1. Pag nagpipili nin maaagom, anong mga hapot an dapat na pag-isipan nin sarong sister?

AN GABOS na Kristiyano yaon sa irarom kan awtoridad ni Jesu-Cristo na sarong perpektong payo. Minsan siring, pag an sarong Kristiyana mag-agom, napapasairarom siya sa pagkapayo kan sarong bakong perpektong lalaki. Puwedeng magin dipisil iyan. Kaya pag nagpipili nin maaagom, marahay na haputon niya an saiyang sadiri: ‘Ano an nahihiling ko sa brother na ini na nagpaparisa na magigin marahay siyang payo nin pamilya? Panginot daw sa buhay niya an espirituwal na mga aktibidad? Kun bako, magigin marahay daw siyang espirituwal na payo pag mag-agom na kami?’ Siyempre, dapat man na haputon kan sister an saiyang sadiri: ‘Anong mga kuwalidad an igwa ako na makakatabang pag mag-agom na kami? Mapasensiya daw ako saka bukas-palad? Makusog daw an relasyon ko ki Jehova?’ (Par. 4:9, 12) Kun naggigibo nin madunong na mga desisyon an sarong babayi bago mag-agom, makakatabang iyan saiya na magkaigwa nin maugmang buhay may agom.

2. Ano an pag-uulayan ta sa artikulong ini?

² Minilyon na sister an marahayon na halimbawa sa pagigin mapagpasakop sa saindang agom. Angay nanggad sindang komendaran! Nakakaugma talaga na maglingkod ki Jehova kaiba an maimbod na mga babaying ini! Sa artikulong ini, pag-uulayan ta an simbag sa tulong hapot: (1) Ano an nagkapirang kadipisilan na tibaad mapaatubang sa mga agom na babayi? (2) Taano ta pipilion nin agom na babayi na magpasakop sa saiyang agom? (3) Ano an manunudan kan mga Kristiyanong agom na lalaki asin agom na babayi manungod sa pagpapasakop sa halimbawa ni Jesus, Abigail, asin Maria, na agom ni Jose asin ina ni Jesus?

3. Taano ta mayong perpektong pag-aguman?

³ An pag-aguman sarong perpektong regalo hali sa Diyos, pero an mga tawo bakong perpekto. (1 Juan 1:8) Kaya pinapatanidan kan Tataramon nin Diyos an mga mag-agom na makakaeksperyensiya sinda nin mga kadipisilan na inaapod na “bagong mga kasakitan sa buhay.” (1 Cor. 7:28) Pag-ulayan ta an pira sana sa mga kadipisilan na puwedeng mapaatubang sa mga agom na babayi.

4. Taano ta tibaad mamati nin agom na babayi na nakakapamenos an pagpasakop sa saiyang agom?

⁴ Kun minsan, huli sa dinakulaan kan agom na babayi, tibaad mamati niya na nakakapamenos an pagpapasakop sa agom niya. Si Marisol, na nakaistar sa Estados Unidos, nagsabi: “Sa dinakulaan kong lugar, pirming sinasabi sa mga babayi na dapat na kapantay ninda an mga lalaki sa gabos na bagay. Aram ko na ginibo ni Jehova an areglo sa pagkapayo asin tinawan niya an mga babayi kan papel na magin masinunod sa agom ninda. Pero siyempre, maninigo man sindang igalang. Dawa arog kaiyan, bakong madali na mapagdanay an balanseng pagmansay sa pagkapayo.”

