TAANO ta makakasigurado kang totoo an mga tataramon na iyan, na si Jehova talagang may pagmakulog sa saimo? An sarong dahilan iyo na espesipikong sinasabi iyan kan Bibliya. An 1 Pedro 5:7 nagsasabi: ‘Ibugtak nindo sa saiya an gabos nindong kahaditan, huli ta siya may pagmakulog sa saindo.’ Pero, ano an mga ebidensiya na interesado sa saimo an Diyos na Jehova?

An saro diyan iyo na igwa an Diyos kan mga kuwalidad na posibleng marhay na hinahanap mo sa gusto mong magin dayupot na mga kaamigo. Sa parati, an nagigin dayupot na magkaamigo iyo idtong parehong mabuot asin bukas-palad sa lambang saro. Hiling-hiling mo sa aroaldaw an pagigin mabuot asin bukas-palad ni Jehova sa mga tawo. Hilinga an sarong halimbawa: ‘Pinapasirang niya an saiyang aldaw sa mga maraot asin sa mga marahay, asin pinapauranan an mga matanos asin bakong matanos.’ (Mat. 5:45) Ano an nagigibo kan aldaw asin uran? Paagi sa mga ini, apuwera pa sa ibang bagay, ‘tinatawan [nin Diyos] nin [igong] kakanon [an mga tawo] asin pinapano nin kaugmahan an saindang mga puso.’ (Gibo 14:17, BPV *) Iyo, sinisiyerto ni Jehova na makakaprodusir nin abundang kakanon an daga, asin talagang ikinakaugma niyato an masisiram na kakanon.

Pero, taano ta dakulon an nagugutom? Huling sa parati, mas nakapokus an mga namamahalang tawo sa pagkamit nin pulitikal na kapangyarihan asin pagpayaman imbes na sa pagpauswag sa kalidad nin buhay kan mga tawo. Madali nang resolberan ni Jehova an problemang iyan nin kahanaban. Hahalion niya an presenteng pulitikal na sistema asin sasalidahan kan langitnon na Kahadian na an namamahalang Hadi iyo an saiyang Aki. Sa panahon na iyan, mayo nang magugutom. Pero dawa ngunyan, sinususteniran na nin Diyos an saiyang maimbod na mga lingkod. (Sal. 37:25) Bako daw na ebidensiya iyan kan saiyang pagmakulog?

An sarong marahay na amigo nagtatao kan saiyang panahon. Dawa pirang oras, puwede siyang makipag-ulay sa saimo dapit sa pareho nindong pinagkakainteresan. Asin pag sinasabi mo sa saiya an saimong mga problema asin ikinakahadit, nagdadangog siyang marhay. Arog man daw kaiyan kaatentibo si Jehova? Iyo nanggad! Nagdadangog siya sa satong mga pamibi. Kaya, dinadagka kita kan Bibliya na magin “maigot sa pamibi” asin “mayong patod na magpamibi” pa ngani.—Roma 12:12; 1 Tes. 5:17, An Banal na Biblia.

Pirang oras an andam na itao ni Jehova para magdangog sa saimong mga pamibi? Sarong pangyayari sa Bibliya an matao sa sato kan simbag. Bago nagpili si Jesus nin magigin niyang mga apostol, ‘bilog na banggi siyang namibi sa Diyos.’ (Luc. 6:12, BPV) Sa pamibing iyan, posibleng marhay na saro-sarong rinepaso ni Jesus an dakul sa mga disipulo niya, tinimbang-timbang an mga kuwalidad saka kaluyahan ninda, asin hinagad sa saiyang Ama na tabangan siya sa pagpili. Kan aga na, aram ni Jesus na napili na niya an mga pinakakuwalipikadong maglingkod bilang mga apostol niya. Bilang “Paradangog nin pamibi,” nauugma si Jehova na magdangog sa gabos na udok sa pusong pamibi. (Sal. 65:2, NW) Kaya, kun an saro mamibi dapit sa sarong bagay na ikinakahadit niyang marhay, andam si Jehova na magdangog gurano man iyan kahaloy.

Kun minsan, dawa an dayupot nang mga magkaamigo nasasakitan kun dapit sa pagpatawad. Pinuputol pa ngani kan iba an haloy na nindang pagigin magkaamigo huling masakiton sa sainda na magpatawad. Bakong arog kaiyan si Jehova. Dinadagka kan Bibliya an gabos na sinserong indibidwal na maghagad sa saiya nin kapatawadan, huling ‘siya bulaos sa pagpatawad.’ (Isa. 55:6, 7) Ano an nagpapahiro sa Diyos na bulaos na magpatawad?

An dahilan iyo an saiyang daing kapantay na pagkamuot. Namutan niyang marhay an kinaban kaya itinao niya an saiyang Aki, si Jesus, tanganing iligtas an katawuhan sa kasalan asin sa mga danyos na dara kaiyan. (Juan 3:16) Sa katunayan, bako sana iyan an nagigibo  kan pantubos. Paagi sa atang ni Cristo, lubos na pinapatawad nin Diyos an mga namumutan niya. Si apostol Juan nagsurat: ‘Kun kita magbuyboy kan satong mga kasalan, siya maimbod asin matanos sa pagpatawad sato kan satong mga kasalan.’ (1 Juan 1:9) Huli sa pagigin mapagpatawad ni Jehova, puwedeng padagos na magkaigwa nin dayupot na relasyon sa saiya an mga tawo, asin an pakaaram niyato kaini nakakapahiro nanggad sa sato.

An sarong tunay na amigo minasukoro kun kaipuhan mo nin tabang. Arog man daw kaiyan an ginigibo ni Jehova? An saiyang Tataramon nagsasabi: ‘[Minsan pa] masingkog [an saro sa mga lingkod nin Diyos], dai siya napapasubasob, ta kinakabit siya [ni Jehova] sa kamot.’ (Sal. 37:24, An Banal na Biblia) “Kinakabit” o tinatabangan ni Jehova an saiyang mga lingkod sa manlain-lain na paagi. Hilinga an eksperyensiyang ini hali sa isla nin St. Croix sa Caribbean.

Sarong Saksing hoben na babayi an ginigipit kan saiyang mga kaklase huli sa dai niya pagsaludo sa bandera. Pakapamibi ki Jehova para sa tabang, nagdesisyon siyang atubangon an isyu. Sa saiyang sunod na report sa klase, pagsaludo sa bandera an pinili niyang tema. Gamit an Sakuyang Libro nin mga Istorya sa Bibliya, ipinaliwanag niya kun paano nakatabang sa desisyon niya an istorya dapit ki Sadrac, Mesac, asin Abednego. Sinabi niya, “Prinotektaran ni Jehova an tulong Hebreong idto huling nagsayuma sindang magsamba sa sarong imahen.” Dangan, naghapot siya kun siisay an gustong magkaigwa kan libro. Onse sa mga kaklase niya an gustong magkaigwa nin kopya. Ugmahon an hoben na babayi huling nahiling niya kun paano siya tinawan ni Jehova nin kusog asin kadunungan para makapagpatotoo mapadapit sa sensitibong temang idto.

Kun nagdududa ka kun baga nagmamakulog sa saimo si Jehova, hurop-hurupon an mga tekstong arog kan Salmo 34:17-19; 55:22; asin 145:18, 19. Maghapot sa haloy nang mga Saksi kun paano nagmakulog sa sainda si Jehova. Asin kun kaipuhan mo an tabang nin Diyos, ipamibi mo iyan sa saiya. Dai mahahaloy, mapapatunayan mong ‘may pagmakulog sa saimo’ si Jehova.