1, 2. Paano ipinahiling ni apostol Pablo na nagpapasalamat siya sa daing kapantay na kabuutan nin Diyos?

TUNAY nanggad na masasabi ni apostol Pablo: ‘An [daing kapantay na kabuutan] na itinao sa sako [nin Diyos] dai nasayang.’ (Basahon an 1 Corinto 15:9, 10.) Dating parapersegir sa mga Kristiyano si Pablo, kaya aram niyang marhay na nag-ako siya kan dakulang pagkahirak nin Diyos bako huling pinagpagalan niya iyan o maninigo niyang akuon iyan.

² Sa huring kabtang kan saiyang buhay, nagsurat si Pablo sa saiyang kapwa trabahador na si Timoteo: “Nagpapasalamat ako ki Cristo Jesus na satuyang Kagurangnan, na nagtao sa sako nin kusog, huling ibinilang niya akong maimbod paagi sa pag-asignar sa sako nin sarong sagradong gibuhon.” (1 Tim. 1:12-14, NW) Ano an gibuhon na iyan? Sinabi ni Pablo sa kamagurangan sa kongregasyon sa Efeso: “Dai ko ibinibilang na may ano man na halaga sa sako an sakuyang buhay, basta  matapos ko sana an sakuyang misyon asin an gibuhon na itinao sa sako kan Kagurangnan na Jesus, na lubos na magpatotoo manungod sa maugmang bareta mapadapit sa daing kapantay na kabuutan nin Diyos.”—Gibo 20:24, NW.

3. Anong espesyal na gibuhon an itinao ki Pablo? (Hilingon an ritrato sa kapinunan kan artikulo.)

³ Anong “maugmang bareta” an ihinulit ni Pablo na nagtatampok sa daing kapantay na kabuutan ni Jehova? Sinabi niya sa mga Kristiyano sa Efeso: “Nadangog nindo na pinagkatiwalaan ako kan daing kapantay na kabuutan nin Diyos para sa kapakanan nindo.” (Efe. 3:1, 2, NW) Isinugo si Pablo para ihulit an maugmang bareta sa mga bakong Judio tanganing makaiba man sinda sa mga inapod na magin kabtang kan Mesiyanikong Kahadian na pamamahalaan ni Cristo. (Basahon an Efeso 3:5-8.) Nagin maigot sa ministeryo si Pablo asin nagtao siya nin marahayon na halimbawa para sa mga Kristiyano ngunyan. Pinatunayan niya na ‘dai nasayang’ an daing kapantay na kabuutan na inako niya sa Diyos.

4, 5. Taano ta masasabi niyato na magkapareho an “maugmang bareta kan Kahadian” asin an maugmang bareta kan “daing kapantay na kabuutan nin Diyos”?

⁴ Sa panahon na ini kan katapusan, isinugo an mga lingkod ni Jehova na ihulit “an maugmang baretang ini kan Kahadian . . . sa bilog na kinaban bilang patotoo sa gabos na nasyon.” (Mat. 24:14, NW) Magkapareho an mensaheng iyan na ihinuhulit niyato asin an “maugmang bareta mapadapit sa daing kapantay na kabuutan nin Diyos” huling gabos na bendisyon na linalauman tang akuon sa irarom kan Kahadian nagin posible huli sa kabuutan ni Jehova na ipinahiling niya paagi ki Cristo. (Efe. 1:3) Inaarog daw kan lambang saro sa sato si Pablo sa pagpahiling nin pasasalamat sa daing kapantay na kabuutan ni Jehova paagi sa maigot na pakikikabtang sa ministeryo?—Basahon an Roma 1:14-16.

⁵ Sa sinusundan na artikulo, nanudan niyato kun paano kita na mga parakasala nakikinabang sa dakul na paagi sa daing kapantay na kabuutan ni Jehova. Kaya, responsabilidad niyato sa gabos na tawo na gibuhon an satong pinakamakakaya para ipaaram sa sainda kun paano ipinapahiling ni Jehova an saiyang pagkamuot asin kun paano sinda personal na makikinabang diyan. Ano an nagkapirang aspekto kan daing kapantay na kabuutan ni Jehova na dapat niyatong tabangan an iba na mapahalagahan?

6, 7. Paano ta naipapalakop an maugmang bareta dapit sa daing kapantay na kabuutan nin Diyos pag ipinapaliwanag niyato sa mga tawo an dapit sa pantubos?

