1. Taano ta dai kita nagngangalas na mahiling sa kinaban an kawaran nin pagtitiwala?

 DAI aram kan mga tawo sa kinaban ni Satanas kun siisay an pagtitiwalaan ninda. Parati sindang nadidisganar kan paggawi kan mga negosyante asin kan mga lider nin pulitika asin relihiyon. Puwede man nindang mamatian iyan sa mga amigo ninda, pagtaraid, asin dawa ngani sa mga kapamilya ninda. Dai na kita dapat magngalas diyan. Ihinula kan Bibliya: “Sa huring mga aldaw . . . an mga tawo magigin . . . bakong maimbod, . . . parapakaraot, . . . traydor.” Sa ibang pagtaram, ipapahiling kan mga tawo an personalidad kan Diyos kan sistemang ini nin mga bagay, na dai nanggad mapagtitiwalaan.—2 Tim. 3:1-4; 2 Cor. 4:4.

2. (a) Kiisay kita lubos na makakapagtiwala? (b) Ano an tibaad maisip kan nagkapira?

² Pero bilang mga Kristiyano, aram niyato na puwede tang lubos na pagtiwalaan si Jehova. (Jer. 17:7, 8) Kumbinsido kita na namumutan niya kita asin na “dai [niya] nuarin man babayaan” an saiyang mga amigo. (Sal. 9:10) Makakapagtiwala man kita ki Cristo Jesus huling itinao niya an saiyang buhay para sa sato. (1 Ped. 3:18) Asin nanudan ta sa personal na eksperyensiya na an Bibliya nagtatao nin masasarigan na paggiya. (2 Tim. 3:16, 17) Sigurado kita na makakapagtiwala kita ki Jehova, ki Jesus, saka sa Bibliya. Pero tibaad maisip kan nagkapira, ‘Puwede ta daw na pirming pagtiwalaan an mga tugang sa kongregasyon?’ Kun iyo, taano ta makakapagtiwala kita sa sainda?

3. Anong pambihirang pribilehiyo an igwa kita? (Mar. 10:29, 30)

³ Pinili kita ni Jehova na magin parte kan saiyang pambilog na kinaban na pamilya nin mga parasamba. Isipa na sana an pambihirang pribilehiyong iyan asin an dakul na pakinabang na dara kaiyan! (Basahon an Marcos 10:29, 30.) Sa bilog na kinaban, igwa kita nin mga tugang na arog ta namumutan man si Jehova asin ginigibo an saindang pinakamakakaya na mamuhay kauyon kan saiyang mga pamantayan.  An satong lengguwahe, kultura, saka pagbado tibaad lain kan sa sainda, pero namamati niyato na magkadarayupot kita, dawa pag primerong beses ta pa lang na pagkahirilingan. Gustong-gusto ta lalo na an makaibanan niyato sinda sa pag-umaw asin pagsamba sa satong mamumuton na Ama sa langit.—Sal. 133:1.

4. Taano ta kaipuhan niyato an satong mga tugang?

⁴ Kaipuhan ta lalong-lalo na ngunyan na magdanay na nagkakasararo kaiba kan satong mga tugang. Kun minsan tinatabangan ninda kita na darahon an satong mga pasanon. (Roma 15:1; Gal. 6:2) Dinadagka man ninda kita na magdanay na aktibo sa paglilingkod ki Jehova asin magdanay na makusog sa espirituwal. (1 Tes. 5:11; Heb. 10:23-25) Paano na sana kita kun mayo kita kan proteksiyon kan kongregasyon para tabangan kitang marigon na makapanindugan laban sa satong mga kaiwal—si Satanas na Diyablo asin an saiyang maraot na kinaban? Si Satanas asin an mga nasa kontrol niya, madali nang atakihon an mga lingkod nin Diyos. Sa panahon na iyan, ipagpapasalamat nanggad niyato na kaibanan ta an satong mga tugang!

