1. Paano ta maaaraman na an sarong tawo mapagtitiwalaan?

 AN SARONG mapagtitiwalaan na tawo hinihinguwang utubon an saiyang mga panuga, asin nagsasabi siya ni totoo. (Sal. 15:4) Aram kan mga tawo na puwede sindang magsarig sa saiya. Gusto tang arog kaiyan an mamati sa sato kan satuyang mga tugang. Ano an makakatabang sa sato na makua an tiwala ninda?

2. Paano ta mapapatunayan na mapagtitiwalaan kita?

² Dai ta mapipirit an iba na magtiwala sa sato. An pagtitiwala dapat na hinguwahon na makua. An pagtitiwala garo kuwarta. Masakit iyan na makua, pero madali iyan na mawara. Nakua nanggad ni Jehova an satong tiwala. Nungka siyang matao nin dahilan para mawara an tiwala ta sa saiya huling “an gabos niyang ginigibo mapagtitiwalaan.” (Sal. 33:4) Asin inaasahan niya na aarugon ta siya. (Efe. 5:1) Pag-ulayan ta an nagkapirang halimbawa kan mga lingkod ni Jehova na inarog an saindang Ama sa langit asin pinatunayan na mapagtitiwalaan sinda. Pag-uulayan ta man an limang kuwalidad na makakatabang sa sato na magin mapagtitiwalaan.

3-4. Paano pinatunayan ni propeta Daniel na mapagtitiwalaan siya, asin mapapahiro kita kaiyan na simbagon an anong mga hapot?

³ Si propeta Daniel marahayon na halimbawa sa pagigin mapagtitiwalaan. Dawa ngani dinara siyang bihag kan mga Babilonyo, dai nahaloy nakua niya an reputasyon bilang saro na puwedeng pagtiwalaan. Lalong nagrahay an reputasyon niya kan pig-interpretar niya, sa tabang ni Jehova, an mga pangaturugan kan hadi kan Babilonya na si Nabucodonosor. Sa sarong pangyayari, kinaipuhan ni Daniel na sabihon sa hadi na dai nauugma si Jehova sa saiya— sarong klase nin mensahe na dai gugustuhon na madangog nin sarong hadi. Nangaipo nanggad iyan nin kusog nin buot huling si Nabucodonosor grabe kun maanggot! (Dan. 2:12; 4:20-22, 25) Pakalihis nin dakul na taon, pinatunayan giraray ni Daniel na mapagtitiwalaan siya kan matawan niya nin tamang pakahulugan an sarong misteryosong mensahe na nahiling sa lanob kan palasyo sa Babilonya. (Dan. 5:5, 25-29) Dangan pakalihis pa nin panahon, narisa man ni Dario na Medo asin kan saiyang ninombrahan na mga opisyal an “ekstraordinaryong kadunungan” ni Daniel. Sinabi ninda na si Daniel “mapagtitiwalaan . . . , bakong pabaya, saka mayo siyang ginigibong maraot na bagay.” (Dan. 6:3, 4) Iyo, inadmitir dawa kan paganong mga tagapamahala na mapagtitiwalaan nanggad an parasambang ini ni Jehova!

⁴ Mantang nasa isip an halimbawa ni Daniel, marahay na haputon ta an satong sadiri: ‘Ano an reputasyon ko sa mga bakong Saksi ni Jehova? Midbid daw ako na nag-uutob nin mga paninimbagan asin mapagtitiwalaan?’ Taano ta mahalagang simbagon niyato an mga hapot na iyan? Huling tinatawan ta nin kaumawan si Jehova pag mapagtitiwalaan kita.

5. Taano ta midbid si Hananias bilang saro na mapagtitiwalaan?

⁵ Kan 455 B.C.E., pagkatapos na maitugdok giraray ni Gobernador Nehemias an mga pader kan Jerusalem, naghanap siya nin masasarigan na mga lalaki na maasikaso sa siyudad. Kaiba sa mga pinili ni Nehemias an namamayo sa Kuta na si Hananias. Sinasabi kan Bibliya na si Hananias “mapagkakatiwalaan nanggad  . . . asin [na] an pagkatakot kaini sa tunay na Diyos mas urog kisa sa dakul na iba pa.” (Neh. 7:2) An pagkamuot ki Jehova asin an pagkatakot na mapamundo siya nakapahiro ki Hananias na seryosuhon an ano  man na asignasyon na itinatao sa saiya. An mga kuwalidad na iyan makakatabang man sa sato na magin masasarigan sa satong paglilingkod sa Diyos.