⁶ Sa konsintidor na kinaban na ini, dakul an dai na nakokonsensiya pag sinda nagkakasala, kaya dai ninda nasasabutan kun taano ta kaipuhan kan katawuhan an pantubos. Pero, padakul man nin padakul an nakakarealisar na dai nagtatao nin tunay na kaugmahan an sarong klase nin pamumuhay na daing bawal. Saka lang ninda naaaraman kun ano an kasalan, an mga epekto kaiyan sa sato, asin an kaipuhan gibuhon para makabutas sa pagkauripon diyan, pag may makaulay na sindang mga Saksi ni Jehova. Nagpapasalamat nanggad an mga sadiyosan an puso na ini na maaraman na huli sa dakulang pagkamuot asin daing kapantay na kabuutan ni Jehova, isinugo niya sa daga an saiyang Aki para tubuson kita sa kasalan asin sa resulta kaiyan na kagadanan.—1 Juan 4:9, 10.

⁷ Mapadapit sa namumutan na Aki ni Jehova, isinurat ni Pablo: “Paagi sa sarong ini [si Jesus], nakatalingkas kita dahil tinubos niya kita kan saiyang dugo, iyo, nakamtan niyato an kapatawadan kan satong mga pagkakasala, uyon sa daing kapantay na kabuutan nin Diyos.” (Efe. 1:7, NW) An atang na pantubos ni Cristo iyo an pinakadakulang patotoo kan pagkamuot sa sato nin Diyos asin ipinapahiling kaiyan kun gurano kadakula  kan Saiyang daing kapantay na kabuutan. Nakakaginhawa nanggad na maaraman na kun magtubod kita sa ipinabulos na dugo ni Jesus, mapapatawad an satong mga kasalan asin malilinigan an satong konsiyensiya! (Heb. 9:14) Sarong maugmang bareta nanggad iyan na dapat sabihon sa iba!

8. Taano ta kaipuhan kan makasalan na katawuhan an pakipag-ulian sa Diyos?

⁸ Igwa kita nin responsabilidad na ipaaram sa satong kapwa na puwede sindang magin dayupot na katuod kan saindang Kaglalang. Ibinibilang nin Diyos na mga kaiwal an mga dai minatubod sa atang ni Jesus. Nagsurat si apostol Juan: ‘An minatubod sa aki igwa nin buhay na daing katapusan; alagad an dai minakuyog sa Aki dai makakahiling nin buhay, kundi an kaanggutan nin Diyos nagdadanay sa saiya.’ (Juan 3:36) Marahay na sana ta huli sa atang ni Cristo, posible na an pakipag-ulian sa Diyos. Sinabi ni Pablo: “Sa saindo na dating napasuway asin mga kaiwal huling an mga isip nindo kaidto yaon sa mga gibong maraot, pinangyari ngunyan nin Diyos na kamo makipag-ulian sa saiya paagi sa pisikal na hawak kan sarong iyan na nagadan.”—Col. 1:21, 22, NW.

9, 10. (a) Anong responsabilidad an itinao ni Cristo sa saiyang linahidan na mga tugang? (b) Paano tinatabangan kan ‘ibang mga karnero’ an saindang linahidan na mga tugang?

⁹ Tinawan ni Jesus an saiyang linahidan na mga tugang sa daga kan inaapod ni Pablo na “misyon manungod sa pakipag-ulian.” Para ipaliwanag ini, nagsurat si Pablo sa inot na siglong linahidan na mga Kristiyano: “An gabos na ini hali sa Diyos, na guminibo nin medyos para makipag-ulian kami sa saiya paagi ki Cristo saka nagtao sa samo kan misyon manungod sa pakipag-ulian, asin an mensahe kan misyon na iyan iyo an ginibong paghiro nin Diyos paagi ki Cristo para makipag-ulian sa saiya an sarong kinaban, na dai na sinisingil an mga tawo sa mga pagkakasala ninda, asin ipinagkatiwala niya sa samuya an mensaheng ini nin pakipag-ulian. Kun siring, kami mga mensahero na kasalihid ni Cristo, na garo baga an Diyos nangangapudan paagi sa samo. Bilang mga mensahero na kasalihid ni Cristo, nakikiulay kami: ‘Makipag-ulian kamo sa Diyos.’”—2 Cor. 5:18-20, NW.

¹⁰ Ibinibilang kan ‘ibang mga karnero’ na sarong pribilehiyo na tabangan sa misyon na ini an saindang linahidan na mga tugang. (Juan 10:16) Bilang mga mensahero ni Cristo, igwa sinda nin dakulang kabtang sa pagtukdo sa mga tawo kan katotoohan asin sa pagtabang sa sainda na magkaigwa nin dayupot na relasyon ki Jehova. Mahalagang kabtang ini kan gibuhon na lubos na pagpapatotoo manungod sa maugmang bareta mapadapit sa daing kapantay na kabuutan nin Diyos.

