1, 2. (a) Paano magkakonektado an pagkamuot asin pagtubod? (b) Anong mga hapot an sisimbagon niyato?

NAMUMUTAN niyato si Jehova ‘huli ta siya an inot na namuot sa sato.’ (1 Juan 4:19, BPV ^[1]) An sarong paagi na ipinapahiling ni Jehova an pagkamuot niya sa saiyang maimbod na mga lingkod iyo an pagtao nin bendisyon sa sainda. Miyentras na namumutan niyato an Diyos, mas lalo man na nagkukusog an satong pagtubod na nag-eeksister siya asin na pirmi niyang tinatawan nin balos an mga namumutan niya.—Basahon an Hebreo 11:6. *

² An pagigin paratao nin balos sarong mahalagang kabtang kan kun siisay si Jehova asin kun ano an ginigibo niya. Dai magigin lubos an satong pagtubod kun bako kitang kumbinsidong marhay na tatawan nin Diyos nin balos an mga maigot na naghahanap sa saiya, huling “an pagtubod iyo an masarig na kumpiyansa na mangyayari an piglalauman.” (Heb. 11:1, NW) Iyo, kalabot sa pagtubod an pagkaigwa nin lubos na pagtitiwala sa ipinanugang mga bendisyon nin Diyos. Pero paano kita makikinabang  sa pagkaigwa ta nin paglaom na tatawan kita nin balos? Paano tinawan ni Jehova nin balos an saiyang maimbod na mga lingkod kaidto asin sa ngunyan? Hilingon ta.

3. Ano an ipinanuga ni Jehova sa Malaquias 3:10?

³ Nanunuga an Diyos na Jehova na tatawan niya nin balos an saiyang maimbod na mga lingkod, kaya iniimbitaran niya kitang hinguwahon na makua an saiyang bendisyon. Mababasa niyato: ‘“Balua nindo ako,” [an sabi ni Jehova nin mga hukbo], “asin mahihiling nindo na bubukasan ko an mga bintana nin kalangitan dangan iuula ko sa saindo an nagsusupay na mga marahay na bagay.”’ (Mal. 3:10, BPV) Maipapahiling niyato an satong pasasalamat asin pagpapahalaga kun aakuon niyato an imbitasyon ni Jehova na baluon siya.

4. Taano ta makakapagtiwala kita na magkakatotoo an sinabi ni Jesus sa Mateo 6:33?

⁴ Siniyerto ni Jesus sa saiyang mga disipulo na kun iinuton ninda an Kahadian, tatabangan sinda nin Diyos. (Basahon an Mateo 6:33.) Sigurado si Jesus sa sinabi niya huling pirming mapagtitiwalaan si Jehova. Aram ni Jesus na pirming nauutob an mga panuga nin Diyos. (Isa. 55:11) Kaya kun lubos an pagtubod niyato ki Jehova, sigurado man kita na uutubon niya an saiyang panuga na: ‘Dai taka nanggad tatalikudan; dai taka nanggad papabayaan.’ (Heb. 13:5, BPV) Huli sa mga tataramon na ini ni Jehova, makakapagtiwala kita na magkakatotoo man an sinabi ni Jesus dapit sa balos na aakuon niyato pag hinanap ta nguna an Kahadian asin an katanusan nin Diyos.

5. Taano ta nakakapakusog sa pagtubod an simbag ni Jesus ki Pedro?

⁵ Hinapot kaidto ni apostol Pedro si Jesus: “Binayaan mi an gabos asin nagsunod kami saimo.  Ano an mapapasamuya?” (Mat. 19:27, BPV) Imbes na sawayon si Pedro huli sa ihinapot kaini, sinabihan ni Jesus an saiyang mga disipulo na tatawan nin balos an saindang mga pagsasakripisyo. An maimbod na mga apostol asin an iba pa mamamahala kaiba niya sa langit. Pero sinabi ni Jesus na dawa dai pa nangyayari iyan, may makakamtan na sindang mga balos: ‘An siisay man na nagbaya kan saiyang pamilya o mga tugang na babayi asin lalaki, ama saka ina, mga aki o mga rugaring dahil sako, maako nin labi pa sa sanggatos na doble, asin magmamana kan buhay na daing katapusan.’ (Mat. 19:29, BPV) Mas dakul an bendisyon na aakuon kan saiyang mga disipulo kisa sa ano man na isakripisyo ninda. Bako daw na mas mahalagang marhay an satong mga ama, ina, tugang na lalaki, tugang na babayi, asin mga aki sa espirituwal kisa sa ano man na tinalikdan o binayaan ta alang-alang sa Kahadian?

