Kan inot na mga taon kan dekada nin 1940, nakipag-adal an mga magurang ko sa mga Saksi ni Jehova. Dai nagdagos-dagos an pag-adal na iyan, pero padagos na nakakaresibi nin mga kopya kan magasin na The Watchtower asin Awake! an sakong ina. Kan 1950, nagkaigwa nin internasyonal na kumbensiyon sa New York City, asin inako kan sakong pamilya an imbitasyon na mag-atender diyan.

Dai nahaloy pagkatapos kaiyan, nagpuon na magdalaw samo si Brother Lawrence Jeffries. Hininguwa niyang tabangan ako na manudan an katotoohan. Kan inot, dai ako uyon saiya manungod sa paninindugan kan Mga Saksi ni Jehova, sa dai ninda pakikikabtang sa pulitika asin sa serbisyo militar. Sinabi ko na kun an gabos sa Amerika habo nang makigiyera, puwedeng basta na sana sakupon kan mga kaiwal an bilog na nasyon. Mapasensiyang ipinaliwanag ni Brother Jeffries: “Ano sa hiling mo an gigibuhon kan Diyos na Jehova kun an gabos na tawo sa Amerika naglilingkod na sa saiya tapos atakihon sinda kan mga kaiwal?” An paliwanag niya manungod diyan asin sa iba pang isyu nakatabang sako na marealisar na sala ako. Dahil kaiyan, nagin mas interesado ako.

Dakul na oras akong nagbasa kan mga lumang isyu kan The Watchtower saka Awake! na isinaray ni Nanay sa bodega. Sa paglihis nin panahon, narealisar ko na an nanunudan ko iyo na an katotoohan, kaya inako ko an alok ni Brother Jeffries na pag-adal sa Bibliya. Nagpuon na man akong regular na mag-atender sa mga pagtiripon. Gustong-gusto ko an nanunudan ko, asin nagin parahayag ako kan maugmang bareta. Nagbago an mga pasuhan ko kan masabutan ko na “harani na an dakulang aldaw ni Jehova.” (Sof. 1:14) Imbes na magpokus na makapagklase sa unibersidad, gusto kong tabangan an iba na manudan an katotoohan sa Bibliya.

 Kan Hunyo 13, 1956, naggradwar ako sa hayskul, asin pakalihis nin tulong aldaw, nabawtismuhan ako sa sarong pansirkitong asembleya. Dai ko lamang inasahan na dakulon palan na bendisyon an makakamtan ko dahil sa paggamit ko kan buhay ko para makanuod asin magtukdo manungod ki Jehova.

Anom na bulan pakabawtismo sa sako, nagregular payunir ako. Sa Disyembre 1956 na Kingdom Ministry yaon an artikulong “Can You Serve Where the Need Is Great?” Para man sako an imbitasyon na iyan. Gusto kong tumabang kun sain dikit an naghuhulit kan maugmang bareta.—Mat. 24:14.

Nagbalyo ako sa Edgefield, South Carolina. An kongregasyon diyan apat sana an parahayag—ako an ikalima. Ginigibo mi an samong mga pagtiripon sa sala kan harong nin sarong tugang. Kada bulan, naggagamit ako nin 100 na oras sa ministeryo sa langtad. Sibot ako sa panginginot sa ministeryo sa langtad asin sa pagtao nin mga pahayag sa kongregasyon. An interesante ta mantang mas dakul an ginigibo ko, mas dakul man akong nanunudan manungod ki Jehova.

Sarong babayi na inaadalan ko sa Bibliya an may punerarya sa Johnston, sarong banwaan na mga pirang kilometro an rayo. Tinawan niya ako nin part-time na trabaho na kaipuhan kong marhay, asin pinagamit niya samo an sarong sadit na building para magin Kingdom Hall mi.

