1-3. (a) Paano ipinahiling kan mga Kristiyano na gustong-gusto nindang mag-atender sa mga pagtiripon? (Hilingon an ritrato sa itaas.) (b) Ano an pag-uulayan sa artikulong ini?

KAN 17 anyos pa sana si Corinna, inarestar an saiyang ina asin dinara sa sarong kampo nin puwersahan na pagtrabaho kan Sobyet. Dai nahaloy, si Corinna man mismo kinua asin dinara sa Siberia, na rinibong kilometro an rayo sa harong ninda. Nagtrabaho siya sa sarong atamanan nin mga hayop asin trinatar siyang garo uripon duman. Kun minsan, puwersahan siyang pinapatrabaho sa luwas dawa grabe an lipot asin mayo siyang igong badong panglipot. Sa ibong kan masakit na kamugtakan na iyan, determinado si Corinna asin an saro pang sister na mag-atender sa pagtiripon kan kongregasyon.

² An sabi ni Corinna: “Banggi kaming naghahali sa pinagtatrabahuhan mi, asin naglalakaw kami nin 25 kilometros pasiring sa istasyon nin tren. Alas dos nin aga naghahali an tren asin anom na oras an biyahe. Pagkatapos, malakaw pa kami nin 10 kilometros pasiring sa lugar nin pagtiripon.” Sulit daw an pagbiyaheng iyan? Sinabi ni Corinna: “Sa pagtiripon, pinag-adalan mi an Torrengbantayan asin nagkanta nin mga awit na pang-Kahadian. Talagang nakapakusog sa pagtubod mi an eksperyensiyang iyan.” Dawa tulong aldaw sindang dai nagbalik sa trabaho, dai narisa kan  namamahala sa atamanan nin mga hayop na naghali si Corinna asin an saiyang kaiba.

³ Pirming pinapahalagahan na marhay kan mga lingkod ni Jehova an mga panahon na nagtitiripon sinda. Halimbawa, pagkaestablisar kan Kristiyanong kongregasyon, an mga parasunod ni Jesus tulos-tulos na ‘nagpadagos sa pakikipagtipon sa lambang saro.’ (Gibo 2:42, NW) Posibleng marhay na arog ka man sa sainda na gustong-gustong regular na mag-atender sa mga pagtiripon kan kongregasyon. Pero, gabos na Kristiyano napapaatubang sa mga ulang. Tibaad magin masakit para sa sato na makaatender sa mga pagtiripon huli sa satong sekular na trabaho, kadakul na gibuhon, o kapagalan. Kaya, ano an magpapahiro sa sato na pagmaigutan na mapangganahan an mga ulang na ini asin regular na makaatender sa mga pagtiripon? ^[1] Paano ta matatabangan an mga tinutukduan niyato sa Bibliya asin an iba pa na mahiling an kahalagahan kan pag-atender sa mga pagtiripon? Sa artikulong ini, pag-uulayan niyato an walong dahilan kun taano ta dapat kitang magtiripon para sumamba. Puwede niyatong barangaon sa tulong kategoriya an mga dahilan na iyan: (1) kun paano kita nakikinabang, (2) kun paano kita nakakatabang sa iba, asin (3) kun ano an namamatian ni Jehova pag nag-atender kita sa mga pagtiripon. ^[2]

4. Paano kita natatabangan kan satong pagtiripon na makanuod manungod ki Jehova?

⁴ Natutukduan kita kan mga pagtiripon. Tinatabangan kita kan lambang pagtiripon na makanuod manungod sa satong Diyos, si Jehova. Halimbawa, dai pa sana nahahaloy, haros duwang taon na pinag-adalan kan kadaklan sa mga kongregasyon an librong Rumani ki Jehova sa saindang Pag-adal sa Bibliya kan Kongregasyon. Bako daw na an pag-adal sa mga kuwalidad nin Diyos, kaiba an udok sa pusong mga komento kan mga tugang, nakapakusog sa pagkamuot mo sa saimong Ama sa langit? Nadugangan man an satong kaaraman sa Bibliya paagi sa atentibong pagdangog sa mga pahayag, demonstrasyon, asin pagbasa sa Bibliya. (Neh. 8:8) Halimbawa, isipon an espirituwal na mga kayamanan na nadidiskubre mo pag nag-aandam ka asin nagdadangog sa tampok na mga kabtang kan babasahon sa Bibliya kada semana!

