa librong iyan—kita man may paglaom na mabuhay sa langit o digdi sa daga.
3-4. (a) Mabubuhay daw kita nin daing sagkod kun nakasurat ngunyan an pangaran ta sa libro nin buhay? Ipaliwanag. (b) Ano an pag-uulayan sa artikulong ini asin sa sunod na artikulo?
3 Nangangahulugan daw iyan na an gabos na tawong an pangaran nakasurat sa librong ini sigurado nang magkakamit nin buhay na daing katapusan? Mahihiling ta an simbag sa hapot na iyan sa mga tataramon ni Jehova ki Moises, na yaon sa Exodo 32:33. Sinabi ni Jehova: “An siisay man na magkasala sa sako, paparaon ko an saiyang pangaran sa sakuyang libro.” Kun siring, an mga pangaran na yaon ngunyan sa librong iyan puwedeng paraon, o halion, na garo baga isinurat nguna ni Jehova an mga pangaran gamit an lapis. (Kap. 3:5) Dapat na siguraduhon niyatong magdadanay sa librong iyan an satong pangaran sagkod na maisurat na iyan nin permanente sa tinta, sabi ngani.
4 Natural sana na may mga hapot kita. Halimbawa, ano an sinasabi kan Bibliya manungod sa mga tawong an pangaran nakasurat sa libro nin buhay pati man sa mga tawong an pangaran dai nakasurat diyan? Nuarin magkakamit nin buhay na daing katapusan an mga tawong an pangaran nagdanay sa librong iyan? Paano man idtong mga nagadan na dai man lamang nagkaigwa nin oportunidad na mamidbid si Jehova? Posible daw na maisurat an pangaran ninda sa librong iyan? An mga hapot na iyan sisimbagon sa artikulong ini asin sa sunod na artikulo.
KAIRISAY NA PANGARAN AN YAON SA LIBRO?
5-6. (a) Arog kan idinuduon sa Filipos 4:3, kairisay na pangaran an nakasurat sa libro nin buhay? (b) Nuarin permanente nang maisusurat an pangaran ninda sa libro nin buhay?
5 Kairisay na pangaran an nakasurat sa piguratibong libro na ini? Para masimbag iyan, pag-uulayan ta an limang magkakalain na grupo nin tawo. An nagkapira diyan nakasurat an pangaran sa libro nin buhay, an iba dai.
6 An inot na grupo kompuwesto kan mga piniling mamahala kaiba ni Jesus sa langit. An pangaran daw ninda nakasurat ngunyan sa libro nin buhay? Iyo. Uyon sa mga tataramon ni apostol Pablo sa saiyang mga ‘kapwa trabahador’ sa Filipos, an pangaran kan mga linahidan, na inimbitaran na mamahala kaiba ni Jesus, yaon na sa libro nin buhay. (Basahon an Filipos 4:3.) Pero tanganing magdanay an pangaran ninda sa piguratibong libro na iyan, kaipuhan nindang magdanay na maimbod. Dangan pag inako na ninda an pangultimong pagtatak sa sainda, iyan man bago sinda magadan o bago magpuon an dakulang kasakitan, an pangaran ninda isusurat na nin permanente sa librong ini.—Kap. 7:3.
7. Ano an nasasabutan ta sa Kapahayagan 7:16, 17 manungod sa kun nuarin permanente nang maisusurat sa libro nin buhay an pangaran kan mga kabilang sa dakulang kadaklan nin ibang mga karnero?
7 An ikaduwang grupo kompuwesto kan dakulang kadaklan nin ibang mga karnero. An pangaran daw ninda nakasurat na ngunyan sa libro nin buhay? Iyo. Magdadanay daw an pangaran ninda sa libro nin buhay pagkatapos nindang makaligtas sa Armagedon? Iyo. (Kap. 7:14) Sinabi ni Jesus na an arog-karnerong mga indibidwal na ini “magkakamit nin buhay na daing katapusan.” (Mat. 25:46) Pero an mga nakaligtas na iyan sa Armagedon dai man tulos magkakamit nin buhay na daing katapusan. Magdadanay sa libro nin buhay an saindang pangaran na isinurat gamit an lapis, sabi ngani. Durante kan Sangribong Taon na Paghadi, si Jesus “magpapastor sa sainda saka magiya sa sainda pasiring sa mga burabod kan tubig nin buhay.” Idtong mga mahimati sa paggiya ni Cristo asin sa katapos-tapusi mahuhukuman bilang maimbod ki Jehova, permanente nang maisusurat an saindang pangaran sa libro nin buhay.—Basahon an Kapahayagan 7:16, 17.
