Si Haykanush, sarong dai pa bawtisadong parahayag na nakaistar sa Armenia, nakapurot nin sarong pasaporte harani sa harong ninda. May nakaipit diyan na mga debit card asin dakulang kantidad nin kuwarta. Sinabi niya ini sa mister niya na saro man na dai pa bawtisadong parahayag.

Dawa nangangaipong marhay nin kuwarta an mag-agom asin may mga utang pa, nagdesisyon sindang ibalik an kuwarta sa adres na nasa pasaporte. Nangalas an lalaking kagsadiri kan pasaporte pati an pamilya kaini. Sinabi ni Haykanush saka kan agom niya na an pagigin onesto o sadiyosan ninda resulta kan mga nanunudan ninda sa Bibliya. Para sa sainda, kaipuhan nindang magin onesto, asin ginamit ninda an oportunidad na ini para ipakipag-ulay an dapit sa Mga Saksi ni Jehova saka magwalat sa pamilya nin mga literatura.

Gusto kan pamilya na tawan si Haykanush nin kuwarta bilang balos, pero dai niya iyan inako. Kan suminunod na aldaw, nagbisita sa harong ninda an agom kan lalaki asin pinirit kaini si Haykanush na akuon an sarong singsing na may tampok na brilyante bilang pasasalamat kan pamilya.

Arog kan pamilyang iyan, dakul an mangangalas sa ipinahiling na pagkaonesto ni Haykanush asin kan agom niya. Pero mangangalas daw kaiyan si Jehova? Ano an paghiling niya sa pagigin onesto ninda? Nakinabang daw sinda sa pagigin onesto ninda?

Pasil an simbag sa mga iyan. Huling nagtutubod an mga lingkod ni Jehova na an pag-arog sa mga kuwalidad niya mas mahalaga sa paghiling niya kisa sa mga brilyante, bulawan, o iba pang materyal na bagay. Iyo, an paghiling ni Jehova sa kun ano an mahalaga asin kun ano an bako, naiiba sa paghiling kan kadaklan na tawo. (Isa. 55:8, 9) Asin para sa mga lingkod ni Jehova, daing kaagid na halaga an maarog nin lubos an mga kuwalidad niya.

Mahihiling ta ini sa sinasabi kan Bibliya mapadapit sa pakasabot asin kadunungan. An Talinhaga 3:13-15 nagsasabi: ‘[Maugma] an tawong nakakakua nin kadunungan asin an tawong nagkakamit nin pakasabot; huli ta an pakinabang hali digdi urog pa kisa sa pakinabang na hali sa plata asin mas mahalaga iyan kisa sa bulawan. An kadunungan mas mahalaga kisa sa mga alahas asin an ano man na saimong mawuton dai puwedeng ipantay diyan.’ (BPV *) Malinaw nanggad, daing dudang mas pinapahalagahan ni Jehova an siring na mga kuwalidad kisa sa ano man na materyal na kayamanan.

Kumusta man kun dapit sa pagigin onesto?

Si Jehova mismo, sarong Diyos na onesto; siya “dai makakapagputik.” (Tito 1:2) Asin pinasabngan niya si Pablo na magsurat sa mga Kristiyanong Hebreo kan inot na siglo: “Danay nindo kaming ipamibi, huli ta nagtitiwala kami na igwa kami nin malinig na konsiyensiya, asin mawot niyamo na sa gabos na bagay gumawi kami nin sadiyosan.”—Heb. 13:18, NW.

Nagpahiling si Jesus nin marahay na halimbawa sa pagigin onesto. Halimbawa, kan an Halangkaw na Saserdoteng si Caifas magsabi: ‘Sa ngaran kan buhay na Diyos, magsumpa ka. Sabihan samo ngunyan kun ika man nanggad an Cristo, an Aki nin Diyos.’ Onestong ipinamidbid ni Jesus an saiyang sadiri bilang an Mesiyas, dawa aram niyang sa pag-admitir niya kaini puwede siyang akusaran kan Sanhedrin nin paglanghad asin magin dahilan kan saiyang kagadanan.—Mat. 26:63, BPV.

Kumusta man kita? Magigin onesto pa daw kita sa mga sitwasyon na diyan makikinabang kita sa materyal kun dai niyato sasabihon an bilog na katotoohan o kun babaguhon ta iyan nin dikit?

Totoo, dipisil an magin onesto sa huring mga aldaw na ini na an dakul na tawo ‘mamumuton sa sainda man sana, mamumuton sa pirak.’ (2 Tim. 3:2) Iniisip nin dakul na huling may krisis sa pinansiyal o masakiton makakua nin trabaho, libre na sindang manghabon, mandaya, o gumibo nin iba pang bakong sadiyosan na bagay. Lakop na marhay an pangangatanusan na ini, mala ngani ta iniisip nin dakul na tanganing makinabang sa materyal, an solamenteng paagi iyo na dai magin onesto. Nakagibo nin salang mga desisyon sa bagay na ini dawa an nagkapirang Kristiyano asin huli sa pagigin “mahanab sa materyal na pakinabang,” naiwara ninda an saindang marahay na reputasyon sa kongregasyon.—1 Tim. 3:8; Tito 1:7, NW.

