ARTIKULONG PAG-AADALAN 40
“Pagdara sa Dakul Pasiring sa Katanusan”
“Idtong mga nagdadara sa dakul pasiring sa katanusan masirang na siring sa mga bituon, sagkod nuarin pa man.”—DAN. 12:3.
KANTA 151 Siya Maapod
SUMARYO KAN PAG-AADALAN a
1. Anong nakakaugmang mga pangyayari an naghahalat sa sato durante kan Sangribong Taon na Paghadi?
MAGIGIN marahayon na aldaw nanggad iyan pag nagpuon na an pagbuhay liwat digdi sa daga sa panahon kan Sangribong Taon na Paghadi ni Cristo! An gabos na nagadanan nin mga mahal sa buhay gustong-gusto nang mahiling giraray an mga ini. Iyan man an namamatian ni Jehova. (Job 14:15) Imahinara an maugmahon na mga paghirilingan giraray na mangyayari sa bilog na daga. Arog kan nanudan ta sa sinundan na artikulo, “an mga matanos,” na an pangaran nakasurat sa libro nin buhay, mabalik para sa “pagkabuhay liwat para sa buhay.” (Gibo 24:15; Juan 5:29) Tibaad dakul sa satong mga mahal sa buhay an bubuhayon liwat digdi sa daga pagkatapos tulos kan Armagedon. b Saro pa, “an mga bakong matanos,” arog kan mga dai nagkaigwa nin igong oportunidad para mamidbid si Jehova o maimbod na paglingkudan siya bago sinda nagadan, bubuhayon sa “pagkabuhay liwat para sa paghukom.”
2-3. (a) Arog kan ipinaparisa sa Isaias 11:9, 10, ano an magigin pinakadakulang programa nin pagtutukdo sa bilog na kasaysayan nin tawo? (b) Ano an pag-uulayan ta sa artikulong ini?
2 An gabos na binuhay liwat na ini kaipuhan na tukduan. (Isa. 26:9; 61:11) Kaya kaipuhan gibuhon an pinakadakulang programa nin pagtutukdo sa bilog na kasaysayan nin tawo. (Basahon an Isaias 11:9, 10.) Taano? An sarong dahilan, iyo na an mga bubuhayon liwat na mga bakong matanos kaipuhan na makanuod manungod ki Jesu-Cristo, sa areglo kan Kahadian, sa pantubos, asin sa unibersal na isyu may koneksiyon sa pangaran asin soberaniya ni Jehova. Maski an mga matanos kaipuhan na tabangan na magin up-to-date sa luway-luway na ihinayag ni Jehova manungod sa saiyang katuyuhan para sa daga. An iba sa mga maimbod na ini nagadan haloy pa bago makumpleto an Bibliya. An mga bakong matanos asin mga matanos dakul pang kaipuhan na manudan.
3 Sa artikulong ini, pag-uulayan ta an minasunod na hapot: Paano gigibuhon an dakulang programang iyan nin pagtutukdo? Ano an magigin epekto kan programang iyan manungod sa kun baga an pangaran kan mga binuhay liwat maisusurat nin permanente sa libro nin buhay o dai? An simbag sa mga hapot na iyan mahalaga sa sato ngunyan. Arog kan maaaraman ta, may interesanteng mga propesiya na nakarekord sa libro nin Daniel asin Kapahayagan na makakatabang para linawon an pakasabot niyato manungod sa kun ano an mangyayari pag binuhay na liwat an mga gadan. Inot, pag-ulayan ta an interesanteng marhay na mga pangyayari na ihinula sa propesiya na yaon sa Daniel 12:1, 2.
AN “MGA NAGTUTUROG SA ALPOG . . . MAMATA”
4-5. Ano an ihinahayag kan Daniel 12:1 manungod sa panahon kan katapusan?
4 Basahon an Daniel 12:1. Ihinahayag kan libro nin Daniel an pagkasunod-sunod kan interesanteng mga pangyayari na mangyayari sa panahon kan katapusan. Halimbawa, ihinahayag sa Daniel 12:1 na si Miguel, na iyo si Jesu-Cristo, “nakatindog alang-alang sa . . . banwaan” nin Diyos. An kabtang na iyan kan propesiya nagpuon na mautob kan 1914 kan nombrahan si Jesus bilang Hadi kan Kahadian nin Diyos sa langit.
5 Minsan siring, sinabi man ki Daniel na si Jesus “matindog” sa “panahon nin kasakitan na dai pa nangyari puon kan panahon na magkaigwa nin nasyon sagkod sa panahon na iyan.” An “panahon nin kasakitan” na sinambit digdi iyo an “dakulang kasakitan” na sinambit sa Mateo 24:21. Si Jesus matindog, o mahiro tanganing idepensa an banwaan nin Diyos, sa katapusan kan panahon na ini nin kasakitan, an buot sabihon, sa Armagedon. An libro nin Kapahayagan sinasambit an mga ini bilang “sarong dakulang kadaklan” na “nakabalyo hali sa nag-aging dakulang kasakitan.”—Kap. 7:9, 14.
