1, 2. (a) Taano ta dai niyato dapat ipagngalas na nakakamati kita nin kahaditan? (Hilingon an ritrato sa itaas.) (b) Ano an pag-uulayan ta sa artikulong ini?

NABUBUHAY kita sa tensiyonadong marhay na panahon. Grabe an kaanggutan ni Satanas na Diyablo asin ‘naglilibot siya siring sa nagngangarob na leon na naghahanap nin masisiba.’ (1 Ped. 5:8; Kap. 12:17) Kaya bakong makangangalas na pati kita, na mga lingkod nin Diyos, nagkakaigwa minsan nin mga kahaditan. Kun sa bagay, may mga pagkakataon na nahadit man an may takot sa Diyos na mga lingkod ni Jehova kaidto, arog ni Hading David. (Sal. 13:2) Nakamati man si apostol Pablo nin “paghadit para sa gabos na kongregasyon.” (2 Cor. 11:28, NW) Pero, ano an puwede niyatong gibuhon kun garo dai ta na kaya an mga kahaditan?

² Tinabangan kan satong mamumuton na Ama sa langit an saiyang mga lingkod kaidto, asin tatabangan man niya kita ngunyan na makakua nin dakulang kaginhawahan sa kapurisawan o kahaditan. Dinadagka kita kan Bibliya: ‘[Ipasa] nindo sa saiya an gabos nindong kahaditan, huli ta siya may pagmakulog sa saindo.’ (1 Ped. 5:7) Pero, paano? Pag-ulayan ta an apat na paagi na magigibo mo ini—paagi sa udok sa pusong pagpamibi, pagbasa saka paghurop-hurop sa Tataramon nin Diyos, paghagad ki Jehova kan saiyang banal na espiritu, asin pagsabi sa  sarong pinagtitiwalaan kan saimong mga namamatian. Mantang pinag-uulayan niyato an apat na paaging ini, hilingon kun anong praktikal na mga lakdang an gusto mong gibuhon.

3. Paano mo ‘ipapasa ki Jehova an pagabat na nasa saimo’?

³ An inot na magigibo niyato iyo na dumulok ki Jehova paagi sa udok na pamibi. Kun ika dai mapamugtak, nahahandal, o nahahadit huli sa inaatubang mong sitwasyon, sabihon mo sa saimong mamumuton na Ama sa langit an gabos na nasa puso mo. Nakimahirak si salmistang David ki Jehova: “Danguga an sakong pamibi, O Diyos.” Dangan sa salmo man sanang iyan, sinabi niya: “Ipasa mo ki Jehova an pagabat na nasa saimo, asin aalalayan ka niya.” (Sal. 55:1, 22, NW) Pagkatapos mong magibo an gabos tanganing resolberan an sarong problema, mas makakatabang an udok sa pusong pagpamibi kisa sa maghadit. Pero paano makakatabang sa saimo an pagpamibi tanganing malikayan an grabeng paghadit asin pagmundo?—Sal. 94:18, 19.

4. Taano ta mahalagang marhay na mamibi kun may mga ikinakahadit kita?

⁴ Basahon an Filipos 4:6, 7. Sisimbagon ni Jehova an satong daing untok asin udok sa pusong mga pamibi. Paano? Paagi sa pagtao sa sato nin panglaog na katuninungan na makakahali kan satong nakakapurisaw na mga kaisipan asin pagmati. Dakul an makakapagpatunay kaini sa sainda mismong eksperyensiya. Imbes na kahaditan, tinatabangan sinda nin Diyos na magkaigwa nin panglaog na katuninungan asin katrangkiluhan na nungka pa nindang naeksperyensiyahan. Puwede man na mangyari iyan sa saimo. Kaya, matatabangan ka kan ‘katuninungan nin Diyos’ na malampasan an ano man na inaatubang mong kadipisilan. Lubos kang makakapagtiwala sa panuga kan satong mapagmakulog na Diyos na si Jehova: “Dai ka maghadit, huli ta ako an saimong Diyos. Papakusugon taka, iyo, tatabangan taka.”—Isa. 41:10, NW.

5. Paano ka matatawan kan Tataramon nin Diyos nin panglaog na katuninungan?

⁵ An ikaduwang paagi tanganing magkaigwa nin panglaog na katuninungan iyo an pagbasa nin mga teksto sa Bibliya asin paghurop-hurop kaiyan. Taano ta mahalaga ini? Igwa an Bibliya nin praktikal na mga sadol na makakatabang sa saimo na malikayan, mabawasan, o makayanan an kahaditan. Dai mo paglingawan na makakatabang asin makakapaginhawa sa saimo an Tataramon nin Diyos huling yaon diyan an mismong madunong na mga konseho kan sato mismong Kaglalang. Mapapakusog kang marhay mantang hinuhurop-hurop mo an mga kaisipan nin Diyos—aldaw man o banggi—asin pinag-iisipan kun paano mo maiaaplikar an praktikal na mga sadol kan Bibliya. Espesipikong ikinonektar ni Jehova an pagbasa sa saiyang Tataramon sa pagigin ‘maisog asin makusog an buot,’ saka sa dai pakamati nin ‘takot o kawaran nin paglaom.’—Jos. 1:7-9, BPV. ^[1]

