MINATIMBANG sana ini nin mga 1.4 kilos pero ini an ibinibilang na “pinakakomplikadong bagay na nadiskubre sa satong uniberso sagkod ngunyan.” Ano ini? An hutok nin tawo. Talagang makangangalas iyan. Miyentras na mas dakul kitang nanunudan dapit diyan, mas lalo man niyatong napapahalagahan an ‘makangangalas’ na mga gibo ni Jehova. (Sal. 139:14) Isipa an saro sana sa mga kakayahan kan satong hutok—an imahinasyon. Ano an imahinasyon? Uyon sa sarong diksiyonaryo iyan “an kakayahan na makabilog nin mga ladawan o ideya sa saimong isip kan mga bagay na bago asin nakakaugma, o mga bagay na dai mo pa naeeksperyensiyahan.” Nasa isip an kahulugan na iyan, dai ka daw mauyon na parati mong ginagamit an imahinasyon mo? Halimbawa, may nabasa o nadangog ka na daw na sarong lugar na dai mo pa nadudumanan? Bakong naiimahinar mo an hitsura kaiyan sa saimong isip? An totoo, kada may iniisip kitang bagay na dai ta nahihiling, nananamitan, nakakaptan, o napaparong, ginagamit ta an satong imahinasyon. Tinatabangan kita kan Bibliya na masabutan na dinisenyo asin linalang an tawo uyon sa ladawan nin Diyos. (Gen. 1:26, 27) Bako daw na ipinaparisa kaiyan na si Jehova mismo igwa kan kakayahan na mag-imahinar? Huling pinili niyang lalangon kita na igwa kan kakayahan na ini, tama sanang lauman niya na gagamiton ta iyan para sabuton an saiyang kabutan. (Par. 3:11) Paano ta magagamit an satong imahinasyon sa madunong na paagi tanganing magibo iyan? Asin ano an mga salang paggamit kan imahinasyon na dapat niyatong likayan?

(1) Pangangarap sa salang panahon o sa salang mga bagay.

Bakong sala an pangangarap. Sa katunayan, may patunay na puwedeng magin kapaki-pakinabang iyan. Pero, tinatabangan kita kan Parahulit 3:1 na masabutan na huling may “panahon para sa lambang aktibidad,” posibleng may ginigibo kitang mga aktibidad na sala sa panahon. (NW) Halimbawa, kun tutugutan tang maglagaw-lagaw an satong isip sa panahon nin mga pagtiripon o personal na pag-adal, nakakatabang daw an satong imahinasyon o nakakaulang? Si Jesus mismo seryosong nagpatanid na peligroso an magparaisip nin salang mga bagay, arog kan imoral na pagpapantasya. (Mat. 5:28) An ibang mga bagay na pinapabayaan tang maimahinar niyato puwedeng makapaanggot na marhay ki Jehova. An imoral na pagpapantasya puwedeng sumagkod sa aktuwal na paggibo nin imoral na bagay. Kaya magin determinado na dai pagtugutan na irayo ka ki Jehova kan saimong imahinasyon!

(2) Pagkaigwa nin paghuna na an materyal na kayamanan makakatao nin nagdadanay na seguridad.

Kaipuhan asin kapaki-pakinabang an materyal na mga bagay. Pero, siguradong masusudya kita kun iimahinaron niyato na makukua ta sa mga iyan an tunay na seguridad asin kaugmahan. An madunong na hading si Solomon nagsurat: “An kayamanan kan mayaman iyo an  saiyang nakukutaan na siyudad; iyan siring sa nagpoprotektar na lanob sa saiyang imahinasyon.” (Tal. 18:11, NW) Halimbawa, kan Setyembre 2009, binaha an labing 80 porsiyento kan Manila, sa Pilipinas, huli sa makusugon na uran. Nakaligtas daw idtong mga dakul an materyal na bagay? Sarong mayaman na lalaki na nawaran nin dakul na pagsasadiri an nagsabi na mayong pinipili an baha, huli kaiyan “an mga mayaman saka pobre pararehong nadipisilan asin nagsakit.” Pasil sanang imahinaron na naitatao kan materyal na mga bagay an tunay na proteksiyon asin seguridad. Pero sa totoong buhay, bako iyan totoo.

(3) Pagparahadit sa mga bagay na tibaad dai man mangyari.

Sinadol kita ni Jesus na dai “maghadit” nin sobra. (Mat. 6:34) Kun pirmi kitang nagpaparahadit, pirmi man niyatong ginagamit an satong imahinasyon. Masasayang sana an satong kusog sa pagparahadit sa mga problema na imahinasyon sana, mga problema na dai pa man nangyayari o tibaad dai man talaga mangyari. Sinasabi kan Kasuratan na an arog kaiyan na paghadit puwedeng magresulta sa pangluluya nin buot o depresyon pa ngani. (Tal. 12:25) Mahalaga nanggad na iaplikar an sadol ni Jesus na dai magparahadit nin sobra-sobra asin atubangon an problema sa kada aldaw pag yaon na iyan.

(1) Pag-aram nin patiinot sa mga peligro asin paglikay diyan.

Dinadagka kita kan Kasuratan na magin alisto an isip asin patiinot na mag-isip. (Tal. 22:3) Gamit an satong imahinasyon, puwede tang isipon an posibleng magin resulta kan gigibuhon niyatong desisyon. Halimbawa, kun inimbitaran ka sa sarong pagtiripon-tipon, paano ka matatabangan kan imahinasyon para madunong na makapagdesisyon kun baga maatender ka o dai? Pagkatapos na aramon kun sairisay pa an mga imbitado, gurano kadakula an pagtiripon-tipon, asin nuarin saka sain iyan gigibuhon, isipon: ‘Ano an posibleng mangyari diyan?’ Naiimahinar mo daw na magigin nakakapakusog asin magigin kauyon kan mga prinsipyo sa Bibliya an pagtiripon-tipon na iyan? Makakatabang ini para mailadawan mo sa saimong isip an okasyon na iyan. An paggamit kan saimong imahinasyon tanganing madunong na makapagdesisyon makakatabang na makalikay ka sa mga sitwasyon na magsasapeligro kan saimong espirituwalidad.

