1. Iilustrar kun taano ta mahalagang magin mapagbantay sa oras asin sa nangyayari sa palibot niyato. (Hilingon an ritrato sa itaas.)

MANTANG nahihiling niyatong nauubos an limang minuto sa relo na nasa video screen, aram tang panahon na para magtukaw asin magdangog sa musika bilang pagpupuon kan sesyon nin sarong kumbensiyon. Panahon iyan para silensiyong magdangog sa magayon na musika kan Watchtower orchestra asin, an pinakamahalaga, maiandam an isip ta saka puso para sa masunod na mga pahayag. Pero paano kun may mga harayo an isip, naglalakaw-lakaw, o nakikipag-ulay pa sa mga amigo ninda na daing pakaaram na nagpupuon na an programa? Malinaw na dai sinda nagdanay na mapagbantay sa oras asin sa nangyayari sa palibot ninda—nasa entablado na an tsirman, pinapatugtog na an musika, asin nakatukaw na an kadaklan. Makakatabang sa sato an senaryong ini para mapahiro kitang magtaong atensiyon sa “paubos nang oras” bago an sarong mas importanteng pangyayari sa maabot na panahon na dapat na danay tang bantayan asin pag-andaman. Ano an pangyayaring iyan?

2. Taano ta sinadol ni Jesus an saiyang mga disipulo na ‘magdanay na mapagbantay’?

² Kan nagtataram si Jesus mapadapit sa “pagtatapos kan sistema nin mga bagay,” sinadol niya an saiyang mga disipulo na magdanay na  mapagbantay asin magdanay na mata, huli ta dai ninda aram kun nuarin an itinalaan na panahon. Pagkatapos, pirang beses pa sindang sinadol ni Jesus na magdanay na mapagbantay. (Mat. 24:3, NW; basahon an Marcos 13:32-37.) Sa rekord ni Mateo kan pag-uulay na iyan, mahihiling na pinatanidan man ni Jesus an saiyang mga parasunod na magdanay na mata: “Kun siring, magdanay kamong mapagbantay huli ta dai nindo aram kun anong aldaw maabot an saindong Kagurangnan. . . . Magin andam kamo, huli ta an Aki nin tawo maabot sa oras na dai nindo pighuhuna.” Sa giraray, sinabi niya: “Kun siring, magdanay kamong mapagbantay huli ta dai nindo aram an aldaw ni an oras.”—Mat. 24:42-44; 25:13, NW.

3. Taano ta tinatawan niyato nin atensiyon an patanid ni Jesus?

³ Bilang mga Saksi ni Jehova, tinatawan ta nin atensiyon an patanid ni Jesus. Aram niyato na nabubuhay na kita sa puro kan “panahon nin katapusan” asin madali nang magpuon an ‘dakulang kahurasaan’! (Dan. 12:4; Mat. 24:21) Nahihiling na niyato sa bilog na kinaban an nakakatakot na mga giyera, naggagrabeng imoralidad saka karatan, nakakaribong na mga katukduan sa relihiyon, grabeng gutom, epidemya, asin mga linog. Aram niyato na sarong pambihirang paghuhulit kan Kahadian an isinasagibo kan mga lingkod ni Jehova sa gabos na lugar. (Mat. 24:7, 11, 12, 14; Luc. 21:11) Hinahalat-halat na nanggad niyato an pag-abot kan Kagurangnan asin mahiling kun ano an magigin kahulugan kaiyan para sa sato saka sa kautuban kan katuyuhan nin Diyos.—Mar. 13:26, 27.

4. (a) Taano ta rasonableng isipon na aram na ngunyan ni Jesus kun nuarin an Armagedon? (b) Dawa dai ta aram kun nuarin mapuon an dakulang kahurasaan, sa ano kita nakakasigurado?

⁴ Aram niyato an eksaktong oras kun nuarin mapuon an kada sesyon nin sarong kumbensiyon. Pero imposible nanggad para sa sato na maaraman an eksaktong taon, lalo na an aldaw asin oras, kun nuarin mapuon an dakulang kahurasaan. Kan nasa daga si Jesus, sinabi niya: ‘Dapit kan aldaw asin kan oras na iyan, daing nakakaisi, minsan an mga anghel sa langit, ni an Aki, kundi an Ama sana.’ (Mat. 24:36) Pero itinao na ki Jesus sa langit an kapangyarihan para makigiyera laban sa kinaban ni Satanas. (Kap. 19:11-16) Kaya, rasonableng isipon na aram na ngunyan ni Jesus kun nuarin an Armagedon. Pero kita, dai ta aram iyan. Kaya kaipuhan tang magdanay na mapagbantay sagkod na mag-abot an dakulang kahurasaan. Nungkang nagin paburubago si Jehova sa itinalaan niyang panahon para sa pangyayaring iyan. Dinesisyunan na niya kun nuarin eksaktong mangyayari an katapusan. Nahihiling niyang paubos na an oras bago magpuon an dakulang kahurasaan, asin an pagpuon kaiyan dai nanggad mahuhuri! (Basahon an Habacuc 2:1-3.) Paano ta nasisigurado iyan?