Si Brother Jolly Jeffries, an aki kan brother na nag-study sako, nagbalyo hali sa Brooklyn, New York, asin nagin kapartner ko sa pagpayunir. Nag-istar kami sa sarong sadit na harong na madaling mailipat-lipat (trailer house) na ipinagamit samo nin sarong tugang.

Hababa an suweldo sa South Carolina. Duwa o tulong dolyar sana an ginaganar mi sa bilog na aldaw na pagtrabaho. Sarong beses, pipira na sana su kuwarta ko tapos binakal ko idto nin kakanon sa grocery store. Pagluwas ko, pigdulok ako nin sarong lalaki tapos naghapot: “Gusto mo nin trabaho? Babayadan taka nin sarong dolyar kada oras.” Tinawan niya ako nin trabaho na paglinig sa sarong construction site sa laog nin tulong aldaw. Malinaw na tinatabangan ako ni Jehova na magdanay sa Edgefield. Pero, nag-atender man ako sa internasyonal na kumbensiyon kan 1958 na ginibo sa New York City.

Sa ikaduwang aldaw kan kumbensiyon, may espesyal na nangyari. Nabisto ko si Ruby Wadlington, na sarong regular payunir sa Gallatin, Tennessee. Pareho mi gustong magmisyonero, kaya nag-atender kami sa miting para sa Gilead sa kumbensiyon na ini. Dai nahaloy, nagpuon na kaming magsuratan. Dangan naimbitaran ako na magpahayag sa Gallatin. Ginamit ko an oportunidad na iyan para alukon siya nin kasal. Nagbalyo ako sa kongregasyon ni Ruby, tapos ikinasal kami kan 1959.

Kan 23 anyos ako, nanombrahan ako bilang congregation servant (na inaapod ngunyan na koordineytor kan grupo nin kamagurangan) sa Gallatin. Kami an inot na kongregasyon na dinalaw ni Charles Thompson bilang paraataman nin sirkito. Dakul na siyang eksperyensiya; dawa arog kaiyan, naghapot  pa man giraray siya sa sako kun ano an kaipuhan kan mga tugang asin kun paano iyan inaasikaso kan ibang mga paraataman nin sirkito. Nanudan ko saiya na marahay an maghapot nguna asin aramon an gabos na detalye bago gumibo nin desisyon.

Kan Mayo 1964, inimbitaran ako na mag-adal sa sarong bulan na Pang-Kahadian na Paadalan sa Pagmiministro na ginibo sa South Lansing, New York. An mga brother na nagkondukta kan pag-adal na ini nakatabang sa sako na magkaigwa nin makusog na pagmawot na makanuod asin mag-uswag pa bilang sarong tawong espirituwal.

Kan Enero 1965, nakaresibi kami ni Ruby nin imbitasyon para sa pansirkitong gibuhon. Inasignar kami sa sarong sirkito na dakula an sakop, puon sa Knoxville, Tennessee, asin haros umabot na sagkod sa Richmond, Virginia. Sakop kaiyan an mga kongregasyon sa North Carolina, Kentucky, asin West Virginia. An mga dinadalaw ko idto sanang mga kongregasyon nin mga itom dahil lakop pa kaidto sa timog na parte kan Estados Unidos an pagsuway nin mga puti sa itom, kaya dai pa sinda puwedeng mag-iribanan sa mga pagtiripon. Tios an mga tugang, kaya pighihiras mi sa mga nangangaipo kun ano an igwa kami. Sarong haluyan nang paraataman nin sirkito an tinukduan ako nin sarong mahalagang marhay na leksiyon: “Magin tugang ka. Dai ka magdalaw sa kongregasyon na garo baga boss ka. Matatabangan mo sinda kun an paghiling ninda sa saimo tugang ka ninda.”