5. Taano ta dipisil kun minsan para sa iba na magtiwala sa saindang mga tugang?

⁵ Alagad an iba nasasakitan na magtiwala sa saindang mga tugang, posibleng dahil an sarong kapagtubod na sinabihan nin kumpidensiyal na bagay inistorya iyan sa iba o dai inutob an ipinanuga niya. O tibaad may kakongregasyon sinda na nakapagsabi o nakagibo nin sarong bagay na nakakulog na marhay sa sainda. An arog kaiyan na mga eksperyensiya puwedeng makapadipisil na magtiwala sa iba. Kaya, ano an makakatabang sa sato na mapakusog an satong pagtitiwala sa mga kapwa parasamba?

6. Paano makakatabang sa sato an pagkamuot na kumusog an pagtitiwala? (1 Corinto 13:4-8)

⁶ Pagkamuot an basehan nin pagtitiwala. Sinambit sa 1 Corinto kapitulo 13 an dakul na aspekto nin pagkamuot na makakatabang sa sato na pakusugon o pakusugon giraray an satong pagtitiwala sa iba. (Basahon an 1 Corinto 13:4-8.) Halimbawa, sinasabi sa bersikulo 4 na  “an pagkamuot mapasensiya asin mabuot.” Si Jehova mapasensiya sa sato dawa pag nagkakasala kita sa saiya. Kun siring, dapat nanggad kitang magin mapasensiya sa satong mga tugang kun makasabi o makagibo sinda nin mga bagay na nakakairitar o nakakakulog kan satong buot. Sinabi man sa bersikulo 5: “[An pagkamuot bakong] arangguton. Dai iyan nagbibilang kan mga maraot na ginibo nin iba.” Habo tang ‘bilangon an mga maraot na ginibo’ kan satong mga tugang na garo baga tinatandaan ta an mga sinabi o ginibo ninda na nakakulog sa sato para gamiton iyan laban sa sainda pag-abot nin panahon. Sinasabi sa Eclesiastes 7:9 na dapat na “dai [kita] tulos makulgan nin buot.” Mas marahay nanggad na iaplikar an mga tataramon na nasa Efeso 4:26: “Dai nindo pagpasulnupon an aldaw na anggot pa kamo”!

7. Paano makakatabang sa sato an mga prinsipyo na nasa Mateo 7:1-5 na mapakusog an satong pagtitiwala?

⁷ An saro pang makakatabang na mapakusog an satong pagtitiwala iyo na hilingon ta an satong mga tugang arog kan paghiling sa sainda ni Jehova. Namumutan sinda nin Diyos asin dai niya binabantayan an saindang mga kasalan. Dapat na arog man kita kaiyan. (Sal. 130:3) Imbes na magparapokus sa saindang mga sala, dapat tang hinguwahon na hilingon an saindang marahay na mga kuwalidad asin isipon an marahay na mga bagay na magigibo ninda. (Basahon an Mateo 7:1-5.) Dai ta pinagdududahan an mga intensiyon ninda huling an pagkamuot “tinitiwalaan an gabos na bagay.” (1 Cor. 13:7) An mga tataramon na iyan dai nangangahulugan na inaasahan sa sato ni Jehova na basta-basta na lang kita magtitiwala sa iba; kundi, inaasahan niya na magtitiwala kita sa sainda huling ipinahiling ninda na mapagtitiwalaan sinda. b

8. Paano mo mapapakusog an pagtitiwala mo sa saimong mga tugang?

⁸ An pagtitiwala, arog nin respeto, kaipuhan nin paghihinguwa tanganing makua, asin nangangaipo iyan nin panahon. Paano mo mapapakusog an pagtitiwala mo sa mga tugang? Midbidon mo sindang marhay. Makipag-ulay sa sainda sa mga pagtiripon kan kongregasyon. Makipartner sa sainda sa ministeryo. Magin mapasensiya sa sainda, na tinatawan sinda kan oportunidad na ipahiling na mapagtitiwalaan sinda. Sa primero, tibaad magin mapamili ka sa kun anong personal na mga bagay an iiistorya mo sa saro na minimidbid mo pa lang. Mantang nagkukusog an relasyon nindo, tibaad mas komportable ka nang magsabi kan mga namamatian mo. (Luc. 16:10) Pero ano an puwede mong gibuhon kun rinaot nin sarong tugang an tiwala mo sa saiya? Dai tulos tapuson an pagigin mag-amigo nindo. Imbes, palihison nguna an panahon. Asin dai pagtugutan an mga paggawi kan pipira man sana na makadisganar sa saimo na magtiwala sa saimong mga tugang. Manungod digdi, pag-uulayan ta an halimbawa kan nagkapira sa maimbod na mga lingkod ni Jehova na dawa may nakakulog kan saindang buot nagtiwala pa man giraray sa iba.

