Maingat mo daw na binasa an dai pa sana nahahaloy na mga isyu kan An Torrengbantayan asin The Watchtower? Buweno, hilinga kun masisimbag mo an minasunod na mga hapot:

Taano ta tinugutan ni Jehova na makigiyera an suanoy na Israel?

Mamumuton si Jehova. Pero, may mga pagkakataon na itinugot niya an pakikigiyera kun may karatan asin pang-aapi na nagsasapeligro sa saiyang banwaan. An Diyos sana an nagdedesisyon kun siisay an makikigiyera asin kun nuarin.—w15-E 11/1, p. 4-5.

Anong mahahalagang bagay an magigibo nin mga magurang para sanayon an mga aki nindang tin-edyer na paglingkudan si Jehova?

Mahalagang marhay na mamutan kan mga magurang an mga aki nindang tin-edyer asin magpahiling sinda nin halimbawa nin kapakumbabaan. Mahalaga man para sa mga magurang na gumamit nin pakasabot asin hinguwahon na sabuton an mga aki nindang tin-edyer.—w15 11/15, p. 9-11.

Ano an mga dapat niyatong ikonsiderar bago magtaram?

Tanganing magamit niyato sa marahay na paagi an satong dila, dapat tang tandaan (1) kun nuarin mataram (Par. 3:7), (2) kun ano an itataram (Tal. 12:18), asin (3) kun paano mataram (Tal. 25:15).—w15 12/15, p. 19-22.

Anong bakong sadiyosan na mga gibo an dapat na likayan kan mga Kristiyano?

Linilikayan kan tunay na mga Kristiyano an pagputik asin pagpakaraot. Dai sinda nagtataram nin bakong totoo asin maraot na mga impormasyon na nakakadanyar sa iba, saka dai sinda nandadaya o naghahabon.—wp16.1-E, p. 5.

Taano ta dai dapat ibilang na kasalida ni Pedro an papa?

Dai sinasabi kan Mateo 16:17, 18 na si apostol Pedro an magigin payo kan Kristiyanong kongregasyon. Dai ipinapahiling kan Bibliya na si Pedro an may pinakahalangkaw na posisyon, kundi ipinapahiling kaiyan na si Jesus an magigin pundasyon kan kongregasyon. (1 Ped. 2:4-8)—wp16.1, p. 8-10.

Sairisay an “mga panginot na saserdote” na sinambit sa Bibliya?

An ekspresyon na “mga panginot na saserdote” malinaw na ipinapanungod sa panginot na mga miyembro kan grupo nin mga saserdote, kaiba digdi an dating mga halangkaw na saserdote na hinali sa puwesto.—wp16.1-E, p. 10.

Paano niyato dapat trataron an saro na nakikikabtang sa mga emblema sa Memoryal?

Dai dapat trataron kan mga Kristiyano na mas nakakalangkaw an mga nakikikabtang. Habo nin sarong tunay na linahidan na ilinalangkaw siya; habo man niyang inaanunsiyo an pagigin niyang linahidan. (Mat. 23:8-12)—w16.01, p. 23-24.

Ano an manunudan ta sa kun paano nagin katuod nin Diyos si Abraham?

Nagkua si Abraham nin kaaraman manungod sa Diyos posibleng paagi ki Sem. Asin nakakua man si Abraham nin eksperyensiya hali sa mga ginibo nin Diyos sa saiya asin sa saiyang pamilya. Puwede man niyatong hinguwahon na gibuhon iyan.—w16.02, p. 9-10.

Paano nagkaigwa nin mga kapitulo asin bersikulo an Bibliya?

An klerigong si Stephen Langton kan ika-13 siglo an nagbanga-banga kan Bibliya sa mga kapitulo. An mga parakopyang Judio an inot na naglaag nin mga bersikulo sa Hebreong Bibliya, asin kan ika-16 na siglo, arog man kaiyan an ginibo ni Robert Estienne sa Kristiyanong Griegong Kasuratan.—wp16.2, p. 14-15.

Kan tentaran ni Satanas si Jesus, aktuwal daw niyang dinara si Jesus sa templo?

Dai ta ini masisiyerto. An Mateo 4:5 asin Lucas 4:9 puwedeng mangahulugan na dinara si Jesus sa templo sa paagi nin sarong bisyon o na nagtindog siya sa sarong halangkaw na parte sa lugar kan templo.—w16.03, p. 31-32.

Sa anong mga paagi puwedeng magin siring sa ambon an satong Kristiyanong ministeryo?

An ambon napoporma nin luway-luway, nakakarepresko, asin nagsusustenir sa buhay. An literal na ambon sarong bendisyon hali sa Diyos. (Deut. 33:13) Arog man kaiyan an pinagsaralak na paghihinguwa sa ministeryo kan mga lingkod nin Diyos.—w16.04, p. 4.