1, 2. Taano ta dapat niyatong sanayon an iba na mag-ako nin teokratikong mga asignasyon?

PANGINOT para ki Jesus an paghuhulit kan maugmang bareta kan Kahadian. Pero, nagtao siya nin panahon para sanayon an iba na magin mga pastor asin paratukdo. (Mat. 10:5-7) Dawa sibot si Felipe sa pagigin ebanghelisador, siguradong tinabangan niya an saiyang apat na aking babayi na magin epektibong parahulit man kan katotoohan sa Kasuratan. (Gui. 21:8, 9) Gurano kaimportante ngunyan an arog kaiyan na pagsasanay?

² Sa bilog na kinaban, padagos na nagdadakul an mga nag-aako kan maugmang bareta. Kaipuhan na masabutan kan mga baguhan na dai pa bawtisado kun taano ta importante an personal na pag-adal sa Bibliya. Kaipuhan man sindang tukduan kun paano ihuhulit an maugmang bareta asin kun paano itutukdo sa iba an katotoohan. Sa satong mga kongregasyon, kaipuhan na dagkahon an mga brother na maghinguwa tanganing makuwalipikar na magin mga ministeryal na lingkod asin elder. Paagi sa ‘marahay na instruksiyon,’ matatabangan kan maygurang na mga Kristiyano an mga baguhan na umuswag sa espirituwal.—Tal. 4:2.

3, 4. (a) Paano ikinonektar ni Pablo an pag-adal sa Kasuratan sa pagigin mabunga sa ministeryo? (b) Bago niyato dagkahon an satong mga tinutukduan na personal na pag-adalan an Bibliya, ano nguna an dapat na ginigibo ta?

³ Gurano kaimportante an personal na pag-adal sa Bibliya? Makukua niyato an simbag sa surat ni apostol Pablo sa mga kapwa niya Kristiyano sa Colosas. Sinabi niya: “Dai kami nagpundo sa pagpamibi para sa saindo asin sa pagpakiulay na lugod mapano kamo nin tamang kaaraman mapadapit sa kabutan [nin Diyos], kasabay an lubos na kadunungan asin espirituwal na pakasabot, na sa siring makalakaw kamo nin maninigo para ki Jehova tanganing lubos siyang mapaugma mantang kamo padagos na namumunga paagi sa lambang marahay na gibo asin padagos na nag-uurog sa saindong tamang kaaraman mapadapit sa Diyos.” (Col. 1:9, 10, NW) Paagi sa tamang kaaraman na iyan, an mga Kristiyano sa Colosas ‘makakalakaw nin maninigo para ki Jehova tanganing lubos siyang mapaugma.’ Matatabangan sinda kaiyan na padagos na ‘mamunga paagi sa lambang marahay na gibo,’ lalo na sa paghuhulit kan maugmang bareta. Kaipuhan na tabangan niyato an mga tinutukduan ta sa Bibliya na masabutan na tanganing epektibong makapaglingkod ki Jehova, dapat na igwa sinda nin regular na pag-adal sa Bibliya.

⁴ Pero bago tabangan an iba na makinabang sa personal na pag-adal sa Bibliya, dapat na kita mismo kumbinsido na talagang mahalaga iyan. Sa katunayan, kita mismo kaipuhan na igwa nin marahay na kaugalian sa pag-adal sa Bibliya. Kaya puwede mong ihapot sa sadiri: ‘Kun an opinyon kan kagharong kontra sa mga itinutukdo kan Kasuratan o kun magbangon siya nin dipisil na mga hapot, nasisimbag ko daw iyan gamit an Bibliya? Pag nababasa ko kun gurano kaigot sa paghuhulit si Jesus, Pablo, asin an iba pa, nadadagka daw ako kaini na magin maigot man sa paglilingkod ki Jehova?’ Gabos kita nangangaipo nin kaaraman asin sadol hali sa Tataramon nin Diyos. Asin kun sasabihon niyato sa iba kun gurano kita nakinabang sa satong personal na pag-adal sa Bibliya, madadagka ta sinda na mahigos na pag-adalan an Kasuratan tanganing sinda man makinabang.

5. Magtao nin mga suhestiyon kun paano tatabangan an mga baguhan na magkaigwa nin regular na personal na pag-adal sa Bibliya.

