1. Linalang ni Jehova an mga tawo na may anong pambihirang mga kakayahan?

KITANG mga tawo linalang ni Jehova na may pambihirang mga kakayahan. Tinawan niya kita nin kakayahan na mag-isip tanganing maresolberan an mga problema asin makapagplano para sa maabot na panahon. (Tal. 2:11) Tinawan niya kita nin kakayahan na maisagibo an satong mga plano, na nagpapangyaring maabot ta an marahayon na mga pasuhan. (Fil. 2:13) Linalang man niya kita na may konsiyensiya—an natural na kakayahan na maaraman an tama asin sala—na makakatabang sa sato na dai makagibo nin maraot asin na maitanos an satong mga sala.—Roma 2:15.

2. Sa anong paagi linalauman ni Jehova na gagamiton niyato an satong mga kakayahan?

² Linalauman ni Jehova na gagamiton niyato sa kapaki-pakinabang na paagi an satong mga kakayahan. Taano? Huling namumutan niya kita, asin aram niyang magpapaugma sa sato an paggamit sa mga kakayahan na ini. Paagi kan saiyang nasusurat na Tataramon, pauruutro kitang sinasadol ni Jehova na gamiton sa marahay an satong  mga kakayahan. Halimbawa, mababasa ta sa Hebreong Kasuratan: “An mga plano kan mahigos siguradong magigin mapanggana”; asin “an ano man na magigibo kan saimong kamot, gibuhon mo sa bilog mong kusog.” (Tal. 21:5, NW; Par. 9:10, NW) Sa Kristiyanong Griegong Kasuratan, sinasabi man sa sato: “Sagkod na igwa kita nin oportunidad, gumibo kita nin marahay sa gabos”; asin “ano man an lebel kan mga kakayahan na itinao sa kada saro sa sato, gamiton niyato iyan sa paglilingkod sa lambang saro.” (Gal. 6:10; 1 Ped. 4:10) Malinaw nanggad na gusto ni Jehova na gamiton niyato an satong kakayahan tanganing makinabang kita asin an iba.

3. Ano an mga limitasyon nin mga tawo?

³ Pero, aram man ni Jehova na may mga limitasyon an mga tawo. Kun sa sadiri sana niyatong kakayahan, dai ta mahahali an pagkabakong perpekto, kasalan, asin kagadanan; ni kaya man niyatong kontrulon an ibang tawo, huling gabos kita may libertad na magdesisyon. (1 Ha. 8:46) Asin gurano man kadakul an kaaraman o eksperyensiya niyato, magdadanay kitang garo sana mga aki kun ikukumparar ki Jehova.—Isa. 55:9.

4. Ano an pag-uulayan niyato sa artikulong ini?

⁴ Sa gabos na kamugtakan, kaipuhan niyatong manarig sa paggiya ni Jehova na nagtitiwala na tatabangan niya kita asin gigibuhon niya para sa sato an mga dai ta kaya. Pero, dapat man niyatong gibuhon an satong makakaya, na minagibo nin marahay o tamang mga lakdang tanganing maresolberan an mga problema asin matabangan an iba. (Basahon an Salmo 37:3. *) An buot sabihon, kaipuhan niyatong ‘magtiwala ki Jehova asin gibuhon an marahay’; saka kaipuhan niyatong ‘gumawi na may kaimbudan.’ Mapadapit digdi, pag-ulayan niyato kun ano an manunudan ta sa mga halimbawa ni Noe, David, asin kan iba pang maimbod na mga lingkod nin Diyos na nagtiwala ki Jehova asin naggibo nin tamang mga lakdang. Aaramon nguna niyato kun ano an saindang dai magigibo, dangan kun ano an magigibo ninda, pagkatapos, kun paano sinda huminiro kauyon kaiyan.

5. Anong sitwasyon an inatubang ni Noe?

⁵ Nabuhay si Noe sa sarong kinaban na ‘pano nin kadahasan’ asin imoralidad. (Gen. 6:4, 9-13) Aram niyang lalaglagon ni Jehova an maraot na kinaban na iyan pag-abot nin panahon. Pero, siguradong naapektaran pa man giraray si Noe kan maraot na  kamugtakan na iyan. Mantang nasa sitwasyon na iyan, aram ni Noe na may mga bagay siyang magigibo asin dai magigibo.