8. Kairisay na pangaran an dai nakasurat sa libro nin buhay, asin ano an mangyayari sa sainda?
8 An ikatulong grupo kompuwesto kan mga kanding, na lalaglagon sa Armagedon. An saindang pangaran mayo sa libro nin buhay. Sinabi ni Jesus na “sasaparon ninda an daing sagkod na pagkapara.” (Mat. 25:46) Pinasabngan si Pablo na isurat na “an mga ini mismo huhukuman nin daing sagkod na kalaglagan.” (2 Tes. 1:9; 2 Ped. 2:9) Arog man kaiyan an mangyayari sa mga tawo—sa bilog na kasaysayan—na tuyong nagkasala tumang sa banal na espiritu. Aakuon man ninda an daing sagkod na kalaglagan, bako an buhay na daing katapusan. Malinaw na dai sinda bubuhayon liwat. (Mat. 12:32; Mar. 3:28, 29; Heb. 6:4-6) Pag-ulayan ta ngunyan an duwang grupo nin tawo na bubuhayon liwat digdi sa daga.
KUN SAIRISAY AN BUBUHAYON LIWAT
9. Arog kan ipinapahiling sa Gibo 24:15, anong duwang grupo nin tawo an bubuhayon liwat digdi sa daga, asin ano an pagkakaiba kan duwang grupong iyan?
9 May sinambit an Bibliya na duwang grupo nin tawo na bubuhayon liwat na may paglaom na mabuhay nin daing sagkod digdi sa daga, “an mga matanos” saka “an mga bakong matanos.” (Basahon an Gibo 24:15.) “An mga matanos” iyo idtong maimbod na naglingkod ki Jehova kaidtong buhay pa sinda. “An mga bakong matanos” man iyo idtong dai naglingkod ki Jehova bago sinda nagadan. Sa katunayan, sa kadaklan na kaso bako nanggad matanos an paggawi ninda. Dahil parehong bubuhayon liwat an duwang grupong ini, masasabi ta daw na an saindang pangaran nakasurat sa libro nin buhay? Para masimbag iyan, pag-ulayan ta an kada grupo.
10. Taano ta bubuhayon liwat “an mga matanos,” asin anong pribilehiyo an makakamtan kan nagkapira sa sainda? (Hilingon man sa isyung ini an “Hapot Hali sa mga Parabasa” manungod sa pagkabuhay liwat digdi sa daga.)
10 “An mga matanos” an ikaapat na grupo. Bago sinda nagadan, nakasurat na sa libro nin buhay an saindang pangaran. Hinali daw sa librong iyan an pangaran ninda kan magadan sinda? Dai, huling “buhay” pa sinda sa memorya ni Jehova. Si Jehova iyo an “Diyos, bako kan mga gadan, kundi kan mga buhay, huli ta para sa saiya gabos sinda buhay.” (Luc. 20:38) Nangangahulugan iyan na pag an mga matanos buhayon na liwat digdi sa daga, an saindang pangaran nakasurat na sa libro nin buhay, kaso nakasurat nguna iyan “gamit an lapis.” (Luc. 14:14) Siguradong may mga binuhay liwat na magkakaigwa kan pribilehiyo na maglingkod bilang “mga pamayo sa bilog na daga.”—Sal. 45:16.
11. Ano an kaipuhan na manudan kan “mga bakong matanos” tanganing maisurat sa libro nin buhay an saindang pangaran?
11 Panghuri, pag-ulayan ta an ikalimang grupo, “an mga bakong matanos.” Namuhay sinda nin bakong matanos bago nagadan tibaad dahil dai ninda aram an mga kahagadan ni Jehova. Kaya an pangaran ninda dai nakasurat sa libro nin buhay. Alagad paagi sa pagbuhay liwat sa sainda, tinatawan sinda nin Diyos nin oportunidad na maisurat sa librong iyan an saindang pangaran. An “mga bakong matanos” na ini mangangaipo nin dakul na tabang. Sa dating buhay ninda, an nagkapira sa sainda naggibo nin grabe karaot na mga bagay. Huli kaiyan, kaipuhan sindang tukduan kun paano mamuhay kauyon kan matanos na mga pamantayan ni Jehova. Tanganing matukduan sinda, didirehiran kan Kahadian nin Diyos an pinakadakulang programa nin pagtutukdo sa bilog na kasaysayan nin tawo.
12. (a) Sairisay an matukdo sa mga bakong matanos? (b) Ano an mangyayari sa mga habong mag-aplikar kan mga nanunudan ninda?