5. Paano ka natabangan kan mga pagtiripon na maiaplikar an mga nanudan mo sa Bibliya asin mapauswag an pamamaagi mo nin paghuhulit?

⁵ Natutukduan kita kan mga pagtiripon na iaplikar sa gabos na aspekto kan satong buhay an mga prinsipyo sa Bibliya. (1 Tes. 4:9, 10) Halimbawa, ibinabagay sa mga pangangaipo kan mga lingkod nin Diyos an Pag-adal sa Torrengbantayan. Napahiro ka na daw kan Pag-adal sa Torrengbantayan na pag-isipan giraray an saimong mga pasuhan, patawadon an saimong kapagtubod, o pauswagon an kalidad kan saimong mga pamibi? An pagtiripon sa tahaw kan semana nagtutukdo man sa sato kun paano magigin epektibo sa paghuhulit kan maugmang bareta asin sa pagtutukdo sa iba kan mga katotoohan na nasa Bibliya.—Mat. 28:19, 20.

6. Paano kita napapakusog asin napapagdanay na makusog kan satong mga pagtiripon?

⁶ Nakakapakusog sa sato an mga pagtiripon. An kinaban na ini ni Satanas pinapaluya an satong buot asin an satong espirituwalidad. Tinatawan man kita kaini nin mga tensiyon asin pasakit. Sa kabaliktaran, napapakusog kita kan mga pagtiripon kan kongregasyon. (Basahon an Guibo 15:30-32.) Sa parati, pinag-uulayan niyato sa satong mga pagtiripon an kautuban kan mga hula sa Bibliya. Kaya, mas napapakusog an satong pagtitiwala na mauutob man an mga panuga ni Jehova sa maabot na panahon. Siyempre, bako sana an mga tugang na nagtatao kan saindang kabtang sa plataporma an nakakapakusog sa sato. Nakakapakusog man sa sato an mga komento kan mga tugang asin an saindang udok sa pusong pagkanta nin pag-umaw ki Jehova. (1 Cor. 14:26) Asin pag nakikipag-ulay kita sa satong mga tugang bago asin pagkatapos kan pagtiripon, nagiginhawahan kita huling nahihiling tang dakul kitang amigo na talagang nagmamakulog sa sato.—1 Cor. 16:17, 18.

7. Taano ta mahalagang marhay na mag-atender kita sa satong mga pagtiripon?

⁷ Nag-aako kita nin tabang kan banal na espiritu sa mga pagtiripon. An pinamuraway na si Jesus nagsabi: ‘An igwa nin talinga, magdangog sa sinasabi kan  espiritu sa mga [kongregasyon].’ (Kap. 2:7) Iyo, ginagamit ni Jesus an banal na espiritu tanganing panginutan an mga kongregasyon. Kaipuhan niyato an banal na espiritu tanganing malabanan an mga sugot, makapaghulit na may kusog nin buot, asin makapagdesisyon nin tama. Bako daw na dapat tang aprobetsaran an lambang oportunidad, arog kan pag-atender sa mga pagtiripon, tanganing akuon an tabang kan banal na espiritu?

8. Paano nakakatabang sa mga kapagtubod ta an satong pag-atender, pagkomento, asin pagkanta sa mga pagtiripon? (Hilingon man an kahon na “Pirmi Siyang Minahali na Mas Marahay Na an Pagmati.”)

⁸ Nagkakaoportunidad kita sa mga pagtiripon na ipahiling sa mga tugang na namumutan ta sinda. May mga kakongregasyon kita na nagtatagal nin grabeng mga pagbalo. Kaya nagsurat si apostol Pablo: “Isipon ta an lambang saro”! Pagkatapos, sinabi ni Pablo na magigibo niyato iyan paagi sa ‘dai pagpabaya sa satong pagtiripon.’ (Heb. 10:24, 25, NW) Pag nag-aatender ka sa mga pagtiripon, naipapahiling mo sa mga kapagtubod na nagmamakulog ka sa sainda, na gusto mo sindang makaibanan saka makaulay, asin interesado ka sa mga namamatian ninda. Nakakapakusog man sa sainda an udok sa puso mong mga komento asin pagkanta.—Col. 3:16.

9, 10. (a) Ipaliwanag kun paano kita matatabangan kan mga sinabi ni Jesus sa Juan 10:16 na masabutan kun gurano kahalaga na makipagtipon sa satong mga tugang. (b) Kun regular kita sa mga pagtiripon, paano ta natatabangan an mga kapagtubod tang isinikwal kan saindang pamilya?

