KAN suminunod na pagdalaw niya, kinurahawan giraray siya kan babayi. Ano an nagin reaksiyon ni Toñi? “Dipisil talagang sitwasyon idto,” an sabi niya. “Mayong basehan an makukulog niyang sinabi.” Pero, sa giraray, naghagad nin dispensa si Toñi asin sinabi sa babayi na nasasabutan niya an sakit na namamatian kaini.

Kun ika si Toñi, ano daw an magigin reaksiyon mo? Mapahiling ka kaya nin kahuyuan nin buot? O masasakitan kang kontrulon an kaanggutan mo? Iyo, tibaad bakong pasil na magdanay na kalmado sa mga sitwasyon na arog kan nasambitan sa itaas. Talagang masakit magdanay na mahuyo an buot pag nasa sitwasyon na nakaka-stress o nakakapaanggot.

Pero, dinadagka kan Bibliya an mga Kristiyano na magin mahuyo an buot. Sa katunayan, ikinokonektar kan Tataramon nin Diyos an ugaling iyan sa kadunungan. “Siisay an madunong asin may pakasabot diyan sa saindo?” an hapot ni Santiago. “Paagi sa marahay na paggawi, ipahiling niya na an gabos na bagay ginigibo niya nin may kahuyuan na bunga nin kadunungan.” (Sant. 3:13, NW) Sa anong paagi nagigin ebidensiya kan kadunungan gikan sa itaas an pagkaigwa nin kahuyuan nin buot? Asin ano an  makakatabang sa sato na magkaigwa nin arog kaining marahayon na ugali?

An pagigin mahuyo an buot nakakapakalma nin tensiyon. ‘An mahuyong simbag nakakahali nin kaanggutan, alagad an [makulog] na tataramon [nakakapaanggot].’—Tal. 15:1, BPV. *

An anggot na reaksiyon makakapagrabe sana sa sitwasyon huling, sabi ngani, nakakadagdag ini nin gatong sa kalayo. (Tal. 26:21) Sa kabaliktaran, an mahuyong simbag sa parati, nakakapakalma. Napapalumoy pa ngani kaiyan an buot nin saro na bakong makikatuod.

Naeksperyensiyahan mismo ini ni Toñi. Napahibi an babayi kan mahiling kaini an mahuyong reaksiyon ni Toñi. Sinabi kan babayi na kadakul niya kayang problema—personal na problema asin problema sa pamilya. Pinatotoohan siya ni Toñi, asin napunan an sarong pag-adal sa Bibliya—gabos iyan resulta kan kalmado asin mapagpatuninong na ugali ni Toñi.

An pagigin mahuyo an buot makakapaugma sa sato. “Maugma an mga mahuyo an buot, huli ta mamanahon ninda an daga.”—Mat. 5:5, NW.

Taano ta maugma an mga mahuyo an buot? Huli sa pagsulot ninda nin kahuyuan, an dakul na indibidwal na dating maiisog, mga maugma na ngunyan. Mas marahay na an buhay ninda, asin aram ninda na sarong marahayon na puturo an naghahalat sa sainda. (Col. 3:12) Nagigirumduman ni Adolfo, sarong paraataman nin sirkito sa España, kun anong klaseng buhay an igwa siya kan mayo pa siya sa katotoohan.

“Mayong direksiyon an buhay ko,” an sabi ni Adolfo. “Pirming mainit an payo ko, kaya dawa an nagkapira sa mga amigo ko takot na sa arogante saka bayolente kong mga reaksiyon. Sa katapos-tapusi, may nangyaring nakapagpabago sako. Nasaksak ako nin anom na beses sa sarong iriwal asin haros magadan ako sa pagkaubos nin dugo.”

Pero ngunyan, paagi sa tataramon asin gibo, tinutukduan ni Adolfo an iba na magin mahuyo. Dakul an nagugustuhan an saiyang mabuot asin marahay na personalidad. Sinabi ni Adolfo na maugma siya sa mga pagbabagong nagibo niya. Asin nagpapasalamat siya ki Jehova sa pagtabang sa saiya na magkaigwa nin mahuyong buot.

An pagigin mahuyo an buot nakakapaugma ki Jehova. ‘Magin madunong ka, aki ko, asin paugmaha an sakong puso, [tanganing] masimbag ko an nagtutuya sako.’—Tal. 27:11, An Banal na Biblia.

Sa katunayan, tinutuya si Jehova kan saiyang panginot na kaiwal, an Diyablo. Igwa an Diyos kan gabos na dahilan tanganing maanggot sa tuyong mga pag-insultong ini, pero sinasabi kan Bibliya na si Jehova ‘dai tulos naaanggot.’ (Ex. 34:6, BPV) Kun pagmamaigutan tang arugon an pagigin dai madaling maanggot asin pagigin mahuyong buot kan Diyos, naglalakaw kita sa dalan nin kadunungan na nakakapaugmang marhay ki Jehova.—Efe. 5:1.

Nabubuhay kita sa kinaban na an mga tawo sa parati bakong makikatuod. Tibaad mapaatubang kita sa mga “mahambog, mapalangkaw, paralanghad, . . . parapakaraot, daing pagpupugol sa sadiri, maringis.” (2 Tim. 3:2, 3, NW) Pero, bakong rason iyan para dai na magin mahuyo an sarong Kristiyano. Ipinapagirumdom sa sato kan Tataramon nin Diyos na an “kadunungan na gikan sa itaas . . . mapagpatuninong, rasonable.” (Sant. 3:17, NW) Kun magigin mapagpatuninong kita asin rasonable, ebidensiya iyan na igwa kita kan kadunungan na hali sa Diyos. Papahiruon kita kan kadunungan na iyan na sumimbag nin mahuyo pag pinoprobokar asin mas mapaparani kita sa Gikanan kan daing limitasyon na kadunungan, si Jehova.