12 Sairisay an matukdo sa mga bakong matanos? An dakulang kadaklan saka an binuhay liwat na mga matanos. Tanganing maisurat sa libro nin buhay an pangaran kan mga bakong matanos, kaipuhan nindang magkaigwa nin dayupot na relasyon ki Jehova asin idusay an sadiri ninda sa saiya. An pag-uswag kan gabos na bakong matanos na ini maingat na susubaybayan ni Jesu-Cristo saka kan mga kapwa niya hukom. (Kap. 20:4) An mga habong mag-ako kan tabang na iyan o habong mag-aplikar kan mga nanunudan ninda dai tutugutan na magdanay na buhay—dawa pa tibaad 100 anyos na sinda. (Isa. 65:20) Si Jehova saka si Jesus nakakabasa nin puso asin dai nanggad ninda tutugutan an siisay man na mangraot sa bagong kinaban sa ano man na paagi.—Isa. 11:9; 60:18; 65:25; Juan 2:25.
PAGKABUHAY LIWAT PARA SA BUHAY ASIN PAGKABUHAY LIWAT PARA SA PAGHUKOM
13-14. (a) Kaidto, ano an pakasabot ta sa mga tataramon ni Jesus na nasa Juan 5:29? (b) Ano an kaipuhan tang mangnuhon manungod sa mga tataramon na iyan?
13 Nagsambit man si Jesus manungod sa mga bubuhayon liwat digdi sa daga. Halimbawa, sinabi niya: “Maabot an oras na an gabos na yaon sa mga lulubngan na girumduman makakadangog kan saiyang boses asin maruluwas, idtong mga naggiribo nin marahay pasiring sa pagkabuhay liwat para sa buhay, asin idtong mga naggiribo nin karatan pasiring sa pagkabuhay liwat para sa paghukom.” (Juan 5:28, 29) Ano an buot sabihon ni Jesus?
14 Kaidto, an pakasabot ta sa mga tataramon na iyan ni Jesus iyo na nanunungod iyan sa mga gigibuhon kan mga binuhay liwat pagkatapos sindang buhayon liwat; an buot sabihon, may mga mabubuhay dangan magiribo nin marahay na mga bagay mantang an iba mabubuhay dangan magiribo nin karatan. Minsan siring, mangnuhon na mayong sinabi si Jesus na an mga kakaluwas pa lang sa mga lulubngan na girumduman magiribo nin marahay o magiribo nin karatan. An ginamit niyang mga tataramon nasa pormang past tense. Sinambit niya an manungod sa mga “naggiribo nin marahay” saka idtong mga “naggiribo nin karatan.” Ipinaparisa kaini na an mga gibong iyan nangyari bago sinda nagadan. Lohikal nanggad iyan, bako? Tutal, mayo nin siisay man na tutugutan na maggibo nin karatan sa bagong kinaban. Sigurado na an mga karatan na ini ginibo kan mga bakong matanos kaidtong bago sinda nagadan. Kun siring, paano ta dapat sabuton an mga tataramon ni Jesus manungod sa “pagkabuhay liwat para sa buhay” asin “pagkabuhay liwat para sa paghukom”?
15. Sairisay an magkakamit nin “pagkabuhay liwat para sa buhay,” asin taano?
15 An mga matanos, na naggibo nin marahay bago sinda nagadan, magkakamit nin “pagkabuhay liwat para sa buhay” huling an saindang pangaran nakasurat na sa libro nin buhay. Nangangahulugan ini na an pagkabuhay liwat kan “mga naggiribo nin marahay” na sinambit sa Juan 5:29 kapareho man sana kan pagkabuhay liwat kan “mga matanos” na sinambit sa Gibo 24:15. An pakasabot na ini kauyon kan mga tataramon na nasa Roma 6:7, na an sabi: “An sarong nagadan absuwelto na sa saiyang kasalan.” An mga kasalan na nagibo kan mga matanos na ini pinatawad na ni Jehova kan sinda magadan, pero padagos niyang gigirumdumon an mga ipinahiling nindang kaimbudan kan sinda buhay pa. (Heb. 6:10) Siyempre, kaipuhan kan mga matanos na ini na binuhay liwat na magdanay na maimbod tanganing magdanay sa libro nin buhay an pangaran ninda.
16. Ano an kahulugan kan “pagkabuhay liwat para sa paghukom”?
16 Paano man an mga naggiribo nin karatan bago sinda nagadan? Maski ngani pinatawad na an saindang mga kasalan kan sinda magadan, dai pa sinda nakakapahiling nin kaimbudan. An pangaran ninda dai nakasurat sa libro nin buhay. Kaya, an pagkabuhay liwat kan “mga naggiribo nin karatan” kapareho man sana kan pagkabuhay liwat kan “mga bakong matanos” na sinambit sa Gibo 24:15. An para sa sainda iyo an “pagkabuhay liwat para sa paghukom.” c An paghukom sa mga bakong matanos nangangahulugan na eebalwaron sinda. (Luc. 22:30) Mangangaipo nin panahon an pagdeterminar kun baga angay na maisurat an pangaran ninda sa libro nin buhay. Saka lang maisusurat diyan an pangaran kan mga bakong matanos kun babayaan ninda an dati nindang maraot na pamumuhay asin idudusay an sadiri ninda ki Jehova.