5. Anong bakong basado sa Kasuratan na mga kaisipan igwa an nagkapira manungod sa papel kan mga babayi?

⁵ Sa kabaliktaran, tibaad iniisip kan agom nin sarong babayi na bakong gayong mahalaga an mga babayi kumpara sa mga lalaki. Si Ivon, na sarong sister na nakaistar sa Timog Amerika, nagsabi: “Sa lugar mi, naiinot na magkakan an mga lalaki bago an mga babayi. An mga aking babayi an máluto saka málinig, pero an mga aking lalaki seserbihan kan saindang ina saka kan mga tugang niyang babayi, asin sinasabi sainda na sinda an ‘hadi sa harong.’” Si Yingling, na sarong sister na nakaistar sa Asia, nagsabi: “Sa lengguwahe mi, may kasabihan na nagpaparisa na dai kaipuhan kan mga babayi na magin madunong o magkaigwa nin mga kasanayan. Para lang sinda sa mga gibuhon sa harong; dai sinda puwedeng magtao nin ano man na opinyon sa saindang agom.” An mga kaisipan na iyan bakong mamumuton saka bakong basado sa Kasuratan. Kun arog kaiyan an kaisipan kan agom na lalaki, masasakitan an agom niya, dai niya maaarog si Jesus, saka mapapaanggot niya si Jehova.—Efe. 5:28, 29; 1 Ped. 3:7.

6. Ano an kaipuhan na gibuhon kan mga agom na babayi tanganing mapakusog an saindang personal na relasyon ki Jehova?

⁶ Arog kan sinabi sa sinundan na artikulo, inaasahan ni Jehova na itatao kan Kristiyanong mga agom na lalaki an espirituwal, emosyonal, asin materyal na mga pangangaipo kan saindang pamilya. (1 Tim. 5:8) Dawa arog kaiyan, kaipuhan kan Kristiyanong mga agom na babayi na magtao nin panahon kada aldaw para basahon asin hurop-hurupon an Tataramon nin Diyos asin udok sa pusong mamibi ki Jehova. Puwedeng magin dipisil iyan. Dakul an gibuhon kan mga agom na babayi, kaya tibaad mamati ninda na mayo na sindang panahon o kusog para gibuhon an mga iyan, pero mahalagang marhay na tawan ninda iyan nin panahon. Taano? Huling gusto ni Jehova na an lambang saro sato magkaigwa nin personal na relasyon sa saiya asin mapagdanay iyan.—Gibo 17:27.

7. Ano an makakatabang sa agom na babayi para mas magin madali sa saiya na gibuhon an saiyang asignasyon?

⁷ Natural sana na tibaad masakitan an sarong agom na babayi na magin mapagpasakop sa saiyang bakong perpektong agom. Pero, mas magigin madali sa saiya na gibuhon an asignasyon na itinao sa saiya ni Jehova kun nasasabutan asin inaako niya an basado sa Kasuratan na mga dahilan kun taano ta dapat siyang magin mapagpasakop.

8. Arog kan sinasabi sa Efeso 5:22-24, taano ta pipilion nin sarong Kristiyanong agom na babayi na magpasakop sa saiyang agom?

⁸ Pipilion nin sarong Kristiyanong agom na babayi na magpasakop sa saiyang agom huling iyan  an hinahagad sa saiya ni Jehova. (Basahon an Efeso 5:22-24.) Nagtitiwala siya sa saiyang Ama sa langit, huling aram niya na namumutan Niya siya asin para sa pinakaikakarahay niya an ano man na ipapagibo Niya sa saiya.—Deut. 6:24; 1 Juan 5:3.

9. Ano an mangyayari kun iginagalang nin sarong sister an awtoridad kan saiyang agom?

⁹ Ineengkaminar kan kinaban an mga babayi na baliwalaon an mga pamantayan ni Jehova asin isipon na nakakapamenos an pagpapasakop. Siyempre an mga nagpapalakop kan mga arog kaiyan na kaisipan dai nakakamidbid sa satong mamumuton na Diyos. Nungkang tatawan ni Jehova an saiyang namumutan na mga aking babayi nin pagbuot na makakapamenos sa sainda. Kun nagmamaigot an sarong sister na utubon an papel na inasignar saiya ni Jehova, makakatabang siya na magin matuninong an pamilya niya. (Sal. 119:165) Makikinabang an agom niya, siya mismo, asin an mga aki.