9. (a) Paano napagdanay ni Hana an pagtitiwala niya sa areglo ni Jehova sa ibong kan mga pagkukulang kan pira sa mga representante niya? (b) Ano an itinutukdo sa saimo kan eksperyensiya ni Hana manungod sa pagtitiwala sa areglo ni Jehova? (Hilingon an ritrato.)

⁹ Nakulgan na daw an buot mo huli sa ginibo nin sarong responsableng brother? Kun iyo, makikinabang ka sa halimbawa ni Hana. An may panginot na espirituwal na awtoridad kan panahon na idto sa Israel iyo an Halangkaw na Saserdoteng si Eli. Pero bakong marahay na halimbawa an saiyang pamilya. An saiyang mga aking lalaki na naglilingkod sa nombradong mga katungdan, regular na naggigibo nin makasusupog asin imoral na paggawi. Pero dai ginibo kan saindang ama an maninigo para itanos sinda. Dai tulos hinali ni Jehova  si Eli sa katungdan kaini. Sa ibong kaiyan, dai isinikwal ni Hana an areglo nin Diyos paagi sa pagsayumang magsamba sa tabernakulo sagkod na si Eli pa an halangkaw na saserdote. Kan mahiling ni Eli na namimibi si Hana na may grabeng kapurisawan, inisip niya na burat ini. Pigkritika niya tulos an napupurisaw na babaying ini na dai nguna inaaram an tunay na mga pangyayari. (1 Sam. 1:12-16) Dawa arog kaiyan, nagpromesa si Hana na kun magkakaigwa siya nin aking lalaki, dadarahon niya ini sa tabernakulo para maglingkod duman kun sain mapapasairarom ini sa pangangataman ni Eli. (1 Sam. 1:11) Kaipuhan daw na itanos an paggawi kan mga aking lalaki ni Eli? Iyo, asin inaksiyunan iyan ni Jehova sa tamang panahon. (1 Sam. 4:17) Si Hana man binendisyunan nin Diyos nin sarong aking lalaki, si Samuel.—1 Sam. 1:17-20.

10. Paano pinagdanay ni David an pagtitiwala niya sa iba sa ibong kan saiyang maraot na eksperyensiya?

¹⁰ Pigtraydor ka na daw nin sarong dayupot na amigo? Kun iyo, pag-isipan an eksperyensiya ni Hading David. An saro sa mga amigo niya iyo si Ahitofel. Pero kan purbaran kan aking lalaki ni David na si Absalom na agawon an pagkahadi sa saiyang ama, uminiba si Ahitofel ki Absalom sa rebelyon. Siguradong nakulgan na marhay si David kan mawara na sa saiya an suporta kan saiyang aki asin kan lalaking ibinilang niyang amigo! Alagad, dai tinugutan ni David an pagtraydor na ini na papunduhon siya sa pagtitiwala sa iba. Padagos niyang pinagtiwalaan an saro pa niyang maimbod na amigo, si Husai, na nagsayumang umiba sa rebelyon. Dai napasala si David sa pagtitiwala niya digdi. Pinatunayan ni Husai na saro siyang marahay na amigo, asin isinapeligro pa ngani an saiyang buhay para tabangan si David.—2 Sam. 17:1-16.