6. Ano an mangyayari pagkatapos na makaligtas sa dakulang kasakitan an dakulang kadaklan? Ipaliwanag. (Hilingon man sa isyung ini an “Hapot Hali sa mga Parabasa” manungod sa pagkabuhay liwat para mabuhay digdi sa daga.)
6 Basahon an Daniel 12:2. Ano an mangyayari pagkatapos na an dakulang kadaklan makaligtas sa panahon na iyan nin kasakitan? An propesiyang ini dai nanunungod sa sarong simbolikong pagkabuhay liwat, o panibagong kaigutan sa espirituwal kan mga lingkod nin Diyos na nangyayari sa panahon kan huring mga aldaw, arog kan dating pakasabot ta. c Imbes, an mga tataramon na ini nanunungod sa pagkabuhay liwat kan mga gadan na mangyayari sa maabot na bagong kinaban. Taano ta nasabi ta iyan? An tataramon na “alpog” ginamit man sa Job 17:16 bilang katumbas kan tataramon na “Lubungan.” Ipinaparisa kaini na an Daniel 12:2 nanunungod sa literal na pagbuhay liwat na mangyayari pagkatapos kan huring mga aldaw asin pagkatapos kan ralaban nin Armagedon.
7. (a) Ano an buot sabihon kan sinabi sa Daniel 12:2 na may mga bubuhayon liwat pasiring sa “daing katapusan na buhay”? (b) Paano masasabi na “mas marahay na pagkabuhay liwat” iyan?
7 Pero ano an buot sabihon kan sinabi sa Daniel 12:2 na may mga bubuhayon liwat pasiring sa “daing katapusan na buhay”? Nangangahulugan iyan na idtong mga bubuhayon liwat saka mamimidbid, o padagos na mamimidbid, si Jehova asin si Jesus asin masunod sa sainda durante kan 1,000 taon sa katapos-tapusi mag-aako nin buhay na daing katapusan. (Juan 17:3) Magigin “mas marahay na pagkabuhay liwat” ini kisa sa pagbuhay liwat kaidto sa nagkapirang tawo. (Heb. 11:35) Taano? Huling an bakong perpektong mga tawong idto nagadan giraray.
8. Paano an iba bubuhayon liwat “pasiring sa kasusupgan saka sa daing katapusan na katuyawan”?
8 Pero bako gabos na bubuhayon liwat aakuon an programa nin pagtutukdo ni Jehova. Sinasabi sa propesiya ni Daniel na an iba bubuhayon liwat “pasiring sa kasusupgan saka sa daing katapusan na katuyawan.” Huling ipapahiling ninda an saindang pagigin rebelyoso, an saindang pangaran dai isusurat sa libro nin buhay asin dai sinda mag-aako nin daing katapusan na buhay. Imbes, mag-aako sinda nin “daing katapusan na katuyawan,” o kalaglagan. Kaya an sinasabi kan Daniel 12:2 iyo an pangultimong kaaabtan kan gabos na binuhay liwat base sa kun ano an ginibo ninda pagkatapos na sinda buhayon liwat. d (Kap. 20:12) An iba mag-aako kan daing katapusan na buhay; an iba dai.
‘PAGDARA SA DAKUL PASIRING SA KATANUSAN’
9-10. Ano pa an mangyayari pagkatapos kan dakulang kasakitan, asin sairisay an “masirang nin maliwanag na siring kan kahiwasan nin langit”?
9 Basahon an Daniel 12:3. Ano pa an mangyayari pagkatapos kan maabot na “panahon nin kasakitan”? Apuwera sa Daniel 12:2, an bersikulo 3 nanunungod man sa mangyayari pagkatapos kan dakulang kasakitan.
10 Sairisay an “masirang nin maliwanag na siring kan kahiwasan nin langit”? Tinatawan kita nin ideya kan mga tataramon ni Jesus na yaon sa Mateo 13:43: “Sa panahon na iyan, an mga matanos masirang na siring kaliwanag kan aldaw sa Kahadian kan saindang Ama.” Sa konteksto kan mga tataramon na ini, nagtataram si Jesus manungod sa “mga aki kan Kahadian,” an saiyang linahidan na mga tugang, na maglilingkod kaibanan niya sa Kahadian sa langit. (Mat. 13:38) Kaya an Daniel 12:3 siguradong nanunungod sa mga linahidan asin sa gigibuhon ninda durante kan Sangribong Taon na Paghadi.