⁵ Tibaad ihapot mo, ‘Paano ko masasanay an tinutukduan ko na regular na pag-adalan an Bibliya?’ Marahay na punan iyan paagi sa pagtukdo sa saiya kun paano mag-aandam para sa pag-adal nindo. Puwede mong sabihon sa saiya na basahon an konektadong mga impormasyon na nasa apendise kan librong Ano Man Nanggad an Itinotokdo kan Biblia? asin hanapon an sitadong mga teksto. Tabangan siya na mag-andam para makapagkomento sa mga pagtiripon. Dagkahon siya na basahon an kada isyu kan An Torrengbantayan asin Awake! Kun makukua sa lengguwahe niya an Watchtower Library o Watchtower ONLINE LIBRARY, ipahiling sa saiya kun paano niya iyan magagamit tanganing hanapon an simbag sa mga hapot sa Bibliya. Kun tatabangan mo siyang magibo an mga ini, posibleng marhay na sa dai mahahaloy, ikakaugma na niya an personal na pag-adal sa Tataramon nin Diyos.

6. (a) Paano mo matatabangan an saimong tinutukduan na mas mamutan an Bibliya? (b) Ano an posibleng gibuhon nin sarong tinutukduan sa Bibliya kun magkaigwa siya nin udok sa pusong pagkamuot sa Kasuratan?

 ⁶ Siyempre, dai niyato dapat piriton an siisay man na basahon asin pag-adalan an Bibliya. Imbes, gamiton niyato an mga kasangkapan na itinatao kan organisasyon ni Jehova tanganing tabangan an satong tinutukduan na mas mamutan an Bibliya. Pag-abot nin panahon, mamamatian kan sinserong estudyante an arog kan sa salmista: ‘Para sa sako, mas marahay an magin harani sa Diyos. Ginibo kong pailihan an [Soberanong Kagurangnan na Jehova].’ (Sal. 73:28, An Marahay na Bareta Biblia) Siyertong tatabangan kan banal na espiritu ni Jehova an siring kaiyan kahigos asin kamapag-apresyar na estudyante sa Bibliya.

7. Paano nagsanay si Jesus nin mga parabalangibog kan maugmang bareta? (Hilingon an ritrato sa kapinunan kan artikulo.)

⁷ Mababasa niyato sa Mateo kapitulo 10 an mga instruksiyon na itinao ni Jesus sa saiyang 12 apostol. Dai siya nagtao sa sainda nin bakong malinaw na mga instruksiyon kundi sinabi niya an espesipiko nindang mga gigibuhon. ^[1] Nagdangog an mga apostol mantang itinutukdo ni Jesus sa sainda kun paano magigin epektibo sa paghuhulit. Dangan naghulit na sinda. Huling naobserbaran ninda an mga pamamaagi ni Jesus, dai nahaloy nagin sindang may kakayahan na mga paratukdo kan katotoohan sa Kasuratan. (Mat. 11:1) Puwede niyatong sanayon an satong mga tinutukduan sa Bibliya na magin epektibong parahayag kan maugmang bareta. Pag-ulayan niyato ngunyan an duwang paagi para matabangan ta sinda.

8, 9. (a) Paano nakipag-ulay si Jesus sa mga tawo sa saiyang ministeryo? (b) Paano ta matatabangan an bagong mga parahayag na maarog an paagi nin pakikipag-ulay ni Jesus?

⁸ Makipag-ulay sa mga tawo. Parating ipinapakipag-ulay ni Jesus sa mga tawo an manungod sa Kahadian. Halimbawa, nagkaigwa siya nin interesante asin mabungang pakikipag-ulay sa sarong babayi na masakdo nin tubig sa bubon ni Jacob, harani sa siyudad nin Sicar. (Juan 4:5-30) Nakipag-ulay man siya ki Mateo Levi na sarong parasingil nin buhis. Dai idinetalye sa mga Ebanghelyo an dapit sa pag-uulay na iyan, pero mababasa niyato na inako ni Mateo an imbitasyon na magin parasunod ni Jesus. Nakipag-ulay man si Jesus sa dakul na tawo kan maghanda si Mateo sa harong niya nin dakulang bangkete para ki Jesus.—Mat. 9:9; Luc. 5:27-39.

⁹ Sa saro pang pagkakataon, may mga sinabing negatibo si Natanael mapadapit sa mga taga Nazaret; pero mabuot na nakipag-ulay sa saiya si Jesus. Huli kaini, nagbago si Natanael. Nagdesisyon siyang urog pang makaaram dapit sa mga itinutukdo ni Jesus na sarong taga Nazaret. (Juan 1:46-51) Kaya may marahay kitang dahilan na sanayon an bagong mga parahayag na makipag-ulay sa mga tawo sa mabuot asin makiamigong paagi. ^[2] Huli sa personal na interes asin mabuot na pakikipag-ulay kan satong mga sinasanay, siguradong mauugma sindang mahiling na naghihimati sa saindang mensahe an mga tawong sadiyosan an puso.