Pero, an kadaklan sa mga Kristiyano inaarog si Jesus. Aram ninda na mas mahalaga an diyosnon na mga kuwalidad kisa sa ano man na kayamanan o pakinabang. Kaya, an hoben na mga Kristiyano dai nandadaya para makakua nin halangkaw na grado sa eskuwelahan. (Tal. 20:23) Totoo, bako sa gabos na panahon matatawan nin balos an pagigin onesto niyato, arog kan inakong balos ni Haykanush. Pero, an pagigin onesto matanos sa paghiling nin Diyos, asin pinagdadanay kaiyan na malinig an satong konsiyensiya, sarong bagay na talagang mahalaga.

Pinatunayan ini kan eksperyensiya ni Gagik. Sinabi niya: “Bago ako nagin Kristiyano, nagtatrabaho ako sa sarong dakulang kompanya na an kagsadiri dai nagbabayad nin tamang buhis paagi sa pagdeklarar nin sadit sanang porsiyon kan ganansiya kan kompanya. Bilang managing director, linalauman na magibo ako nin ‘kasunduan’ sa auditor nin buhis paagi sa pagsuhol sa saiya tanganing palampason an pandadaya kan kompanya. Kaya, midbid ako bilang bakong onestong tawo. Kan manudan ko an katotoohan, hinabuan ko na an trabahong iyan, dawa dakulaon an suweldo. Imbes, nagbukas ako nin sadiri kong negosyo. Asin sa primerong aldaw pa sana, ipinarehistro ko na an kompanya saka binayadan an gabos na buhis.”—2 Cor. 8:21.

Sinabi pa ni Gagik: “Haros kabanga na sana kan dati kong suweldo an ginaganar ko, kaya nasasakitan akong sustentuhan an pamilya ko. Pero, mas maugma ako ngunyan. May malinig akong konsiyensiya sa atubangan ni Jehova. Nagin marahay akong halimbawa para sa duwa kong aking lalaki, saka nakuwalipikar akong mag-ako nin mga pribilehiyo sa kongregasyon. Midbid na ako ngunyan kan mga auditor nin buhis saka kan iba pang katransaksiyon ko sa negosyo bilang onestong tawo.”

Namumutan ni Jehova an mga sinasamnuhan an saiyang katukduan paagi sa pag-arog sa saiyang marahayon na mga kuwalidad arog kan pagigin onesto. (Tito 2:10) Ipinasabong niya ki Hading David an nakakapakusog sa buot na tataramon na ini: “Aki pa ako kaidto, asin ngunyan gurang na; alagad dai ko pa nahiling na pinabayaan nin Kagurangnan an matanos na tawo o na an saiyang mga aki nakilimos nin tinapay.”—Sal. 37:25, BPV.

Pinatunayan iyan kan eksperyensiya kan maimbod na si Ruth. Dai niya binayaan an panugangan niyang si Noemi miling gurang na ini, imbes danay niya ining inibanan. Nagbalyo si Ruth sa Israel, na diyan makakasamba siya sa tunay na Diyos. (Rut 1:16, 17) Kan nasa Israel si Ruth, bilang pagsunod sa areglo sa Katugunan, onesto saka mahigos siyang nangua kan mga tada sa inanihan. Arog kan naeksperyensiyahan ni David kan huri, dai pinabayaan ni Jehova si Ruth asin Noemi. (Rut 2:2-18) An mas mahalaga, urog pa sa materyal na probisyon an itinao ni Jehova ki Ruth. Tinawan man siya kan pribilehiyong magin apuon ni David asin kan ipinanugang Mesiyas pa ngani!—Rut 4:13-17; Mat. 1:5, 16.

Tibaad masakit na marhay para sa ibang lingkod ni Jehova na makaganar nin igong kuwarta para sa mga pangangaipo ninda. Imbes na maghanap  nin pasil pero bakong onestong solusyon, padagos sindang maigot na nagtatrabaho. Kaya, ipinapahiling ninda na mas mahalaga para sa sainda an marahayon na mga kuwalidad nin Diyos, arog kan pagigin onesto, kisa sa ano man na materyal na bagay.—Tal. 12:24; Efe. 4:28.

Arog ni Rut, ipinapahiling kan mga Kristiyano sa bilog na kinaban na nagsasarig sinda sa kakayahan ni Jehova na magtabang. Lubos sindang nagtitiwala sa Saro na nanuga kan mga tataramon na ini sa Bibliya: ‘Dai taka nanggad tatalikudan; dai taka nanggad pababayaan.’ (Heb. 13:5, BPV) Pauruutrong ipinahiling ni Jehova na kaya niya asin tatabangan niya an mga masakit an kamugtakan sa buhay na nagigin onesto sa gabos na panahon. Pirmi niyang inuutob an saiyang panuga na itatao niya sa saiyang mga lingkod an saindang mga pangangaipo sa buhay.—Mat. 6:33.

Iyo, ibinibilang kan mga tawo na mahalaga an mga brilyante asin iba pang bagay. Pero makakasigurado kita na sa paghiling kan satong Ama sa Langit, mas mahalaga nanggad an pag-arog ta sa saiyang pagigin onesto asin sa iba pa niyang mga kuwalidad. Iyo, mas mahalagang marhay kisa sa ano man na mamahalon na bato!