⁹ Nakakatabang sa sato an mga pagtiripon na magkasararo. (Basahon an Juan 10:16.) Iinagid ni Jesus an saiyang sadiri sa sarong pastor, asin an saiyang mga parasunod sa sarong aripumpon nin mga karnero. Pag-isipan ini: Kun an duwang karnero nasa bulod, an duwa pang karnero nasa kababan, asin an saro pa nagsasabsab sa ibang lugar, masasabi ta daw na sarong aripumpon an limang karnerong iyan? Dai, huling an sarong aripumpon nagdadanay na magkairibanan sa irarom kan pangangataman nin sarong pastor. Kaagid kaiyan, dai ta masusunod an satong Pastor kun tuyo niyatong isinusuway an satong sadiri. Kaipuhan niyatong makipagtipon sa ibang mga Kristiyano tanganing magin parte nin ‘sarong aripumpon’ na nasa pangangataman nin “sarong pastor.”

¹⁰ Pag nag-aatender kita sa pagtiripon, nakakakontribwir kita sa pagkasararo kan satong kasararuan nin magturugang. (Sal. 133:1) An iba sa mga kapagtubod ta isinikwal kan mga magurang ninda asin mga tugang. Pero, nanuga si Jesus na matao siya sa sainda nin sarong espirituwal na pamilya na mamumuot asin maataman sa sainda. (Mar. 10:29, 30) Kun regular kang nag-aatender sa mga pagtiripon, magigin kang garo ama, ina, o tugang kan saro sa mga namumutan na ini! Bako daw na napapahiro kita kaiyan na gibuhon an satong pinakamakakaya para makaatender sa gabos na pagtiripon?

11. Paano kita natatabangan kan pag-atender sa mga pagtiripon na maitao ki Jehova an mga maninigo sa saiya?

¹¹ Naitatao niyato paagi sa pag-atender sa mga pagtiripon  an mga maninigo ki Jehova. Bilang satong Kaglalang, maninigo si Jehova sa pag-umaw, kamurawayan, pasasalamat, asin onra. (Basahon an Kapahayagan 7:12.) Pag kita namimibi, nagkakanta, asin nagtataram manungod ki Jehova sa satong mga pagtiripon, itinatao ta sa saiya an talagang maninigo sa saiya—an satong pagsamba. Pinapahalagahan niyato an pribilehiyo na tawan nin onra an Saro na kadakul nang ginibo para sa sato.

12. Ano an namamatian ni Jehova pag kinukuyog ta an pagbuot niya na mag-atender sa mga pagtiripon?

¹² Maninigo man ki Jehova an satong pagkuyog. Ipinagbuot niya sa sato na dai pagpabayaan an satong pagtiripon, lalo na sa panahon na ini kan katapusan. Kun gikan sa buot niyatong kinukuyog an pagbuot na iyan, napapaugma ta si Jehova. (1 Juan 3:22) Nahihiling niya asin pinapahalagahan an satong paghihinguwa na makaatender sa lambang pagtiripon.—Heb. 6:10.

13, 14. Paano kita napaparani ki Jehova asin ki Jesus sa satong mga pagtiripon?

¹³ Naipapahiling niyato paagi sa pag-atender sa pagtiripon na gusto tang mas maparani ki Jehova asin sa saiyang Aki. Sa satong mga pagtiripon, tinutukduan kita kan satong Kahuruhalangkawing Instruktor paagi sa mga pahina kan saiyang Tataramon, an Bibliya. (Isa. 30:20, 21) Dawa an mga bakong kapagtubod na nakakaatender sa satong mga pagtiripon tibaad nakakapagsabi: ‘An Diyos nasa saindo man nanggad.’ (1 Cor. 14:23-25) Itinatao ni Jehova sa satong mga pagtiripon an saiyang banal na espiritu asin aktibo niyang ginigiyahan paagi kaiyan an programa nin pagtutukdo sa Kasuratan. Kaya sa satong mga pagtiripon, nagdadangog kita sa mga sinasabi ni Jehova asin namamatian ta kun gurano niya kita kanamumutan. Bilang resulta, napaparani kita sa saiya.