6. Taano ta pinanugaan ni Jehova nin balos an saiyang mga parasamba?

⁶ An pakaaram sa panuga ni Jehova na tatawan niya nin balos an saiyang mga parasamba nakakatabang sa sainda na matagalan an mga pagbalo sa saindang integridad. Apuwera sa abundang espirituwal na bendisyon na inaako ninda ngunyan, hinahalat-halat man kan maimbod na mga lingkod nin Diyos an mas dakula pang mga bendisyon sa maabot na panahon. (1 Tim. 4:8) Iyo, an pagigin kumbinsido tang marhay na si Jehova “an paratao nin balos sa mga maigot na naghahanap sa saiya,” matabang sa sato na magdanay na marigon sa pagtubod.—Heb. 11:6, NW.

7. Paano nagseserbing angkla an satong paglaom?

⁷ Sa saiyang Sermon sa Bukid, sinabi ni Jesus: ‘Mag-ugma kamo asin mag-ugma nin labi-labi ta dakula an balos sa saindo sa langit, huli ta arog man kaiyan ninda pinaglamag an mga propeta na nainot saindo.’ (Mat. 5:12) Apuwera sa paglaom na balos sa langit, an paglaom na mabuhay nin daing sagkod sa Paraisong daga saro man na dahilan tanganing ‘mag-ugma asin mag-ugma nin labi-labi.’ (Sal. 37:11; Luc. 18:30) An satong paglaom, sa langit man iyan o sa daga, magseserbing “angkla kan kalag, sigurado asin marigon.” (Heb. 6:17-20, NW) Kun paanong pinagdadanay nin sarong angkla na masarig an sarong barko sa kinamumugtakan kaiyan pag may bagyo, an siguradong paglaom sa aakuon na balos makakatabang man na magdanay na marigon an satong emosyon, isip, asin espirituwalidad. Matatawan kita kaiyan nin kusog tanganing matagalan an mga kasakitan.

8. Paano an satong paglaom makakatabang na mabawasan an mga kahaditan niyato?

⁸ Matatabangan kita kan satong paglaom na basado sa Bibliya na mabawasan an mga kahaditan niyato ngunyan. An mga panuga nin Diyos garo espirituwal na panghaplas na nakakapaginhawa sa satong nahahadit na puso. Nakakaranga nanggad na maaraman na ‘aalalayan kita ni Jehova’ kun ‘ipapasa niyato sa saiya an pagabat na nasa sato’! (Sal. 55:22, NW) Lubos kitang makakapagtiwala na kaya nin Diyos na “gibuhon an lampas pang marhay kisa sa gabos na bagay na puwede tang hagadon o isipon.” (Efe. 3:20, NW) Isipa iyan—bako lang basta lampas o lampas pa, kundi “lampas pang marhay”!

9. Paano ta masisigurado na mag-aako kita nin bendisyon hali ki Jehova?

⁹ Tanganing mag-ako kan balos, kaipuhan niyatong lubos na magtubod ki Jehova asin magin makinuyog sa mga pagbuot niya. Sinabi ni Moises sa nasyon nin Israel: ‘Bebendisyunan kamo [ni Jehova] na saindong Diyos sa daga na itinatao niya saindo, kun kukuyugon nindo siya asin uutubon an gabos na ipinagbubuot ko saindo ngunyan. Bebendisyunan kamo [ni Jehova] siring sa saiyang ipinanuga.’ (Deut. 15:4-6, BPV) Lubos ka daw na nagtitiwala na bebendisyunan ka ni Jehova kun padagos kang maimbod na maglilingkod sa saiya? May marahay na dahilan ka nanggad na magkaigwa nin arog kaiyan na pagtitiwala.

10, 11. Paano tinawan ni Jehova nin balos si Jose?

¹⁰ Isinurat an Bibliya para makinabang kita. Dakul an istorya diyan na nagpapahiling kun paano nin Diyos talagang tinawan nin balos an saiyang maimbod na mga lingkod. (Roma 15:4) An saro sa magayon na halimbawa digdi iyo si Jose. Huli sa  pagkurumplutan kan saiyang mga tugang asin, kan huri, huli sa putik na akusasyon kan agom kan saiyang kagurangnan, napreso siya sa Ehipto. Pinabayaan na daw siya kan saiyang Diyos? Dai nanggad! Sinasabi kan Bibliya: “Si Jehova padagos na nasa kaibanan ni Jose asin padagos na nagpapahiling nin maimbod na pagkamuot sa saiya . . . Si Jehova nasa kaibanan ni Jose asin an ano man na gibuhon niya pinangyari ni Jehova na magin mapanggana.” (Gen. 39:21-23, NW) Sa masakit na mga panahon na idto, mapasensiyang naghalat si Jose sa saiyang Diyos.