Mantang dinadalaw mi an sarong sadit na kongregasyon, napunan ni Ruby nin pag-adal sa Bibliya an sarong hoben na babayi na may aking sarong taon pa sana an edad. Pag mayo sa kongregasyon nin puwedeng mag-study sa babayi, ginigibo iyan ni Ruby paagi sa surat. Kan sunod ming dalaw, nag-atender an babayi sa gabos na pagtiripon. Kan may mag-abot na duwang espesyal payunir, sinda na an nagpadagos sa pag-study sa saiya, asin dai nahaloy nabawtismuhan siya. Pakalihis nin mga 30 taon, kan 1995, sa Bethel sa Patterson, sarong hoben na sister an nagpabisto ki Ruby. Siya palan idtong aki kan babayi na na-study ni Ruby kaidto. An saiyang aki kaiba kan agom kaining lalaki mga estudyante sa ika-100 na Klase kan Gilead.

An ikaduwang sirkito na dinalaw mi yaon sa central Florida. Kan panahon na iyan kinaipuhan mi nin awto, kaya nagkua kami nin awto na nabakal mi nin baratuhon sana. Kaya lang, sa inot pa sanang semana, nagkaproblema na su water pump. Mayo kaming pampahirahay. Inapudan ko an sarong brother na sa hiling ko makakatabang sa samo. Pigsugo niya su saro sa mga tawuhan niya para hirahayon su awto mi, tapos habo man kaming pabayadon. Sinabi niya lang, “Ayos na po, mayo man po kamong babayadan.” Tinawan niya pa ngani kami nin kuwarta bilang regalo! Magayunon na halimbawa nanggad idto kun paano inaataman ni Jehova an saiyang mga lingkod. Pinagirumdom kami kaiyan na magin bukas-palad sa iba.

Pag nagdadalaw kami sa mga kongregasyon, nagdadagos kami sa harong kan mga tugang. Bilang resulta, nagkaigwa kami nin dakul na marahay na amigo. Sarong aldaw, nawalat ko sa makinilya ko an dai ko pa tapos na report manungod sa kongregasyon. Pagbalik ko kinabanggihan, naaraman ko na an makinilya ko palan pigparapindot kan tres anyos na aking lalaki kan pamilyang pigdadagusan mi. Kaya kinaipuhan kong utruhon an report. Pigparasuba ko idto sa aki sa laog nin dakul na taon.

Kan 1971, nakaresibi ako nin surat na nagsasabi na iinaasignar ako bilang paraataman nin distrito sa New York City. Nabigla kami! Kan magbalyo kami duman, 34 anyos pa sana ako. Mainit an nagin pag-ako sako kan mga tugang, bilang an saindang inot na itom na paraataman nin distrito.

Bilang paraataman nin distrito, gustong-gusto ko an pagtukdo manungod ki Jehova sa kada katapusan kan semana sa pansirkitong asembleya. Dakul sa mga paraataman nin sirkito an mas eksperyensiyado kisa sako. An saro sa sainda iyo an nagpahayag kaidto kan bawtismuhan ako. An saro pang brother, si Theodore Jaracz, kan huri nagin miyembro kan Namamahalang Grupo. Dakul man na eksperyensiyadong brother an naglilingkod sa Bethel sa Brooklyn. Nagpapasalamat ako na an mga paraataman nin sirkito saka an mga Bethelite tinabangan ako na dai mag-alangan. Nahiling ko mismo na mamumuton na mga pastor sinda, na nagsasarig sinda sa Tataramon nin Diyos saka maimbod na nagsusuportar sa organisasyon. Dahil sa kapakumbabaan ninda, dai nagin masakit sako na maglingkod bilang paraataman nin distrito.

Kan 1974, inasignar kan Namamahalang Grupo an saro pang grupo nin mga paraataman nin sirkito para maglingkod sa pandistritong gibuhon, asin ako maglilingkod giraray bilang paraataman nin sirkito—sa pagkakataon na ini sa South Carolina. Marahay na sana ta sa panahon na ini puwede nang mag-iribanan sa mga kongregasyon asin mga sirkito an mga puti saka mga itom, na ikinaugmang marhay kan mga tugang.