6. Paano pinatunayan ni Tiquico na saro siyang mapagtitiwalaan na amigo ni apostol Pablo?

⁶ Mangnuhon an halimbawa ni Tiquico, na sarong mapagtitiwalaan na kaiba-iba ni apostol Pablo. Kan nakapreso sa harong si Pablo, nagsarig siya ki Tiquico, asin sinabi niya na ini sarong “maimbod na ministro.” (Efe. 6:21, 22) Pinagkatiwalaan siya ni Pablo bako lang para magdara kan mga surat para sa mga tugang sa Efeso saka Colosas kundi para man pakusugon saka rangahon sinda. Nagigirumduman ta sa halimbawa ni Tiquico an maimbod saka maaasahan na mga lalaki na nag-aasikaso sa satong espirituwal na mga pangangaipo ngunyan.—Col. 4:7-9.

7. Ano an manunudan mo sa pagigin mapagtitiwalaan kan mga elder saka ministeryal na lingkod sa saindong kongregasyon?

⁷ Sa ngunyan, ipinagpapasalamat nanggad niyato an satong mapagtitiwalaan na mga elder saka ministeryal na lingkod. Arog ni Daniel, Hananias, saka Tiquico, sineseryoso ninda an saindang mga paninimbagan. Halimbawa, pag nag-aatender kita sa pagtiripon sa tahaw kan semana, sigurado kita na may nakaasignar sa gabos na kabtang kan programa. Asin naaapresyar nanggad kan mga elder pag an mga inasignar ninda maaasahan nindang mapreparar asin mapresentar kan saindang mga kabtang sa pagtiripon! Para iilustrar, dai kita nag-aalangan na imbitaran an satong mga tinutukduan sa Bibliya na mag-atender sa pagtiripon sa puro kan semana ta sigurado kita na igwa nin matao nin pampublikong pahayag. Asin tiwala kita na igwa kitang makukuang mga literatura na kaipuhan ta sa ministeryo. Naaataman nanggad kitang marhay kan maimbod na mga brother na ini, asin nagpapasalamat nanggad kita ki Jehova dahil sa sainda! Pero, sa anong mga paagi niyato mapapatunayan na mapagtitiwalaan kita?

8. Paano ta maipapahiling na balanse kita pag nagpapahiling nin interes sa iba? (Talinhaga 11:13)

⁸ Namumutan ta an satong mga tugang, asin interesado kita sa mga nangyayari sa sainda. Minsan siring, dapat na magin balanse kita asin igalang an saindang pribadong buhay. May mga miyembro kan Kristiyanong kongregasyon kan inot na siglo na “mga tsismosa asin mga parapakilabot sa buhay nin ibang tawo, na nagpaparapangistorya nin mga bagay na dai man ninda dapat ipangistorya.” (1 Tim. 5:13) Habo nanggad niyato na magin arog ninda. Pero ipamugtak na may nag-istorya sa sato nin sarong personal na impormasyon asin dai ta na lang daa iyan ipag-istorya sa iba. Halimbawa, tibaad inistorya sa sato nin sarong sister an manungod sa hilang niya o iba pang pagbalo na napapaatubang sa saiya, asin sinabi niyang dai ta iyan ipag-istorya sa iba. Dapat tang irespeto an pakiulay niya. b (Basahon an Talinhaga 11:13.) Pag-ulayan ta ngunyan an nagkapirang iba pang sitwasyon na diyan mahalaga na pagdanayon tang kumpidensiyal an mga bagay na kumpidensiyal.

9. Paano mapapatunayan kan mga miyembro kan pamilya na mapagtitiwalaan sinda?

⁹ Sa pamilya. An lambang miyembro kan pamilya may responsabilidad na pagdanayon na pribado an nagkapirang bagay manungod sa pamilya. Halimbawa, tibaad an sarong Kristiyana igwa nin kinatudan o ugali na para sa agom niya makangisi. Ipapangistorya daw iyan kan agom na lalaki na magigin dahilan na mapasupog an agom niya? Siyempre dai! Namumutan niya an saiyang agom, asin dai siya magibo nin ano man na makakakulog digdi. (Efe. 5:33) Gusto kan mga tin-edyer na pahilingan sinda nin respeto. Marahay na girumdumon  iyan kan mga magurang. Dai ninda ipapasupog an saindang mga aki paagi sa pag-istorya sa iba kan mga salang nagigibo ninda. (Col. 3:21) An mga aki kaipuhan na makanuod na magin maingat, na dai mag-istorya nin mga impormasyon sa iba na puwedeng makapasupog sa ibang mga miyembro kan pamilya. (Deu. 5:16) Pag ginigibo kan lambang miyembro kan pamilya an kabtang niya na pagdanayon na pribado an mga bagay na dapat na sa pamilya sana, nagkukusog an relasyon kan pamilya.