6. Paano ka makikinabang sa mga tataramon ni Jesus?

⁶ Mahihiling man niyato sa Tataramon nin Diyos an nakakarangang mga sinabi ni Jesus. An saiyang mga tataramon asin katukduan nakaginhawa sa mga nakadangog sa saiya. Kadakul kan naparani sa saiya huling napakalma niya an saindang napupurisaw na puso, pinakusog an mga maluya, asin rinanga an mga nagmumundo. (Basahon an Mateo 11:28-30.) Interesado siyang marhay sa espirituwal, emosyonal, asin pisikal na mga pangangaipo kan iba. (Mar. 6:30-32) Nagtatabang si Jesus sagkod ngunyan. Kun paanong tinabangan niya an mga apostol na nakaibanan niya kaidto sa pagbaklay, tatabangan ka man niya ngunyan. Dai mo kaipuhan na aktuwal na makaibanan si Jesus tanganing maako an saiyang tabang. Bilang Hadi sa langit, padagos siyang nagmamalasakit sa sato. Kaya kun nahahadit ka, makakasiyerto kang ‘tatabangan’ ka niya “sa mga panahon na kaipuhan” mo iyan. Iyo, matatabangan ka ni Jesus na makayanan an mga kapurisawan, asin matatawan ka niya nin paglaom saka kusog nin buot.—Heb. 2:17, 18; 4:16, NW.

7. Paano ka makikinabang sa itatao nin Diyos na banal na espiritu pag hinagad mo iyan sa saiya?

⁷ Nanuga si Jesus na siyertong itatao kan satong Ama sa langit an banal na espiritu sa mga naghahagad kaiyan sa Saiya. (Luc. 11:10-13) Ini an ikatulong paagi na makakatabang tanganing mabawasan an satong kahaditan—an mga aspekto kan bunga kan banal na espiritu. Ipinapahiling kan magagayon na kuwalidad na ini, na hali sa aktibong puwersa nin Diyos, an mismong personalidad kan makakamhan sa gabos na Diyos. (Basahon an Galacia 5:22, 23; * Col. 3:10) Mantang hinihinguwa mong ipahiling an mga aspekto kan bunga kan banal na espiritu, magigin mas marahay an relasyon mo sa iba. Kaya malilikayan mo an dakul na sitwasyon na puwedeng gikanan nin kahaditan. Pag-ulayan ta sa halipot kun paano ka matatabangan kan mga aspekto kan bunga kan banal na espiritu.

8-12. Paano ka matatabangan kan mga aspekto kan bunga kan banal na espiritu nin Diyos na makayanan o malikayan an mga sitwasyon na magkakawsa nin kahaditan?

⁸ “Pagkamuot, kagaya-gayahan, katuninungan.” Kun may paggalang mong tatrataron an iba, posibleng marhay na mas makokontrol mo an saimong negatibong mga emosyon. Sa anong paagi? Huling mantang ipinapahiling mo an pagkamuot sa tugang, kapadangatan, asin respeto, lilikayan mo an mga sitwasyon na magkakawsa nin kahaditan.—Roma 12:10.

⁹ “Pakatios, kabuutan, karahayan.” Mapagdadanay mo an matuninong na relasyon sa iba kun susunudon mo an sadol na: “Magin mabuot kamo sa lambang saro, mapagmalasakit, na lubos na nagpapatinarawadan.” (Efe. 4:32, NW) Kun gigibuhon mo ini, malilikayan mo an mga sitwasyon na puwedeng gikanan nin kahaditan. Magigin pasil man sa saimo na atubangon an mga sitwasyon na resulta kan pagkabakong perpekto nin tawo.

¹⁰ “Pagtubod.” Sa ngunyan, an parating kawsa kan satong kahaditan iyo an kuwarta asin mga rugaring. (Tal. 18:11) Pero, matatabangan kang makayanan o malikayan an arog kaiyan na kahaditan kun susunudon mo an ipinasabong na sadol ni apostol Pablo na magin ‘kontento na sa kun ano an igwa kita.’ Matatabangan ka kan pagkaigwa nin makusog na pagtubod na magtiwala na itatao ni Jehova an saimong mga pangangaipo. Sinabi pa ni Pablo: “Huli ta [an Diyos] nagsabi: ‘Dai taka nuarin man tatalikudan, asin dai taka nuarin man papabayaan.’ Sa siring mapapano kita nin kumpiyansa asin masabi: ‘Si Jehova an sakuyang paratabang; dai ako matatakot. Ano an magigibo nin tawo sa sako?’”—Heb. 13:5, 6, NW.