17-18. Ano an kaipuhan na gibuhon kan gabos na binuhay liwat para mabuhay digdi sa daga, asin ano an “mga gibo” na sinambit sa Kapahayagan 20:12, 13?
17 Sinda man dating matanos o bakong matanos, an mga binuhay liwat kaipuhan na magsunod sa mga pagbuot na yaon sa bagong mga rolyo na bibikladon durante kan 1,000 taon. Ilinadawan ni apostol Juan an nahiling niya sa bisyon: “Nahiling ko an mga gadan, an mga midbid asin an mga hamak, na nakatindog sa atubangan kan trono, asin biniklad an mga rolyo. Pero saro pang rolyo an biniklad; iyo ini an rolyo nin buhay. Hinukuman an mga gadan sigun sa saindang mga gibo base sa mga nakasurat sa mga rolyo.”—Kap. 20:12, 13.
18 Base sa anong “mga gibo” huhukuman an mga binuhay liwat? Iyan daw an mga ginibo ninda bago sinda nagadan? Bako nanggad! Girumdumon na kan nagadan sinda, pig-absuwelto na sinda sa mga kasalan ninda kaidto. Kaya digdi, an “saindang mga gibo” dai puwedeng magpanungod sa mga ginibo ninda kaidto sa dati nindang buhay. Kundi, siguradong nanunungod iyan sa mga gibo ninda may koneksiyon sa kun ano an magigin pag-ako ninda sa mga pagsasanay sa sainda sa bagong kinaban. Maski an maimbod na mga lalaking arog ni Noe, Samuel, David, saka Daniel kaipuhan na makanuod manungod ki Jesu-Cristo asin magpahiling nin pagtubod sa saiyang atang. Kaya lalo na an mga bakong matanos!
19. Ano an pinal na kaaabtan kan mga nagsasayuma sa marahayon na oportunidad na ini?
19 Ano an pinal na kaaabtan kan mga nagsasayuma sa marahayon na oportunidad na ini? Sinasabi sa sato kan Kapahayagan 20:15: “An siisay man na dai nakasurat sa libro nin buhay inapon sa danaw nin kalayo.” Iyo, biyo sindang lalaglagon sagkod pa man. Kaya mahalaga nanggad na siguraduhon tang nakasurat sa libro nin buhay an satong pangaran asin na magdanay iyan diyan!
Sarong brother na nakikikabtang sa dakulang programa nin pagtutukdo na mangyayari durante kan Sangribong Taon (Hilingon an parapo 20)
20. Anong nakakaugmang gibuhon an isasagibo durante kan Sangribong taon na Paghadi? (Hilingon an ritrato sa cover.)
20 Magigin nakakaugmang panahon nanggad an Sangribong Taon na Paghadi! Isasagibo diyan an pinakadakulang programa nin pagtutukdo kasuarin man digdi sa daga. Pero iyan man an panahon na eebalwaron an paggawi kan mga matanos asin kan mga bakong matanos. (Isa. 26:9; Gibo 17:31) Paano isasagibo an programang ini nin pagtutukdo? Tatabangan kita kan sunod na artikulo na masabutan asin mapahalagahan an pambihirang probisyon na ini.
KANTA 147 Ipinanuga an Buhay na Daing Katapusan
a Sa artikulong ini, ipapahiling an pagliliwat kan satong pakasabot sa mga tataramon ni Jesus na yaon sa Juan 5:28, 29 manungod sa “pagkabuhay liwat para sa buhay” asin sa “pagkabuhay liwat para sa paghukom.” Manunudan ta kun sa ano nanunungod an duwang pagkabuhay liwat na ini asin kun sairisay an kabilang sa kada saro diyan.
b An pagsurat kan librong ini nagpuon “sa pagkaestablisar kan kinaban”—an kinaban nin mga tawo na igwa kan oportunidad na makinabang sa atang na pantubos ni Jesus. (Mat. 25:34; Kap. 17:8) Kaya minalataw na an pangaran kan matanos na si Abel an pinakainot na isinurat sa libro nin buhay.
c Kaidto, ipinaliwanag niyato na an terminong “paghukom” na ginamit digdi nangangahulugan na bakong paborableng paghukom, o hatol na pagkondenar. An totoo, an tataramon na “paghukom” puwedeng may arog kaiyan na kahulugan. Pero sa kontekstong ini, minalataw na ginamit ni Jesus an tataramon na “paghukom” sa mas mahiwas na kahulugan—an proseso nin pag-ebalwar sa saro asin maingat na pagsubaybay saiya para testingon siya o, arog kan sinasabi sa sarong Griegong diksiyonaryo sa Bibliya, “pagsiyasat sa paggawi.”
