1. Taano ta may mga tawong nawawaran nin ganang mag-adal?

SA PANAHON niyato ngunyan, dipisilon an paghanapbuhay. Dakul na tugang niyato an nagtatrabaho nin halawig na oras tangani sanang maitao an mga pangangaipo kan saindang pamilya. Kadakul na iba pa an pirang oras na nagbibiyahe pasiring sa trabaho asin pauli. Dakul man an naghahanapbuhay paagi sa paggibo nin magabat na trabaho. Sa katapusan kan aldaw, pagal-pagal na an mahihigos niyatong tugang na ini! Huli kaiyan dakul an nawawaran na nin ganang mag-adal.

2. Nuarin ka nag-aadal?

² Pero an totoo, dapat kitang maghanap nin panahon para pag-adalan—talagang pag-adalan—an Tataramon nin Diyos asin an satong mga publikasyon. Nakadepende nanggad sa paggibo niyato kaiyan an satong relasyon ki Jehova asin an satong buhay na daing katapusan! (1 Tim. 4:15) May mga nagbabangon nin amay kada aldaw para mag-adal huling sa oras na iyan tuninong an saindang harong asin presko an saindang isip pagkamata ninda. An iba man nagtatagama nin pirang minuto sa katapusan kan aldaw tanganing magkakan nin espirituwal na kakanon asin hurop-hurupon iyan huling trangkilo sinda sa oras na iyan.

3-4. Anong mga pagbabago an ginibo sa bilang kan mga publikasyon, asin taano?

³ Siguradong uyon ka na mahalagang maghanap nin panahon sa pag-adal. Pero ano an dapat niyatong pag-adalan? Tibaad sabihon mo, ‘Kadakul nin babasahon. Nasasakitan akong basahon iyan gabos.’ May mga tugang na lubos na naaaprobetsaran an gabos na espirituwal na probisyon, pero dakul an nasasakitan na makahanap nin panahon para magibo iyan. Aram ini kan Namamahalang Grupo. Huli kaiyan, dai pa sana nahahaloy may itinaong instruksiyon  na bawasan an bilang kan mga publikasyon na imprentado asin digital.

⁴ Halimbawa, dai na kita nagpupublikar kan Yearbook of Jehovah’s Witnesses huling igwa na nin dakul na nakakapakusog na eksperyensiya sa jw.org^® pati man sa mga programa sa JW Broadcasting^® kada bulan. An pampublikong edisyon kan magasin na An Torrengbantayan asin Gumising! tulong beses na sana ngunyan na ipinupublikar kada taon. Ginibo an mga pagbabagong ini bako para magkaigwa kita nin mas dakul na panahon sa ibang mga bagay. Ginibo an mga ini tanganing urog niyatong matawan nin atensiyon an “mas importanteng mga bagay.” (Fil. 1:10) Pag-ulayan niyato kun paano ka makakapagdesisyon kun arin an mga inot mong pag-aadalan asin kun paano ka lubos na makikinabang sa saimong personal na pag-adal sa Bibliya.

5-6. Anong mga publikasyon an dapat na siguraduhon niyatong pag-adalan na marhay?

⁵ Ano an dapat na inot niyatong pag-adalan? Dapat nanggad kitang magtao nin panahon kada aldaw para pag-adalan an Tataramon nin Diyos. Binawasan na ngunyan an mga bersikulo na nakaiskedyul para sa semanal na babasahon sa Bibliya kan kongregasyon tanganing magkaigwa kita nin mas dakul na panahon para hurop-hurupon an satong binabasa asin mag-research. An pasuhan niyato iyo na bako lang para mabasa an nakaasignar na mga bersikulo para sa semana, kundi mapahiro kan mensahe kan Bibliya an satong puso asin magin mas harani ki Jehova.—Sal. 19:14.