10. Ano an mga manunudan ta sa sinabi ni Carol?

¹⁰ Kun an agom na babayi nagpapasakop sa saiyang bakong perpektong agom, pinapatunayan niya na namumutan asin iginagalang niya si Jehova, an saro na kag-establisar kan pagkapayo. Si Carol, na nakaistar sa Timog Amerika, nagsabi: “Aram ko na makakagibo nin mga sala si agom. Aram ko man na ipinapahiling kan reaksiyon ko pag napapasala siya kun gurano kahalaga sako an dayupot na relasyon ko ki Jehova. Kaya hinihinguwa kong magdanay na mapagpasakop huling gusto kong mapaugma an sakong Ama sa langit.”

11. Ano an nakakatabang sa sister na si Aneese na magin mapagpatawad, asin ano an manunudan ta sa sinabi niya?

¹¹ Puwedeng magin dipisil sa agom na babayi na igalang saka magpasakop sa saiyang agom kun namamati niya na garo daing pakiaram an saiyang agom sa saiyang mga namamatian asin mga ikinakahadit. Pero mangnuhon kun ano an ginigibo ni Aneese pag nangyayari iyan. Sinabi niya: “Hinihinguwa ko na dai maghinanakit. Ginigirumdom ko na gabos kita nasasala. An pasuhan ko iyo na lubos na magpatawad arog ni Jehova. Pag nagpapatawad ako, nagigin matuninong giraray an isip ko.” (Sal. 86:5) Kun mapagpatawad an sarong agom na babayi, mas madali para sa saiya na magin mapagpasakop.

12. Anong mga halimbawa an mahihiling sa Bibliya?

¹² Tibaad isipon kan iba na maluya an saro kun mapagpasakop siya. Pero bako nanggad iyan totoo. Mababasa sa Bibliya an dakul na halimbawa  kan mapagpasakop na mga indibidwal na may dakulang kusog nin buot. Pag-ulayan niyato kun ano an manunudan ta ki Jesus, Abigail, asin Maria.

13. Taano ta nagpapasakop si Jesus ki Jehova? Ipaliwanag.

¹³ Nagpapasakop si Jesus ki Jehova, bako nanggad huli ta bako siyang madunong o kulang an saiyang kasanayan. An saiyang simple asin malinaw na pagtutukdo patunay na madunong nanggad si Jesus. (Juan 7:45, 46) Kumbinsidong marhay si Jehova sa kakayahan ni Jesus kaya tinugutan niya ining magtrabaho kaiba Niya sa paglalang ni Jehova kan uniberso. (Tal. 8:30; Heb. 1:2-4) Asin puon kan buhayon liwat si Jesus, ipinagkatiwala sa saiya ni Jehova an “gabos na awtoridad sa langit asin sa daga.” (Mat. 28:18) Dawa ngani madunong si Jesus, naghahagad pa man giraray siya ki Jehova nin paggiya. Taano? Huling namumutan niya an saiyang Ama.—Juan 14:31.

14. Ano an manunudan kan mga agom na lalaki sa (a) pagmansay ni Jehova sa mga babayi? (b) mga mababasa sa Talinhaga 31?

¹⁴ Kun ano an manunudan kan mga agom na lalaki. Ginibo ni Jehova na magin sakop an mga agom na babayi kan saindang agom bako huling ibinibilang niyang mas hababa an mga babayi kumpara sa mga lalaki. Malinaw iyan na ipinahiling ni Jehova kan pareho niyang pilion an mga babayi asin mga lalaki na magin kairibang tagapamahala ni Jesus. (Gal. 3:26-29) Ipinahiling ni Jehova na may tiwala siya sa saiyang Aki paagi sa pagtao niya digdi nin awtoridad. Kaagid kaiyan, pinagkakatiwalaan man kan agom na lalaki nin awtoridad an saiyang agom. Manungod sa papel kan may kakayahan na agom na babayi, sinasabi kan Tataramon nin Diyos na kaya niyang pamahalaan an mga gibuhon sa harong, magbakal asin magpabakal nin daga, asin magnegosyo. (Basahon an Talinhaga 31:15, 16, 18.) Bako siyang arog nin sarong uripon na mayong deretso na magtao kan saiyang opinyon. Imbes, pinagkakatiwalaan siya kan saiyang agom na lalaki asin dinadangog an mga opinyon niya. (Basahon an Talinhaga 31:11, 26, 27.) Kun tinatratar nin sarong lalaki an saiyang agom nin may arog kaiyan na paggalang, magigin maugma siya na magin sakop niya.

