Siring Daw sa Ambon an Saimong Ministeryo?
MAHALAGA asin kapaki-pakinabang an satong ministeryo. Pero, bako gabos na nahuhulitan niyato nasasabutan an bagay na ini. Dawa kun magin interesado an mga tawo sa mensahe kan Bibliya, tibaad dai ninda pirming nasasabutan kun taano ta kaipuhan nindang makipag-adal nin Bibliya sa sato.
Arog kaini an sitwasyon ni Gavin. Nag-aatender na siya sa mga pagtiripon; pero, habo niyang makipag-adal sa Bibliya. An sabi niya: “Dikit sana an aram ko sa Bibliya, asin nasusupog akong maaraman iyan kan iba. Habo kong maloko o magka-obligasyon.” Ano sa hiling mo? Dai na daw talaga makikipag-adal sa Bibliya si Gavin? Dai man! Pag-isipan an marahay na epekto sa sarong tawo kan mga katukduan sa Bibliya. Sinabi ni Jehova sa saiyang suanoy na banwaan: ‘Maturo siring sa ambon an sakong [tataramon], siring sa tagiti sa ibabaw nin duot.’ (Deut. 31:19, 30; 32:2, An Banal na Biblia) Magayon na ipinapahiling kan mga karakteristiko nin ambon kun paano ta epektibong matatabangan an gabos na klase nin tawo sa satong ministeryo.—1 Tim. 2:3, 4.
SIRING SA AMBON AN MINISTERYO—PAANO?
An ambon maluway sana. An tagdo nin ambon napoporma nin luway-luway hali sa natitipon na alisngaw nin tubig na yaon sa aire. An tataramon ni Jehova ‘nagtuturo siring sa ambon.’ An buot sabihon, mabuot, kalmado, asin makonsiderasyon siyang nakipag-ulay sa saiyang banwaan. Inaarog niyato siya kun iginagalang ta an punto de vista kan ibang tawo. Dinadagka ta an mga tawo na sinda mismo an mag-isip asin maggibo nin sadiri nindang kongklusyon. Pag ipinapahiling ta an arog kaiyan na konsiderasyon, mas madali nindang maaako an satong mensahe asin magigin mas epektibo an ministeryo ta.
An ambon nakakarepresko. Magigin nakakarepresko sa iba an satong ministeryo kun maisip kita nin lain-lain na paagi tanganing matabangan sindang mas makanuod pa dapit sa katotoohan. Si Chris, an brother na inot na nag-alok ki Gavin nin pag-adal sa Bibliya, dai pinirit si Gavin na akuon iyan. Imbes, nag-isip siya nin manlain-lain na paagi para mas magin komportable si Gavin na pag-ulayan an Bibliya. Sinabi ni Chris ki Gavin na igwang sarong tema an Bibliya asin kun manunudan niya iyan mas masasabutan niya an mga pagtiripon na inaatenderan niya. Dangan, inistorya ni Chris na an nakapakumbinsir sa saiya na totoo an Bibliya iyo an mga hula na yaon diyan. Huli kaini, nagkapirang beses sindang nag-ulay mapadapit sa kautuban kan mga hula sa Bibliya. Narepreskuhan si Gavin sa mga pag-uulay na ini asin sa katapos-tapusi, inako na niya an pag-adal sa Bibliya.
An ambon nagsusustenir sa buhay. Sa panahon nin tig-init sa nasyon nin Israel, puwedeng dai mag-uran sa laog nin pirang bulan. Kun mayo an alumaad na itinatao kan ambon, maaalang asin magagadan an mga pananom. Arog kan ihinula ni Jehova, naeeksperyensiyahan ngunyan kan katawuhan an espirituwal na tigmara. (Amos 8:11) Pero nanuga siya na magigin “siring kan ambon ni Jehova” an linahidan na mga ebanghelisador mantang ibinabalangibog ninda an mensahe kan Kahadian, kaiba an ‘ibang mga karnero.’ (Miq. 5:7; Juan 10:16) Pinapahalagahan ta daw an satong mensahe kan Kahadian bilang kabtang kan nagsusustenir sa buhay na espirituwal na alumaad na itinatao ni Jehova?
An ambon bendisyon hali ki Jehova. (Deut. 33:13) Magigin bendisyon sa mga tawo an satong ministeryo kun aakuon ninda iyan. Iyan an naeksperyensiyahan ni Gavin. Paagi sa saiyang pag-adal sa Bibliya, nakua niya an simbag sa gabos niyang hapot. Marikas an nagin pag-uswag niya, nabawtismuhan, asin ngunyan, lubos siyang nakikikabtang sa paghuhulit kan maugmang bareta kan Kahadian, kaiba kan saiyang agom na si Joyce.
An mga Saksi ni Jehova sinasagom nin mensahe kan Kahadian an daga
PAHALAGAHAN AN SAIMONG MINISTERYO
Makakatabang man sa sato an paghurop-hurop dapit sa ambon para mahiling an halaga kan satong personal na paghihinguwa sa ministeryo. Paano? An sarong tagdo nin tubig dikiton sana an pakinabang, pero kun pagsasaralakon an minilyon na tagdo nin ambon, masasagom kaiyan an daga. Kaagid kaiyan, tibaad dikiton sana para sa sato an nagigibo ta sa ministeryo. Pero, an pinagsaralak na paghihinguwa kan gabos na lingkod ni Jehova nakakakontribwir para mapatotoohan an ‘gabos na nasyon.’ (Mat. 24:14) Magigin bendisyon daw para sa iba an satong ministeryo? Iyo nanggad, kun an satong ihinuhulit na mensahe magigin siring sa ambon—maluway o mabuot, nakakarepresko, asin nagsusustenir sa buhay!