⁶ Ano pa an dapat niyatong pag-adalan na marhay? Siyempre, gusto niyatong pag-andaman an materyal para sa Pag-adal sa Torrengbantayan asin sa Pag-adal sa Bibliya kan Kongregasyon saka an iba pang materyal para sa pagtiripon sa tahaw kan semana. Dapat man niyatong basahon an lambang isyu kan An Torrengbantayan asin Gumising!

7. Dapat daw kitang pangluyahan nin buot kun dai niyato nababasa o nahihiling an gabos na yaon sa satong website asin sa JW Broadcasting?

⁷ Tibaad sabihon mo, ‘Okey, pero pa’no man an gabos na artikulo saka video sa satong website na jw.org, pati an materyal na ipinepresentar sa JW Broadcasting? Dakulon nanggad iyan!’ Pag-isipan an sarong ilustrasyon: Kadakul nin manlain-lain na masisiram na kakanon sa buffet nin sarong restawran. Dai man kayang manamitan kan mga kostumer kan restawran an gabos na putahe. Kaya nagpipili lang sinda nin pirang putahe. Kaagid kaiyan, kun dai mo nababasa asin nahihiling an gabos na itinataong elektronikong materyal, dai ka pangluyahan nin buot. Basahon asin hilingon kun ano sana an kaya mo. Pag-ulayan niyato ngunyan kun ano talaga an buot sabihon kan pag-adal asin kun paano lubos na makikinabang sa satong pag-adal.

8. Anong mga lakdang an puwede niyatong gibuhon pag nag-aandam para sa Pag-adal sa Torrengbantayan, asin paano ka makikinabang sa paggibo kaiyan?

⁸ An pag-adal iyo an pagpokus sa binabasa sa katuyuhan na makanuod nin sarong mahalagang bagay. Bako sana iyan marikas na pagbasa kan nakaasignar na materyal asin pagkurit kan mga simbag. Halimbawa, pag nag-aandam para sa Pag-adal sa Torrengbantayan, basahon nguna an sumaryo sa kapinunan kan artikulo. Sunod, pag-isipan an titulo kan artikulo, pati an mga subtema asin mga hapot sa repaso. Dangan, basahon na marhay an artikulo; dai maghidali. Risahon an topic sentence, na sa parati iyo an inot na sentence kan lambang parapo. Sa parati, tatabangan ka kan topic sentence na maaraman kun ano an pinakapunto kan parapo. Mantang binabasa mo an bilog na artikulo, pag-isipan kun paano sinusuportaran kan lambang parapo an subtema asin kun paano iyan konektado sa pangkagabsan na tema kan artikulo. Ilista an mga tataramon na dai ka pamilyar asin an mga punto na gusto mong i-research.

9. (a) Taano ta dapat na niyatong tawan nin partikular na atensiyon an mga teksto pag nag-aandam para sa Pag-adal sa Torrengbantayan, asin paano ta iyan magigibo? (b) Arog kan mababasa sa Josue 1:8, ano an dapat niyatong gibuhon apuwera sa pagbasa nin mga teksto?

 ⁹ An Pag-adal sa Torrengbantayan tinatabangan kitang masabutan an Bibliya. Kun siring, tawan nin partikular na atensiyon an mga teksto, lalo na an mga tekstong babasahon pag pinag-aadalan na sa kongregasyon an artikulo. Risahon lalo na kun paano sinusuportaran kan panginot na mga tataramon sa teksto an punto na pinapalataw sa parapo. Apuwera kaiyan, magtao nin panahon para hurop-hurupon an mga tekstong binabasa mo, asin kun paano mo iyan maiaaplikar sa saimong buhay.—Basahon an Josue 1:8.

10. Kauyon kan Hebreo 5:14, taano ta dapat na magtao nin panahon an mga magurang sa panahon nin pampamilyang pagsamba para tukduan an saindang mga aki kun paano mag-adal asin mag-research?