6, 7. (a) Ano an dai magigibo ni Noe? (b) Paano nakakaagid kan ki Noe an satong sitwasyon?

⁶ Kun ano an dai magigibo ni Noe: Padagos na ihinulit ni Noe an patanid ni Jehova, pero dai niya mapupuwersa an maraot na mga tawo na akuon an dara niyang mensahe, ni magigibo man niyang paabuton an Baha nin mas amay. Kinaipuhan ni Noe na magtiwala na uutubon ni Jehova sa tamang panahon an Saiyang panuga na halion an karatan.—Gen. 6:17.

⁷ Nabubuhay man kita sa sarong kinaban na pano nin karatan na aram niyatong hahalion ni Jehova, arog kan saiyang ipinanuga. (1 Juan 2:17) Mantang naghahalat kaiyan, dai niyato mapupuwersa an mga tawo na akuon ‘an maugmang bareta kan Kahadian.’ Asin dai man niyato magigibong parikason an pagpuon kan dakulang kahurasaan o “grabeng kasakitan.” (Mat. 24:14, 21) Arog ni Noe, kaipuhan niyato nin makusog na pagtubod na nagtitiwalang sa dai na mahahaloy mainterbenir an Diyos. (Sal. 37:10, 11) Kumbinsido kita na dai itutugot ni Jehova na makalampas, dawa sarong aldaw, sa itinalaan niyang panahon an paglaglag sa maraot na kinaban na ini.—Hab. 2:3.

8. Paano nagpokus si Noe sa mga bagay na magigibo niya? (Hilingon an ritrato sa kapinunan kan artikulo.)

⁸ Kun ano an magigibo ni Noe: Imbes na sumuko huli sa mga bagay na dai niya magigibo, nagpokus si Noe sa mga bagay na magigibo niya. Bilang “sarong parahulit nin katanusan,” padagos na ihinulit ni Noe an patanid na itinao sa saiya. (2 Ped. 2:5) Siguradong nakatabang iyan tanganing magdanay na makusog an pagtubod ni Noe. Apuwera sa paghuhulit, ginamit man niya an saiyang pisikal asin mental na mga kakayahan tanganing mahaman an arka na ipinagibo sa saiya nin Diyos.—Basahon an Hebreo 11:7.

9. Paano niyato maaarog si Noe?

⁹ Arog ni Noe, hinihinguwa niyato na “dakul an ginigibo sa gibuhon kan Kagurangnan.” (1 Cor. 15:58) Kaiba sa mga gibuhon na iyan an pagtugdok asin pagmentenar nin mga pasilidad para sa pagsamba, pagboluntaryo sa mga asembleya asin kumbensiyon, o pagsagibo sa iinasignar na mga trabaho sa sangang opisina o sa remote translation office. Urog sa gabos, nagdadanay kitang sibot sa paghuhulit huling aram niyato na an gibuhon na ini nakakapakusog sa satong paglaom para sa maabot na panahon. Sarong maimbod na sister an nagsabi: “Pag ipinapakipag-ulay mo sa iba an dapit sa mga bendisyon kan Kahadian nin Diyos, mahihiling  mong mayo na talagang paglaom an mga tawo saka hinuhuna ninda na nungka na sindang mawawaran nin mga problema.” Iyo, kun nakikikabtang kita sa paghuhulit, napapakusog an satong paglaom para sa maabot na panahon asin an satong determinasyon na dai sumuko sa paurumbasan para sa buhay.—1 Cor. 9:24.

10. Anong sitwasyon an inatubang ni David?

¹⁰ “Sarong lalaking inuuyunan kan sakuyang puso,” arog kaiyan inapod ni Jehova si Hading David. (Gibo 13:22) Sa pangkagabsan, nagin maimbod si David sa bilog niyang buhay. Pero sa sarong pagkakataon, nakagibo siya nin magabat na kasalan. Nakakomiter siya nin pagsambay ki Bat-seba. An maraot pa, hininguwa niyang itago iyan paagi sa paggibo nin paagi na magadan sa ralaban an agom ni Bat-seba na si Urias. Ipinadara pa ngani ni David ki Urias mismo an sarong surat na masasabing sentensiya nin kagadanan kaini! (2 Sam. 11:1-21) Siyempre, nabuyagyag an mga kasalan ni David. (Mar. 4:22) Ano an ginibo ni David kan mangyari iyan?