¹¹ “Pagigin kalmado, pagpupugol sa sadiri.” Isipa kun gurano kapraktikal asin kaepektibo kun ipapahiling mo an mga kuwalidad na ini. Siguradong lilikayan mong makagibo o makataram nin mga bagay na magtatao nin kahaditan sa saimo, asin makikinabang ka kun lilikayan mo an “grabeng paghinanakit, kaanggutan, pagkaungis, sirilyakan, asin mapang-insultong pagtaram.”—Efe. 4:31, NW.

¹² Totoo, kaipuhan mo an kapakumbabaan tanganing magtiwala ka sa ‘makapangyarihan na kamot nin Diyos’ asin tanganing ‘[ipasa] mo sa saiya an gabos mong kahaditan.’ (1 Ped. 5:6, 7) Pero kun magigin kang mapakumbaba, makakamtan mo an pag-uyon asin tabang nin Diyos. (Miq. 6:8) Kun aram mo kun sagkod sain an kaya kan saimong pisikal, mental, asin emosyonal na mga abilidad, posibleng dai ka sobrang mahahadit huling sa Diyos ka magtitiwala.

13. Ano an buot sabihon ni Jesus kan sabihon niya: ‘Dai kamo [nuarin man] maghadit’?

¹³ May madunong na sadol si Jesus sa Mateo 6:34 (basahon): ‘Dai kamo [nuarin man] maghadit.’ Pero, tibaad masakit sunudon an sadol na ini. Ano an buot sabihon ni Jesus kan sabihon niya: ‘Dai kamo [nuarin man] maghadit’? Malinaw na dai niya sinasabi na nungkang nahahadit an sarong lingkod nin Diyos; naaraman niyato na dawa si  David asin Pablo nahadit man. Kundi, tinatabangan ni Jesus digdi an saiyang mga disipulo na masabutan na an dai kinakaipuhan, o sobrang paghadit dai makakaresolber sa mga problema. May sadiring problema an kada aldaw, kaya dai kaipuhan na idugang kan mga Kristiyano sa presente nindang kahaditan an mga kahaditan ninda para sa nakaagi o sa maabot na panahon. Paano mo maiaaplikar an sadol ni Jesus tanganing mabawasan an grabeng kahaditan?

14. Paano mo aatubangon an mga kahaditan na resulta kan mga nagibo o pagkukulang mo kan nakaagi?

¹⁴ An ibang kahaditan tibaad resulta kan mga nagibo o pagkukulang nin saro kan nakaagi. Tibaad nakokonsensiya siya huli sa sarong bagay na nagibo niya kaidto, dawa dakul na taon na an nakalihis. May panahon kaidto na namatian ni Hading David na an saiyang ‘mga kalapasan lampas na sa saiyang payo.’ Sinabi niya: ‘Nagkurahaw ako huli sa [agrangay] kan sakuyang puso.’ (Sal. 38:3, 4, 8, 18) Ano an ginibo ni David kan siya nasa sitwasyon na iyan? Nagtiwala siya sa pagigin mahihirakon asin mapagpatawad ni Jehova. Bilog na pagtitiwala niyang sinabi: ‘[Maugma] idtong an saiyang mga kalapasan pinatawad.’—Basahon an Salmo 32:1-3, 5.

15. (a) Taano ta dai mo dapat na ikahadit an sa ngunyan? (b) Anong praktikal na mga lakdang an magigibo mo tanganing mabawasan an kahaditan? (Hilingon an kahon na “ Nagkapirang Praktikal na Paagi Para Mabawasan an Kahaditan.”)

¹⁵ Sa ibang pagkakataon, tibaad ikinakahadit mo an sa ngunyan. Halimbawa, kan isurat ni David an Salmo 55, may huma kaidto sa saiyang buhay. (Sal. 55:2-5) Pero, dai niya tinugutan na maiwara kan saiyang kahaditan an pagtitiwala niya ki Jehova. Udok sa pusong ipinamibi ni David ki Jehova an saiyang mga problema, pero aram man niya na kaipuhan niyang gumibo nin praktikal na mga lakdang dapit sa sitwasyon niya. (2 Sam. 15:30-34) May manunudan ka ki David. Imbes na tugutan na daugon ka kan saimong kahaditan, gumibo ka nin mga lakdang tanganing maatubang an sitwasyon. Dangan, may pagtitiwalang ipabaya ki Jehova an mga bagay-bagay.