5. Magtao nin halimbawa na nagpapahiling na an mga hula ni Jehova pirming nauutob nin eksakto sa itinalaan na panahon.

⁵ An mga hula ni Jehova pirming nauutob nin eksakto sa itinalaan na panahon! Pag-isipan an pagigin eksakto kan pagpatalingkas niya sa mga Israelita sa Ehipto. Mapadapit sa petsang Nisan 14, 1513 B.C.E., sinabi ni Moises: ‘Pakaagi nin 430 taon, kan aldaw man sanang [ini], an [banwaan] ni Jehova huminali sa daga kan Ehipto.’ (Ex. 12:40-42) Nagpuon an ‘430 taon’ na iyan kan 1943 B.C.E., kan magin balido an tipan ni Jehova ki Abraham. (Gal. 3:17, 18) Dangan paghaloy-haloy, sinabi ni Jehova ki Abraham: ‘An saimong mga kapag-arakian magigin mga dayuhan sa bako nindang daga, magigin mga uripon duman asin aapihon sa laog nin 400 na taon.’ (Gen. 15:13, BPV ^[1]; Gui. 7:6) Minalataw na nagpuon an ‘400 na taon’ na iyan nin pagpasakit kan 1913 B.C.E., kan tuya-tuyaon ni Ismael si Isaac kan panahon na butason ini sa pagsuso, asin natapos iyan kan maghali an mga Israelita sa Ehipto kan 1513 B.C.E. (Gen. 21:8-10; Gal. 4:22-29) Iyo, apat na siglo bago pa mangyari, itinalaan na ni Jehova an eksaktong aldaw na ililigtas niya an saiyang banwaan!

6. Taano ta makakasigurado kita na ililigtas ni Jehova an saiyang mga lingkod?

 ⁶ Si Josue, na kabilang sa mga pinatalingkas sa Ehipto, ipinagirumdom sa bilog na Israel: ‘Nakakaaram sa saiyang puso asin kalag an lambang saro sa saindo na itinao saindo ni [Jehova na saindong Diyos] an gabos na marahay na bagay na saiyang ipinanuga. Inutob niya an lambang panuga, mayong nasudya minsan saro.’ (Jos. 23:2, 14, BPV) Makakasigurado kita na dai man masusudya an panuga ni Jehova na ililigtas niya kita sa dakulang kahurasaan. Pero kun gusto tang makaligtas sa pagkalaglag kan sistemang ini, dapat kitang magdanay na mapagbantay.

7, 8. (a) Ano an papel nin sarong bantay kaidtong suanoy na mga panahon, asin ano an itinutukdo kaiyan sa sato? (b) Magtao nin halimbawa sa kun ano an puwedeng mangyari kun makaturog an bantay.

⁷ May manunudan kita sa suanoy na mga panahon mapadapit sa kahalagahan kan pagigin mapagbantay. Dakul na mas darakulang siyudad kaidto, arog nin Jerusalem, an napapalibutan nin haralangkaw na lanob. Proteksiyon an mga lanob na ini sa mga nananakyada asin magayon na puwesto man ini para mahiling an palibot. Aldaw asin bangging nakapuwesto an mga bantay sa ibabaw kan lanob saka sa mga trangkahan. Pag may nagdadangadang na peligro, papatanidan ninda an mga nakaistar sa siyudad. (Isa. 62:6) Dapat sindang magdanay na mata asin nagbabantay sa puwesto huling nakadepende sa sainda an buhay kan saindang mga kahimanwa.—Ezeq. 33:6.

⁸ Sinabi kan Judiong historyador na si Josephus na kan 70 C.E., nalaog kan mga suldados na Romano an Tore nin Antonia na kataid kan lanob kan siyudad nin Jerusalem, huling tururog an mga bantay sa mga trangkahan! Hali diyan, nakalaog an mga Romano sa siyudad asin sinulo an templo. Iyan an nagin pangultimong kabtang kan pinakadakulang kahurasaan na dai pa kasuarin man naeksperyensiyahan kan Jerusalem asin kan Judiong nasyon.