11, 12. (a) Ano an dai magigibo ni David pagkatapos na siya magkasala? (b) Kun magsusulsol kita kan satong magabat na kasalan, ano an mapagtitiwalaan niyatong gigibuhon ni Jehova para sa sato?

¹¹ Kun ano an dai magigibo ni David: Dai na maibabalik ni David an nakaagi. Asin dai siya makakalibre sa mga epekto kan saiyang mga pagkakasala. Sa katunayan, an iba sa mga epekto kaiyan maeeksperyensiyahan ni David sagkod na siya magadan. (2 Sam. 12:10-12, 14) Kaya, nangaipo siya nin pagtubod. Kinaipuhan niyang magtiwala na kun tunay siyang magsusulsol, papatawadon siya ni Jehova asin tatabangan siyang matagalan an mga epekto kan saiyang mga ginibo.

¹² Huling bako kitang perpekto, gabos kita nagkakasala. May mga sala na mas magabat kisa sa iba. Sa ibang mga pagkakataon, may mga sala na dai na niyato maitatama pa. Tibaad kaipuhan na lang niyatong tiuson an mga epekto kaiyan sagkod na kita nabubuhay. (Gal. 6:7) Pero nagtutubod kita sa mga sinabi nin Diyos asin nagtitiwala na kun kita magsusulsol, tatabangan kita ni Jehova sa masakit na mga panahon—dawa kun an mga kasakitan na iyan resulta kan satong mga ginibo.—Basahon an Isaias 1:18, 19; Gibo 3:19.

13. Paano naibalik ni David an haraning relasyon niya ki Jehova?

¹³ Kun ano an magigibo ni David: Nagpatabang si David ki Jehova na maibalik an haraning relasyon niya sa saiya. An sarong paagi na ginibo niya iyo na inako niya an pagtatanos kan representante ni Jehova na si propeta Natan. (2 Sam. 12:13) Namibi man si David ki Jehova, itinuga an saiyang mga kasalan, asin ipinahiling na gustong-gusto na niya talagang maibalik an pag-uyon ni Jehova sa saiya. (Sal. 51:1-17) Imbes na magpadaog sa pagkakonsiyensiya asin mayo nang gibuhon, nakanuod si David sa mga sala niya. Iyo, dai na niya ginibo giraray an magabat na mga kasalan na idto. Pakalihis nin mga taon, nagadan siyang maimbod, asin an saiyang rekord nin kaimbudan siguradong dai lilingawan ni Jehova.—Heb. 11:32-34.

14. Ano an manunudan niyato ki David?

¹⁴ Ano an manunudan niyato ki David? Kun makagibo kita nin magabat na kasalan, kaipuhan niyatong sinserong magsulsol asin maghagad nin tawad ki Jehova. Dapat niyatong ituga sa saiya an satong mga kasalan. (1 Juan 1:9) Kaipuhan man niyatong magdulok sa mga elder huling matatawan kita ninda nin espirituwal na tabang. (Basahon an Santiago 5:14-16.) Kun susunudon niyato an mga areglong ini ni Jehova, maipapahiling niyato na nagtitiwala kita sa saiyang panuga na tatabangan asin papatawadon niya kita. Pagkatapos kaiyan, makanuod kita sa satong mga sala, magpadagos na maglingkod ki Jehova, asin may kumpiyansang maglaom para sa sarong magayon na puturo.—Heb. 12:12, 13.

15. Ano an manunudan niyato ki Hana?

¹⁵ Tibaad may maisip ka pang maimbod na mga lingkod ni Jehova kan suanoy na panahon na nagtiwala sa saiya mantang minagibo nin tamang mga lakdang. Halimbawa, kun sa sadiri sana ni Hana,  dai niya mapapangganahan an problema niya na pagkabaog. Pero nagtiwala siya na rarangahon siya ni Jehova, kaya padagos siyang nagduman sa tabernakulo para sumamba asin sabihon ki Jehova sa pamibi an gabos na nasa puso niya. (1 Sam. 1:9-11) Bako daw na sarong marahay na halimbawa iyan para sa sato? Kun may hilang kita o napapaatubang sa iba pang problema na dai niyato kontrolado, ipinapasa niyato ki Jehova an satong kahaditan huling nagtitiwala kita na nagmamakulog siya sa sato. (1 Ped. 5:6, 7) Asin ginigibo niyato an satong pinakamakakaya tanganing makinabang sa Kristiyanong mga pagtiripon asin iba pang espirituwal na mga probisyon.—Heb. 10:24, 25.