¹⁴ Si Jesus nagsabi: ‘Kun sain an duwa o tulo na nagtitiripon sa ngaran ko, yaon man ako sa [tahaw] ninda.’ (Mat. 18:20) Aplikado sa satong mga pagtiripon an sinabing ini ni Jesus. Bilang payo kan kongregasyon, si Cristo ‘naglalakaw sa tahaw’ kan mga kongregasyon kan banwaan nin Diyos. (Kap. 1:20–2:1) Isip-isipon ini! Kalabot si Jehova asin si Jesus sa pagpapakusog sa sato sa Kristiyanong mga pagtiripon. Ano sa hiling mo an namamatian ni Jehova pag nahihiling niyang ginigibo mo an gabos tanganing maparani sa saiya asin sa saiyang Aki?

15. Paano naipapahiling kan pag-atender niyato sa mga pagtiripon na gusto tang kuyugon an Diyos?

¹⁵ Naipapahiling niyato paagi sa pag-atender sa pagtiripon na sinusuportaran ta an soberaniya nin Diyos. Dawa ipinagbuot sa sato ni Jehova na mag-atender sa mga pagtiripon, dai niya kita pinupuwersang sunudon iyan. (Isa. 43:23) Kaya, nasa sato kun ipapahiling niyato na talagang namumutan tang marhay si Jehova nin gikan sa puso asin marigon tang sinusuportaran an saiyang pamamahala. (Roma 6:17) Halimbawa, tibaad gipiton kita kan satong amo na dai mag-atender sa pagtiripon para gibuhon an ipinapatrabaho niya. Tibaad maghuma sa sato an gobyerno na papagmultahon kita, ipepreso, o iba pang mas grabeng padusa kun magtitiripon kita para sumamba. O tibaad natetentaran kitang maglibang imbes na mag-atender sa pagtiripon. Sa kada sitwasyon na ini, ipinapabaya ni Jehova sa sato an pagpili kun siisay an paglilingkudan ta. (Gui. 5:29) Kun pipilion niyato na suportaran an soberaniya ni Jehova, mapapaugma ta siya.—Tal. 27:11.

16, 17. (a) Taano ta masasabi niyato na mahalagang marhay para sa mga Kristiyano kan inot na siglo an mga pagtiripon? (b) Ano an namatian ni Brother George Gangas kun dapit sa Kristiyanong mga pagtiripon?

¹⁶ Pagkatapos kan makangangalas na milagro kan Pentecostes 33 C.E., nagtiripon an inot na mga Kristiyano bako sanang sa laog nin halipot na panahon kundi “nagpadagos sinda sa paghimati sa itinutukdo kan mga apostol, sa pakikipagtipon sa lambang saro.” (Gibo 2:42, NW) An Griegong tataramon na itrinadusir na “paghimati” nagpaparisa nin pagdanay o pagtagal sa sarong gibuhon na may grabeng paghihinguwa. Dai nagin pasil para sa mga Kristiyano kaidto an pag-atender sa mga pagtiripon huling pinepersegir sinda kan gobyerno nin Roma asin kan mga Judiong lider nin relihiyon. Pero,  naghinguwang marhay sinda na padagos na makapagtiripon.

¹⁷ Dakul na lingkod ni Jehova ngunyan an pinapahalagahan na marhay an Kristiyanong mga pagtiripon. Si George Gangas, na naglingkod bilang miyembro kan Namamahalang Grupo sa laog nin labing 22 na taon, nagsabi: “Para sako, an pakikipagtipon sa mga tugang an saro sa pinakadakulang kaugmahan sa buhay asin gikanan nin pampakusog nin buot. Gustong-gusto kong magin saro sa mga naiinot sa Kingdom Hall, asin saro sa mga nahuhuring maghali, kun posible. Ugmahon ako pag nakakaulay ko an mga lingkod nin Diyos. Pag kaibanan ko sinda, garo ako nasa sadiri kong harong kaiba kan sakong pamilya sa sarong espirituwal na paraiso.” Sinabi pa niya: “Arog kan kompas na pirming nakatukdo sa norte, gusto man kan isip asin puso ko na pirming mag-atender sa mga pagtiripon.”

18. Ano an namamatian mo kun dapit sa satong mga pagtiripon, asin ano an determinado mong gibuhon?

¹⁸ Arog man daw kaiyan an namamatian mo dapit sa pakikipagtipon tanganing sumamba ki Jehova? Kun iyo, magin determinadong padagos na gibuhon an gabos mong makakaya tanganing regular na makaibanan an saimong mga tugang sa mga pagtiripon, dawa sa mga panahon na masakit iyan na gibuhon. Sa paaging ini, maipapahiling mong minauyon ka ki Hading David na nagsabi: ‘Namumutan ko an saimong harong, [Jehova].’—Sal. 26:8, An Marahay na Bareta Biblia.