9. Ano an dai naaaraman kan kadaklan sa mga tawo ngunyan?

⁹ An kadaklan na nasyon ngunyan igwa man nin “mga bantay” arog kan modernong mga sistema sa pagmanman asin mga nagpapatrolya sa mga sagkudan kan saindang teritoryo. Binabantayan ninda kun may ilegal na mga minalaog sa teritoryo ninda asin kun may kalaban na posibleng magin peligro sa seguridad kan saindang nasyon. Pero an nahihiling sana kan siring na “mga bantay” iyo an mga peligrong hali sa mga tawo o gobyerno nin tawo. Dai ninda naaaraman na igwa nin gobyerno an Diyos sa langit, sarong Kahadian na pinamamahalaan ni Cristo, na dakul an isinasagibo sa ngunyan. Asin madali na kaiyan na hukuman an gabos na nasyon. (Isa. 9:6, 7; 56:10; Dan. 2:44) Pero, paagi sa pagigin mata asin mapagbantay sa espirituwal, magigin andam kita nuarin man umabot an aldaw na iyan nin paghukom.—Sal. 130:6.

10, 11. (a) Sa ano kita dapat na mag-ingat, asin taano? (b) Taano ta kumbinsido ka na naimpluwensiyahan na kan Diyablo an mga tawo na baliwalaon an hula sa Bibliya?

¹⁰ Imahinara an sarong nagbabantay nin bilog na banggi. Sa natatadang pirang oras kan saiyang pagbabantay, nagigin masakit para sa saiya na magdanay na mata huling pagal asin tungka na siya. Kaagid kaiyan, mantang mas nagrarani kita sa katapusan kan sistemang ini nin mga bagay, mas nagigin masakit man para sa sato na magdanay na mata. Kapaha-pahamak nanggad kun dai kita makapagdanay na mapagbantay! Pag-ulayan niyato an tulong negatibong impluwensiya na puwedeng makaapektar sa pagigin mata asin mapagbantay niyato kun dai kita mag-iingat.

¹¹ Iniimpluwensiyahan kan Diyablo an mga tawo para luway-luway na mawara an interes ninda sa espirituwal. Kan madali nang gadanon si Jesus, tulong beses niyang pinatanidan an saiyang mga disipulo manungod sa “tagapamahala kan kinaban na ini.” (Juan 12:31; 14:30; 16:11, NW) Aram  ni Jesus na hihinguwahon ni Satanas na magdanay na nasa kadikluman an isip nin mga tawo para dai ninda mamatian an pagkaapurado kan panahon na mahihiling sa mga hula nin Diyos. (Sof. 1:14) Ginagamit ni Satanas an pambilog na kinaban na imperyo nin palsong relihiyon tanganing butahon an isip kan mga tawo. Ano an naririsa mo pag nakikipag-ulay ka sa iba? Bako daw na an Diyablo ‘nabuta na an pag-isip kan mga dai minatubod’ sa nagdadangadang na katapusan kan sistemang ini nin mga bagay, asin sa katotoohan na namamahala na ngunyan si Cristo sa Kahadian nin Diyos? (2 Cor. 4:3-6) Gurano mo kaparating madangog sa mga tawo an, “Dai ako interesado”? Sa parati, dai sinda interesado pag sinasabi ta sa sainda an kaaabtan kan kinaban na ini.

12. Taano ta dai niyato dapat pagtugutan na madaya kita kan Diyablo?

¹² Dai pagtugutan na madisganar ka o mangluya an buot asin dai ka na magdanay na mapagbantay huli sa kawaran nin interes kan iba. Mas may naaaraman ka kisa sainda. Nagsurat si Pablo sa mga kapagtubod niya: ‘Kamo man sana nakakaaram na marhay na an aldaw nin Kagurangnan madatong,’ asin sinabi pa niya, ‘siring sa parahabon kun banggi.’ (Basahon an 1 Tesalonica 5:1-6.) Nagpatanid si Jesus sa sato: ‘Kamo man mag-andam, huli ta sa oras na dai nindo pighuhuna, an Aki nin tawo madatong.’ (Luc. 12:39, 40) Dai na mahahaloy, dadayaon ni Satanas an mga tawo para isipon ninda na nakamtan na ninda an katuninungan asin katiwasayan. Papaniwalaon niya sinda na marahay na an kamugtakan kan kinaban. Kumusta man kita? Kun magdadanay kitang ‘puka asin [tultol an pag-iisip],’ dai kita ‘aabutan kan aldaw [nin paghukom] na siring sa parahabon.’ Kaya, dapat niyatong aroaldaw na basahon an nasusurat na Tataramon nin Diyos asin hurop-hurupon kun ano an sinasabi diyan sa sato ni Jehova.