10-12. (a) Paano kinultibar ni Jesus an interes kan iba sa maugmang bareta? (b) Paano niyato matatabangan an bagong mga parahayag na mapauswag an saindang kakayahan bilang mga paratukdo kan katotoohan sa Bibliya?

¹⁰ Kultibaron an interes. Limitado an panahon ni Jesus tanganing maisagibo an saiyang ministeryo. Pero, nagtao siya nin panahon para kultibaron an interes kan mga tawo sa maugmang bareta. Halimbawa, nagtukdo si Jesus sa dakul na tawo mantang nakalunad sa sarong bangka. Pagkatapos kaiyan, milagroso niyang pinangyari na makadakop nin dakul na sira si Pedro asin sinabi niya digdi: ‘Puon ngunyan, mandadakop ka nin mga tawo.’ Ano an epekto ki Pedro kan mga sinabi asin ginibo ni Jesus? ‘Idinuong [ni Pedro asin kan saiyang mga kairiba] an saindang mga sakayan, binayaan ninda an gabos, asin suminunod [ki Jesus].’—Luc. 5:1-11.

¹¹ Si Nicodemo, sarong miyembro kan Sanhedrin, nagin interesado sa mga itinutukdo ni Jesus.  Gusto niyang makanuod pa, pero natakot siya sa puwedeng sabihon kan iba kun mahiling ninda siyang nakikipag-ulay ki Jesus. Madaling makibagay si Jesus asin matinao siya kan saiyang panahon; nagtugot siyang makipag-ulay sa saiya si Nicodemo sa pribado asin dawa banggi na. (Juan 3:1, 2) Ano an manunudan niyato digdi? Nagtao nin panahon an Aki nin Diyos tanganing pakusugon an pagtubod kan mga tawo. Bako daw na dapat man kitang magin mahigos sa pagdalaw liwat asin pagtukdo sa Bibliya sa mga interesado?

¹² Posibleng marhay na mapapauswag kan mga baguhan an saindang kakayahan bilang paratukdo kan katotoohan sa Bibliya kun papartneran niyato sinda sa paghuhulit. Puwede niyato sindang tukduan na balikan dawa an mga nagpahiling nin dikit na interes. Puwede man niyato sindang agdahon na umiba sa sato sa pagdalaw liwat asin pag-Bible study. Paagi sa arog kaiyan na mga pagsasanay asin pagpakusog sa saindang buot, siguradong magugustuhan kan mga baguhan na kultibaron an interes kan iba asin magkaigwa man nin sadiri nindang tinutukduan sa Bibliya. Manunudan man ninda na dai tulos sumuko kundi magin mapasensiya asin matiyaga sa ministeryo.—Gal. 5:22; hilingon an kahon na “ Kaipuhan na Magin Matiyaga.”

13, 14. (a) Ano an masasabi mo sa mga halimbawa sa Bibliya kan mga nagsakripisyong marhay para sa iba? (b) Sa anong praktikal na mga paagi niyato masasanay an mga baguhan asin mga hoben na magpahiling nin pagkamuot sa mga tugang?

¹³ Idinuon sa mga halimbawa sa Bibliya an pribilehiyo niyatong ipahiling an satong ‘pagkamuot sa mga tugang’ asin maglingkod sa lambang saro. (Basahon an 1 Pedro 1:22; Lucas 22:24-27.) Itinao kan Aki nin Diyos an gabos, pati an saiyang buhay, sa paglilingkod sa iba. (Mat. 20:28) Si Dorcas ‘kadakul nin ginibong karahayan asin itinaong tabang sa mga pobre.’ (Gibo 9:36, 39, NW) Si Maria, sarong tugang na babayi kaidto sa Roma, ‘nagpagal nin labi-labi’ para sa mga tugang sa kongregasyon. (Roma 16:6) Paano niyato matatabangan an mga baguhan na masabutan kun gurano kaimportante an pagtabang sa mga tugang?

¹⁴ Puwedeng agdahon kan maygurang na mga Kristiyano an mga baguhan na umiba sa sainda sa pagdalaw sa mga may hilang asin may edad na. Kun angay, puwedeng iiba kan mga magurang an saindang mga aki sa siring na mga pagdalaw. Puwedeng agdahon kan mga elder an mga hoben o mga baguhan na magtabang sa sainda sa pagtao nin kakanon o sa paghirahay sa harong kan mga may edad na. Sa paaging ini, manunudan kan mga hoben asin kan mga baguhan na gumibo nin kabuutan sa iba. Halimbawa, mantang naghuhulit sa sarong harayong teritoryo, naghahapit an sarong elder sa mga tugang na nakaistar duman tanganing kumustahon sinda. Nanudan kan hoben na brother na pirming nag-iiba sa saiya na dapat na mamatian kan gabos na nasa kongregasyon na namumutan sinda.—Roma 12:10.