¹⁰ Natural sana na gusto kan mga magurang na magin nakakaugma an semanal na Pampamilyang Pagsamba para sa saindang mga aki. Minsan siring, maski ngani an mga magurang dapat na pirming may nakaplanong tutukaron para sa pampamilyang pagsamba, dai man kaipuhan na surusemana igwa sindang espesyal na mga aktibidad o proyekto. Dawa ngani puwedeng gamiton an panahon nin Pampamilyang Pagsamba para maghiling nin bulanan na programa sa JW Broadcasting o paggibo nin espesyal na proyekto paminsan-minsan, arog kan paggibo nin modelo kan arka ni Noe, mahalaga man na tukduan an mga aki kun paano mag-adal. Halimbawa, kaipuhan nindang makanuod kun paano mag-andam para sa mga pagtiripon kan kongregasyon o kun paano ire-research an sarong isyu na napaatubang sa sainda sa eskuwelahan. (Basahon an Hebreo 5:14.) Kun matao sinda nin panahon para pag-adalan sa harong an sarong tema sa Bibliya, magigin mas pasil sa sainda na magpokus sa materyal na ipinepresentar sa mga pagtiripon sa kongregasyon, asembleya, asin kumbensiyon, na tibaad dai man pirming may video. Siyempre, an lawig kan lambang pag-adal nakadepende sa edad asin personalidad kan mga aki.

11. Taano ta mahalaga na tukduan niyato an satong mga Bible study kun paano gigibuhon an makahulugan na personal na pag-adal?

¹¹ Kaipuhan man kan satong mga Bible study na makanuod kun paano mag-adal. Kan baguhan pa sinda, nauugma kita na mahiling sindang kinukuritan an mga simbag bilang pag-andam sa pag-adal ninda nin Bibliya o sa mga pagtiripon kan kongregasyon. Pero kaipuhan niyatong tukduan an satong mga Bible study kun paano mag-research asin kun paano gigibuhon an makahulugan na personal na pag-adal. Paagi kaiyan, pag may mag-abot na problema, imbes na maghagad tulos nin tabang sa iba sa laog kan kongregasyon  kun ano an gigibuhon, aram ninda kun paano sinda makakakua nin praktikal na mga sadol paagi sa pag-research sa satong mga publikasyon.

12. Ano an mga puwede niyatong magin pasuhan pag nag-aadal?

¹² Kun bako kang paraadal, tibaad isipon mong imposibleng ma-enjoy mo an pag-adal. Pero posible iyan. Magpuon paagi sa haralipot na pag-adal dangan padikit-dikit na dagdagan an oras na ginagamit mo diyan. Mag-isip nin pasuhan. Siyempre, an pinakapasuhan niyato iyo na padagos na maparani ki Jehova. An sarong pasuhan na puwede niyatong magibo tulos iyo an masimbag an sarong hapot o an mag-research dapit sa problemang inaatubang niyato.

13. (a) Ipaliwanag an mga lakdang na puwedeng gibuhon nin sarong hoben para idepensa sa eskuwelahan an saiyang mga tinutubod. (b) Paano mo iaaplikar an konseho na yaon sa Colosas 4:6?

¹³ Bilang halimbawa, ika daw sarong hoben na nag-eeskuwela? Tibaad gabos mong kaklase nagtutubod sa teoriya nin ebolusyon. Gusto mong idepensa an mga katukduan sa Bibliya, pero tibaad pagmati mo dai mo iyan kaya. Kaipuhan mong mag-adal! Puwedeng duwa an magin katuyuhan mo: (1) mapakusog an saimong pagtubod na linalang nin Diyos an gabos na bagay asin (2) mapauswag an saimong kakayahan sa pagdepensa sa katotoohan. (Roma 1:20; 1 Ped. 3:15) Puwede mo ngunang haputon an saimong sadiri, ‘Taano ta sinasabi kan mga kaklase ko na naniniwala sinda sa ebolusyon?’ Dangan mag-research na marhay gamit an satong mga publikasyon. Tibaad an pagdepensa sa mga tinutubod mo bako man arog kadipisil kan inaasahan mo. Kadaklan na tawo naniniwala man sana sa ebolusyon huling sinabi sa sainda kan saro na iginagalang ninda na totoo iyan. Kun makahanap ka nin dawa saro o duwang punto, tibaad makatao ka nin nakakakontentong simbag sa saro na talagang naghahanap kaiyan.—Basahon an Colosas 4:6.