¹¹ Pakalihis nin pirang taon, pinaluwas ni Faraon si Jose sa presuhan asin ginibo niyang ikaduwang namamahala sa Ehipto an mapakumbabang uripon na ini. (Gen. 41:1, 37-43) Kan magkaaki nin duwang aking lalaki si Jose asin an agom niya, ‘nginaranan niyang Manases an matua huling sinabi niya, “Pinalingaw sako nin Diyos an gabos kong pagtios asin an pamilya nin sakong ama.” Asin nginaranan niyang Efraim an ikaduwa huling sinabi niya, “Tinawan ako nin Diyos nin mga aki sa daga nin sakong kasakitan.”’ (Gen. 41:51, 52, BPV) Huling nagdanay na maimbod si Jose, binendisyunan siya nin Diyos; kaya, nailigtas niya sa tiggutom an mga Israelita saka Ehipsiyo. An punto iyo ini, minidbid ni Jose na si Jehova an nagtao sa saiya nin balos asin nin bendisyon.—Gen. 45:5-9.

12. Ano an nakatabang ki Jesus na magdanay na maimbod kan siya nasa mga pagbalo?

¹² Sa manlain-lain na pagbalo sa saiyang pagtubod, nagdanay man na makinuyog sa Diyos si Jesus, asin tinawan siya nin balos. Ano an nakatabang sa saiya na makatagal? An Tataramon nin Diyos nagsasabi: “Huli sa kaugmahan na inaantisipar niya, tinagalan niya an hariging pasakitan, na dai iniintindi an kasusupgan.” (Heb. 12:2, NW) Tunay nanggad na nagin maugma si Jesus huling napakangbanal niya an pangaran nin Diyos. Asin bilang balos, nakamtan niya an pag-uyon kan saiyang Ama saka an dakul na pambihirang pribilehiyo. Sinasabi kan Bibliya na “tuminukaw siya sa may tuo kan trono nin Diyos.” Sinasabi pa kaiyan: “Ibinugtak siya nin Diyos sa sarong mas halangkaw na posisyon asin may kabuutan na itinao sa saiya an ngaran na mas urog kisa sa gabos na iba pang ngaran.”—Fil. 2:9, NW.

13, 14. Ano an namamatian ni Jehova sa mga ginigibo niyato para sa saiya?

¹³ Makakasigurado kita na napapahalagahan ni Jehova an gabos niyatong paghihinguwa tanganing paglingkudan siya. Nasasabutan niya an ano man na pagduda niyato sa satong sadiri o sa satong kakayahan. Nagmamalasakit siya sa sato kun nagagabatan kita sa pinansiyal, o kun nalilimitaran kan satong salud o namamatian an satong sagradong paglilingkod. Asin lubos kitang makakapagtiwala na pinapahalagahan ni Jehova an mga ginigibo kan saiyang mga lingkod na magdanay na maimbod sa saiya.—Basahon an Hebreo 6:10, 11.

¹⁴ Tandaan man na puwede kitang dumulok sa “Paradangog nin pamibi” na may pagtitiwala na dadangugon niya kita. (Sal. 65:2, An Banal na Biblia) “An Ama nin mamumuton na pagkahirak asin an Diyos nin gabos na karangahan,” abundang itatao an kinakaipuhan niyatong emosyonal asin espirituwal na tabang, tibaad paagi sa satong mga kapagtubod. (2 Cor. 1:3, NW) Nauugma si Jehova kun nagpapahiling kita nin pagmalasakit sa iba. ‘Nagpapautang ki Jehova an nagtatao sa dukha, asin babayadan Niya siya’ sa mga ginibo kaini. (Tal. 19:17; Mat. 6:3, 4) Kaya, kun daing kaimutan niyatong tatabangan an mga nasa kadipisilan, ibibilang iyan ni Jehova na pautang sa Saiya. Asin nanunuga siya na tatawan niya nin balos an kabuutan na iyan.

15. Anong mga balos an hinahalat-halat mo nang marhay? (Hilingon an ritrato sa kapinunan kan artikulo.)

¹⁵ Nakakapakusog sa mga linahidan na Kristiyano an paglaom nindang makamtan “an sarong korona para sa mga matanos, na itatao . . . kan Kagurangnan, an matanos na hukom, bilang balos sa aldaw na iyan.” (2 Tim. 4:7, 8, NW) Pero, dai  nangangahulugan na bako kang gayong mahalaga kun ibang paglaom an itinao sa saimo ni Jehova. Minilyon na ‘ibang mga karnero’ ni Jesus an hinahalat-halat nang marhay an balos na buhay na daing katapusan sa Paraisong daga sa maabot na panahon. ‘Magkakararanga sinda diyan nin labi-labi sa [nagsusupay na] katuninungan.’—Juan 10:16; Sal. 37:11.