(2) Pag-ensayo sa isip kun paano aatubangon an masasakit na problema.

Kaiba man sa imahinasyon an “kakayahan na atubangon asin solusyunan an sarong problema.” Ipamugtak na igwa kamong dai pagkakaintindihan kan sarong kakongregasyon mo. Paano mo kakaulayon an saimong tugang tanganing makipagkatuninungan? Dakul na bagay an dapat ikonsiderar. Ano an paagi niya nin  pakikipag-ulay? Nuarin an pinakamarahay na panahon para pag-ulayan an problema? Anong mga tataramon asin tono nin boses an pinakamarahay gamiton? Paagi sa paggamit kan saimong imahinasyon, maeensayo mo sa isip an manlain-lain na paagi kun paano aatubangon an sitwasyon asin mapipili mo an sa hiling mong pinakaepektibo asin pinakamarahay an magigin pag-ako niya. (Tal. 15:28) Makakatabang an arog kaiyan na pinag-isipan na pamamaagi sa pag-atubang sa masakit na sitwasyon tanganing magkaigwa nin katuninungan sa kongregasyon. Marahay na paagi nanggad iyan nin paggamit kan imahinasyon.

(3) Pagpauswag kan saimong personal na pagbasa asin pag-adal sa Bibliya.

Mahalagang marhay an aroaldaw na pagbasa nin Bibliya. Pero, urog pa an kaipuhan kisa sa makabasa sana nin dakul na pahina. Kaipuhan tang masabutan an praktikal na mga leksiyon na nasa mga pahina kan Bibliya asin mapahirong iaplikar iyan sa satong buhay. Dapat na mapakusog kan satong pagbasa sa Bibliya an pagpapahalaga ta sa mga pamamaagi ni Jehova. Makakatabang an paggamit ta kan satong imahinasyon para magibo ini. Paano? Hilinga an librong Arugon an Saindang Pagtubod. An pagbasa sa mga istorya sa librong ini makakapukaw sa satong imahinasyon huling tatabangan kita kaiyan na mailadawan an mga eksena asin kamugtakan kan lambang karakter sa Bibliya. Tatabangan kitang mahiling an mga lugar, madangog an mga tanog, maparong an mga hamot, asin masabutan an mga namamatian kan mga karakter. Huli kaini, makukua ta an marahayon na mga leksiyon asin nakakapakusog na punto hali sa mga istorya sa Bibliya na tibaad sa paghuna niyato kabisado ta nang marhay. Talagang mauswag an satong personal na pagbasa asin pag-adal sa Bibliya kun gagamiton ta an satong imahinasyon sa arog kaining paagi.

(4) Pagkaigwa asin pagpahiling nin empatiya.

Sarong magayon na kuwalidad an empatiya. Ilinaladawan iyan bilang an pakamati sa satong puso kan kulog na namamatian kan iba. Huling parehong nagpahiling nin empatiya si Jehova asin si Jesus, dapat niyatong arugon sinda. (Ex. 3:7; Sal. 72:13) Paano kita magkakaigwa kan kuwalidad na ini? An saro sa pinakaepektibong paagi tanganing magkaigwa nin empatiya iyo an paggamit kan satong imahinasyon. Tibaad dai pa niyato naeksperyensiyahan an mga inaagihan kan satong mga tugang. Pero, puwede mong ihapot sa sadiri: ‘Kun ako an nasa sitwasyon ninda, ano an mamamatian ko? Ano daw an kakaipuhanon ko?’ An paggamit kan satong imahinasyon para masimbag an mga hapot na ini makakatabang sa sato na magkaigwa nin urog na empatiya sa sainda. An totoo, pag nagpahiling kita nin empatiya, mauswag an satong buhay bilang Kristiyano, pati man an satong ministeryo asin an relasyon ta sa mga kapagtubod.

(5) Pag-imahinar sa magigin buhay sa bagong kinaban.

Pano an Kasuratan nin malinaw na mga deskripsiyon kan magigin buhay sa ipinanuga nin Diyos na bagong kinaban. (Isa. 35:5-7; 65:21-25; Kap. 21:3, 4) Sa mga publikasyon ta, tinatawan nin dakul na magagayon na artistikong paglaladawan an mga deskripsiyon na ini. Taano? Huling pinupukaw kan mga ritrato o drowing na ini an satong imahinasyon asin tinatabangan kitang maimahinar an satong sadiri na maugmang inaako na an mga ipinanugang bendisyon na ini. Urog kisa kiisay man, mas aram ni Jehova, an Kaglalang kan imahinasyon, kun gurano kapuwersa an kakayahan na ini. Kun gagamiton ta ini para hurop-hurupon an saiyang mga panuga, magkakaigwa kita nin pagtitiwala na mauutob an mga iyan. Makakatabang man iyan sa sato para magdanay na maimbod, dawa napapaatubang kita sa presenteng mga kadipisilan sa buhay.

Mamumuton na itinao ni Jehova sa sato an makangangalas na kakayahan na ini nin imahinasyon. Talagang matatabangan kita kaini na paglingkudan siya nin lubos sa satong aroaldaw na buhay. Lugod na ipahiling niyato an satong pasasalamat sa Kagtao kan makangangalas na regalong ini paagi sa madunong na paggamit kaiyan sa kada aldaw.