11. Sa anong paagi nagpahiling nin pagtitiwala an saro sa mga suruguon ni Nabal?

¹¹ Pag-isipan an halimbawa kan saro sa mga suruguon ni Nabal. Mabuot na prinotektaran ni David asin kan mga tawuhan niya an mga suruguon kan Israelitang si Nabal. Paghaloy-haloy, nakiulay si David sa mayaman na si Nabal na tawan nin kakanon an mga tawuhan niya, ano man na maitatao ni Nabal. Kan magsayuma si Nabal sa simpleng pakiulay na iyan, naanggot na marhay si David kaya nagdesisyon ining gadanon an gabos na lalaki sa harong ni Nabal. Ibinareta kan sarong suruguon an sitwasyon sa agom ni Nabal na si Abigail. Bilang saro sa mga suruguon ni Nabal, aram niya na nasa kamot ni Abigail an buhay niya. Imbes na magdulag, nagtiwala siya na mareresolberan ni Abigail an sitwasyon. Arog kaiyan kadakula an pagtitiwala niya ki Abigail dahil midbid ini bilang sarong  babayi na may pakasabot. Asin dai siya napasala sa pagtitiwalang iyan. Huminiro si Abigail nin may kusog nin buot paagi sa pagkumbinsir ki David na dai idagos an plano kaini. (1 Sam. 25:2-35) Nagtiwala siya na mahiro nin may pagkarasonable si David.

12. Paano ipinahiling ni Jesus na nagtiwala siya sa mga disipulo niya sa ibong kan mga salang nagibo ninda?

¹² Nagtiwala si Jesus sa mga disipulo niya sa ibong kan mga salang nagibo ninda. (Juan 15:15, 16) Kan maghagad si Santiago asin Juan ki Jesus nin sarong espesyal na posisyon sa Kahadian, dai kinuwestiyon ni Jesus an mga motibo ninda sa paglilingkod ki Jehova asin dai niya man sinda hinali bilang mga apostol. (Mar. 10:35-40) Pag-abot nin panahon, binayaan si Jesus kan gabos niyang disipulo kan bangging arestaron siya. (Mat. 26:56) Alagad, nungkang nawara an pagtitiwala ni Jesus sa sainda. Aram niyang marhay an mga kaluyahan ninda; dawa arog kaiyan, “namutan niya sinda sagkod sa katapusan.” (Juan 13:1) Kan mabuhay na liwat si Jesus, tinawan niya pa ngani an saiyang 11 maimbod na apostol kan magabat na paninimbagan na panginutan an gibuhon na paggibo nin mga disipulo asin an pangangataman sa saiyang namumutan na marhay na mga karnero. (Mat. 28:19, 20; Juan 21:15-17) Dai napasala an pagtitiwala niya sa bakong perpektong mga lalaking ini. Gabos sinda maimbod na naglingkod sagkod na matapos an saindang buhay digdi sa daga. Iyo, si Hana, si David, an suruguon ni Nabal, si Abigail, asin si Jesus nagin marahayon na halimbawa sa pagtitiwala sa bakong perpektong mga tawo.

13. Ano an sarong puwedeng makapaluya sa pagtitiwala?

¹³ May ipinagkatiwala ka na daw sa sarong tugang na sarong kumpidensiyal na impormasyon tapos naaraman mo kan huri na inistorya niya palan iyan sa iba? Nakakapangluya nanggad iyan nin buot. Sarong beses, may sister na nag-istorya nin sarong personal na bagay sa sarong elder. Kinaagahan, inapudan kan agom kan elder an sister tanganing pakusugon ini, kaya malinaw na aram niya an personal na bagay na sinabi kan sister sa elder. Natural sana na lumuya an tiwala kan sister sa elder. Pero marahay na sana ta naghagad nin tabang an sister. Nagdulok siya sa saro pang elder, asin tinabangan siya kaini na mapakusog giraray an pagtitiwala niya sa mga elder.

14. Ano an nakatabang sa sarong brother na mapakusog giraray an pagtitiwala niya?

¹⁴ May sarong brother na haloy nang may kulog nin buot sa duwang elder na pagmati niya dai niya mapagtitiwalaan. Alagad, pinunan niyang isip-isipon an sinabi nin sarong brother na iginagalang niyang marhay. An simple pero mapuwersang sinabi kan brother iyo ini: “Si Satanas an kaiwal, bako an satong mga tugang.” Hinurop-hurop na marhay kan brother an mga tataramon na iyan na may kaibang pagpamibi, asin pag-abot nin panahon nagibo niyang makipagkatuninungan sa duwang elder.