16. Paano makakaranga sa sato an 1 Juan 3:19, 20?

¹⁶ Kun minsan, tibaad namamatian niyato na dikit sana an satong nagigibo, o tibaad iniisip niyato kun baga nauugma si Jehova sa mga paghihinguwa ta. Tibaad mamatian ta pa ngani na dai kita maninigong mag-ako nin ano man na balos. Pero, dai niyato paglingawan na ‘an Diyos urog pa kisa satuyang mga puso asin nakakaaram kan gabos na bagay.’ (Basahon an 1 Juan 3:19, 20.) Kaya, gurano man kasadit para sa sato kan ginigibo tang paglilingkod, siguradong tatawan niya iyan nin balos kun ginigibo ta iyan huli sa pagtubod asin pagkamuot sa saiya.—Mar. 12:41-44.

17. Ano an nagkapirang balos na sa ngunyan inaako na niyato?

¹⁷ Dawa sa masakit na huring mga aldaw na ini kan maraot na sistema nin mga bagay, binebendisyunan ni Jehova an saiyang mga lingkod. Sinisigurado niya na lalo pang umuswag an saiyang tunay na mga parasamba sa saindang espirituwal na paraiso, na abundang marhay sa espirituwal na mga bagay na dai pa nangyari kasuarin man. (Isa. 54:13) Arog kan ipinanuga ni Jesus, inaako ta na ngunyan an balos ni Jehova—an mapabilang sa sarong nagkakaminuruutan na internasyonal na pamilya sa espirituwal. (Mar. 10:29, 30) Dugang pa, an mga maigot na naghahanap sa Diyos tinatawan man nin balos—daing kaparehong katuninungan nin isip, pagkakontento, asin kaugmahan.—Fil. 4:4-7.

18, 19. Ano an namamatian kan mga lingkod ni Jehova sa mga balos na inaako ninda?

¹⁸ Napatunayan kan mga lingkod ni Jehova sa bilog na kinaban na totoong nagtatao siya nin marahayon na mga balos. Halimbawa, si Bianca na taga Germany, nagsabi: “Labi-labi an pasasalamat ko ki Jehova na tinabangan niya akong dai magparahadit saka pirmi siyang nasa kataid ko aroaldaw. Maribok saka mayong paglaom an kinaban. Pero pag naggigibo akong kaiba ni Jehova, tiwasay ako sa pangangataman niya. Sa kada may isakripisyo ako, tinatawan niya ako nin mananggatos na balos.”

¹⁹ Isipa man an 70 anyos na si Paula na taga Canada na nalilimitaran na marhay kan grabeng hilang niya sa gulod. Sinabi niya: “Dai nangangahulugan na pag bawas na an paghiro mo, bawas na man dapat an ministeryo mo. Inaaprobetsaran ko an manlain-lain na klase nin paghuhulit arog kan pagpapatotoo paagi sa telepono saka impormal na pagpapatotoo. Isinusurat ko sa sarong notebook an mga teksto saka mga punto sa mga publikasyon ta. Rinerepaso ko ini sa pana-panahon para mapakusog ako. An apod ko kaiyan, ‘An Sakong Notebook nin Kaligtasan.’ Temporaryo sana an pangluluya nin buot kun mapokus kita sa mga panuga ni Jehova. Yaon pirmi si Jehova para tabangan kita, ano man an satong kamugtakan.” Tibaad iba man an sitwasyon mo sa sitwasyon ni Bianca o ni Paula. Pero, posibleng may maisip kang pagkakataon na tinawan ka ni Jehova nin balos saka an iba. Marahay nanggad na hurop-hurupon kun paano ka tinatawan ni Jehova nin balos sa ngunyan asin kun paano ka niya tatawan nin balos sa maabot na panahon!

20. Ano an malalauman niyato kun padagos kitang bilog na kalag na maglilingkod ki Jehova?

²⁰ Dai paglingawan na an saimong udok sa pusong mga pamibi sa Diyos tatawan nin “dakulang katimbang na balos.” Makakasigurado kang ‘pakagibo mo kan buot nin Diyos, aakuon mo an [kautuban] kan panuga.’ (Heb. 10:35, 36) Kaya padagos niyatong pakusugon ngunyan an satong pagtubod asin bilog na kalag na maglingkod ki Jehova. Magigibo ta ini huling nagtitiwala kita na tatawan kita ni Jehova nin balos.—Basahon an Colosas 3:23, 24.