10. Ano an kalabot sa pagigin tunay na amigo? (Talinhaga 17:17)

¹⁰ Sa satong mga amigo. Sa buhay ta, may mga pagkakataon na kakaipuhanon niyato an sarong dayupot na amigo para masabihan ta kan mga namamatian niyato. Kun minsan tibaad dipisil iyan. Tibaad dai kita tuod na sabihon sa iba an satong kauruiraruming mga kaisipan, asin makukulgan nanggad kita kun sa huri maaraman niyato na an amigong pigsabihan ta kaiyan pigsabi man iyan sa iba. Pero pinapahalagahan nanggad niyato an saro na dai iniistorya sa iba an personal na mga bagay na pigsabi ta saiya! Saro siyang “tunay na amigo.”—Basahon an Talinhaga 17:17.

11. (a) Paano ipinapahiling kan mga elder saka kan saindang agom na masasarigan sinda? (b) Ano an manunudan ta sa sarong elder na may inasikasong kumpidensiyal na bagay manungod sa kongregasyon asin kan huri kaiba na kan saiyang pamilya? (Hilingon an ritrato.)

¹¹ Sa kongregasyon. An mga elder na midbid na mapagkakatiwalaan nin kumpidensiyal na mga bagay siring sa “sarong lugar na pahiplian sa duros, sarong lugar na taguan” para sa saindang mga tugang. (Isa. 32:2) Aram niyato na puwede tang iistorya sa sainda an manungod sa ano man na bagay, huling sigurado kita na ano man an sabihon ta sa sainda papagdanayon ninda iyan na kumpidensiyal. Dai ta sinda pipiriton na sabihon sa sato an mga bagay na dapat nindang pagdanayon na pribado. Dugang pa, inaapresyar ta an mga agom nin elder dahil dai ninda hinihinguwa na makakua nin kumpidensiyal na mga impormasyon hali sa saindang agom. An totoo, makakatabang nanggad kun dai sasabihon kan elder sa agom niya an personal na mga impormasyon manungod sa mga tugang. Sinabi nin sarong agom nin elder: “Nagpapasalamat ako na dai sako sinasabi ni agom an kumpidensiyal na mga impormasyon manungod sa  mga pigse-shepherding niya o kan mga nangangaipo nin tabang sa espirituwal, maski ngani an pangaran ninda dai niya sinasabi sako. Naaapresyar ko na dai ako napapagabatan nin mga isyu na mayo man akong maitatabang. Nagigibo kong makiiba-iba sa gabos sa kongregasyon na dai nag-aalangan. Asin makakapagtiwala ako na pag sinabi ko ki agom an mga namamatian ko o mga problema ko, dai niya man iyan sasabihon sa iba.” Siyempre, gabos kita gustong magkaigwa kan reputasyon na mapagtitiwalaan kita. Anong mga kuwalidad an makakatabang sa sato na magibo iyan? Pag-ulayan ta an lima sa mga iyan.

12. Taano ta masasabi niyato na pagkamuot an pundasyon nin pagtitiwala? Magtao nin halimbawa.

¹² An pagkamuot an pundasyon nin pagtitiwala. Sinabi ni Jesus na an duwang pinakaimportanteng tugon iyo na kamutan si Jehova asin na kamutan an satong kapwa. (Mat. 22:37-39) An pagkamuot niyato ki Jehova nagpapahiro sa sato na arugon an saiyang perpektong halimbawa nin pagigin mapagtitiwalaan. Halimbawa, an pagkamuot niyato sa satong mga tugang nagpapahiro sa sato na pagdanayon na pribado an mga bagay manungod sa sainda. Dai nanggad niyato gugustuhon na iistorya sa iba an sarong bagay na makakadanyar, makakapasupog, o makakakulog sa sainda.—Juan 15:12.

13. Paano kita tinatabangan kan kapakumbabaan na magin mapagtitiwalaan?

¹³ An kapakumbabaan makakatabang sa sato na magin mapagtitiwalaan. An sarong mapakumbabang Kristiyano dai naghihinguwang pahangaon an iba paagi sa pagigin iyo an inot na makapagsabi sa iba kan manungod sa sarong bagay. (Fil. 2:3) Dai niya hinihinguwang isipon kan iba na importanteng tawo siya paagi sa pagparisa na may aram siyang importanteng impormasyon na dai niya dapat sabihon sa iba. Pupugulan man kita kan kapakumbabaan sa pagpalakop nin mga espekulasyon manungod sa mga bagay na dai man pinag-uulayan sa Bibliya o sa satong mga publikasyon na basado sa Bibliya.