13. Paano nakakaapektar sa mga tawo an espiritu kan kinaban, asin paano ta malilikayan iyan?

¹³ An espiritu kan kinaban pinapaturog sa espirituwal an mga tawo. Dakul an nawiwiling marhay sa saindang pang-aroaldaw na mga aktibidad sa buhay kaya dai sinda “nakakamating kaipuhan ninda nin espirituwal na mga bagay.” (Mat. 5:3, NW) Bangkag sinda sa pagkua kan dakul na materyal na bagay na inaalok kan kinaban na minapukaw sa ‘mawot kan laman asin mawot kan mga mata.’ (1 Juan 2:16, An Banal na Biblia) Asin taon-taon, an mga pasali sa telebisyon asin pelikula paurog nin paurog an pang-eengganyar sa mga tawo na “magpasiram-siram” asin paniguan an ano man na pagmawot ninda. (2 Tim. 3:4, NW) Ini  an dahilan kaya sinabihan ni Pablo an mga Kristiyano na dapat sindang “dai magparaisip para sa mga kamawutan kan laman” na nakakapaturog sa espirituwal.—Roma 13:11-14, NW.

14. Ano an ipinapatanid sa sato kan Lucas 21:34, 35?

¹⁴ Imbes na an espiritu kan kinaban, an gusto niyatong makaimpluwensiya sa satong buhay iyo an espiritu nin Diyos. Ini man an ginagamit ni Jehova para tabangan kita na masabutan nin malinaw an mga mangyayari sa maabot. ^[2] (1 Cor. 2:12) Pero, aram niyato na bako sanang ekstraordinaryong mga bagay an puwedeng makapatungka sa sato sa espirituwal. Kaya kitang patungkaon dawa kan ordinaryong mga bagay sa buhay kun papabayaan ta an mga iyan na makaulang sa satong espirituwal na mga gibuhon. (Basahon an Lucas 21:34, 35.) Tibaad tuya-tuyaon kita kan iba sa pagdadanay niyatong mapagbantay, pero dai dapat magin dahilan iyan para dai ta na isipon na nabubuhay na kita sa huring mga aldaw. (2 Ped. 3:3-7) Imbes, dapat na regular kitang makiasosyar sa satong mga tugang sa mga pagtiripon ta, kun sain yaon an espiritu nin Diyos.

15. Ano an nangyari ki Pedro, Santiago, asin Juan, asin paano man iyan puwedeng mangyari sa sato?

¹⁵ An satong pagkabakong perpekto puwedeng makapaluya sa determinasyon niyatong magdanay na mata. Aram ni Jesus na an bakong perpektong mga tawo may tendensiyang magpadaog sa mga kaluyahan kan laman. Hilinga an nangyari kan banggi bago gadanon si Jesus. Tanganing makapagdanay siyang maimbod, kinaipuhan ni Jesus na maghagad nin kusog sa saiyang Ama sa langit. Hinagad niya ki Pedro, Santiago, asin Juan na “padagos na magbantay” mantang siya namimibi. Pero, dai ninda napag-isip-isip kun gurano kaseryoso kan mga mangyayari. Imbes na magbantay para sa saindang Kagurangnan, nagpadaog sinda sa mawot kan saindang laman asin nagturog. Dawa pagal man kaidto si Jesus, nagdanay siyang mata asin udok na namibi sa saiyang Ama. Arog man kutana kaiyan an ginibo kan saiyang mga kairiba.—Mar. 14:32-41, NW.

16. Ano an itinukdo sa sato ni Jesus sa Lucas 21:36 para magdanay kitang ‘puka’?

¹⁶ Tanganing magdanay kitang ‘puka’ o mata sa espirituwal, urog pa sa pagkaigwa nin kagustuhan na dai makaturog an kaipuhan. Mga pirang aldaw bago an mga pangyayari sa hardin nin Getsemane, sinabihan ni Jesus an iyo man sanang mga disipulong idto na magngayo-ngayo ki Jehova. (Basahon an Lucas 21:36.) Kaya tanganing magdanay na mapagbantay sa espirituwal, dapat man kitang mamibi sa gabos na panahon.—1 Ped. 4:7.

17. Paano ta masisigurado na andam kita sa mga mangyayari sa maabot?

¹⁷ Huling sinabi ni Jesus na maabot an katapusan ‘sa oras na dai niyato pighuhuna,’ bako ining panahon para makaturog sa espirituwal, bako ining panahon para magmaigot na makamtan an mga imahinasyon asin pantasya na iinaalok ni Satanas saka kan kinaban, mga bagay na hinahanap-hanap man kan satong makasalan na laman. (Mat. 24:44) Paagi kan Bibliya, sinasabi sa sato nin Diyos asin ni Cristo kun ano an itinagama ninda sa sato sa harani nang panahon asin kun paano kita makakapagdanay na mapagbantay. Dapat tang tawan nin atensiyon an espirituwalidad niyato, an relasyon niyato ki Jehova, asin an pag-inot niyato sa Kahadian. Dapat kitang magin mapagbantay sa oras asin sa mga nangyayari sa palibot niyato tanganing magin andam kita sa mga mangyayari sa maabot. (Kap. 22:20) Nakadepende diyan an satong buhay!