Hanapon an Sarong Bagay na Mas Mahalaga Pa sa Bulawan
Nakahanap ka na daw nin sarong tipak nin bulawan? Dikiton sana an nakakakua kaiyan. Pero, minilyon an nakahanap nin sarong bagay na mas mahalaga pa diyan. Iyan iyo an kadunungan nin Diyos, na ‘dai mababakal nin [purong] bulawan.’—Job 28:12, 15.
SA NAGKAPIRANG paagi, maikukumparar sa mga parahanap nin bulawan an sinserong mga estudyante sa Bibliya. Kaipuhan kan mga estudyanteng ini na magmaigot asin padagos na hanapon sa Kasuratan an daing kaagid an halaga na kadunungan. Bilang mga estudyante sa Bibliya, ano an manunudan niyato sa tulong paagi na diyan nakakahanap nin bulawan?
NAKAHANAP KA NIN TIPAK NIN BULAWAN!
Imahinaron na naglalakaw ka harani sa pangpang nin sarong salog asin nakahiling ka nin garo saditon na gapo na nagkikinang pag natatamaan kan saldang. Nagduko ka asin ugmahon ka kan mahiling mong sarong tipak iyan nin bulawan. Mas sadit pa iyan sa payo nin posporo asin mas bihirang makakua kaiyan kisa sa de-kalidad na diyamante. Siyempre, naghanap ka pa sa palibot ta tibaad may mahiling ka pang ibang tipak nin bulawan.
Kaagid kaiyan, sa sarong dai mo malilingawan na aldaw kaidto, saro sa mga lingkod ni Jehova an nagtuktok sa pinto nindo tanganing ipakipag-ulay an mensahe nin paglaom na mahahanap sa Bibliya. Tibaad natatandaan mo pang marhay an panahon na nahanap mo an saimong inot na, sabi ngani, espirituwal na tipak nin bulawan. Tibaad nangyari iyan kan inot mong mahiling sa Bibliya an pangaran kan Diyos na Jehova. (Sal. 83:18) O tibaad kan manudan mo na puwede kang magin katuod ni Jehova. (Sant. 2:23) Narealisar mo tulos na nakakua ka nin sarong bagay na mas mahalaga pa sa bulawan! Asin posibleng gustong-gusto mo pang makakua nin iba pang espirituwal na tipak nin bulawan.
NAKAKUA KA PA!
Kun beses, natitipon sa mga sapa asin salog an saraditon na bilog o lapnad na pidaso nin bulawan. Inaapod ining alluvial gold. Sa sarong panahon nin paghanap, an maigot na mga parahanap nin bulawan puwedeng makakua sa lugar na iyan nin rinibong gramo nin bulawan na nagkakantidad nin ribo-ribong dolyar.
Kan magpuon kang makipag-adal nin Bibliya sa mga Saksi ni Jehova, tibaad an namatian mo garo ka sarong parahanap nin bulawan na nagkakabod sa sarong lugar na kadakul nin natipon na bulawan. An saro-sarong paghurop-hurop sa mga teksto sa Bibliya nakakadagdag sa natitipon mong kaaraman asin nagigin kang mayaman sa espirituwal. Mantang maugma mong hinuhurop-hurop an mahalagang marhay na mga katotoohan sa Bibliya, nanunudan mo kun paano ka mapaparani ki Jehova asin magdadanay sa saiyang pagkamuot na may paglaom na buhay na daing katapusan.—Sant. 4:8; Jud. 20, 21.
Arog nin sarong maigot na parahanap nin bulawan, nagmamaigot ka man daw na manudan an mahalagang marhay na mga katotoohan sa Bibliya?
PADAGOS NA MAGHANAP!
An sarong parahanap nin bulawan puwedeng makakua nin kadikit na bulawan sa laog nin mga igneous rock. An nagkapira sa arog kaining gapo igwa nin dakulon na nakahalong bulawan kaya minimina iyan asin rinurunot tanganing makua an bulawan. Sa primero, tibaad dai mo tulos mahiling an bulawan na nasa gapo. Taano? Huling sa kada tonelada nin igneous rock na iyan, 10 gramo sana nin bulawan an makukua! Pero dawa arog kaiyan, para sa parahanap nin bulawan, sulit an gabos na paghihinguwa para minahon iyan.
Kaipuhan man an paghihinguwa pagkatapos na manudan nin saro an “panginot na doktrina manungod sa Cristo.” (Heb. 6:1, 2, NW) Pag pinag-aadalan mo an Bibliya, kaipuhan mong magmaigot para makua an bagong mga punto asin praktikal na mga leksiyon. Kaya, ano an magigibo mo para talagang makinabang kang marhay sa personal na pag-adal sa Bibliya dawa dakul na taon mo nang ginigibo iyan?
Papagdanayon an interes mong makanuod. Tawan nin maingat na atensiyon an mga detalye. Kun padagos kang maghihinguwa, mahahanap mo an mahalagang marhay na mga tipak nin kadunungan asin paggiya nin Diyos. (Roma 11:33) Tanganing madagdagan an saimong kaaraman sa Kasuratan, gamiton an mga kasangkapan sa pag-research na makukua sa sadiri mong lengguwahe. Magin matiyaga sa paghanap kan kaipuhan mong paggiya asin kan mga simbag sa mga hapot mo sa Bibliya. Maghapot sa ibang mga tugang kun anong mga teksto saka artikulo an nakatabang asin nakapakusog na marhay sa sainda. Sabihon sa iba an mga interesanteng punto na nahanap mo sa pag-adal sa Tataramon nin Diyos.
Siyempre, an pasuhan mo bako sanang para mapadakul an saimong kaaraman. Nagpatanid si apostol Pablo na “an kaaraman nakakapadakula nin payo.” (1 Cor. 8:1, NW) Kaya, maghinguwa kang magdanay na mapakumbaba asin makusog sa pagtubod. Makakatabang an regular na pampamilyang pagsamba asin personal na pag-adal sa Bibliya tanganing makapamuhay ka kauyon kan mga pamantayan ni Jehova asin mapahiro kang tabangan an iba. Urog sa gabos, magigin maugma ka huling nahanap mo an sarong bagay na mas mahalaga pa sa bulawan.—Tal. 3:13, 14.