An 144,000 makikipagtabangan na marhay ki Jesu-Cristo para direhiran an gibuhon na pagtutukdo na isasagibo durante kan 1,000 taon (Hilingon an parapo 11)
11-12. Magkakaigwa nin anong gibuhon an 144,000 durante kan 1,000 taon?
11 Paano dadarahon kan mga linahidan an “dakul pasiring sa katanusan”? An mga linahidan makikipagtabangan na marhay ki Jesu-Cristo para direhiran an programa nin pagtutukdo na isasagibo digdi sa daga durante kan 1,000 taon. An 144,000 dai lang mamamahala bilang mga hadi kundi maglilingkod man bilang mga saserdote. (Kap. 1:6; 5:10; 20:6) Kaya, matabang sinda “sa pagpaumay kan mga nasyon”—na luway-luway na dinadara an katawuhan pabalik sa pagigin perpekto. (Kap. 22:1, 2; Eze 47:12) Siguradong nakakaugma nanggad iyan para sa mga linahidan!
12 Sairisay an kabilang sa “dakul” na dadarahon pasiring sa katanusan? Makakaibanan digdi idtong mga binuhay liwat asin idtong mga nakaligtas sa Armagedon kaiba na an mga aki na tibaad mamundag sa bagong kinaban. Sa katapusan kan 1,000 taon, an gabos na nabubuhay sa daga magigin perpekto na. Kaya nuarin an saindang pangaran maisusurat na nin permanente sa tinta asin bako na nin lapis sa libro nin buhay?
AN PANGULTIMONG PAGBALO
13-14. Ano an kaipuhan na ipahiling kan gabos na perpektong tawo digdi sa daga bago sinda mag-ako nin buhay na daing katapusan?
13 Dapat na girumdumon ta na an pagigin perpekto dai nangangahulugan na an saro awtomatiko nang mag-aako nin buhay na daing katapusan. Girumdumon si Adan asin Eva. Perpekto sinda, pero kaipuhan ninda kaidto na ipahiling an saindang pagsunod sa Diyos na Jehova bago sinda tawan nin buhay na daing katapusan. Asin, nakakamundo, dai sinda nagin masinunod sa saiya.—Roma 5:12.
14 Ano an magigin kamugtakan kan mga nasa daga sa katapusan kan 1,000 taon? An gabos magigin nang perpekto. An gabos daw na perpektong tawo lubos na susuportaran an pamamahala ni Jehova sagkod pa man? O may magigin mga arog daw ki Adan asin Eva—na sa ibong nin pagigin perpekto nagin bakong maimbod? Kaipuhan na masimbag an mga hapot na iyan, pero paano?
15-16. (a) Nuarin an bilog na katawuhan tatawan nin oportunidad na ipahiling an saindang kaimbudan ki Jehova? (b) Ano an magigin resulta kan pangultimong pagbalong ini?
15 Si Satanas ipepreso sa laog nin 1,000 taon. Sa panahon na iyan, dai niya magigibo na mandaya nin siisay man. Minsan siring, pagkatapos kan 1,000 taon, papaluwason si Satanas sa saiyang presuhan. Dangan pupurbaran niya na dayaon an perpektong mga tawo. Sa panahon na iyan nin pagbalo, an gabos na perpektong tawo digdi sa daga magkakaigwa nin oportunidad na malinaw na ipahiling kun sain sinda kampi sa isyu manungod sa pangaran asin soberaniya nin Diyos. (Kap. 20:7-10) An magigin reaksiyon ninda bilang mga indibidwal sa paghihinguwa ni Satanas iyo an madeterminar kun baga an saindang pangaran dapat na isurat nin permanente sa libro nin buhay.
16 May mga indibidwal, na dai sinambit an eksaktong bilang, an magigin siring ni Adan asin Eva na isisikwal an pamamahala ni Jehova. Ano an mangyayari sa sainda? Sinasabi sato kan Kapahayagan 20:15: “An siisay man na dai nakasurat sa libro nin buhay inapon sa danaw nin kalayo.” Iyo, an mga rebeldeng ini lubos na lalaglagon sagkod lamang. Pero an mayoriya kan perpektong mga tawo makakapasar sa pangultimong pagbalong ini. Dangan maisusurat na nin permanente sa libro nin buhay an saindang pangaran.