14-16. (a) Ano an puwede mong gibuhon tanganing magin pamilyar ka sa sarong libro sa Bibliya na dai ka pa gayong pamilyar? (b) Gamit an sitadong mga teksto, ipaliwanag kun paano mo mas lubos na masasabutan an libro nin Amos. (Hilingon man an kahon na “ Gibuhon na Buhay na Buhay an Bibliya!”)

¹⁴ Ipamugtak na sa maabot na pagtiripon kan kongregasyon, pag-aadalan ta an isinurat kan saro sa inaapod na mas sadit na mga propeta na tibaad dai ka pa gayong pamilyar. An inot na lakdang tibaad iyo na patalubuon an saimong interes sa isinurat kan propetang iyan. Paano mo iyan gigibuhon?

¹⁵ Inot, haputon an sadiri: ‘Ano an aram ko mapadapit sa kagsurat kan libro? Siisay siya, sain siya nakaistar, ano an trabaho niya?’ An mga impormasyon dapit sa kagsurat puwede man na makatabang sa saimo na masabutan kun taano ta siring na mga tataramon asin ilustrasyon an ginamit niya. Mantang binabasa mo an Bibliya, maghanap nin mga tataramon na nagpaparisa kan personalidad kan kagsurat.

¹⁶ Sunod, makakatabang sa saimo kun aaramon mo kun kasuarin isinurat an libro. Madali mong maaaraman iyan paagi sa paghiling sa “Table of the Books of the Bible” sa likod kan New World Translation of the Holy Scriptures. Dugang pa, puwede mong hilingon an tsart kan mga propeta asin hadi sa Giya sa Pag-adal sa Tataramon nin Diyos, pahina 14-17. Kun an libro sa Bibliya na pag-aadalan mo libro nin mga hula, marahay na aramon mo an mga kamugtakan kaidto kan isurat iyan. Anong maraot na mga ugali o gibo an gustong itanos kan propeta? Sairisay an kakontemporanyo niya? Para mas masabutan pa an sitwasyon, tibaad kaipuhan mong magkonsulta sa iba pang libro sa Bibliya. Halimbawa, tanganing mas lubos na masabutan kun ano an nangyayari kan panahon na kinabuhayan ni propeta Amos, makikinabang ka kun babasahon mo an mga bersikulo sa libro nin 2 Hade asin 2 Cronica na nakalista sa mga marginal reference kan Amos 1:1 sa  New World Translation of the Holy Scriptures. Dugang pa, puwede mo man basahon an mga isinurat ni Oseas na posibleng kakontemporanyo ni Amos. An gabos na reperensiyang ini makakatabang sa saimo na mas masabutan an mga kamugtakan sa panahon na kinabuhayan ni Amos.—2 Ha. 14:25-28; 2 Cron. 26:1-15; Os. 1:1-11; Amos 1:1.

17-18. Gamit an sadiri mong halimbawa o an nasa parapo, iilustrar kun paano puwedeng makatabang an pagtao nin atensiyon sa garo baga bakong gayong importanteng mga detalye para ma-enjoy an personal na pag-adal sa Bibliya.