16. Ano an manunudan kan mga magurang sa may edad nang si Samuel?

¹⁶ Kumusta man an maimbod na mga magurang na may mga aking napasuway sa organisasyon? Dai mapupuwersa kan may edad nang si Samuel an saiyang darakula nang mga aki na padagos na sumunod sa matanos na mga pamantayan na itinukdo niya sa sainda. (1 Sam. 8:1-3) Kinaipuhan niyang ipabaya ki Jehova an mga bagay-bagay. Pero, magigibo ni Samuel na magdanay na maimbod asin mapaugma an saiyang Ama sa langit, si Jehova. (Tal. 27:11) Sa ngunyan, may Kristiyanong mga magurang an nasa arog man kaiyan na sitwasyon. Nagtitiwala sinda na si Jehova, arog kan ama na nasa parabula dapit sa gastador na aki, pirming nag-aabang tanganing maugmang akuon giraray an mga nagkasala na nagsusulsol. (Luc. 15:20) Pero kasabay kaiyan, nagmamaigot an mga magurang na ini na magdanay na maimbod ki Jehova asin naglalaom na an saindang marahay na halimbawa makakapahiro sa saindang mga aki na magbalik sa organisasyon.

17. Taano ta nakakapakusog sa sato an halimbawa kan dukha na babaying balo?

¹⁷ Isipa man an dukha na babaying balo kan panahon ni Jesus. (Basahon an Lucas 21:1-4.) Mayo nanggad siyang magiginibo kun dapit sa maraot na mga gibuhon sa templo. (Mat. 21:12, 13) Asin diit sana an tibaad magigibo niya tanganing magin marahay an saiyang pagbuhay. Pero, gikan sa buot niyang idinonar an saiyang “duwang sadit na sinsilyo,” na iyo na an “gabos niyang pagbuhay.” Ipinahiling kan maimbod na babaying ini an bilog na pusong pagtitiwala ki Jehova asin aram niya na kun iinuton niya an espirituwal na mga bagay, itatao nin Diyos an saiyang materyal na mga pangangaipo. An pagtitiwala kan babaying balo an nagpahiro sa saiya na suportaran an areglo para sa tunay na pagsamba kan panahon na idto. Siring man ngunyan, nagtitiwala kita na kun hahanapon ta nguna an Kahadian, sisiguraduhon ni Jehova na igwa kita kan mga kaipuhan ta.—Mat. 6:33.

18. Magtao nin halimbawa nin sarong lingkod nin Diyos sa presenteng panahon na may tamang pananaw.

¹⁸ Dakul sa mga kapagtubod niyato ngunyan an nagtitiwala man ki Jehova mantang minagibo nin tamang mga lakdang. An saro sa sainda iyo si Malcolm, sarong brother na nagdanay na maimbod sagkod na siya magadan kan 2015. Sa laog nin dakul na taon na paglilingkod niya kaiba kan saiyang agom, dakul sindang nagin problema. Sinabi niya: “An buhay kun minsan mayong kasiguraduhan saka masakit pa nganing pakibagayan. Pero binebendisyunan ni Jehova an mga nagtitiwala sa saiya.” Kaya ano an suhestiyon sa sato ni Malcolm? “Ipamibi na magin kang mabunga asin aktibo sa paglilingkod ki Jehova sagkod sa pinakamakakaya mo. Magpokus ka sa magigibo mo, bako sa dai mo magigibo.” *

19. (a) Taano ta angay an napiling teksto para sa taon 2017? (b) Paano mo iaaplikar sa saimong buhay an teksto para sa taon 2017?

¹⁹ Mantang an sistemang ini nin mga bagay ‘lalo pang nagigin maraot,’ lauman niyato na mapapaatubang kita sa mas grabe pang mga kadipisilan. (2 Tim. 3:1, 13) Kaya, urog na mahalaga ngunyan kisa kasuarin man na dai kita magpadaog sa mga kadipisilan na iyan. Imbes, kaipuhan niyatong magkaigwa nin makusog na pagtitiwala ki Jehova mantang ginigibo an ano man na marahay o tamang lakdang. Angay nanggad an napiling teksto para sa taon 2017: “Magtiwala ka ki Jehova asin gibuhon mo an marahay”!—Sal. 37:3, NW.