Sa huring mga kabtang kan taon 1976, inasignar ako sa sarong sirkito sa Georgia sa pag-ultanan kan Atlanta saka Columbus. Nagigirumduman ko pang marhay kan magtao ako nin pahayag sa gadan para sa limang aking itom na nagadan kan suluon nin mga arsonista an saindang harong. Pig-ospital an saindang ina dahil sa mga lugad kaini. Daing pundo an pag-abot kan mga Saksi ni Jehova, itom saka puti, sa ospital para rangahon an mga magurang. Nahiling ko an pambihirang pagkamuot kan mga tugang. An pagmalasakit na iyan makakatabang sa mga lingkod nin Diyos na makayanan an masakiton na mga kamugtakan.

Kan 1977 pinakiulayan kami na magduman sa Bethel sa Brooklyn para tumabang sa sarong proyekto sa laog nin pirang bulan. Kan patapos na iyan, duwang miyembro kan Namamahalang grupo an kinaulay ako asin naghapot kun andam kami ni Ruby na maglingkod nin permanente sa Bethel. Inako mi an imbitasyon.

Sa laog nin 24 taon, naglingkod ako sa Service Department, na diyan sa parati sensitibo saka komplikadong mga hapot an inaasikaso kan mga brother. Sa paglihis nin mga taon, nagtao an Namamahalang Grupo nin paggiya na kauyon kan mga prinsipyo sa Bibliya. Ginamit iyan na basehan sa pagsimbag sa mga hapot, pero nagin basehan man iyan sa pagsasanay sa mga paraataman nin sirkito, mga elder, asin mga payunir. An materyal na ini sa pagsasanay nakatabang sa dakul na umuswag sa espirituwal. Bilang resulta, napakusog kaiyan an organisasyon ni Jehova.

Puon 1995 sagkod 2018, nagdalaw ako sa manlain-lain na sangang opisina bilang representante kan headquarters, na dati inaapod na zone overseer. Nakikipag-ulay ako sa mga Komite kan Sangay, mga Bethelite, asin mga misyonero para pakusugon sinda asin tabangan sa ano man na kadipisilan ninda. Kami man ni Ruby, pirmi man kaming napapakusog kan mga eksperyensiyang iniistorya ninda sa samo. Halimbawa, kan taon 2000 nagdalaw kami sa Rwanda. Napahiro kaming marhay kan madangog mi kun paano nakaligtas an mga tugang asin an pamilyang Bethel sa genocide (pagpuho sa bilog na etnikong grupo) kan 1994. Dakul an nawaran nin mahal sa buhay. Sa ibong kan tinagalan ninda, an mga tugang na idto nagpahiling nin pagtubod, paglaom, asin kaugmahan.

Labi na kaming 80 anyos ngunyan. Beynteng taon na akong naglilingkod bilang miyembro kan Komite kan Sangay sa Estados Unidos. Dai lamang ako nakapagklase sa unibersidad; pero tinawan ako ni Jehova asin kan saiyang organisasyon kan pinakahalangkaw na edukasyon. Nakatabang iyan sako na magin andam para magtukdo sa iba kan mga katotoohan sa Bibliya na matao sainda nin daing sagkod na pakinabang. (2 Cor. 3:5; 2 Tim. 2:2) Nahiling ko kun paano an mensahe kan Bibliya nakatabang sa mga tawo na maparahay an saindang buhay asin magkaigwa nin dayupot na relasyon sa saindang Kaglalang. (Sant. 4:8) Nuarin man kaya mi ni Ruby, padagos ming dinadagka an iba na pahalagahan na marhay an pribilehiyo na makanuod manungod ki Jehova asin itukdo sa iba an mga katotoohan sa Bibliya—an pinakadakulang pribilehiyo na igwa an sarong lingkod ni Jehova!