15. Ano an manunudan kan mga agom na babayi sa halimbawa ni Jesus?

¹⁵ Kun ano an manunudan kan mga agom na babayi. Dakul na pambihirang bagay an naisagibo ni Jesus, pero dai niya inisip na nakakapamenos saiya an pagpasakop sa pagkapayo ni Jehova. (1 Cor. 15:28; Fil. 2:5, 6) Arog ni Jesus, dai iisipon kan sarong may kakayahan na babayi na nagsusunod sa halimbawa ni Jesus na nakakapamenos an pagpapasakop niya sa saiyang agom. Susuportaran niya an saiyang agom bako lang dahil namumutan niya ini kundi panginot na ta namumutan asin iginagalang niya si Jehova.

16. Sigun sa 1 Samuel 25:3, 23-28, anong mga kadipisilan an napaatubang ki Abigail? (Hilingon an ritrato sa cover.)

¹⁶ An agom kaidto ni Abigail iyo si Nabal. Makasadiri ini, mapalangkaw, saka bakong mapagpasalamat. Dawa arog kaiyan, dai basta sinuwayan ni Abigail an saiyang agom. Puwede kutang mayo na lang siyang ginibo tapos pinabayaan na lang si David saka an mga tawuhan kaini na gadanon an agom niya. Imbes, naggibo siya nin praktikal na mga lakdang para protektaran si Nabal saka an dakul nindang kairiba sa harong. Imahinara na sana an kusog nin buot na kinaipuhan ni Abigail para magdulok sa 400 na armadong lalaki asin magalang na magpaliwanag ki David. Andam pa ngani si Abigail na siya an basulon sa ginibo kan agom niya. (Basahon an 1 Samuel 25:3, 23-28.) Minidbid tulos ni David na ginamit ni Jehova an babaying ini na makusog an buot para tawan siya nin kinakaipuhan na sadol na nakapugol saiya na makagibo nin seryosong pagkakasala.

17. Ano an manunudan kan mga agom na lalaki ki David asin Abigail?

¹⁷ Kun ano an manunudan kan mga agom na lalaki. Madunong na babayi si Abigail. Marahay na  sana ta dinangog ni David an sadol niya. Huli kaiyan, nalikayan niya na magkasala sa dugo. Sa kaagid na paagi, kinokonsiderar man na marhay kan madunong na agom na lalaki an mga ideya kan saiyang agom pag naggigibo nin mahahalagang desisyon. Puwedeng makatabang an ideya kan agom niya para malikayan niyang makagibo nin bakong madunong na mga desisyon.

18. Ano an manunudan kan mga agom na babayi sa halimbawa ni Abigail?

¹⁸ Kun ano an manunudan kan mga agom na babayi. Kun an sarong agom na babayi namumutan asin iginagalang si Jehova, puwede iyan magkaigwa nin marahay na epekto sa saiyang pamilya dawa ngani kun an saiyang agom dai naglilingkod ki Jehova o namumuhay kauyon kan Saiyang mga pamantayan. Dai siya mahanap nin bakong basado sa Kasuratan na dahilan para tapuson an relasyon ninda. Imbes, paagi sa saiyang pagigin magalang asin mapagpasakop, hinihinguwa niyang mapahiro an agom niya na midbidon si Jehova. (1 Ped. 3:1, 2) Pero kun dai mapahiro an agom na lalaki sa marahay na halimbawa kan saiyang agom, pinapahalagahan ni Jehova an kaimbudan na ipinapahiling Saiya kan mapagpasakop na agom na babayi.