15. Taano ta tibaad mahaloy bago maibalik giraray an tiwala? Magtao nin halimbawa.

¹⁵ Nawaran ka na daw nin pribilehiyo? Puwedeng magin makulugon iyan. Si Grete saka an saiyang ina maimbod na mga Saksi sa Nazi Germany kan mga dekada nin 1930 na sa panahon na iyan ipinagbabawal an satong gibuhon. Maugma si Grete sa pribilehiyong mag-type nin mga kopya kan The Watchtower para sa saiyang mga kapagtubod. Pero kan maaraman kan mga brother na kontra sa katotoohan an saiyang ama, hinali ninda sa saiya an pribilehiyong iyan, dahil sa takot na ’baad isumbong kan saiyang ama an kongregasyon sa mga nagkokontra. Bako lang iyan an nagin mga pagbalo ki Grete. Sa bilog na Ikaduwang Giyera Mundiyal, dai pigtatawanan kan mga tugang si Grete saka an saiyang ina nin mga kopya kan mga magasin asin dai nakikipag-ulay sa sainda pag nagkakanuparan sa tinampo. Makulugon nanggad iyan sa buot! Grabe an nagin epekto kaiyan ki Grete, asin sinabi niya na nahaloy bago niya nagibong magpatawad asin magtiwala giraray sa mga tugang na idto. Pero pag-abot  nin panahon, sinabi niya na siguradong napatawad na sinda ni Jehova, kaya dapat magpatawad na man siya. c

16. Taano ta dapat tang hinguwahon na pangganahan an ano man na ulang sa pagpakusog niyato kan satong pagtitiwala?

¹⁶ Kun nagkaigwa ka na nin kaagid na makulugon na eksperyensiya, hinguwahon na maibalik giraray an saimong pagtitiwala. Tibaad mangaipo iyan nin panahon, pero magigin sulit nanggad an mga paghihinguwa mo. Para iilustrar, kun naeksperyensiyahan ta nang mahilo o mahudong nin kakanon, tibaad magin mas maingat na kita manungod sa mga kinakakan ta. Minsan siring, an sarong bakong magayon na pangyayaring iyan dai man magigin dahilan na dai na lamang kita makakan. Sa kaagid na paagi, dai ta dapat pagtugutan na an sarong maraot na eksperyensiya paluyahon an satong pagtitiwala sa gabos na tugang niyato, na aram ta man na mga bakong perpekto. Pag hinihinguwa tang pakusugon giraray an satong pagtitiwala, magigin mas maugma kita asin mas makakapokus sa kun ano an puwede niyatong gibuhon para makatabang na kumusog an pagtitiwala sa laog kan satong kongregasyon.

17. Taano ta mahalagang marhay an pagtitiwala, asin ano an pag-uulayan niyato sa sunod na artikulo?

¹⁷ An pagtitiwala bihira sa kinaban ni Satanas, pero an pagtitiwala na basado sa pagkamuot hiling-hiling sa satong pambilog na kinaban na kasararuan nin magturugang. An pagtitiwalang iyan nakakakontribwir sa satong kaugmahan asin pagkasararo ngunyan asin magigin proteksiyon sa sato pag mapaatubang na kita sa maabot na masakit na mga panahon. Paano kun may nakakulog kan saimong buot asin nawaran ka na nin tiwala sa saiya? Hinguwahon na hilingon an mga bagay-bagay uyon sa paghiling diyan ni Jehova, iaplikar an mga prinsipyo sa Bibliya, magkaigwa nin hararom na pagkamuot sa mga tugang, asin makanuod sa mga halimbawa sa Bibliya. Mahahali ta an namamatian tang kulog nin buot asin maibabalik an satong pagtitiwala sa iba. Mantang ginigibo ta iyan, makakamtan niyato an bendisyon na magkaigwa nin dakul na amigo na “nagdadanay na mas dayupot pa kisa sa sarong tugang.” (Tal. 18:24) Pero bakong igo na magtiwala kita sa iba, dapat na maaraman ninda na mapagtitiwalaan man ninda kita. Sa sunod na artikulo, pag-uulayan niyato kun paano ta mapapatunayan na angay kitang pagtiwalaan kan satong mga tugang.