¹⁷ Pag nagbabasa nin Bibliya, marahay na igwa kita nin makusog na pagmawot na makanuod nin urog pa. Halimbawa, binabasa mo ngaya an kapitulo 12 kan hula ni Zacarias na nagsasabi kan pagkagadan kan Mesiyas. (Zac. 12:10) Pag-abot mo sa bersikulo 12, mababasa mo na nagmundong marhay sa pagkagadan kan Mesiyas “an pamilya kan kamag-anakan ni Nathan.” (NW) Imbes na basta na sana agihan an mga detalyeng iyan, pumundo nguna asin haputon an sadiri: ‘Paano konektado sa Mesiyas an kamag-anakan ni Nathan? May ibang paagi pa daw na makakakua ako nin dagdag na impormasyon?’ Nag-research ka na garo detektib. Sa New World Translation of the Holy Scriptures may marginal reference na nagtutukdo sa saimo sa 2 Samuel 5:13, 14 na diyan naaraman mo na si Nathan saro sa mga aki ni Hading David. Ipinapahiling kan ikaduwang marginal reference, sa Lucas 3:23, 31, na si Jesus direktang gikan ni Nathan paagi ki Maria. (Hilingon an “Joseph, son of Heli,” sa study note sa Lucas 3:23.) Bigla kang nagkainteres! Aram mong ihinula na si Jesus magikan ki David. (Mat. 22:42) Pero labing 20 an aking lalaki ni David. Bako daw na makangangalas na espesipikong sinabi ni Zacarias na an kamag-anakan ni Nathan igwa nin dahilan na magmundong marhay sa kagadanan ni Jesus?

¹⁸ Pag-isipan an saro pang halimbawa. Sa inot na kapitulo kan Lucas, mababasa niyato na an  anghel na si Gabriel nagbisita ki Maria asin ipinaisi sa saiya an dapit sa aki na ipapangaki niya: “An sarong ini ibibilang na importanteng marhay saka aapudon na Aki kan Kahuruhalangkawi, asin itatao sa saiya kan Diyos na Jehova an trono ni David na saiyang ama, asin mamamahala siya sagkod lamang bilang Hadi sa mga gikan ki Jacob.” (Luc. 1:32, 33) Tibaad an tendensiya ta iyo na magpokus sa inot na kabtang kan mensahe ni Gabriel na si Jesus aapudon na “Aki kan Kahuruhalangkawi.” Pero iprinopesiya man ni Gabriel na si Jesus “mamamahala . . . bilang Hadi.” Kaya tibaad mapaisip kita kun ano an posibleng naisip ni Maria sa sinabi ni Gabriel. Inisip niya daw na an buot sabihon ni Gabriel si Jesus an masalida ki Hading Herodes—o sa saro sa mga magigin kasalida kaini bilang tagapamahala sa Israel? Kun magin hadi si Jesus, magigin inang-reyna si Maria, asin an saiyang pamilya maistar sa palasyo kan hadi. Pero mayong mababasa sa Bibliya na may sinabi si Maria na arog kaiyan ki Gabriel; ni mababasa man niyato na naghagad si Maria nin inuuyunan na kamugtakan sa Kahadian, siring kan ginibo kan duwang disipulo ni Jesus. (Mat. 20:20-23) An detalyeng ini urog nanggad na nakakakumbinsir sa sato na si Maria sarong babayi na mapakumbabang marhay!

19-20. Arog kan ilinadawan sa Santiago 1:22-25 asin 4:8, ano an mga pasuhan niyato pag nag-aadal?

¹⁹ Tandaan niyato na an pinakapasuhan ta sa pag-adal kan Tataramon nin Diyos asin kan satong mga publikasyon iyo na mas maparani kita ki Jehova. Gusto man niyatong mas malinaw na mahiling “kun ano an pagkatawo” ta asin kun anong mga pagbabago an kaipuhan niyatong gibuhon tanganing mapaugma an Diyos. (Basahon an Santiago 1:22-25; 4:8.) Kaya sa kapinunan kan lambang pag-adal niyato, dapat na hagadon ta an banal na espiritu ni Jehova. Dapat kitang makimahirak sa saiya na tabangan kita na lubos na makinabang sa materyal asin na malinaw niyatong mahiling kun ano pang mga pagbabago an kaipuhan tang gibuhon.

²⁰ Lugod na kita gabos magin arog kan maimbod na lingkod nin Diyos na ilinadawan kan salmista: “An ikinakaugma niyang marhay iyo an katugunan ni Jehova, asin binabasa niya sa maluway na boses, aldaw asin banggi, an katugunan Niya. . . . An mga ginigibo niya magigin mapanggana gabos.”—Sal. 1:2, 3, NW.