19. Sa anong mga kamugtakan dai susunudon kan agom na babayi an saiyang agom?

¹⁹ Pero, dai susunudon kan mapagpasakop na Kristiyanong agom na babayi an saiyang agom kun hinahagad kaini saiya na balgahon an mga pagbuot o mga prinsipyo sa Bibliya. Halimbawa, paano kun sabihan an sarong sister kan saiyang bakong kapagtubod na agom na magputik, maghabon, o gumibo nin sarong bagay na bakong basado sa Kasuratan. Si Jehova an dapat na panginot na sunudon kan gabos na Kristiyano, kaiba na an mga sister na may agom. Kun hagadon sa sarong sister na balgahon an mga prinsipyo sa Bibliya, dapat siyang magsayuma, na ipinapaliwanag sa mabuot pero marigon na paagi kun taano ta dai niya iyan magigibo.—Gibo 5:29.

20. Paano ta naaraman na may harani asin personal na relasyon ki Jehova si Maria?

²⁰ Si Maria igwa nin harani asin personal na relasyon ki Jehova. Risang-risa na pamilyar siyang marhay sa Kasuratan. Sa pakikipag-ulay niya ki Elizabeth, na ina ni Juan Bautista, nagkotar si Maria nin labing 20 teksto hali sa Hebreong Kasuratan. (Luc. 1:46-55) Asin pag-isipan ini: Dawa ngani katrato na ni Maria si Jose, bako si Jose an inot na kinaulay kan anghel ni Jehova. Imbes, ki  Maria inot na nakipag-ulay an anghel asin sinabi kaini na ipapangaki niya an Aki nin Diyos. (Luc. 1:26-33) Midbid na marhay ni Jehova si Maria asin tiwala siya na mamumutan asin aatamanon kaini an saiyang Aki. Asin daing duda na padagos na nagkaigwa nin marahay na relasyon si Maria ki Jehova dawa kan magadan na si Jesus asin buhayon na liwat pasiring sa langit.—Gibo 1:14.

21. Ano an manunudan kan mga agom na lalaki sa sinasabi kan Bibliya manungod ki Maria?

²¹ Kun ano an manunudan kan mga agom na lalaki. An madunong na agom na lalaki maugma pag pamilyar na marhay sa Kasuratan an saiyang agom. Dai niya iisipon na sinasapawan siya kan agom niya. Aram niya na kun pamilyar na marhay sa Bibliya asin sa mga prinsipyo na yaon diyan an agom niya, talagang dakulang tabang iyan para sa saiyang pamilya. Siyempre, dawa kun mas may inadalan an agom na babayi, responsabilidad pa man giraray kan agom na lalaki na manginot sa pampamilyang pagsamba asin sa iba pang teokratikong mga aktibidad.—Efe. 6:4.

22. Ano an manunudan kan mga agom na babayi ki Maria?

²² Kun ano an manunudan kan mga agom na babayi. An babayi dapat na magpasakop sa saiyang agom, pero responsabilidad pa man giraray niyang pakusugon an saiyang espirituwalidad. (Gal. 6:5) Para magibo iyan, dapat siyang magtagama nin panahon para sa saiyang personal na pag-adal asin paghurop-hurop. Makakatabang iyan saiya na mapagdanay an pagkamuot asin paggalang niya ki Jehova asin magin maugma sa pagigin mapagpasakop sa saiyang agom.

23. Dahil sa pagigin mapagpasakop kan agom na babayi, paano siya nakikinabang, an saiyang pamilya, asin an kongregasyon?

²³ An mga agom na babayi na nagdadanay na mapagpasakop sa saindang agom huli sa pagkamuot ki Jehova nagigin mas maugma asin kontento kisa sa mga habong magsunod sa areglo ni Jehova sa pagkapayo. Marahay man sindang halimbawa sa mga hoben na lalaki asin babayi. Asin nakakatabang man sinda na mamatian an pagkamuot asin katuninungan bako lang sa laog kan pamilya kundi sa laog man kan kongregasyon. (Tito 2:3-5) Ngunyan, mga babayi an kadaklan sa maimbod na mga naglilingkod ki Jehova. (Sal. 68:11) Alagad gabos kita, lalaki man o babayi, may mahalagang papel sa kongregasyon. Pag-uulayan sa sunod na artikulo kun paano isasagibo kan lambang saro sa sato an papel na iyan.