11, 12. Taano ta maugmang bareta para sa mga tawo na maaraman na puwede sindang mamibi ki Jehova?

¹¹ Dakul na tawo an namimibi huling marahay iyan sa saindang pagmati, pero dai talaga sinda nagtutubod na dinadangog nin Diyos an saindang mga pamibi. Kaipuhan nindang maaraman na si Jehova iyo an “Paradangog nin pamibi.” Isinurat kan salmistang si David: “O Paradangog nin pamibi, sa saimo madurulok an gabos na klase nin tawo. Nadaog ako kan sakong mga sala, alagad tinahuban mo an samong mga paglapas.”—Sal. 65:2, 3, NW.

¹² Sinabi ni Jesus sa saiyang mga disipulo: ‘Kun kamo maghagad nin ano man sa ngaran ko, gigibuhon ko iyan.’ (Juan 14:14) Siyempre, an tataramon digdi na ‘ano man’ nangangahulugan nin ano man na kauyon kan katuyuhan ni Jehova. Sinisigurado sa sato ni Juan: “May kumpiyansa kita sa saiya na ano man na bagay na hagadon niyato kauyon kan saiyang kabutan, dinadangog niya kita.” (1 Juan 5:14, NW) Marahayon nanggad na itukdo sa iba na an pamibi bako sanang basta paagi para magrahay an saindang pagmati,  kundi saro ining makangangalas na paagi nin pagdulok “sa trono [ni Jehova] nin daing kapantay na kabuutan”! (Heb. 4:16, NW) Kun itutukdo niyato sa sainda na mamibi sa tamang paagi, sa tamang Persona, asin para sa tamang mga bagay, matatabangan ta sinda na maparani ki Jehova saka makanumpong nin karangahan sa mga panahon nin kasakitan.—Sal. 4:1; 145:18.

13, 14. (a) Magkakaigwa an mga linahidan nin anong pambihirang mga pribilehiyo sa maabot na panahon? (b) Anong marahayon na trabaho an gigibuhon kan mga linahidan para sa katawuhan?

¹³ Mas ipapahiling ni Jehova an daing kapantay na kabuutan pag natapos na an presenteng maraot na sistema nin mga bagay. Mapadapit sa pambihirang pribilehiyo na itinao nin Diyos sa 144,000, na inapod para mamahala kaiba ni Cristo sa saiyang Kahadian sa langit, si Pablo nagsurat: “An Diyos . . . huli sa saiyang dakulang pagkamuot sa sato, binuhay niya kita kaiba kan Cristo, minsan ngani dati kitang gadan huli kan satong mga pagbalga. Iyo, kamo naligtas paagi sa daing kapantay na kabuutan. Saro pa, huling mga kasaro kita ni Cristo Jesus, ibinangon kita nin Diyos kaiba ni Cristo asin pinatukaw kitang kaiba niya sa mga langitnon na lugar, tanganing sa maabot na mga sistema nin mga bagay ikapahiling Niya an saiyang daing kapantay na kabuutan paagi sa pagkabukas-palad Niya sa satuya na mga kasaro ni Cristo Jesus.”—Efe. 2:4-7, NW.

¹⁴ Dipisil nanggad imahinaron an pambihirang mga bagay na itinagama ni Jehova para sa linahidan na mga Kristiyano kun magtukaw na sinda sa trono para mamahala kaiba ni Cristo sa langit. (Luc. 22:28-30; Fil. 3:20, 21; 1 Juan 3:2) Ipapahiling ni Jehova lalo na sa mga linahidan “an saiyang daing kapantay na kabuutan.” Sinda an makompuwesto sa “Bagong Jerusalem,” an nobya ni Cristo. (Kap. 3:12; 17:14; 21:2, 9, 10) Makakaibanan sinda ni Jesus sa ‘pagpaumay kan mga nasyon.’ Gigiyahan ninda an makinuyog na mga tawo sa kun paano magigin talingkas sa pasakit kan kasalan saka kagadanan asin tatabangan sindang magin perpekto.—Basahon an Kapahayagan 22:1, 2, 17.

15, 16. Paano ipapahiling ni Jehova sa maabot na panahon an saiyang daing kapantay na kabuutan sa ‘ibang mga karnero’?