15. Taano ta mahalagang magin interesado an mga elder sa pag-uswag kan mga brother sa kongregasyon?

¹⁵ Huling ginagamit ni Jehova an mga lalaki tanganing magtukdo sa kongregasyon, mahalagang pauswagon kan mga brother an kakayahan ninda sa pagtao nin pahayag. Bilang elder, puwede ka daw na magdangog mantang pinapraktis nin sarong ministeryal na lingkod an saiyang pahayag? Paagi sa saimong tabang, mapapauswag niya an saiyang kakayahan bilang sarong paratukdo kan Tataramon nin Diyos.—Neh. 8:8. ^[3]

16, 17. (a) Paano tinawan ni Pablo nin atensiyon an pag-uswag ni Timoteo? (b) Paano epektibong masasanay nin mga elder an mga magigin pastor sa kongregasyon?

¹⁶ Dakula an pangangaipo para sa dugang pang mga pastor sa Kristiyanong kongregasyon, asin kaipuhan na padagos na sanayon an mga magsasaabaga kan gibuhon na ini sa maabot na panahon. Nagtao si Pablo nin ideya kun paano sasanayon an iba kan siya magsabi ki Timoteo: “Aki ko, padagos kang magpakakusog paagi sa daing kapantay na kabuutan na ipinapahiling ni Cristo Jesus; asin kun mapadapit sa mga bagay na nadangog mo sa sako na kinumpirmar nin dakul na mga saksi, ipagkatiwala mo an mga ini sa masasarigan na mga lalaki,  asin sinda man magigin lubos na kuwalipikado na magtukdo sa iba.” (2 Tim. 2:1, 2, NW) Dakul an nanudan ni Timoteo sa paglilingkod kaiba kan apostol na si Pablo na sarong may edad na. Dangan inaplikar ni Timoteo sa saiya mismong ministeryo asin sa ibang aspekto kan saiyang sagradong paglilingkod an mga pamamaagi na nanudan niya ki Pablo.—2 Tim. 3:10-12.

¹⁷ Sinigurado ni Pablo na talagang masasanay niya si Timoteo kaya iiniba niya ini sa saiyang pagmimisyonero. (Gui. 16:1-5) Maaarog kan mga elder si Pablo kun iiiba ninda sa pagsungko sa pagpastor, kun angay, an mga kuwalipikadong ministeryal na lingkod. Sa paaging ini, tinatawan ninda nin oportunidad an siring na mga brother na personal na maobserbaran an pagtutukdo, pagtubod, pasensiya, asin pagkamuot na kaipuhan na mahiling sa sarong Kristiyanong paraataman. Saro ining paagi para masanay an mga magigin pastor kan ‘aripumpon nin Diyos.’—1 Ped. 5:2.

18. Taano ta dapat na mahalaga para sa sato an pagsasanay sa iba sa paglilingkod ki Jehova?

¹⁸ Mahalagang marhay an pagsasanay sa iba huling dakul na baguhan an kaipuhan na tabangan tanganing mapauswag an kakayahan sa ministeryo. Kaipuhan man na matukduan an mga brother kun paano mangangataman sa kongregasyon. Epektibo pa man giraray sagkod ngunyan an halimbawa nin pagsasanay na itinao ni Jesus asin ni Pablo. Gusto ni Jehova na masanay na marhay an mga lingkod niya sa ngunyan para sa teokratikong mga asignasyon ninda. Itinao sa sato nin Diyos an pribilehiyong tabangan an mga baguhan para mapauswag an saindang mga kakayahan tanganing maisagibo an kinakaipuhan na mga gibuhon sa kongregasyon. Mantang naggagrabe an kamugtakan sa kinaban asin kadakul pa kan dapat gibuhon na paghuhulit, nagigin mahalaga asin apurado ngunyan an siring na pagsasanay.

19. Taano ta makakasigurado kang magigin mapanggana an saimong mga paghihinguwa na sanayon an iba sa paglilingkod ki Jehova?

¹⁹ Siyempre, nangangaipo nin panahon asin paghihinguwa an pagsasanay sa iba. Pero tatabangan kita ni Jehova saka kan saiyang namumutan na Aki asin tatawan ninda kita nin kadunungan para maitao an siring na pagsasanay. Magigin maugma kita mantang nahihiling ta an mga sinanay niyato na padagos na ‘nagpapagal asin naghihinguwa.’ (1 Tim. 4:10) Asin kasabay kaiyan, lugod na padagos man kitang gumibo nin espirituwal na pag-uswag sa satong sagradong paglilingkod ki Jehova.