DURANTE KAN “PANAHON KAN KATAPUSAN”
17. Ano an sinabi ni Daniel na mangyayari sa satong panahon? (Daniel 12:4, 8-10)
17 Nakakaugma nanggad na isip-isipon an mga mangyayaring ini sa maabot na panahon! Minsan siring, paagi sa sarong anghel nag-ako si Daniel nin nagkapirang mahahalagang impormasyon manungod sa satong panahon, “an panahon kan katapusan.” (Basahon an Daniel 12:4, 8-10; 2 Tim. 3:1-5) Sinabi kan anghel ki Daniel: “Magigin abunda an tunay na kaaraman.” Iyo, an propetikong mga tataramon sa saiyang libro mas lubos na masasabutan kan mga lingkod nin Diyos. Sinabi pa kan anghel na sa panahon na ini, “an mga maraot magibo nin maraot, asin mayo sa mga maraot an makakasabot.”
18. Ano an madali nang mangyari sa mga maraot?
18 Sa ngunyan, an mga maraot garo baga dai napapadusahan sa saindang maraot na mga gibo. (Mal. 3:14, 15) Pero dai na mahahaloy huhusgaran ni Jesus an mga arog-kanding asin isusuway sinda sa mga arog-karnero. (Mat. 25:31-33) An mga maraot na ini dai makakaligtas sa dakulang kasakitan, dai man sinda bubuhayon liwat para mag-istar sa bagong kinaban. An saindang pangaran dai isusurat sa “libro nin girumduman” na sinambit sa Malakias 3:16.
19. Panahon na ngunyan na gibuhon ta an ano, asin taano? (Malakias 3:16-18)
19 Ngunyan na an panahon para patunayan ta na bako kitang kabilang sa mga maraot. (Basahon an Malakias 3:16-18.) Tinitipon ni Jehova an mga ibinibilang niya na “espesyal na pagsadiri,” o mahalagang marhay na rugaring. Siguradong marhay na gusto tang magin kabilang sainda.
Nakakaugma nanggad na mahiling si Daniel, an satong mga mahal sa buhay, asin dakul na iba pa na “magbangon” para akuon an saindang kahirasan sa bagong kinaban! (Hilingon an parapo 20)
20. Ano an huring ipinanuga ki Daniel, asin taano ta hinahalat-halat mo na an kautuban kan panugang iyan?
20 Tunay nanggad, nabubuhay kita sa interesanteng marhay na panahon. Pero urog pang pambihirang mga bagay an madali nang mangyari. Dai na mahahaloy mahihiling ta an paghali sa gabos na karatan. Kasunod kaiyan, mahihiling ta an kautuban kan panuga ni Jehova ki Daniel: “Mabangon ka tanganing akuon an saimong kahirasan sa katapusan kan mga aldaw.” (Dan. 12:13) Gustong-gusto mo na daw na mag-abot an aldaw na si Daniel “mabangon” giraray kaiba kan saimong mga mahal sa buhay? Kun iyo, gibuhon mo ngunyan an pinakamakakaya mo na magin maimbod, asin makakasigurado ka na papagdanayon ni Jehova na nakasurat an saimong pangaran sa saiyang libro nin buhay.
KANTA 80 “Namiti Asin Hilinga Nindo na si Jehova Marahay”
a Ipapahiling sa artikulong ini an sarong pagliliwat sa satong pakasabot manungod sa dakulang programa nin pagtutukdo na ilinadawan sa Daniel 12:2, 3. Sisiyasaton ta kun nuarin ini mangyayari asin kun sairisay an mapartisipar digdi. Aaramon ta man kun paano aandamon kan programang ini nin pagtutukdo an mga nasa daga para sa pangultimong pagbalo pagkatapos kan Sangribong Taon na Paghadi ni Cristo.
b An pagbuhay liwat posibleng magpuon duman sa mga nagadan na maimbod durante kan huring mga aldaw dangan magpapadagos iyan nin pabalik, henerasyon por henerasyon. Kun arog kaiyan an mangyayari, an kada henerasyon magkakaigwa nin oportunidad na sabaton an mga kamidbid ninda. Ano man an mangyari, may sinasambit an Kasuratan na “tamang pagkasunod-sunod” manungod sa pagkabuhay liwat sa langit, asin puwede ta man isipon na an pagkabuhay liwat digdi sa daga gigibuhon man sa aregladong paagi.—1 Cor. 14:33; 15:23.
c An paliwanag na ini sarong pagliliwat sa pakasabot na yaon sa librong Magbigay-Pansin sa Hula ni Daniel! kapitulo 17, asin sa An Torrengbantayan na Hulyo 1, 1987, p. 19-23.
d Sa kabaliktaran, an mga tataramon na “an mga matanos” asin “an mga bakong matanos” na yaon sa Gibo 24:15 asin an mga tataramon na “idtong mga naggiribo nin marahay” asin “idtong mga naggiribo nin karatan” na yaon sa Juan 5:29 nakapokus sa kun ano an ginibo kan mga binuhay liwat bago sinda nagadan.