14. Paano nakakatabang sa sato an pakasabot na magin mapagtitiwalaan?

¹⁴ An pakasabot makakatabang sa sarong Kristiyano na maaraman kun nuarin an “panahon na magsilensiyo asin panahon na magtaram.” (Ecl. 3:7) “An pagtaram plata, pero an pagsilensiyo bulawan” sarong komun na ekspresyon sa nagkapirang kultura. Sa ibang pagtaram, may mga panahon na mas marahay na magdanay na silensiyo kisa sa magtaram. Angay nanggad an sadol kan Talinhaga 11:12: “An tawong may tunay na pakasabot nagdadanay na silensiyo.” Pag-isipan an sarong halimbawa. May sarong eksperyensiyadong elder na parating pinapakiulayan na tabangan an ibang mga kongregasyon sa saindang dipisil na mga problema. Manungod digdi, ini an sabi kan kapwa niya elder, “Pirmi siyang maingat na nungkang magsabi sa iba nin kumpidensiyal na impormasyon manungod sa ibang mga kongregasyon.” Dahil sa pakasabot o pakamansay kan elder, nakua niya an respeto kan mga elder na kairiba niya sa saindang kongregasyon. Sigurado sinda na dai niya sasabihon sa iba an kumpidensiyal na mga bagay manungod sa saindang kongregasyon.

15. Magtao nin halimbawa kun paano an pagigin sadiyosan makakatabang na makua ta an tiwala kan iba.

¹⁵ An pagigin sadiyosan o onesto saro pang makakatabang para magin mapagtitiwalaan kita. Nagtitiwala kita sa sarong sadiyosan na tawo dahil aram ta na pirmi siyang masabi nin totoo. (Efe. 4:25; Heb. 13:18) Halimbawa, gusto mo ngayang pauswagon an kakayahan mo sa pagtukdo. Kaya may pinakiulayan ka na magdangog sa pahayag mo asin magtao nin kapaki-pakinabang na mga suhestiyon sa kun ano pa an puwede mong pauswagon. Siisay an pagtitiwalaan mo na magtao nin onestong obserbasyon? An saro daw na nagsasabi lang saimo kan gusto mong madangog, o an saro na may kabuutan na sinasabi  saimo an totoo? Siyempre, malinaw an simbag. Sinasabi kan Bibliya: “Mas marahay an hayagan na pagsagwi kisa sa tagong pagkamuot. An mga lugad hali sa sarong amigo maimbod.” (Tal. 27:5, 6) Dawa ngani sa primero masakit akuon an onestong komento nin sarong amigo, sa huri makikinabang kita diyan.

16. Paano idinuduon kan Talinhaga 10:19 na kaipuhan ta an pagpupugol sa sadiri?

¹⁶ An pagpupugol sa sadiri mahalagang marhay para makua ta an tiwala kan iba. An kuwalidad na iyan nakakatabang sa sato na pugulan an satong mga ngabil pag natetentaran kitang sabihon sa iba an sarong bagay na dai ta dapat ipangistorya. (Basahon an Talinhaga 10:19.) Tibaad masakitan kitang pugulan an satong sadiri pag naggagamit kita nin social media. Kun dai kita mag-iingat, puwede tang maihayag nin dai tinutuyo an kumpidensiyal na mga bagay sa dakul na tawo. Asin pag naipalakop ta na an impormasyon na iyan sa social media, dai na niyato makokontrol kun paano iyan gagamiton o kun gurano kadakula an puwedeng magin danyos kaiyan. Makakatabang man sa sato an pagpupugol sa sadiri na magdanay na silensiyo pag linalansi kita kan mga nagkokontra na maghayag nin mga bagay na puwedeng magsapeligro sa satong mga tugang. Puwedeng mangyari ini pag inuusisa kita kan mga pulis sa nasyon kun sain an satong gibuhon ipinagbabawal o may restriksiyon. Sa mga sitwasyon na ini asin sa iba pa, puwede tang iaplikar an prinsipyong “bantayan [an satong] nguso paagi sa pagbusal kaiyan.” (Sal. 39:1) Kita man nasa laog kan satong pamilya, kaiba kan satong mga amigo o mga tugang, o nin siisay pa man, kaipuhan tang magin mapagtitiwalaan. Asin tanganing magin mapagtitiwalaan, kaipuhan ta an pagpupugol sa sadiri.

17. Paano kita makakatabang na kumusog an pagtitiwala sa laog kan kongregasyon?

¹⁷ Nagpapasalamat nanggad kita na giniyahan kita ni Jehova pasiring sa kasararuan nin magturugang na kompuwesto nin mga tawo na mamumuton asin mapagtitiwalaan! Gabos kita igwa nin responsabilidad na hinguwahon na makua an tiwala kan satong mga tugang. Mantang hinihinguwa kan lambang saro sa sato na magpahiling nin pagkamuot, kapakumbabaan, pakasabot, pagigin sadiyosan, asin pagpupugol sa sadiri, nakakatabang kita na kumusog an pagtitiwala sa laog kan kongregasyon. An pagpakusog nin pagtitiwala sarong nagpapadagos na proseso. Lugod na arugon ta an satong Diyos, si Jehova, asin padagos tang patunayan na mapagtitiwalaan kita.