¹⁵ Mababasa ta sa Efeso 2:7 na ipapahiling nin Diyos an saiyang daing kapantay na kabuutan “sa maabot na mga sistema nin mga bagay.” (NW) Siguradong maeeksperyensiyahan sa bagong sistema nin mga bagay ni Jehova sa daga “an saiyang daing kapantay na kabuutan.” (Luc. 18:29, 30) An saro sa pinakadakulang kapahayagan kan pambihirang kabuutan ni Jehova iyo an pagbuhay liwat sa mga tawo na nasa ‘Lulubngan.’ (Job 14:13; Juan 5:28, 29) An maimbod na mga lalaki asin babayi kaidto na nagadan bago magadan si Cristo bilang atang, pati an gabos na ‘ibang mga karnero’ na nagadan na maimbod sa panahon kan huring mga aldaw, bubuhayon liwat para padagos na maglingkod ki Jehova.

¹⁶ Bubuhayon man an minilyon na nagadan na dai namidbid an Diyos. Tatawan sinda nin oportunidad na magpasakop sa soberaniya ni Jehova. Si Juan nagsurat: “Nahiling ko an mga gadan, an darakula asin an saradit, na nakatindog sa atubangan kan trono, asin may mga rolyong biniriklad. Alagad may saro pang rolyong biniklad; iyan an rolyo nin buhay. Hinukuman an mga gadan sigun sa mga bagay na nakasurat sa mga rolyo uyon sa saindang mga gibo. Asin itinao kan dagat an mga gadan na yaon sa saiya, asin itinao kan kagadanan asin kan Lulubngan an mga gadan na yaon sa sainda, asin an lambang saro sa sainda hinukuman uyon sa saindang mga gibo.” (Kap. 20:12, 13, NW) Siyempre, kaipuhan na manudan kan mga bubuhayon liwat na iaplikar an mga prinsipyo nin Diyos na yaon sa Bibliya. Dugang pa, kaipuhan nindang sunudon an ihahayag na mga laog kan “mga rolyo”—kapaki-pakinabang na bagong mga instruksiyon o mga kahagadan ni Jehova sa  pag-istar sa bagong sistema nin mga bagay. An paghayag kaiyan magigin saro pang kapahayagan kan daing kapantay na kabuutan ni Jehova.

17. Ano an dapat na pirmi niyatong isaisip pag kita naghuhulit?

¹⁷ Urog kisa kasuarin man, importante nanggad an satong misyon na ihulit an maugmang bareta kan Kahadian huling naghaharani na an katapusan! (Mar. 13:10) Malinaw nanggad na itinatampok kan maugmang bareta an daing kapantay na kabuutan ni Jehova. Dapat na pirmi niyatong isaisip na pag kita naghuhulit, an katuyuhan niyato iyo na magtaong onra ki Jehova. Magigibo ta ini kun sasabihon ta sa mga tawo na an gabos na ipinanugang bendisyon sa bagong kinaban kapahayagan kan pambihirang kabuutan ni Jehova.

18, 19. Paano ta maipapahiling na talagang pinapasalamatan ta an daing kapantay na kabuutan ni Jehova?

¹⁸ Pag naghuhulit kita sa iba, puwede tang sabihon na sa irarom kan pamamahala ni Cristo sa Kahadian, makakamtan kan katawuhan an lubos na pakinabang kan atang na pantubos asin gradwal sindang magigin perpekto. Sinasabi kan Bibliya: “An mga linalang mismo mapapatalingkas man sa pagkauripon sa kalapaan asin magkakaigwa man kan mamuraway na katalingkasan kan mga aki nin Diyos.” (Roma 8:21, NW) Magigin posible sana ini huli sa pambihirang kabuutan ni Jehova.

¹⁹ Igwa kita kan pribilehiyo na sabihon sa gabos na magdadangog an nakakaugmang panuga na nasa Kapahayagan 21:4, 5 (NW): “Papahidon [nin Diyos] an gabos na luha sa saindang mga mata, asin mawawara na an kagadanan, pati pagmundo, pagtangis, asin kulog. An dating mga bagay nakalihis na.” Asin si Jehova, an saro na nakatukaw sa trono, nagsabi: “Uya! Ginigibo kong bago an gabos na bagay.” Sinabi pa niya: “Isurat mo, huli ta an mga tataramon na ini maimbod asin totoo.” Kun maigot niyatong ihinuhulit sa iba an maugmang baretang ini, tunay nanggad na pinapasalamatan tang marhay an daing kapantay na kabuutan ni Jehova!