16. Paano mapapakusog kan kahulugan kan pangaran nin Diyos an saimong pagtubod?

¹⁶ Nagkakaigwa nin mga dai kinakaipuhan na kahaditan kun pigpaparaisip nin sarong Kristiyano an dapit sa posibleng magin problema sa maabot. Pero, dai mo kaipuhan na ikahadit an mga bagay na dai pa man nangyayari. Taano? Huling sa parati, dai man nangyayari an mga kinakatakutan ta. Dugang pa, mayong sitwasyon an dai kayang kontrulon kan Diyos na puwede mong pasahan kan gabos mong kahaditan. An saiya mismong pangaran nangangahulugan na “Pinangyayari Niyang Magin.” (Ex. 3:14, NW) Sinisiyerto sa sato kan hararom na kahulugan kan pangaran nin Diyos na kayang-kaya niyang utubon an mga katuyuhan niya para sa saiyang mga lingkod. Makakasiyerto ka na bebendisyunan nin Diyos an mga maimbod sa saiya asin tatabangan niya sindang maatubang an mga kahaditan ninda para sa mga nakaagi, sa presente, asin sa maabot na panahon.

 17, 18. Paano makakatabang an marahay na komunikasyon tanganing makayanan mo an kahaditan?

¹⁷ An ikaapat na paagi na makakatabang sa saimo na makayanan an kahaditan iyo an pagkaigwa nin marahay na komunikasyon sa sarong pinagtitiwalaan,  na sinasabi mo sa saiya an saimong mga namamatian. Tibaad matabangan ka kan saimong agom, dayupot na amigo, o sarong elder, na mas magin malinaw sa saimo an sitwasyon mo. ‘An kahaditan minapagabat sa puso nin tawo, alagad minapaugma sa saiya an marahay na tataramon.’ (Tal. 12:25, BPV) Dakula an maitatabang nin sarong bukas asin onestong komunikasyon tanganing masabutan asin maatubang mo an saimong mga problema. Sinasabi sa sato kan Bibliya: ‘Masasayang an mga plano kun mayo nin [pag-urulay], alagad kun kadakul kan parahatol marahay an magigin bunga kaiyan.’—Tal. 15:22, BPV.

¹⁸ Tinatabangan man ni Jehova an mga Kristiyano na maatubang an mga kahaditan paagi sa mga pagtiripon kan kongregasyon kada semana. Makakaibanan mo diyan an mga kapagtubod na nagmamalasakit sa saimo asin gustong pakusugon an lambang saro. (Heb. 10:24, 25) An siring na ‘pagpakusog’ sa buot kan lambang saro magpapakusog kan saimong espirituwalidad asin magigin mas pasil sa saimo na atubangon an ano man na kahaditan.—Roma 1:12, NW.

19. Taano ta makakapagtiwala ka na mapapakusog ka kan relasyon mo sa Diyos?

¹⁹ Hilingon kun paano napatunayan nin sarong elder sa Canada an kahalagahan kan pagpasa niya ki Jehova kan saiyang mga kahaditan. Nakaka-stress na marhay an trabaho niya bilang school counselor asin maestro, saka may hilang pa siyang anxiety disorder. Paano niya ini napangganahan? Sinabi niya: “Inot sa gabos, nahiling kong an pinaka-kakusugan ko tanganing malabanan an problema ko sa emosyon iyo an paghihinguwa kong pakusugon an relasyon ko ki Jehova. Sa mga panahon na nasasakitan ako, dakulang tabang an suporta kan dayupot kong mga amigo asin kapagtubod. Sinasabi ko sa agom ko an gabos na namamatian ko, mayo akong itinatago. Dakulang tabang man an mga kapwa ko elder asin an samong paraataman sa sirkito tanganing mas masabutan ko an kamugtakan ko. Nagpabulong man ako, binago ko an paggamit ko nin panahon, asin nagtagama nin panahon para magrelaks saka mag-ehersisyo. Luway-luway kong namatian na mas kontrolado ko na an mga bagay-bagay. Pero, pag may mga bagay na dai ko kayang makontrol, ipinapabaya ko iyan ki Jehova.”

20. (a) Paano niyato ipapasa sa Diyos an satong mga kahaditan? (b) Ano an pag-uulayan niyato sa masunod na artikulo?

²⁰ Bilang sumaryo, naaraman niyato an kahalagahan kan pagpasa ki Jehova kan satong mga kahaditan paagi sa udok sa pusong pagpamibi asin pagbasa saka paghurop-hurop sa saiyang Tataramon. Pinag-ulayan man niyato an kahalagahan kan pagpahiling kan mga aspekto kan bunga kan saiyang banal na espiritu, pagsabi sa sarong pinagtitiwalaan kan satong mga namamatian, asin pagkua nin kusog sa Kristiyanong mga pagtiripon. Pag-uulayan niyato sa masunod na artikulo kun paano kita urog pang tinatabangan ni Jehova paagi sa pagtao sa sato nin paglaom na tatawan niya kita nin balos.—Heb. 11:6.